Meda Rerevaka Beka na Lako Mai i Karisito?

NA CAVA e votu ena nomu vakasama ena kena tukuni na lako mai i Jisu Karisito? O raica beka me gauna ni leqa, rarawa, kei na nodra totogitaki na kawatamata? Se o namaka me na mai oti kina vakadua na noda leqa kece? Meda rerevaka beka na lako mai i Karisito? Se meda rai vakanamata kina?

Me baleta na lako mai i Karisito, na iVolatabu e kaya: “Raica, sa lako mai ko koya e na o ka na raici koya na mata kece ga; . . . Era na tagi tale ga na veimataqali kece e vuravura e na vuku ni ka era a kitaka vua.” (Vakatakila 1:​7, VV) Na lako mai e cavuti e ke e dusia tiko nona na basika mai o Jisu ena gauna se bera mai me na vakalougatataki ira na dau caka dodonu, qai totogitaki ira na dau caka ca.

A sega ni rerevaka na yapositolo o Joni na lako mai i Karisito, ia a rai vakanamata ga kina. Ni sa vakatakilai oti vei Joni ena raivotu na lako mai i Jisu kei na kena cakayaco e vuravura, sa qai masuta o Joni: “Ni lako mai, Turaga Jisu.” (Vakatakila 22:20) Ia, na cava era ‘tagi kina ena vukuna na veimataqali kece ga e vuravura’? Era na raici koya vakacava “na mata kece ga”? Na cava ena yaco ni lako mai na Karisito? Ena yaga vakacava vei keda edaidai na noda vakabauta na nona lako mai? Ena saumi na veitaro oqori ena ulutaga e tarava.