Veika ena Yaco ni Lako Mai na Karisito

“YACO NA KA VAKADOMOBULA E SÃO PAULO.” Oqori na ulutaga a tabaka na ivola na Veja me vakamacalataka na ka e yaco ena va na siga ena Me 2006, na gauna era a “lewa” kina na mataisoqosoqo ni daubasulawa na korolevu duadua qai vutuniyau e Brazil. Era a mate kina e rauta ni 150 na ovisa, daubasulawa, kei ira na lewenivanua. A yaco tiko na “veika vakadomobula oqo ena sivia na 100 na aua.”

Voleka ni veiyasa i vuravura kece e dau wiliki se rogoci kina na itukutuku ni itovo voravora. Sa ra sega ni tarova rawa na iliuliu vakatamata na yaco ni itovo voravora. E sa qai torocake ga na vakarerevaki ni bula ena noda vuravura. De dua e dau vakayalolailaitaki iko ni veivanua kece ga, o na rogoca kina e levu na itukutuku ca. Ia sa voleka sara na gauna ni veisau.

A vakavulici iratou na nona imuri o Jisu me ratou masuta me yaco mai na Matanitu ni Kalou, me vakayacori tale ga na loma ni Kalou “e vuravura me vaka sa caka mai lomalagi.” (Maciu 6:​9, 10) Na matanitu oqo e kena Tui lesi vakalou o Jisu Karisito. Ena walia na leqa kece ni kawatamata. Ia, me rawa gona ni kauta mai na veisau e vuravura na Matanitu ni Kalou, ena dodonu me sosomitaka na veiliutaki vakatamata na veiliutaki i Karisito. Oqo sara ga na ka ena yaco ni lako mai na Karisito.

Ena Malumu Beka na Kena Yaco na Veisau?

Era na yalomalumalumu beka na veimatanitu mera vakarurugi ena veiliutaki i Karisito? Kune na kena isau ena dua na raivotu a vakatakilai vua na yapositolo o Joni, e kaya: “Ka’u a raica na manumanu [isoqosoqo vakapolitiki e vuravura], kei ira na tui kei vuravura, kei na nodrai valu, era sa soqoni vata mai me ra veivala kaya sa vodo e na ose [o Jisu], kei ira na nonai valu.” (Vakatakila 19:19) Na cava ena yacovi ira na tui kei vuravura ena ivalu oqo? E kaya na iVolatabu ni o koya na Tui lumuti i Jiova ena ‘voroti ira ena ititoko kaukamea: ena vorolaki ira tale ga me vaka na bilo nei koya na dautulikuro.’ (Same 2:9) Na veika vakapolitiki kece ena vorolaki vakadua. Na Matanitu ni Kalou “ena vurumemeataka . . . ka vakaotia na veimatanitu [vakatamata] oqori, ka na tu ga ka sega ni mudu.”​—Taniela 2:​44.

Ia, na cava ena yaco vei ira na dau saqata na Matanitu ni Kalou? “Ni na vakaraitaki mai lomalagi na Turaga ko Jisu kei ira vata kaya na nona agilose kaukauwa, e na yameyame-ni-buka waqa,” e vakaibalebaletaka ni o Jisu ena “cudruvi ira era sa sega ni kila na Kalou, a sa sega ni vakabauta nai tukutuku-vinaka.” (2 Cesalonaika 1:​7, 8) “Ia ko ira na tamata ca,” e kaya na Vosa Vakaibalebale 2:​22, “era na muduki tani e vuravura, kei ira na dautalaidredre era na cavu laivi maikina.”

E kaya na iVolatabu me baleta na lako mai i Karisito: “Raica, sa lako mai ko koya e na o ka na raici koya na mata kece ga.” (Vakatakila 1:​7, VV) Era na sega ni raici koya na tamata ena matadra dina. Ni gauna e lako cake kina i lomalagi o Jisu, e sa kabula vakayalo qai “tiko e na rarama sa sega ni torovi rawa: sa sega na tamata sa raica, se raica rawa.”​—1 Timoci 6:​16.

E sega ni gadrevi me taurivaka o Jisu na yago vakatamata me rawa kina nira ‘raici’ koya na lewe i vuravura, me vaka ga na kena sega ni gadrevi me rairai vakatamata o Jiova ena nona vakatauca vei Ijipita na Tini na Kuita ena gauna i Mosese. Era kila na bula ena gauna oya ni o Jiova ga a vakavuna na kuita oqori, ra vakasaurarataki gona mera raica na nona kaukaua. (Lako Yani 12:31) Ena vaka tale ga oqori na ka ena yaco ena gauna sa na yavala kina o Karisito me vakatauca na lewa ni Kalou, era na vakasaurarataki na tamata ca mera “raica” se kila, ni vakayagataki Jisu na Kalou me lewai ira. Era na sega ni lecava na veika e yaco oqori baleta nira sa vakasalataki taumada kina. Io, “[e]na raici koya [Jisu] na mata kece ga; . . . Era na tagi tale ga na veimataqali kece e vuravura e na vuku ni ka era a kitaka vua.”​—Vakatakila 1:​7, VV.

E gadrevi mera vakarusai na tamata ca qai kau laivi na veiliutaki ca me rawa ni qai vakalesui mai vuravura na bula sautu dina kei na tiko vinaka. Ena vakayacora oqori o Karisito. Sa na qai lewa o koya na ka kece e caka e vuravura, kei na veiveisau lelevu ena vakayacori.

Na Veivakavoutaki e Yaga

A tukuna na yapositolo o Pita na “gauna sa na vakavoutaki kina na veika kece, me vaka e a sa vosa oti kina na Kalou e na gusudra na nona parofita yalo savasava e na gauna makawa sara.” (Cakacaka 3:​21, VV) Na veivakavoutaki oqo e okati kina na veisau ena yaco e vuravura na gauna ena veiliutaki kina o Karisito. E vica na parofita a tukuna kina na Kalou na kena ‘vakavoutaki na veika kece’ e vuravura, e dua gona vei ira o Aisea, a bula ena ikawalu ni senitiuri B.S.K. A tukuna o koya ni o Jisu Karisito, na “Tui ni Sautu” ena vakalesuya mai na sautu e vuravura. E kaya na parofisai i Aisea me baleta na veiliutaki i Karisito: “Ena sega ni oti na kena tubu na nona lewa kei na sautu.” (Aisea 9:​6, 7) Ena vakatavulici ira na lewe i vuravura o Jisu ena bula veisaututaki. O ira na bula e vuravura era na “daumarau tiko e na veivakacegui [“sautu,” NW] vakaidina.”​—Same 37:11.

Na cava ena yaco ina bula dravudravua kei na lauqa ena gauna sa veiliutaki kina o Karisito? E kaya o Aisea: “E na ulu-ni-vanua oqo ena cakava ko Jiova ni lewe vuqa vei ira na veimatanitu kecega, e dua na magiti e na ka e uro, na magiti ni waini makawa, e na ka e uro ka vakautona, e na waini makawa ka makare sara.” (Aisea 25:6) E lagata na daunisame: “Ena sa tu e vuravura e na dela ni veiulu-ni-vanua na sila e qumi rawarawa ga.” (Same 72:16) Me kena ikuri, eda wilika me baleti ira na tawana na vuravura: “A ra na tara vale, ka tiko kina; era na tea eso na were-ni-vaini, ka kania na vuana; era na sega ni tara, ka tiko kina na tamata tani, era na sega ni tea, ka kania na tamata tani: ia me vaka na kena dede e dua na kau ena vakakina na nodra gauna na noqu tamata, ia era na rekitaka vakadede na cakacaka ni ligadra ko ira na tamata ka’u sa digitaka.”​—Aisea 65:​21, 22.

Sa parofisaitaka tale tu ga mai o Aisea ni na oti na tauvimate kei na mate. E kaya vei Aisea na Kalou: “Ena qai rai na matadra na mataboko, ka rogo na daligadra na didivara. Ena qai ladelade na lokiloki me vaka na me kila, ka sere na yamedra na galu.” (Aisea 35:​5, 6) O ira na ‘lewenikoro era na sega ni kaya, au sa tauvi mate.’ (Aisea 33:24) Na Kalou “ena vakaotia sara na mate . . . ia na Turaga ko Jiova ena tavoya na wai ni mata mai na matadra na tamata kecega.”​—Aisea 25:8.

Ia, vakacava o “ira kecega e nai bulubulu”? (Joni 5:​28, 29) E parofisaitaka o Aisea: “Ena bula ko ira na nomu mate . . . era na tu cake tale.” (Aisea 26:19) Io, era na vakaturi o ira na mate!

‘Sega ni Mudu na iTikotiko Vakaturaga ni Kalou’

Ena vakavoui na veika kece e vuravura na gauna ena lako mai kina na Karisito. Ena veisautaki na vuravura ina dua na parataisi totoka, ra vakaduavatataki tale ga na kawatamata ina sokalou vua na Kalou dina. Da vakadeitaka vakacava ni na rawa vei Jisu Karisito me kauta tani vakadua na ituvaki ca ena vuravura oqo, qai vakaisosomitaka ena ituvaki vinaka?

Dikeva mada se vu mai vei na kaukaua kei na lewa e soli vei Jisu. “Oi kemuni na Kalou,” e kaya na iVolatabu me baleti koya e solia na kaukaua oqo vua na Luvena. Kuria na kena tukuni me baleta na lewa oqo: “Ena sega ni mudu na nomuni tikotiko-vakaturaga . . . sai titoko ni caka dodonu nai titoko ni nomuni matanitu: ni kemuni sa vinakata nai valavala dodonu, ka cata nai valavala ca.” (Iperiu 1:​8, 9) Na itikotiko vakaturaga se veiliutaki i Jisu e vu ga mai vei Jiova. O koya sara ga a tauyavutaka qai lewa na itikotiko oqori. Oya na vuna ena rawa kina vei Jisu me walia na leqa kece.

Ni vakaturi o Jisu, a tukuna vei ira na nona tisaipeli: “Sa soli mai vei au na lewa kecega mai lomalagi kei vuravura.” (Maciu 28:18) E kaya na 1 Pita 3:​22, (VV): “O koya ka sa lewai ira kece ga na agilosi, kei ira sa kaukauwa vata kei ira sa dau lewa mai lomalagi.” Sega gona ni dua na veiliutaki se lewa ena saqati Jisu me qaqa. Ena sega tale ga ni dua ena tarova na nona vakalougatataka na kawatamata me tawamudu.

Sala e Tara Kina Noda Bula na Lako Mai i Karisito

Ena nona ivola vei ira mai Cesalonaika, a vola na yapositolo o Paula: “Keitou sa sega ni mudu ni nanuma na nomudou daucakacaka e na vakabauta, kei na nomudou oca e na loloma, kei na nomudou vosota e nai nuinui vua na noda Turaga ko Jisu Karisito, e na mata ni Kalou ko Tamada.” (1 Cesalonaika 1:3) E raica o Paula na vuavuaivinaka ni nodra cakacaka kei na nodra vosota, e rawa wale ga baleta nira nuitaki Jisu Karisito. Nodra inuinui oqori e okati kina na nodra vakabauta na lako mai i Karisito, kei na veika ena mai vakayacora oya nona na vakavouya na ka kece. Na inuinui vaka oqo ena vakaukauataki keda tale ga na lotu Vakarisito dina, da qai vosota tiko ga se mani ituvaki dredre cava eda sotava.

Taura mada nona ivakaraitaki o Carlos, e tiko mai São Paulo, e Brazil. Ena Okosita 2003, e kila kina ni sa tauvi kenisa tiko. Mai na gauna oya, sa sele oti vakawalu qai dua na ka na mosi kei na rarawa e sotava kina ni sa tatara vakaca na wainimate a soli vua. Ia, e dau vakayaloqaqataki ira tale e so. Dua na gauna a vunau voli e salatu donuya na mata ni dua na valenibula levu qai sotava kina e dua na marama e iVakadinadina i Jiova tale ga, e caka tiko vei watina na veiqaravi vakavuniwai na chemotherapy. Nona sa sotava oti gona o Carlos na mosi e dau vakilai ena vuku ni mate na kenisa, a rawa kina vua me vakayaloqaqataki rau na veiwatini oqo, qai vakacegui rau tale ga. Erau a qai kaya ni vakaukauataki rau sara ga na nodratou veivosaki oya. E vakadinadinataka o Carlos na dina ni vosa i Paula: “O koya [na Kalou] sa vakacegui keitou e na neitou rarawa kecega, me keitou vakacegui ira rawa era sa rarawa e na dua na ka, e na veivakacegui keitou sa vakacegui kina mai vua na Kalou.”​—2 Korinica 1:4.

Na cava e vakaukauataki Carlos me dau veivakayaloqaqataki tiko ga kina vei ira e so tale, dina ga ni tauvimate? Nona nuitaka na lako mai i Karisito kei na veika ena mai vakayacora, e vakauqeti Carlos me ‘kua ni oca ena caka vinaka.’​—Kalatia 6:9, VV.

Dua tale ga na ivakaraitaki o Samuel, a labati o tacina. Na vanua a labati kina e rauta ni 50 na mita mai na vale i tamadrau. E lauti tacina e tini na sici ni dakai. A davo voli ga ena yasa ni gaunisala me walu na aua, me yacova ni oti nodratou vakadikeva na ovisa na ka e yaco. Sega ni guilecava rawa o Samuel na ka a yaco ena siga oya. Ia, a vakaukauataki koya ga nona nuitaka ni na vakaotia vakadua o Karisito na itovo ca e vuravura, ena vakatikora tale ga na veiliutaki dodonu ena kauta mai na kalougata vua na kawatamata. Dau raitayaloyalotaka sara tu ga o Samuel nona sa na marautaki tacina ni sa vakaturi mai ena Parataisi e vuravura.​—Cakacaka 24:15.

Na Cava Mo Cakava?

O na vakila dina na lomavakacegu ni o nuitaka na lako mai i Karisito kei na veika ena mai vakayacora. Ena vakaotia vakadua o Jisu Karisito na veika kece e vakavuna sara tiko ga na noda leqa kei na veika ca eda sotava tu.

Na cava mo cakava mo na rawata kina na veivakalougatataki era na vakila na kawatamata ena ruku ni veiliutaki i Karisito? Mo vulica sara vagumatua na Vosa ni Kalou, na iVolatabu. E kaya o Jisu ena nona masu tiko vei Tamana: “Sai koya oqo na bula tawa mudu, me ra kilai kemuni na Kalou dina duadua ga, kei Jisu Karisito ko koya ko ni a tala mai.” (Joni 17:3) Me nomu isausau mo dikeva na ka e kaya na iVolatabu. Era marau na iVakadinadina i Jiova ena nomu yasayasa mera vukei kemuni. O ni sureti gona mo ni veitaratara kei ira, se volavola ina vanua e dau tabaki kina na ivoladraudrau oqo.

[iYaloyalo ena tabana e 7]

Ena vakavoui na veika kece e vuravura na gauna ena lako mai kina na Karisito

[Credit Line]

Inset, background only: Rhino and Lion Park, Gauteng, South Africa