Na Cava na Matanitu ni Kalou?

“Na itukutuku vinaka ni matanitu ni Kalou . . . ” —MACIU 24:14.

NA NONA vunau rogo ena Ulunivanua o Jisu a vakavulica kina e dua na ivakarau ni masu me cabori vua na Kalou, e okati kina qo: “Me yaco mai na nomuni matanitu.” Levu era wiligusutaka ra qai cavuta wasoma na masu qo. E tukuna e dua na encyclopedia, ni qo “e dua na masu e dau cavuti vakalevu ena nodra sokalou na lotu vaKarisito.” Ia e levu era cavuqaqataka era sega ni kila na Matanitu e tukuni tiko kina, kei na ka ena cakava ni sa liutaka mai na vuravura.—Maciu 6:9, 10.

E sega ni kurabuitaki qori, baleta ni levu na iliuliu ni lotu ni Veivanua vaKarisito era vakamacalataka e levu na ivakamacala veivakacalai, veilecayaki, qai vereverea me baleta na Matanitu qo. A vola e dua ni Matanitu ni Kalou e dua na “kaukaua vuni, . . . e semai keda vua na Kalou . . . , na nona veiwekani kei na Kalou e dua na tagane se yalewa me vakabulai kina.” Dua tale e vakamacalataka na itukutuku ni Matanitu e “idusidusi ga ni lotu.” E dua na ivoladusidusi ni lotu Katolika na Catechism of the Catholic Church e tukuna: “Na matanitu ni Kalou, na yalododonu, vakacegu kei na reki ena Yalo Tabu.”

O na kunea na ivakamacala matata me baleta na Matanitu ena tabana e 2 ni mekesini qo. E tukuna: “Na Matanitu ni Kalou e dua dina matanitu e tiko mai lomalagi. Na Matanitu qo ena vakaotia vakadua na ivakarau ca, qai veisautaka na vuravura me parataisi.” Meda raica mada se tokona vakacava na iVolatabu na vakasama qori.

O Ira Era na Liutaka na Vuravura

Na matanitu e dau liutaka e dua na tui. Na Tui gona ni Matanitu ni Kalou o Jisu sa vakaturi oti. Eda kila ena raivotu ni parofita o Taniela na nona dabe ena idabedabe vakatui mai lomalagi o Jisu, e vola: “Au a vakaraica e na raivotu ni bogi, ka raica, sa lako mai e na o kei lomalagi e dua sa vaka e dua na Luve ni tamata [Jisu] ka sa lako mai vei koya sa dede sara na nona bula [Kalou o Jiova], ka ra sa kauti koya sara vua. A sa soli vua na lewa, kei na vakarokoroko, kei na matanitu, me ra qaravi koya ko ira na tamata kece, kei na veivanua, kei na dui vosavosa; a nona lewa na lewa sa sega ni mudu, ena sega ni takali, kei na nona matanitu ena sega ni vakarusai.”—Taniela 7:13, 14.

E vakaraitaka tale ga na ivola i Taniela ni na vakataudeitaka na Kalou na Matanitu qo, e sega ni dua ena vuaviritaka, ia ena vakarusa na matanitu vakatamata kece. Na wase 2 e vakamacalataka na tadra uqeti vakalou a tadra o tui Papiloni, a raica na matakau levu e vakatakarakarataka na nodra veiliutaki veitaravi na matanitu kaukaua kei vuravura. A vakamacalataka na parofita o Taniela na tadra qori. “E na gauna maimuri,” e vola, “ena qai vakatura na Kalou ni lomalagi e dua na matanitu, ena sega sara ni vakarusai rawa: ia na matanitu ko ya ena sega ni biu tu me nodra na tamata tani, ia ena vurumemeataka ga ka vakaotia na veimatanitu oqori, ka na tu ga ka sega ni mudu.”—Taniela 2:28, 44.

Ena sega ni veiliutaki duadua na Tui ni Matanitu ni Kalou. Ni cakacaka vakaitalatala voli e vuravura o Jisu a vakadeitaka vei ira na nona yapositolo yalodina kei ira eso tale nira na vakaturi i lomalagi, era na dabe tale ga ena idabedabe vakatui. (Luke 22:28-30) A sega ni vakaibalebaletaka o Jisu na idabedabe vakaturaga dina, ni tukuna na Matanitu ni Kalou e tiko mai lomalagi. E vakaraitaka na iVolatabu ni o ira na veiliutaki kei Jisu era cavutu mai na “yavusa kece, na vosa kece, na matamata kece, kei na matanitu kece.” Era na “bete vua na Kalou, mera tui, mera liutaka na vuravura.”—Vakatakila 5:9, 10.

Na Cava e Vinaka Kina na iTukutuku ni Matanitu

Meda vakasamataka tiko ni sa soli vei Jisu me liutaka na “tamata kece, kei na veivanua, kei na dui vosavosa.” O ira gona na veitokani kei koya era na “tui, mera liutaka na vuravura.” Ia o cei era na vakarurugi ena veiliutaki ni Matanitu qo? O ira era rogoca ra qai talairawarawa ena itukutuku vinaka e vunautaki tiko nikua. E okati tale ga kina o ira era na vakaturi, nira rawa ni nuitaka tale ga na bula tawamudu.

E vakamacalataka vinaka na iVolatabu na veivakalougatataki ena vakilai ena veiliutaki ni Matanitu. Qo eso:

“Sa vakaotia nai valu mai nai yalayala kei vuravura: Sa musuka na dakai titi ko koya, ka tayamusuka na moto, ka sa vakama na qiqi-ni-valu e na buka waqa.”—Same 46:9.

“A ra na tara vale, ka tiko kina; era na tea eso na were-ni-vaini, ka kania na vuana, era na sega ni tara, ka tiko kina na tamata tani, era na sega ni tea, ka kania na tamata tani.”—Aisea 65:21, 22.

“[Na Kalou] ena qusia tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa sega na veika e dau yaco e liu.”—Vakatakila 21:3, 4.

“Ena qai rai na matadra na mataboko, ka rogo na daligadra na didivara. Ena qai ladelade na lokiloki me vaka na me kila, ka sere na yamedra na galu.”—Aisea 35:5, 6.

“Sa voleka na gauna mera rogoca na domona o ira kece na tu ena ibulubulu mera tucake mai. O ira era cakava na ka vinaka era na vakaturi mera bula.”—Joni 5:28, 29.

“Ko ira na yalomalumalumu era na taukena na vanua; ka na daumarau tiko e na veivakacegui vakaidina.”—Same 37:11.

Sa dua dina na itukutuku rogo vinaka! Kuria qori na vakayacori ni parofisai ena iVolatabu e vakadinadinataka ni sa voleka sara me tekivutaka na veiliutaki vinaka duadua e vuravura na Matanitu ni Kalou.