Taro na Dauwiliwili
E vica na manumanu savasava e kauta o Noa e loma ni waqa—e vitu na manumanu se vitu na isa manumanu?
Ni sa taya oti na waqa o Noa, a tukuna vua o Jiova: “Mo vodo ki na waqa, ko iko kei na nomu lewe-ni-vale kecega; ni’u sa raici iko ni ko sa yalododonu e mataqu e nai tabatamata oqo. Mo kauta vata kei iko na manumanu e yavai va sa savasava me yavitu, mai na mataqali kecega, na ka tagane kei na ka yalewa; kei na manumanu e yavai va sa sega ni savasava me yarua, mai na mataqali kecega, na ka tagane kei na ka yalewa.” (Vakatekivu 7:1, 2) E so na ivakadewa ni iVolatabu me vaka na New English Bible, The New Jerusalem Bible, kei na Tanakh—The Holy Scriptures, era vakadewataka na vosa taumada vakaIperiu me “vitu na isa.”
Ena vosa taumada vakaIperiu, na vosa “yavitu” e volai me “vitu vitu.” (Vakatekivu 7:2) Ia, na kena volai veimuri ena vosa vakaIperiu e dua na matanifika, e sega ni kena ibalebale me lai vakalevutaki vakarua na matanifika oqori. Me kena ivakaraitaki, e tukuni ena 2 Samuela 21:20 me baleta e “dua na tamata yagolevu, a sa tauyaono nai qaqalo ni ligana ruarua, ka tauyaono nai qaqalo ni yavana ruarua.” Ena vosa vakaIperiu, na matavosa na “tauyaono” e volai me “ono ono.” Ia, e sega ni kena ibalebale ni o koya na tamata yagolevu oya e 12 na qaqaloniligana ena dua na ligana, qai 12 na qaqaloniyavana ena dua na yavana. Ena lawa ni tuvavosa vakaIperiu, na kena volai veimuri na matanifika e dusia vakamatata ga na iwiliwili yadua ni qaqaloniliga ena liga, se qaqaloniyava ena yava.
O koya gona, na “vitu vitu” ena vosa taumada vakaIperiu ena Vakatekivu 7:2 e sega ni dusia e vitu na isa manumanu, se me tukuni ni 14 taucoko. E tauvata tale ga oqo kei na matavosa na “yarua” ena Vakatekivu 7:9, 15. Dina ni volai ena vosa vakaIperiu taumada me “rua rua,” ia e sega ni dusia e rua na isa, se me va na manumanu. A kau ga e loma ni waqa e “yavitu” na manumanu savasava, vaka kina e “yarua” na manumanu e sega ni savasava.
Ia, vakacava na matavosa, “na ka tagane kei na ka yalewa” e cavuti vata kei na “yavitu” ena Vakatekivu 7:2? Ni semati toka kei na nodra na vakawa na manumanu, era vakabauta kina e so ni a vakaroti o Noa me kauta e vitu na isa ni mataqali kece ga ni manumanu savasava. Ia, a sega ni inaki ga ni nodra vakabulai na manumanu savasava mera na vakawa. E kaya na Vakatekivu 8:20 ni oti nona sobu mai na waqa o Noa, “a sa cakava . . . e dua nai cabocabo-ni-soro vei Jiova; a sa taura eso vei ira na manumanu kecega e yavai va sa savasava, ka so vei ira na manumanu vuka kecega sa savasava, a sa vakacabora nai soro kama e nai cabocabo-ni-soro.” Ni tiko na ikavitu ni manumanu mai na mataqali kece ga ni manumanu savasava, a rawa gona vei Noa me cabora na ikavitu ni manumanu me imadrali, qai vo e tolu na isa me ratou vakawataka na nodratou dui mataqali.