O se Nanuma Tiko?

O taleitaka na ka o wilika ena itabataba ni Vale ni Vakatawa era se qai taba oti ga? Raica mada ke rawa ni o sauma e vica na taro oqo:

• Na cava eda vulica vua na turaga cikecike ena vosa vakatautauvata i Jisu? (Luke 11:​5-​10)

Na vosa vakatautauvata oqo e vakaraitaka na ka meda cakava ena gauna eda masu kina. Meda cikecike ena kerekere, se da kerekere tiko ga, vakabibi noda kerea na yalo tabu ni Kalou. (Luke 11:​11-​13)​—12/15, tabana e 20-​2.

• Na ka bibi cava eda vulica ena vosa vakatautauvata me baleti koya na yada kei na turaganilewa? (Luke 18:​1-8)

E vakabibitaka meda masu tiko ga. Ni sega ni vakataki koya na turaganilewa, o Jiova e dau lewa vakadodonu qai vinakata sara ga me vukei keda. Na noda vakabauta me vakataki koya sara ga na yada ena vosa vakatautauvata oya.​—12/15, tabana e 26-​8.

• Na cava e vakasalataki ira kina na lotu Vakarisito e Korinica o Paula mera ‘dolava vakalevu na lomadra’? (2 Korinica 6:​11-​13, VV)

E laurai ni so vei ira na kai Korinica era sega ni rokovi ira era vakabauta vata, e qiqo na yalodra ra qai sega ni lomasavu. Meda saga meda rokovi ira dina eda vakabauta vata, meda vakalevutaka tale ga na noda itokani ena dina.​—1/1, tabana e 9-​11.

• Na veidregati cava e dusia tiko na Vakatakila 7:​3, VV?

Ni lumuti ira na lotu Vakarisito ena yalona tabu na Kalou, e dusia oya nira sa dregati taumada. Ia na Vakatakila 7:3 e dusia tiko na iotioti ni veidregati, e vakaraitaka ni o ira na lumuti oqo era sa vakadeitaka nodra yalodina ena basoga kece ni nodra bula.​—1/1, tabana e 30-1.

• Cava era vulica na itubutubu ena ivakaraitaki i Samuela e volai tu ena iVolatabu?

Dua oya mera vakavulici ira na luvedra ena Vosa ni Kalou, me vaka erau cakava na itubutubu i Samuela. Mera uqeti luvedra tale ga mera tadolova na cakacaka vakatabakidua vei Jiova me usutu sara ga ni nodra bula.​—1/15, tabana e 16.

• Eda vakaraitaka vakacava nida marau ni waraki Jiova?

Eda sa “dauwaraka . . . na kena yaco mai na siga ni Kalou,” eda rai vakanamata ina bula vakacegu ena gauna era sa na vakarusai kina vakadua na tamata tawalotu. (2 Pita 3:​7, 12) E vinakata sara ga o Jiova me tinia na ca, ia e yalovosovoso voli me rawa nira vakabulai na lotu Vakarisito ena sala ena vakalagilagi kina na yacana. Eda nuidei ni kila o Jiova na gauna dodonu me vakabulai ira kina nona tamata, meda vakacaucautaki koya nida waraka tiko na gauna me na yavala kina. (Same 71:​14, 15)​—3/1, tabana e 17-​18.

• E kauta beka e loma ni waqa o Noa e vitu na manumanu se vitu na isa manumanu?

E tukuni vei Noa me ‘kauta vata kei koya e yavitu’ na manumanu savasava. (Vakatekivu 7:​1, 2) Ena vosa taumada vakaIperiu, na “yavitu” e volai me “vitu vitu.” Oqo e sega ni kena ibalebale me vitu na isa manumanu me vaka e tukuni ena so tale na tikinivolatabu. A kauta gona o Noa e yavitu na manumanu, e tolu na isa qai vo ga e dua se na kena ikavitu me imadrali. (Vakatekivu 8:​20)​—3/15, tabana e 31.

• Na cava mera “nanuma” kina na lotu Vakarisito na nodra vakabauta na qase ni ivavakoso?

E sureti keda na yapositolo o Paula meda “nanuma,” se meda vakasamataka vinaka nodra yalodina na qase, da qai vakatotomuria nodra vakabauta. (Iperiu 13:7) Eda cakava oqo baleta ni tukuna vei keda na Vosa ni Kalou, da qai vakadinata ni o ira na qase era kauaitaka dina na veika e vauca na Matanitu ni Kalou ra qai kauaitaki keda tale ga.​—4/1, tabana e 28.