Tiko na iNuinui ena Vuravura Leqaleqa Oqo

“E TU sara ga vei ira na lewenivanua na kaukaua mera dau caka vinaka, ra walia tale ga na leqa sa takalevu tu nikua.” A cavuta oqori na Peresitedi vakacegu ni Mereke o Bill Clinton, ena dua na bose mai Ottawa, e Kenada, ena Maji 2006. E tinia ena nona kaya ni dua na ivakarau ni caka vinaka sa vakayacori raraba tiko me tekivu mai na gauna a yaco kina na ualoka ena 2004, da qai bula tu oqo ena “gauna e gadrevi vakalevu kina meda dau veitokoni.”

Meda namaka beka na yaco ni leqa tubukoso me vakauqeti ira na tamata mera cakacaka vata me vinaka kina na veisiga ni mataka? Vakacava na kena ‘gadrevi vakalevu meda dau veitokoni,’ e yavu dei beka ni noda nuitaka na sautu kei na bula vakacegu me baleta na veisiga ni mataka?

iVurevure ni iNuinui Dina

E laurai ena ivolatukutuku ni kawatamata ena sivia na ononaudolu na yabaki sa oti, nira dau vakavuna ga na tamata na nodra rarawa. Veivakasalataki kina na iVolatabu: “Dou kakua ni vakararavi vei ira na turaga, se vua na luve ni tamata, ni sa sega vua na ka mo dou bula kina.” (Same 146:3) Kevaka gona eda nuitaka na isoqosoqo vakavuravura, kena iyau, kei na veika e lalawataka, eda na tini rarawa ga kina. Baleta? Ni “ko vuravura sa lako tani yani, kei na kena gagadre talega.”​—1 Joni 2:​17.

Ia ena veisenitiuri sa oti, era nuitaka ga na Kalou na tamata yalododonu. E tukuna na iVolatabu nira ‘dauvakararavi [vua] na Isireli’ ra qai “vakararavi” tale ga vua o “ira na nodra qase.” E kune ena iVolatabu e levu na vosa e vakaraitaka na nodra nuitaki se vakabauti koya. (Jeremaia 14:8; 17:13; 50:7) E uqeti keda na iVolatabu meda dau “waraki [“nuitaki,” NW] Jiova.”​—Same 27:14.

Kaya na Vosa Vakaibalebale 3:​5, 6: “Mo vakararavi vei Jiova e na vu ni yalomu: ka mo kakua ni vakararavi ki na nomu yalomatua: mo vakarogotaka vua na nomu sala kecega, ia ena vakadodonutaka na nomui lakolako ko koya.” Levu sara na vuna vinaka mo nuitaka kina na yalayala oqori, ni sega ni dau veiveisau na Kalou o Jiova, e nuitaki vakaoti, qai dau dina. (Malakai 3:6; Jemesa 1:​17) E vinakata o Jiova me solia vei iko na ka vinaka, na nomu muria tale ga na nona Vosa na iVolatabu ena dusimaki iko mo tamata yaco ena gauna rerevaki oqo.​—Aisea 48:​17, 18.

O koya e muria na veidusimaki ni Kalou mai vu ni lomana e rawa ni nuitaka na yalayala oqo: “Kakua ni ko rere; ni’u sa tiko vata kei iko: kakua ni ko taqaya; ni’u sa nomu Kalou: ka’u na vakaukauwataki iko; io, ka’u na vukei iko; io, ka’u na tokoni iko e na ligaqu i matau sa daudina.” (Aisea 41:10) Na masu vagumatua kei na kena vakasamataki vakatitobu na veivakadeitaki oqo, e vu ni vakacegu vei ira na lomana dina na Kalou o Jiova, nira na vosota rawa kina na veika dredre era sotava kei na nodra nuiqawaqawa.

Vakasamataki Andrea mada, e dua na iVakadinadina i Jiova qai rua na luvena. E kaya: “Na masu ga kei na noqu dau vakasamataka vakatitobu na ka e yalataka o Jiova, e vakaukauataki au ena gauna au sotava kina e so na leqa. Kevaka au dau vakaliuci Jiova ena noqu bula, e vakarawarawataka sara noqu tudei tiko.”

Vaqaqacotaka Nomu Nuitaki Jiova

Ni vakamacalataka tiko na bibi ni nuitaki Jiova e kaya e dua na daunisame: “A ka levu na nodra vakacegu era lomana na nomuni vunau: ka sa sega na ka me ra bale kina.” (Same 119:165) Ni titobu nomu vulica na Vosa ni Kalou o na tugana ina nomu vakasama kei na lomamu na veika e veitaraicake vakayalo qai ‘dina, vakaturaga, dodonu, savasava, totoka, qai dau dokai.’ Kevaka gona o saga vagumatua mo rogoca, vulica, ciqoma, qai cakava na veika kece oqori, ena ‘tiko vata kei iko na Kalou dau veivakacegui.’​—Filipai 4:​8, 9, VV.

Mai na veika e sotava ena vica na yabaki sa oti, e kaya e dua na turaga o John: “Me rawa ni veisau na noqu rai me baleta na veisiga ni mataka, e bibi meu saga vakaukaua meu veisautaka sara ga na noqu itovo kei na noqu vakasama ni bera niu qai bucina na veiwekani kei na Kalou e tawarairai. Au na qai rawata ga na veiwekani oya keu tamata vakayalo, me tiko vei au na vakasama ni Kalou ena noqu wilika na nona Vosa kei na noqu vakasamataka vakatitobu.”

Kevaka gona o gunuva na wai makare ni ka dina e tu ena iVolatabu, o sa vakayagataka sara tiko ga na iwalewale yaga qai mana mo vorata kina na veika ca era bololaki keda kina vakayauyau ena veisiga na tabana ni itukutuku. Ni o muria na veika e tukuni ena iVolatabu ena vakaukauataka tale ga nomu veiwekani vakavuvale, qai sega ni o nuiqawaqawa vakalevu. Kena ikuri, e yalataka na Kalou ni tu vakarau “me totaki ira vakaidina sa dodonu na lomadra vua.” (2 Veigauna 16:9) Ena cakava na ka ena sala o na sega sara ga ni bau nuiqawaqawa kina.

O Phinehas, e dua na turaga a bula donuya na veivaluvaluti kei na nodra mate e levu, e kaya: “Au vulica meu dau vakararavitaka noqu bula vei Jiova. Au sega ni sotava e levu na leqa baleta niu dau muria na ivakavuvuli ni iVolatabu.” Kevaka o nuitaki Jiova dina, ena vukei iko mo valuta na leqa cava ga o na sotava. (Same 18:29) Na gone e qaqaco vinaka nona veiwekani kei rau nona itubutubu ena dau nuitaki rau, qai vakila tale ga nodrau veitaqomaki ena gauna e tauvimate se sotava kina na veika dredre. Oqori tale ga na ka o na vakila kevaka o saga qai ciqoma na veisureti mo nuitaki Jiova.​—Same 37:34.

Yavu Dei ni Vakanuinui

E kaya o Jisu Karisito vei ira na nona imuri: “Mo dou qai masu kina vaka oqo: ‘Tama i keimami mai lomalagi, me vakarokorokotaki na yacamuni, me yaco mai nomuni matanitu, me caka na lomamuni e vuravura, me vaka sa caka tiko mai lomalagi.’ ” (Maciu 6:​9, 10, VV) Oqo na matanitu vakalomalagi​—e veiliutaki kina o Jisu Karisito​—ena vakaraitaka kina na Kalou na dodonu ni nona veiliutaki cecere e vuravura.​—Same 2:​7-​12; Taniela 7:​13, 14.

Na levu ni ka e vakavuna na nuiqawaqawa nikua sa na gadrevi ga kina na veivuke ni Kalou. E marautaki ni sa voleka sara ni vukei keda o koya! Ena nona veilesi na Kalou e sa dabe tiko kina vakatui o Jisu ena gauna oqo ena nona itutu vakamesaia, me vakadinadinataka nona veiliutaki cecere o Jiova kei na vakalagilagi ni yacana. (Maciu 28:18) Sa voleka sara oqo ni vakaotia na Matanitu ni Kalou na veika kece e vuravura e dau vakavuna na nuiqawaqawa kei na rere. E vakamacalataki ena Aisea 9:6 na vuna e ganiti Jisu vinaka kina me veiliutaki ni na vakabulai keda mai na noda nuiqawaqawa. Kena ivakaraitaki, e vakatokai o koya me “Tama ni gauna tawa mudu,” ‘iVakavuvuli Veivakurabuitaki,’ qai “Tui ni Sautu.”

Vakasamataka mada na icavuti talei “Tama ni gauna tawamudu.” E dusia oqo ni tu vei Jisu na kaukaua kei na lewa, vaka kina nona gadreva sara ga me solia vei ira na kawatamata talairawarawa na bula tawamudu e vuravura ena vuku ni nona isoro ni veivoli. Kena ibalebale oqo nira sa na sereki vakadua mai na ivalavala ca kei na bula sega ni uasivi, a vakadewa vei ira o Atama, na imatai ni tamata. (Maciu 20:28; Roma 5:​12; 6:​23) Ena vakayagataka tale ga o Karisito na kaukaua soli vakalou me vakabulai ira kina na sa mate.​—Joni 11:​25, 26.

A vakadinadinataka o Jisu ena nona bula voli e vuravura ni o koya na ‘iVakavuvuli Veivakurabuitaki.’ Nona buta vinaka tu ena Vosa ni Kalou kei na nona kila na noda ivalavala na tamata, e rawa kina ni walia na leqa e sotavi ena veisiga. Me tekivu mai na nona buli me tui mai lomalagi, e se ‘iVakavuvuli Veivakurabuitaki’ tiko ga ena nona vakayagataki koya o Jiova me veitaratara kei ira na kawatamata. E votu ena iVolatabu na nona ivakavuvuli vuku qai dodonu. Nomu kila kei na nomu vakabauta na ivakavuvuli oqori ena sereki iko mai na bula veilecayaki kei na nuiqawaqawa.

E vakatakilai Jisu tale ga na Aisea 9:6 ni “Tui ni Sautu.” Ena itutu oqo, sa vakarau vakayagataka o Karisito na nona kaukaua me vakaotia kina na veivakaduiduitaki kece​—ena veika vakapolitiki, bula veimaliwai, kei na bula vakailavo. Ena sala cava? Nodra vakaduavatataki na kawatamata ena ruku ni veiliutaki ni Matanitu nei koya na Mesaia.​—Taniela 2:​44.

Ena kauta mai na bula sautu e vuravura raraba na Matanitu oqo. O na vakadeitaka vakacava? Eda wilika ena Aisea 11:9: “Era [o ira na vakarurugi ena Matanitu oqo] na sega ni ia na veivakacaca se na veivakamatei e na noqu ulu-ni-vanua tabu kecega: ni na roboti ko vuravura e na veikilai kei Jiova, me vaka sa ubia na wasa titobu na wai.” Yaco na gauna sa ra na kila vinaka na Kalou na tamata kece, ra qai talairawarawa vua. Sega beka ni vakamarautaki iko oya? Ke vaka kina, kua tale ni qai lokuyarataka nomudrau “veikilai kei Jiova.”

O rawa sara ga ni vaqaqacotaka nomu vakabauta kei na kilaka e solia na bula ena nomu vulica na ka e kaya na iVolatabu me baleta na veika eda sa sotava tiko ena gauna oqo, kei na inuinui totoka me baleta na veisiga ni mataka. Oni sureti gona mo ni vuli kei ira na iVakadinadina i Jiova ena dua na ituvatuva ni vuli iVolatabu era vakarautaka e sega ni saumi. Oni na kunea kina na vakacegu, o na kila tale ga kina ni tiko na inuinui ena vuravura leqaleqa oqo.

[Kato/​iYaloyalo ena tabana e 7]

Vuna e iNuinui Kina na Matanitu ni Kalou

Sa soli tu vei Jisu Karisito, na Tui ni Matanitu ni Kalou, na kaukaua kei na dodonu me veiliutaki e vuravura kei lomalagi. (Maciu 28:18) Ena vakasuka tale mai na veika bula e vuravura ena kena ivakatagedegede e uasivi. Ena vakaotia tale ga na tauvimate kei na mate ca. Na cakamana kece a kitaka o Jisu e vuravura e ivakaraitaki lailai wale ga ni veivakalougatataki levu ena qai vakayacora ni sa veiliutaki, e vakadinadinataki koya kina me Tui uasivi qai nuitaki. Na nona itovo cava soti na Tui Vakamesaia e tuvai toka oqo o taleitaka?

▪ Torovi rawarawa.​—Marika 10:​13-​16.

▪ Yalorawarawa qai sega ni veivakaduiduitaki.​—Marika 10:​35-​45.

▪ Nuitaki qai sega ni dau nanumi koya ga.​—Maciu 4:​5-7; Luke 6:​19.

▪ Dau caka dodonu qai dina.​—Aisea 11:​3-5; Joni 5:​30; 8:​16.

▪ Dauveinanumi, veikauaitaki, qai yalomalumalumu.​—Joni 13:​3-​15.

[iYaloyalo ena tabana e 4]

Nida wili iVolatabu da qai dau vakasamataka vakatitobu ena uqeti keda meda nuitaki Jiova