Taro na Dauwiliwili

E vakaraitaka beka na Vosa Vakaibalebale 22:6 ni kevaka era vakavulici vinaka na gone lotu Vakarisito, era na sega ni gole tani mai na sala i Jiova?

E tukuna na tikina oqo: “Vakatavulica na gone e na sala e dodonu me lako kina: ia ni sa qase mai, ena sega ni lako tani maikina.” Na tubu ni kau ena vakatau ena vanua e loveci kina ni se lailai. E vaka tale ga kina o ira na gone. Kevaka era vakavulici vinaka nira se lalai, ena rawarawa sara nira lai qaravi Jiova tiko ga ena vo ni nodra bula. Era kila na itubutubu kece ni taura na gauna kei na igu na veivakavulici. Me rawa nira tisaipeli i Karisito na luvedra, e bibi vei ira na itubutubu mera veivakavulici, veivakaroti, veiuqeti ra qai veivakayaloqaqataki ni salavata kei na nodra ivakaraitaki vinaka. Me caka vakawasoma qai vakayalololoma tale ga me vica vata na yabaki.

Kena ibalebale oqo ke gole tani o gone mai na nona qaravi Jiova, e sa vakaraitaka ni guce na veituberi mai vale? Ena so na ituvaki, a sega beka ni vinaka sara na nodra veisusu na itubutubu mera tuberi luvedra ena ivunau kei na ivakavuvuli i Jiova. (Efeso 6:4) Ena yasana adua, e sega ni kaya tiko i ke na vosa vakaibalebale ni na yalodina ga vua na Kalou na luvemu kevaka o vakavulica vinaka. Era na sega ni moici luvedra rawa na itubutubu ena sala ga era vinakata. O ira na gone, vakataki ira ga na qase, e tu vei ira na dodonu ni vakatulewa qai dodonu mera digitaka na sala mera na muria ena nodra bula. (Vakarua 30:​15, 16, 19) Veitalia sara mada ga na nodra sasaga na itubutubu, e so na gone era se tawayalodina tiko ga, vakataki Solomoni ga, oya na vuna e vola kina na tikina eda veivosakitaka tiko oqo. So mada ga na luve i Jiova era a tawayalodina.

O koya gona, e sega ni tukuni tiko ena tikinivolatabu oqo ni veigauna kece ga “ena sega ni lako tani maikina” na gone ia, rawa nida kaya ni oqo na ka ena yaco vakalevu. Ena veivakayaloqaqataki dina vei ira na itubutubu! Dodonu mera yaloqaqa na itubutubu ni nodra yalogu mera vakavulici luvedra ena sala i Jiova ena vuavuaivinaka sara. Ni bibi na nodra itavi qai cakayaco na nodra veivakamuai, era uqeti na itubutubu mera raica vakabibi na nodra itavi.​—Vakarua 6:​6, 7.

Ke ra gole tani mada ga na gone ena nodra qaravi Jiova, na itubutubu e dau gumatua ni vakavulici luvena ena nuitaka ni dua na siga ena qai kilai yalona tale. E kaukaua na ka dina ena iVolatabu, ena dredre mera guilecava na gone na veituberi mai vale.​—Same 19:7.