Taro na Dauwiliwili

E vakayavana beka na gata a vosa vei Ivi?

E volaitukutukutaki ena Vakatekivu 3:14, ni Kalou o Jiova a vosa vua na gata a vakacalai Ivi ena were o Iteni. Kaya na Kalou: “Ni ko a kitaka na ka oqo, ko na cudruvi vakalevu vei ira na manumanu e yavai va, vei ira talega na manumanu tawa lasa kecega ni vanua: ko na dolo ga e ketemu, ko na kania talega na kuvu ni soso, e na veisiga kecega ni nomu bula.” Sega ni vakamatatataka sara na iVolatabu ni manumanu a vakayagataki me temaki Ivi a vakayavana tu oti qai vakayalia. De ra nanuma beka e so ni vaka oya na ka e tukuni ena Vakatekivu 3:14, ia e sega ni dodonu meda tinimaka kece ni a vakayavana tu e liu na gata. Na cava na vuna?

Na vuna levu ga baleta o Jiova e cudruvi Setani tiko—na kabula tawarairai ni vakayagataka vakatawadodonu na manumanu oya. E vakamacalataki Setani na iVolatabu “ni sa daulasulasu” qai “gata makawa.” Na vosa ruarua oqo e dusia na nona vakayagataka o Setani na gata me nona waqawaqa ni uqeti Ivi me talaidredre ina ivakaro ni Kalou.—Joni 8:44; Vakatakila 20:2.

Na Kalou a bulia na gata, qai vakayacani ira o Atama ni bera na nona veivakacalai o Setani. Sega ni dodonu me na beitaki na gata a vosa vei Ivi baleta ni sega ni kila e dua na ka. Ena sega ni kidava rawa na gata ni a vakayagataki koya tiko o Setani, qai sega tale ga ni kila na nona vakataulewa na Kalou vei ratou na talaidredre.

Na cava ga e cavuta kina na Kalou na kena ituvaki lolovira vakayago na gata? O ira na gata era dolo e ketedra qai darayame vaka ga mera dramica na kuvuniqele, oqo e veiganiti vinaka kei na kena ituvaki lolovira o Setani. A marautaka tu e liu na itutu cecere ni dua na agilosi ni Kalou, ia ena gauna oqo e sa mai tu ena dua na itutu lolovira se butobuto sara e vakatokai ena iVolatabu me o Tatarusi.—2 Pita 2:4, NW.

Ni rawa vua na gata me vakamavoataka na bukubukuniyava ni tamata, o Setani tale ga ena kena ituvaki lolovira ena ‘qaqia na bukubukuniyava’ ni nona “kawa” na Kalou. (Vakatekivu 3:15) Na kawa oqo e dusi Jisu Karisito, a mai sotava vakalekaleka na veika rarawa ena ligadra na nona mata o Setani. Na ulu ivakatakarakara ni gata ena butuqaqia vakadua o Karisito kei ira na nona itokani lotu Vakarisito lumuti era sa vakaturi oti. (Roma 16:20) O koya gona, e taudonu vinaka nona cudruva na gata na Kalou ena kena ituvaki lolovira, kei na nona vakarusai vakadua na kabula tawarairai o Setani na Tevoro na “gata makawa.”