Taro na Dauwiliwili

E vosa vakacava na gata vei Ivi ena were o Iteni me beca kina na lawa ni Kalou me baleta na kau e kilai kina na ka vinaka kei na ka ca?

E kaya na Vakatekivu 3:1: “Ia sa lawaki na gata ka lialia na manumanu kecega ni vanua ka bulia na Kalou ko Jiova. A sa kaya ko koya vua na yalewa, Oi, sa kaya bagi na Kalou mo drau kakua ni kania na vua ni kau kecega e na were?” E levu sara na sala e tukuni ni a vakayagataka na gata me veivosaki kina kei Ivi. E dua na nanuma ni a soli ivukivuki. Kena ivakaraitaki, e kaya e dua na italatala mai Igiladi o Joseph Benson: “E rairai vakayagataka e so na mataqali ivukivuki. E so tale era tukuna ni dua na ka era dau kilai tu kina e liu na gata oya nodra rawa ni vakasama kei na nodra rawa ni vosa, ia na ka oqo e sega na kena ivakadinadina.”

Ke a soli ivukivuki ga e rawa vakacava me tukuna se vakaraitaka na gata vei Ivi ni na vaka na Kalou, me rawa ni vakaduiduitaka na ka vinaka mai na ka ca, ena nona kania na vuanikau vakatabui? Kuria oya ni a vosa tale ga o Ivi, e sauma na taro i koya na gata. (Vakatekivu 3:2-5) Na rai ni a soli ivukivuki na gata vei Ivi ena nona saga me veitaratara kei koya ena vakavuna me nanumi kina ni cakava tale ga oya o Ivi, ia na iVolatabu e kaya ni a vosa.

E a vakasalataki ira kina na tacina lotu vakarisito o Paula ena vuku ni ka e yaco oqo: “Na ka au leqataka sa i koya na nona a vakacalai Ivi na gata e na nona qaseqase; de na qai vakacalai tale ga na lomamuni.” Na ka ni veivakacalai e tukuna e ke o Paula e vu mai vei ira na “apositolo vakailasu, . . . era sa tamata dauveivakaisini.” Era sega ni soli ivukivukitaka se matanataka na nodra veivakacalai na “apositolo lasu” oqo. Era vakayagataka sara ga na vosa e veivakacalai mera vakacalai ira kina e so.​—2 Korinica 11:3-5, 13, VV.

E dina ni tukuni ni a vakacalai ena vosa o Ivi ena were o Iteni, e sega ga ni kena ibalebale oqo ni tiko na nodra kato ni vosa na gata. E sega ni yaga vua na gata oya. Ena gauna a vosa kina na agilosi ni Kalou vei Pelami ena gusu ni asa, a sega ni gadreva e dua na kato ni domo me vaka e tiko vua na tamata. (Tiko Voli mai na Lekutu 22:26-31) E matata kina ni a “vosa na asa galu e na domo ni tamata,” ena kaukaua e lako mai na dua na ka bula vakayalo.—2 Pita 2:16.

Na ibulibuli vakayalo e vosa vei Ivi e tiko mai daku ni gata e vakaraitaki ena iVolatabu me “gata makawa, a yacana na Tevoro, kei Setani.” (Vakatakila 12:9) Na vosa e rogoca qai sauma o Ivi e lako sara ga mai vei Setani, e dau “vukici koya me vaka e dua na agilosi ni rarama.”​—2 Korinica 11:14, VV.

[iYaloyalo ena tabana e 27]

“Drau na vaka na Kalou, ni drau na kila na ka vinaka kei na ka ca”