Pasiliai na Turaga e Kila Nona iYalayala

‘NA CAVA meu vakaocataki kemuni kina?’ A cavuta oqori o Pasiliai e yabaki 80, vei Tevita na Tui Isireli. Kaya na iVolatabu ni o Pasiliai e dua na ‘turaga vutuniyau.’ (2 Samuela 19:​32, 35) E vakaitikotiko e Kiliati, ena dua na vanua veiulunivanua ena yasayasa ena ceva ni uciwai na Joritani.​—2 Samuela 17:27; 19:31.

Na ituvaki cava e cavuta kina o Pasiliai na vosa oqori vei Tevita? Cava e vosa kina vaka oya na kena turaga oqo?

Vorati na Tui

E rivarivabitaki na bula i Tevita. Na luvena o Apisalomi a suguta na itutu vakatui ni oti nona “rawa na yalodra na Isireli.” Sa macala tu ga ni na sega ni vakabula e dua e yalodina vei tamana. Mani biuti Jerusalemi kina o Tevita kei ira nona tamata. (2 Samuela 15:​6, 13, 14) Ni yaco yani o Tevita e Meeneimi ena dua na vanua ena ceva ni Joritani, a mai vukei koya o Pasiliai.

Eratou vakarautaka o Pasiliai kei na rua tale na tagane na veika vakayago e gadreva o Tevita. O ratou na lewe tolu na lewenivanua yalodina oqo, eratou kila na ituvaki leqataki i Tevita kei ira nona tamata, ena nodratou kaya: “Era sa viakana na tamata, a ra sa malumalumu, ka viagunu mai na veikau.” Ratou vakarautaka na ka kece eratou rawata o Pasiliai, Sopi, kei Mekiri, na imocemoce, witi, parile, madrai droka, sila tavu, so na pini, pini tani, oni, bata, sipi, kei na so tale na veika vakayago me vakacegui kina o Tevita kei ira nona tamata.​—2 Samuela 17:​27-​29.

E rerevaki sara ni dua e saga me vukei Tevita. Sa macala tu ga ni o Apisalome ena totogitaki ira na tokona na tui dina. Ia e yaloqaqa o Pasiliai me vakaraitaka nona yalodina vei Tevita.

Vuki na Uto

Sega ni dede, era sa vala na mataivalu vakaduduile i Apisalome kei ira na tamata i Tevita. Na vala oqo e vakayacori ena loma ni veikau o Ifireimi, rairai volekata na vanua o Meeneimi. Era vakamalumalumutaki na mataivalu i Apisalome, “sa dua kina na moku levu e na siga ko ya.” Dina ni a saga o Apisalome me dro, sega ni dede sa vakamatei.​—2 Samuela 18:​7-​15.

Se baci qaqa tale o Tevita na tui Isireli. Sega tale nira qai dro voli nona tamata. Na nodra yalodina e rokovi ira qai vakavinavinakataki ira kina o Tevita.

Ni vakarau suka tale i Jerusalemi o Tevita, “sa lako sobu mai Rokilimi ko Pasiliai na kai Kiliati, ka lako vata kaya na tui ki tai kadua ni Joritani.” Ena gauna oqori e sureti Pasiliai kina o Tevita: “Daru lako vata yani, ka’u na vakani iko ni daru sa tiko mai Jerusalemi.”​—2 Samuela 19:​15, 31, 33.

Sega ni vakabekataki ni marautaka vakalevu o Tevita na veivuke i Pasiliai. E sega ni kena ibalebale ni a via sauma lesu ga na tui na veika vakayago a vakarautaka vua. Na turaga vutuniyau oqo e sega ni gadreva na veivuke vaka oya. De dua e vinakati koya o Tevita me lai tiko ena vale ni tui ena vuku ni nona itovo totoka. Me lai tiko ena vanua vaka oya e ka dokai dina, ena rogo kina o Pasiliai, ena rawaka tale ga ni lai veitokani voleka sara kei na tui.

Yalomalumalumu qai Kila Nona iYalayala

E kaya o Pasiliai ena veisureti i Tui Tevita: “Ena bogi vica tale na noqu bula, me’u lako cake kina kei na tui ki Jerusalemi. Sa walusagavulu na noqu yabaki e na siga oqo: au sa kila rawa beka na ka vinaka kei na ka ca? sa kila rawa beka na nomuni tamata na kenai kanakana ni ka ka’u sa kania se na ka ka’u sa gunuva? au sa rogoca rawa tiko li na domodra na tagane dausere kei na yalewa dausere?” (2 Samuela 19:​34, 35) Io ena yalo veidokai e vakasuka o Pasiliai na veisureti kei na itavi dokai e dulaki oya. Na vuna?

Kena imatai, baleta beka ni sa kena turaga qai vakaiyalayala ga na ka e rawa ni cakava. De dua e kila ni na sega ni dede na nona bula. (Same 90:10) Sa cakava na ka e rawata me vukei Tevita kina, ia e kila tale ga na nona iyalayala ena vuku ni bula vaqase. Sega ni laiva o Pasiliai na vakasama ni via rogo kei na vakaitutu me vakaruguta nona vakatulewataka vinaka na kena ituvaki. Duatani sara o Apisalome, a saga me rogo, ia o Pasiliai e vakaraitaka ga na yalomalumalumu.​—Vosa Vakaibalebale 11:2.

Na ikarua ni vuna e vakuakua kina o Pasiliai, baleta e sega ni vinakata na kena ituvaki me lai vakataotaka na nona cakacaka na tui e digitaka na Kalou. E taroga gona o Pasiliai: “Ka cava me’u vakaocataki kemuni kina noqu turaga na tui koi au na nomuni tamata?” (2 Samuela 19:35) Dina ni se tokoni Tevita tiko ga, ia e kila ni rawa ni vakayacora vinaka e dua e cauravou na itavi e lesi. Rairai e vakaibalebaletaka tiko ga vua na luvena, ni kaya o Pasiliai: “Raica na nomuni tamata ko Kimami; me lako vata yani ko koya kei na noqu turaga na tui; ia mo ni cakava vua na ka e vinaka vei kemuni.” A sega ni leva o Tevita, e ciqoma ga na vakatutu oya. Ni bera ni kosova na Joritani, a “sa reguci Pasiliai ko koya na tui, ka vosavakalougatataki koya.”​—2 Samuela 19:​37-​39.

Lewa Matau

Na itukutuku me baleti Pasiliai e vakabibitaka na lewa matau. So na gauna, ena sega ni dodonu meda vakasuka na itavi e lesi vei keda, se meda sega ni via saga meda sauva baleta nida vinakata ga na bula rawarawa se da nanuma nida na sega ni cakava rawa. Na Kalou ena vukei keda ena ka eda sega ni rawata kevaka eda nuitaka na nona kaukaua kei na vuku.​—Filipai 4:​13; Jemesa 4:​17; 1 Pita 4:​11.

Ena yasana kadua, ena vinaka meda kila na noda iyalayala. Kena ivakaraitaki, sa rairai ogaoga rawa tu e dua na lotu Vakarisito ena veika e vauca na sokalou. E kila ni kevaka me ciqoma e so tale na itavi, sa na rawa ni lai weletaka na itavi e vakacolata vua na iVolatabu, oya ena nona qarava nona vuvale. Ena ituvaki vaka oqo, e ivakaraitaki beka ni yalomalumalumu kei na lewa matau ke vakasuka na ikuri ni itavi e lesi vua?​—Filipai 4:5; 1 Timoci 5:8.

O Pasiliai e kotora e dua na ivakaraitaki totoka, qai yaga sara vei keda kevaka eda vakasamataka vakatitobu. E turaga yalodina, yaloqaqa, lomasoli, qai yalomalumalumu. Kena ilutua, e dau saga o Pasiliai me vakaliuca na loma ni Kalou.​—Maciu 6:​33.

[Mape ena tabana e 15]

(Raica tale na ivola)

E lako o Pasiliai e yabaki walusagavulu, ena dua na ilakolako e veivakaocai me rawa ni vukei Tevita

KILIATI

Rokilimi

Sukoci

Meeneimi

Uciwai na Joritani

Kilikali

Jeriko

Jerusalemi

IFIREIMI

[iYaloyalo ena tabana e 13]

Cava e vakasuka kina o Pasiliai na veisureti i Tevita?