Qarai ni Veika Vakayalo

A KAYA o Jisu ena nona iVunau ena Ulunivanua: “Era marau o ira era kauaitaka nodra bula vakayalo.” (Maciu 5:​3, NW) De dua o duavata ena vosa oya. Na tamata kece era kila ni gadrevi na ka vakayalo ena nodra bula, ra qai nanuma nira na marau ke ra sa kunea. Ia na cava sara mada na ibalebale ni vosa “vakayalo”?

Dua na ivolavosa e vakamacalataka na vosa vakayalo me “ka e gadrevi se semati ena veituberi vakalotu” vaka kina “na ivakatagedegede se ituvaki vakayalo.” Me kuri na kena vakamacalataki na vosa oqori, vakasamataka mada na ivakatautauvata oqo: E dua e kenadau ena veika vakailavo e rawa ni tukuni ni daunibisinisi. Vakatale ga kina e dua e dau mareqeta na veika vakayalo se galeleta na qaravi Kalou, e vakatokai me tamata vakayalo.

Ena rawati vakacava na veika vakayalo dina? Voleka ni lotu kece era kaya nira kila na sala me vakacegui kina na gagadre vakayalo. E vica na kena ivakaraitaki oqo. Na lotu Tawase e kaya ni rawa ni vakabulai e dua ke tiko ena dua na soqo ni lotu e vakayacori e matana levu. Dua na lotu Katolika ena qara na veivakadonui ni Kalou ena nona tiko ena Misa. Era qara na veivakararamataki na lotu Buda ena nodra dau vakanananu vakatitobu. Na lotu Idu ena saga me sereki me kua ni sucu tiko ga e vuravura ena nona vakuai koya mai na so na ka. Na sala kece oqo ena kune beka kina na veika vakayalo dina? E tiko beka e dua na sala?

Levu era vakabauta ni sega. Era kaya ni veika vakayalo e gadrevi ga kina “na vakabauta,” oya mo vakabauta ga ni tiko e dua na kalou sega ena nomu lewena sara e dua na lotu. So tale era nanuma ni veika vakayalo e kena ibalebale nomu vinakata na lomavakacegu kei na inaki ni bula, sega ena nomu lai kila sara na veika vakalotu. Era kaya ni o ira era qara na veika vakayalo e sega ni vinakati tale kina na lotu. Ia mera dikeva sara ga na ituvaki ni lomadra mera rawata kina na veika vakayalo. E kaya e dua na dauvolaivola: “Na veika vakayalo dina, e dua na ka e laurai ena nona bula e dua. E vakaraitaki oqo ena nomu loloma, ivakarau ni nomu rai me baleti vuravura kei na nomu veimaliwai kei ira era yavoliti iko. Ena sega ni kune oqori ena nomu lewena se mo lai vakabauta sara na ivakavuvuli ni dua na matalotu.”

E macala ni duidui vakalevu na vakasama me baleta na veika vakayalo. Vica vata na udolu na ivola e nanumi me dusimaka na sala ina veika vakayalo, ia levu na gauna o ira mada ga na dauwiliwili era sega ni lomavakacegu, ra sa qai veilecayaki ga. Ia, e dua na ivola e lewena na idusidusi nuitaki me baleta na veika vakayalo. Na ivola oqo e vakadinadinataki ni vakavuna na Kalou. (2 Timoci 3:​16) Meda raica mada na ka e kaya na iVolatabu me ibalebale ni veika vakayalo kei na kena yaga.