Veika Vakayalo Dina ena Kune e Vei?

‘NI SA vu ni mate na gadreva na itovo vakayago; ia sa vu ni bula kei na vakacegu na gadreva na itovo vakayalo,’ a vola na yapositolo o Paula. (Roma 8:6) Na vosa oqori, e dusia tiko kina na yapositolo ni dua e kauaitaka na veika vakayalo, e sega ni ka wale ga e digitaka se taleitaka na lomana. Ia e vauci kina na bula kei na mate. Ena vakasama cava gona e ‘bula qai vakacegu’ kina e dua e kauaitaka na veika vakayalo? E kaya na iVolatabu ni tamata vaka oqo ena kunea na vakacegu ni Kalou ena gauna sara ga oqo​—qai vakaicovitaki ena bula tawamudu ena gauna se bera mai. (Roma 6:​23; Filipai 4:7) Sa rauta me kaya o Jisu: “Era marau o ira era kauaitaka nodra bula vakayalo”!​—Maciu 5:​3, NW.

Ni o wilika tiko na ivola oqo, e ivakadinadina ni o taleitaka na veika vakayalo​—oqo tale ga na sala ni vuku. Ia, e duidui vakalevu na rai me baleta na veika vakayalo, rairai o na taroga: ‘Cava sara mada na veika vakayalo dina? Rawa vakacava ni dua e kunea?’

‘Na Vakasama i Karisito’

Levu sara na ka e cauraka na yapositolo o Paula me baleta na bibi kei na yaga ni veika vakayalo dina. E vakamacalataka vei ira na lotu Vakarisito ena korolevu o Korinica na duidui ni tamata vakayago, kei na tamata vakayalo, e dua e muria na gagadre ni yago, e dua tale e mareqeta na veika vakayalo. A vola o Paula: “Na tamata sa vakayago sa sega ni vakabauta na veika ni Yalo ni Kalou: ni sa ka lialia vua.” Ena yasana kadua, sa qai vakamacalataka o Paula ni tamata vakayalo ena tiko vua ‘na loma [“vakasama,” NW] i Karisito.’​—1 Korinica 2:​14-​16.

Me tiko vei keda ‘na vakasama i Karisito’ e kena ibalebale ga “na ivakarau ni vakasama vata ga e tiko vei Karisito.” (Roma 15:​5, NW, Filipai 2:5) E rawa ni tukuni ni tamata vakayalo e dua e dau vakasama me vakataki Jisu qai muria na we ni yavana. (1 Pita 2:​21; 4:1) O koya e tiko vua na ivakarau ni vakasama i Karisito, ena kaukaua vakayalo qai nuidei ni na rawata na “bula kei na vakacegu.”​—Roma 13:14.

Kilai ‘na Vakasama i Karisito’

Me rawa ni tiko vei keda na vakasama i Karisito, e dodonu meda kila mada e liu na ivakarau ni nona vakasama, oya tale ga na imatai ni kalawa eda na bucina kina na veika vakayalo. Ena rawa vakacava meda kila na nona vakasama e dua a bula e vuravura ena 2,000 na yabaki sa oti? Kena ivakaraitaki, na sala cava o kila kina na kedra itukutuku makawa na tamata rogo ena nomu vanua? Rairai, ena nomu wilika na veika me baleti ira. Noda wilika tale ga na itukutuku volai me baleti Jisu e sala uasivi meda kila kina na ivakarau ni nona vakasama.​—Joni 17:3.

E volai vakamatata tu na itukutuku makawa me baleti Jisu ena va na Kosipeli, kena a vola o Maciu, Marika, Luke, kei Joni. Nida wilika vakavinaka na itukutuku oqo ena rawa nida kila kina na ivakarau ni vakasama i Jisu, na lomana kei na inaki ni nona cakacaka. Ni o tikica na gauna mo vakasamataka kina vakatitobu na ka o wilika me baleti koya, sa rawa mo raitayaloyalotaka se tamata vakacava o Jisu. Kevaka sara mada ga o kaya ni o imuri i Karisito, na nomu wilika na kena itukutuku kei na nomu vakananuma na ka o wilika ena yaga ena nomu “tubu cake e na loloma, kei na kila na noda Turaga ko Jisu Karisito nai Vakabula.”​—2 Pita 3:​18.

Nida vakasamataka tiko oya, meda dikeva mada e so na tikinivolatabu ena Kosipeli meda kila kina se yaco vakacava o Jisu me dua e matua vakayalo. Ia, vakasamataka na sala o rawa ni vakatotomuri koya kina.​—Joni 13:15.

Bula Vakayalo kei “na Vua ni Yalo Tabu”

E kaya na dauvola Kosipeli o Luke, ni a sobuti Jisu na yalo tabu ena nona papitaiso qai ‘sa sinai ena Yalo tabu.’ (Luke 3:​21, 22; 4:1) A vakabibitaka tale ga o Jisu vei ira na nona imuri na yaga ni veidusimaki ni yalo tabu se na igu tawarairai ni Kalou. (Vakatekivu 1:2; Luke 11:​9-​13) Cava e bibi kina oya? Baleta na kaukaua ni yalo tabu ni Kalou e rawa ni veisautaka na nona vakasama e dua, me tautauvata kei na ivakarau ni vakasama i Karisito. (Roma 12:​1, 2) Na yalo tabu e bucina vua e dua na itovo me vaka “na loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, nai valavala malua.” E vakatoka na iVolatabu na itovo kece oqo​—me “vua ni Yalo Tabu”​—na ivakatakilakila ni dua e matua vakayalo. (Kalatia 5:​22, 23) Rawa gona ni tukuni ni o koya e matua vakayalo ena dusimaki koya tiko na yalo tabu ni Kalou.

Ena gauna kece e cakacaka voli kina vakaitalatala e vuravura o Jisu, e laurai ni vuataka na vua ni yalo tabu ena ka e cakava. Na itovo me vaka na loloma, yalololoma, kei na yalovinaka e laurai votu ena ka e cakava vei ira na lewenivanua era dau raici tu mera lolovira. (Maciu 9:​36) Dikeva me kena ivakaraitaki, e dua na ka a yaco e vakamacalataka na yapositolo o Joni. Eda wilika: “Ni sa lako yani ko koya [Jisu], sa raica e dua na tamata sa sucu mataboko.” Ni ratou raica na tamata oya na tisaipeli i Jisu, eratou raici koya ga me ivalavala ca. Eratou taroga, “Ko cei sai valavala ca, a tamata oqo, se tamana kei tinana?” O ira tale ga era tiko veitikivi era raici koya ga me dua e dau kerekere. Era kaya, “Sa sega li ni koya oqo sa dautiko ka daukerekere?” Ia, o Jisu e raica na turaga mataboko me dua e gadreva dina na veivuke. A vosa vua qai vakabulai koya.​—Joni 9:​1-8.

Na cava o vulica me baleta na ivakarau ni vakasama i Karisito ena ka e yaco oya? Kena imatai, o Jisu e sega ni rai baleti ira na tauvanua ia e lomani ira. iKarua, e vakaliuliu sara ga me vukei ira na tani. O sa vakatotomuria tiko beka na ivakaraitaki oqo i Jisu? O dau tu vakarau mo vukei ira na tani mera vakavinakataka nodra bula ra qai nuitaka na gauna totoka sa bera mai me vaka a vakayacora o Jisu? Se, o dau kauaitaki ira ga na rogo? Kevaka o dau raici ira na tani me vakataki Jisu, o sa vakatotomuri koya sara tiko ga.​—Same 72:​12-​14.

Bula Vakayalo kei na Masu

Na itukutuku ena Kosipeli e vakaraitaka ni o Jisu e dau torova na Kalou ena masu. (Marika 1:​35; Luke 5:​16; 22:41) Ena nona cakacaka vakaitalatala e vuravura, e dau vakatikitikitaka sara ga na gauna me masu kina. A vola na tisaipeli o Maciu: “Ni sa vakatalai ira oti yani na lewevuqa, sa cabe taudua ko koya [Jisu] ki na ulu-ni-vanua, me masu.” (Maciu 14:23) Na gauna vakanomodi vaka oqori ni dau veivosaki kei na Tamana vakalomalagi o Jisu e vakaukauataki koya sara ga. (Maciu 26:​36-​44) Nikua, o ira na matua vakayalo era qara tale ga na gauna mera veivosaki kina kei na Kalou, era kila ni oqo ena vaqaqacotaka nodra veiwekani kei na Dauveibuli qai vukea tale ga me rawa ni vakataki Karisito na ivakarau ni nodra vakasama.

E dau qacoya na masu o Jisu. (Joni 17:​1-​26) Kena ivakaraitaki, ni bera ni digitaki iratou na 12 na tagane me nona yapositolo, “a lako cake kina ko Jisu ki na ulunivanua me la’ki masu, ka a masu tiko vua na Kalou e na bogi taucoko.” (Luke 6:​12, VV) Sega ni kena ibalebale oqo meda masu tiko ena bogi taucoko, o ira na matua vakayalo era na muria na ivakaraitaki i Jisu. Ni bera nira cakava e dua na vakatulewa bibi ena nodra bula, era na masulaka tiko vua na Kalou ena loma ni dua na gauna, era na kerea na veidusimaki ni yalo tabu ena vakatulewa era na cakava me na vinaka tiko ga kina nodra bula vakayalo.

E vakaraitaka tale ga o Jisu ni vu dina mai lomana nona masu, oqo e dodonu meda vakatotomuria. Dikeva na ka e vola o Luke me baleta na masu i Jisu ena yakavi ni bera ni mate. “Ni sa yaluma sara, sa masu vagumatua cake kina: ia na nona buno sa vaka na titiri ni dra ni sa lutu ki na qele.” (Luke 22:44) Dau masu vakalevu o Jisu e liu, ia oqo e masu “vagumatua cake” sara ni sotava na veivakatovolei mosimosi duadua ena nona bula e vuravura,​—qai rogoci nona masu. (Iperiu 5:7) O ira na matua vakayalo era na muria tale ga na ivakaraitaki i Jisu. Ni sotavi na veivakatovolei mosimosi, era na masu “vagumatua cake” vua na Kalou ena nodra kerea na veidusimaki kei na veitokoni ni yalona tabu.

E macala ni o Jisu e daumasu, sega gona ni kurabuitaki ni ratou via vakatotomuri koya tale ga ena tikina oqo na nona tisaipeli. Eratou kerea: ‘Turaga ni vakavulici keitou me keitou masu.’ (Luke 11:1) Nikua tale ga, o ira era taukena na veika vakayalo dina ra qai vinakata me dusimaki ira na yalo tabu ni Kalou era vakatotomuria na ivakarau ni masu i Jisu. Erau veisemati na veika vakayalo dina kei na masu.

Bula Vakayalo kei na Vunautaki ni iTukutuku Vinaka

Eda raica ena Kosipeli i Marika na itukutuku ni nona vakabula e levu na tauvimate o Jisu, e cakava oqo me yacova na bogilevu. Ena siga e tarava ni masu duadua voli, era mai tukuna vua na nona yapositolo ni levu era vaqarai koya tiko, rairai era vinakata mera vakabulai. Ia e kaya vei ratou o Jisu: “Tou lako ki na veikoro sa voleka, me’u vunau talega kina.” Sa qai vakamacalataka vei iratou na vuna: “Sa i koya ga oqo na i naki ni noqu talai mai.” (Marika 1:​32-​38; Luke 4:​43, VV) Dina ni bibi vei Jisu mera vakabulai na tamata ia na ilesilesi bibi duadua vua me vunautaka na itukutuku vinaka ni Matanitu ni Kalou.​—Marika 1:​14, 15.

Nikua, e se kedra ivakatakilakila tiko ga na tiko vei ira na vakasama i Karisito na vunautaki ni Matanitu ni Kalou vei ira tale e so. E vakarota o Jisu vei ira kece era vinakata mera nona imuri: “Dou lako yani ka qisi ira me ra noqu tisaipeli na lewe ni veivanua kece ga, . . . vakavulici ira me ra muria na veika kece ga au sa vakarota tu vei kemudou.” (Maciu 28:​19, 20, VV) E kaya tale: “Ena vunautaki mada e vuravura taucoko nai tukutuku-vinaka oqo kei na matanitu, mei vakadinadina ki na veivanua kecega; sa na qai yaco emuri nai vakataotioti.” (Maciu 24:14) Na Vosa ni Kalou e vakatakila ni rawa ga ni vakayacori na cakacaka vakavunau ena kaukaua ni yalo tabu, noda gumatua ena cakacaka oqo e ivakadinadina ni matua vakayalo.​—Cakacaka 1:8.

Me vunautaki na itukutuku ni Matanitu ni Kalou vei ira na tamata e vuravura taucoko e gadrevi kina nodra sasaga ena duavata e vica vata na milioni. (Joni 17:​20, 21) O ira na vakayacora na cakacaka oqo e sega wale ga nira matua vakayalo ia e tuvalaki vinaka tale ga na nodra cakacaka e vuravura raraba. O kila se o cei era muria tiko na weniyava i Karisito ra qai vunautaka na itukutuku vinaka ni Matanitu ni Kalou e veiyasa i vuravura?

O sa Rawata Beka na iVakatagedegede Oya?

Io, e tiko e so tale na ka ena vakatakilakilataki kina e dua e matua dina vakayalo, ia vakacava sa laurai tiko beka vei iko na kena eda sa dikeva oti mai? Mo rawa ni kila, tarogi iko mada: ‘Au wilika beka vakawasoma na Vosa ni Kalou na iVolatabu, qai vakananuma vakatitobu na ka au wilika? E laurai beka ena noqu bula na vua ni yalo tabu? Au daumasu beka? Au taleitaka beka meu sosoqoni vata kei ira era vunautaka e vuravura raraba na itukutuku vinaka ni Matanitu ni Kalou?’

Ena nomu liaci iko sara ga ena ka o cakava tiko ena nomu bula sa na rawa mo kila na ivakatagedegede ni nomu bula vakayalo. Oni uqeti mo ni muria na ikalawa oqo me nomuni kina na “bula kei na vakacegu.”​—Roma 8:6; Maciu 7:​13, 14; 2 Pita 1:​5-​11.

[Kato/​iYaloyalo ena tabana e 7]

IVAKATAKILAKILA NI BULA VAKAYALO

[Caption on page 7]

◆ Dau taleitaka na Vosa ni Kalou

◆ Laurai ena nomu bula na vua ni yalo tabu

◆ Masu wasoma vua na Kalou mai vu ni lomamu

◆ Tukuna vei ira tale e so na itukutuku vinaka ni Matanitu ni Kalou

[iYaloyalo ena tabana e 5]

Ena vukei iko na iVolatabu mo kila “na ivakarau ni vakasama i Karisito”