Rua na iTuvaki “Veivakurabuitaki” ena Dua na Soqo ni Tikina e Georgia

A YACO e rua na ituvaki “veivakurabuitaki” ena dua na soqo guilecavi dredre e Georgia ena 2006. Na tolu na siga, mai na ika7 ina ika9 ni Julai, a vakayacori ena ono na vanua e kea na Soqo ni Tikina ni iVakadinadina i Jiova, “Voleka Noda Vakabulai!” Na kana magiti vakayalo era marautaka na le 17,000 vakacaca na tiko kina.

Ena Janueri 2006, era tekivu sasaga na mataveitacini ena kena vaqarai e dua na vanua veiganiti ena koroturaga kei Georgia, o Tbilisi, me vakayacori kina na soqo ni tikina. Era semati ena talevoni na vo ni vanua ni soqo ni tikina.

Sa soli tu na galala ni sokalou ena vanua o Georgia ena vica na yabaki sa oti. Dina ga nira tusaqati sara vakalevu na iVakadinadina ena veigauna sa oti, ia era nuidei ni na kune e dua na vanua me caka kina na soqo ena koroturaga. Era yalovinaka ra qai dauveikauaitaki na kai Georgia. Ia, e so na ivakalesilesi e kaukaua sara nodra veivakaduiduitaki vakalotu. Era na lomarawarawa beka mera redetaka na iVakadinadina e dua na vanua?

Era lai raica e so na valenisarasara kei na rara lelevu ni qito na komiti e cicivaka na soqo ni tikina. Era mani yalataka na manidia ni rawa nira vakayagataka na mataveitacini, ia era sega ga ni via tukuna se na rawa ni vakayagataki ena gauna cava. Eratou kurabui na lewe ni komiti nira vakadonuya na tabana ni veiliutaki ni Tbilisi Philharmonic me vakayagataki na vale ni vakatasuasua e kea. E toka sara ga ena lomadonu ni siti qai dau vakayacori kina e levu na soqo rogo.

Eratou marau na komiti ni soqo ni sa mai yaga na nodratou sasaga. Tekivu sara me tuvanaki na cicivaki ni soqo ni tikina e Tbilisi, vaka kina na soqo ni tikina ena vakayacori ena tauni kei na korolelevu kei Georgia, okati kina o Tsnori, Kutaisi, Zugdidi, Kaspi, kei Gori. A vakayacori e levu na cakacaka mera semati ena talevoni na vanua e caka kina na soqo ni tikina, me rawa ni rogoci vata ga ena dua na gauna na porokaramu. Sa vakarautaki tu na ka kece. Vo ga e dua na macawa me vakayacori na soqo ni tikina, eratou vakadaroya na konitaraki na ivakalesilesi ni vale ni vakatasuasua na Tbilisi Philharmonic. Sega mada ga ni ratou vakamacalataka na vuna.

iMatai ni Ka “Veivakurabuitaki”

Na cava era na cakava na tacida tagane ena gauna lekaleka oqo? Sa na kena iwali ga mera lako i Marneuli ena dua na itikotiko ni iteitei ena taudaku ni korolevu o Tbilisi, rauta ni 40 na kilomita na kena yawa. E levu na soqo ni tikina a vakayacori e ke ena qele ni dua na vuvale iVakadinadina i Jiova. A iteitei levu tu e liu na qele oqo. Ena tini na yabaki sa oti na vanua ga oqori e rawa nira vakayagataka na ivavakoso e Tbilisi me vakayacori kina na soqo ni tikina. Ia, na vanua tale ga o Marneuli era a sotava kina na veivakacacani voravora na iVakadinadina i Jiova.

Dua na ituvaki oqo a yaco ena 16 Sepiteba, 2000. Era a sogo gaunisala na ovisa ni korolevu e Marnueli me tarovi ira na iVakadinadina ena nodra lako ina soqo ni tikina. E kele mai na basi era osota tu na dauvakacaca, qai liutaki ira na bete vakasivoi ni lotu Orthodox o Vasili Mkalavishvili. Era tarova na motoka kei na basi e lako ina soqo ni tikina, ra yarataki ra qai mokulaki ira sara vakaca e so na mataveitacini. Gauna vata oya, e butakoci na nodra iyaya na vo ni mataveitacini okati kina na nodra iVolatabu kei na ivola vakaivolatabu.

Era a vakacaca tale ga ena vanua ni soqo ni tikina e Marneuli e dua na ilala rauta nira le 60. Era mavoa kina e 40 vakacaca na iVakadinadina. Dua na tacida tagane a lausua na sarena ena isele. So vei ira na vakacaca era yalovaka na nodra dakaileka e vakalekalekataki ra qai vanataka e macawa. A dodoka na nona dakai vei itaukeiniqele e dua vei ira, qai vakaroti koya me solia na nona ilavo kei na iukuuku vatu talei. Era yanaraka na dauvakacaca na nona vale e toka ena mua ni vanua oya, ra qai butakoca na nona iyau vakamareqeti. Ra vorolaka na iloilo ni katubaleka kece, ra qai vakama na ivola vakaivolatabu kei na idabedabe balavu a caka vakatabakidua me vakayagataki ena soqo ni tikina. A vakarusai tale ga e dua veimama na tani na ivola. Ra sega ni bau tarova na vakacaca na ovisa ia era vakaitavi tale ga ena nodra vakacacani na iVakadinadina.a

Sega wale ga ni ratou leqataka na komiti e cicivaka na soqo ni tikina na vakacaca, eratou vakasamataka tale ga ni vanua oqo e dau rauti ira ga e 2,500, ia ena rauti ira vakacava na le 5,000? Ena wali vakacava na leqa oqo ni sa lekaleka na gauna? E vaka ga na cakamana ni rau curu takoso mai e rua na itaukeiniqele, rau qai tukuna me redetaki na nodrau iteitei e rau koto veitikivi.

Sega ni rawarawa na kena vukici na rua na iteitei oqo me ganita na soqo ni tikina. Vakadredretaka tale ga na draki​—tau na uca ena macawa taucoko ni bera ni tekivu na soqo ni tikina. Era tei tale tu ga na pateta ena rua na qele veitikivi oqo, qai gadrevi mera na cavu. Taumada, era a kumuni vata na bole cakacaka ena tau ni uca oya mera keli pateta. Oti era tosoya na bai ra qai vakaduria e so na vatuniloa mera vakaruru kina na vakarorogo mai na siga kei na uca. A gadrevi me caka tale e so na idabedabe kau balavu, qai vakarautaki tale ga e so tale na misini ni ivakatagi. Ra cakacaka ena siga kei na bogi na bolecakacaka, nira varovaro, tukituki, ra qiva qara tale ga.

E so era nanuma: “Sa na wacava na lolobo ni rara ena soqo ni tikina ke tau tiko ga na uca. O koya e lobo kina, ena sega ni kune tale.” A voli na co madu me ubi kina na rara. Sa qai cila mai na siga! A mamaca vinaka na rara ena tolu taucoko na siga ni soqo ni tikina.

Nira yaco yani na mataveitacini, e totoka vakaoti na irairai ni vanua. E vaka me ivakaraitaki lailai ni vuravura vou na ituvatuva ni lomanivanua oqo. Era dabe ena idabedabe vinaka na mataveitacini, qai wavokiti ira na vunilolo, na vuata, na were ni sila kei na loga ni tomata. A ubi na daku ni buturaranivosa ena drau ni vaini. Ni vakacagau tiko na porokaramu, era rogoca tale ga na vakarorogo na kena dau tagi na tamanitoa vaka kina na tinanitoa ni kumuni na nona yaloka. So tale na rorogo e matau ga me rogoci e lomanivanua, ia e vaka me lasa tale vei ira na vakarorogo. Era sega ni laiva oqori me vakamua tani na nodra vakasama ni dei na lomadra mera rogoca vinaka na porokaramu totoka vakaivolatabu. Ia, e sega ni koya ga oya na gauna guilecavi dredre ena soqo ni tikina oqo.

iKarua ni Ka “Veivakurabuitaki”

Ena iotioti ni vunau ena mataka ni Vakaraubuka, era kurabui na mataveitacini ni dua vei ira na iLawalawa Dauvakatulewa o Geoffrey Jackson, a kacivaka na soli ni iVolatabu taucoko na New World Translation, ena vosa vaka Georgia.b Era luluvu ena levu ni nodra marau. A kaya e dua na vuvale ena levu ni nodratou marau: “Keitou sega ni tukuna rawa na levu ni neitou vakavinavinaka ena cakamana oqo​—na cakamana i Jiova. Na cakacaka vakaitamera a vakacavari ena dua na gauna lekaleka!”

E kaya e dua na tacida yalewa a rogoca na porokaramu ena talevoni mai na tauni o Tsalendjikha: “Au sega ni tukuna rawa na levu ni noqu marau niu taura na noqu ilavelave ni iVolatabu taucoko. Au vakavinavinakataka na soqo ni tikina siga tolu totoka oqo. E dua dina na soqo vakairogorogo.” E kaya e dua na vuvale eratou lewe ni dua na ivavakoso ena ra kei Georgia, volekata na Wasawasa Loaloa: “Me yacova mai oqo, a dua tu ga na neitou iVolatabu, ia qo keitou sa yadua kece na New World Translation. Sa qai rawa me keitou vulica vakai keitou na iVolatabu.”

Ke laurai vinaka, a sega ni rawarawa na kena veisoliyaki na ilavelave ni iVolatabu. Kena ivakaraitaki, dina ni a tabaki qai vakau i Georgia na New World Translation me donuya na soqo ni tikina, ia eratou a sega ni vakatara na tabana ni kasitaba na kena kau i Georgia. Era kerekere na tacida tagane ina valenivolavola ni Obasimani, qai vakadonuya mani yaco donu sara ga yani ena soqo ni tikina. A tala tale ga na nona ivukevuke ina soqo ni tikina e Marneuli me rawa ni kauta mai e so na ilavelave ni iVolatabu vou me biu ena nodratou valenivolavola.

Na iValavala ni Veikidavaki Mai Georgia

E vakairogorogo na soqo ni tikina e Marneuli ena dua tale na vuna. A vakaitavi ena porokaramu e dua vei ira na iLawalawa Dauvakatulewa ni iVakadinadina i Jiova. Ena levu ni nodra marau, era via kidavaki koya yadudua sara ga na mataveitacini kece era tiko ena soqo. A duri o Brother Jackson me vica na aua ni bera ni tekivu na soqo, ena gauna ni vakasigalevu, vaka tale ga kina ni sa oti na soqo me kidavaki ira na mataveitacini, ia dua na ka na nona marautaka na nodra veikauaitaki.

Ni oti e dua na soqo ni tikina ena 1903, a kaya e dua na tacida tagane: “Au dravudravua ia ena sega ni sosomitaki rawa vakailavo na veika vinaka au vulica ena soqo oqo.” Oti e vica na drau na yabaki mai na gauna oya, era duavata ena tikina oqori na iVakadinadina era a tiko ena soqo ni tikina guilecavi dredre ni vulaikatakata ni yabaki 2006 ena vanua taucoko o Georgia.

[iVakamacala e ra]

[Kato ena tabana e 19]

Sa Lewe Levu ‘O Koya sa Lewe Lailai’

E yaco dina e Georgia na parofisai ena Aisea 60:22: “Ko koya sa lailai, ena yaco me le dua na udolu; kei koya sa lailai, me matanitu kaukauwa: koi au ko Jiova, ka’u na vakusarawataka e na kena gauna.” Ni bera ni oti e 20 na yabaki, e tubu na dautukutuku e Georgia mai na voleka na 100 ina le 16,000 vakacaca. O ira na italatala gugumatua ni Vosa ni Kalou oqo, era vakavulica e rauta ni 8,000 na vulivolatabu ena veimacawa​—e ivakatakilakila ni na tubu tiko ga na iwiliwili ni mataveitacini e Georgia.

[Mape ena tabana e 16]

(Raica tale na ivola)

RUSSIAN FEDERATION

GEORGIA

⇨ Zugdidi

⇨ Kutaisi

Marneuli ⇨ Gori

⇨ Kaspi

⇨ Tsnori

TBILISI

TAKI

ARMENIA

AZERBAIJAN

[Credit Line]

Globe: Based on NASA/Visible Earth imagery

[iYaloyalo ena tabana e 16]

iVakatakarakara e Tbilisi

[iYaloyalo ena tabana e 17]

A semati ena mobile phone na soqo ni tikina e Marneuli kei na lima tale na vanua a vakayacori kina na soqo

[iYaloyalo ena tabana e 18]

Era marautaka na tiko ena soqo ni tikina na kena soli na iVolatabu taucoko, na “New World Translation” ena vosa vaka Georgia