Tolu na Siga ni Veivakabulabulataki Vakayalo
1. Ena yaga vakacava vei keda na soqo ni tikina ena yabaki qo?
1 E dravuisiga tu vakayalo na vuravura e lewa tu o Setani, ia o Jiova e vakamamautaki ira tiko ga vakayalo na nona tamata. (Aisea 58:11) Dua na sala e vakabulabulataki keda kina vakayalo, oya na soqo ni tikina e caka e veiyabaki. Sa roro voleka mai na soqo ni tikina ni yabaki qo, na cava eda rawa ni cakava meda kua kina ni calata na veivakalougatataki vakayalo i Jiova kei na noda vakabulabulataki ira vakayalo eso tale?—Vkai. 21:5.
2. Na cava mo vakadeitaka rawa qo?
2 Mo tuvanaka rawa qo na veiveisau e vinakati ena nomu cakacaka kei na so tale na ka o na via cakava mo kua kina ni calata e dua na siga ni soqo. O sa cakacakataka na levu ni gauna e taura mo na yaco kina ena vanua ni soqo, mo raica rawa nomu idabedabe ni bera ni tekivu na porokaramu? Eda na sega ni via calata na kakana vakayalo veivakayaloqaqataki e vakarautaka o Jiova me baleti keda! (Aisea 65:13, 14) Sa vakadeitaki beka na nomu icili kei na nomu ilakolako ina soqo ni tikina?
3. Me yaga vei keda na soqo ni tikina, na cava meda cakava yadua se vakavuvale?
3 Na cava o rawa ni cakava me kua kina ni ciriyawa na nomu vakanananu ni vakacagau tiko na soqo? Ke rawa, tovolea mo vakacegu vinaka ni oti e dua na siga ni soqo. Mo raici koya e vunau, cega na tikinivolatabu e wilika, qai vola eso na tikina o vulica. Ena vinaka moni dabe vata na itubutubu kei ira na luvemuni moni vukei ira mera vakarorogo vinaka. (Vkai. 29:15) Ni dou lesu i vale ena yakavi e rawa ni dou taleva vakavuvale na veitikina bibi dou vulica ena soqo. Mo dou vakaukauataki tiko ga vakayalo ni oti na soqo ni tikina, dou rawa ni tuvanaka mo dou veivosakitaka ena yakavi ni nomudou Sokalou Vakavuvale na veitikina bibi mo dou cakacaka kina.
4. Eda na vukei ira vakacava eso tale ena noda ivavakoso mera vakabulabulataki tale ga vakayalo?
4 Vukei Ira Eso Tale Mera Bulabula Vakayalo: Eda vinakata mera vakabulabulataki vakayalo eso tale. E tiko beka eso na itabaqase se so tale ena ivavakoso era gadreva na veivuke mera tiko ena soqo ni tikina? O rawa ni vukei ira? (1 Joni 3:17, 18) Mera raica na qase ni ivavakoso, vakabibi o ira na ivakatawa ni iwasewase lalai na nodra vukei na dautukutuku era gadreva na veivuke.
5. Ena veisoliyaki vakacava na ivola ni veisureti ni soqo ni tikina? (Raica na kato ena tabana e 4.)
5 Me vaka ga ena veigauna sa oti, eda na veisureti tale ga ena yabaki qo ni vo e tolu na macawa me caka na soqo ni tikina. Mera tuvanaka na ivavakoso yadua mera solia na nodra iokaoka ni ivola ni veisureti, mera saga me kovuti vinaka na nodra yalava kece ni cakacaka ena gauna e veisoliyaki kina. Ke vo na nomudou ivola ni veisureti vakavuvale me kau tiko yani ena gauna ni soqo ni tikina me vakayagataki ena vunau tawalokuci. Me ikuri ni ivakamacala me baleta na tikina qo ena qai veivosakitaki ena porokaramu ena Vakaraubuka. Na ivola ni veisureti dou na sega ni vakayagataka ena vanua ni soqo me qai soli vua e dua na dauveivuke ena soqo ni tikina. Mo maroroya tiko e dua na kopi ni na veivosakitaki qori ena iotioti ni vunau ena Sigatabu.
6. Sala cava eda na vakayaloqaqataki kina, eda na vakayaloqaqataki ira vakacava eso tale?
6 Veivakayaloqaqataki ena Veimaliwai: E dau marautaki ena soqo ni tikina kece na noda veimaliwai kei na noda veivakayaloqaqataki vakamataveitacini. (Same 133:1-3) Nida “lomasavu” eda na vakaliuliu meda veivosaki kei ira na tacida ena so tale na ivavakoso. (2 Kor. 6:13) Saga me noda isausau ena tolu na siga ni soqo meda kila e dua na tacida se dua na vuvale se sega nida veikilai. Na gauna ni vakasigalevu e gauna vinaka me caka kina qori. Ena vinaka me mamada ga na kakana eda vakarautaka me rawa nida vakasigalevu ga ena vanua ni soqo qai veimaliwai kei ira eso tale, mai na noda lai voli vakasigalevu se vakasigalevu sara ga ena dua na valenikana. Nida vakasigalevu ena vanua ni soqo ena rawa ni tauyavu kina eso na itokani e dei.
7. Na cava meda bolecakacaka kina ena gauna ni soqo, eda na cakava vakacava qori?
7 E dau veivakayaloqaqataki dina nida cakacaka vata kei ira na tacida ena noda veiqaravi tabu! O rawa ni veivuke ena dua na tabana se tokona na nomu ivavakoso ena sasamaki? (Same 110:3) Ke o via bolecakacaka ena gauna ni soqo o rawa ni lako ena Tabana ni Bolecakacaka. Ni levu na liga ena mamada na cakacaka qai marautaki tale ga.
8. Ni sa roro voleka mai na soqo ni tikina, na cava me noda isausau? Na vuna?
8 Sa roro voleka mai na soqo ni tikina. Na kena tuvanaki me bulabula na soqo kei na porokaramu e taura e levu na gauna kei na sasaga. Me nomu isausau mada ga mo tiko ena siga kece ni soqo, mo tu vakarau mo rogoca na veika e vakarautaka tu o Jiova kei na nona isoqosoqo. Mo veivakayaloqaqataki tale ga ena nomu itovo vinaka kei na nomu veimaliwai ena marau. O na vakila kina kei ira tale eso na ka e tukuna e dua na tacida me baleta na soqo ni tikina ena yabaki sa oti, “Dua tani sara ga na vakacegu au vakila kina!”
[iYaloyalo ena tabana 3]
Me vaka ga ena veigauna sa oti, eda na veisureti tale ga ena yabaki qo ni vo e tolu na macawa me caka na soqo ni tikina
[iYaloyalo ena tabana 4]
Soli iVola ni Veisureti
Me kovuti e levu na yalava, ena vinaka meda vosa ga vakalekaleka. Eda rawa ni tukuna: “Bula. Keimami veisoliyaka tiko na ivola ni veisureti qo e veiyasa i vuravura. Qo na nomu. O na raica kina eso tale na ivakamacala.” Ena uqeti taukei ni vale na ka e volai tu ena imatai ni tabana, solia vua me rawa ni raica. Me bulabula na nomu ivakamacala. Ni soli ena muanimacawa na ivola ni veisureti, e rawa ni soli vata kei na mekesini ke veiganiti.
[iYaloyalo ena tabana 4]
Mo veivakayaloqaqataki tale ga ena nomu itovo vinaka kei na nomu veimaliwai ena marau