Taro na Dauwiliwili
Ni oti nona vakamatei Koliaci o Tevita, na cava e tarogi koya kina o Tui Saula, ‘A luve i cei o iko na cauravou?’ dina ga ni a sa talatala yani vakailiu o Saula me mai nona dauveiqaravi o Tevita?—1 Samuela 16:22; 17:58.
A rawa vei Saula me guilecavi Tevita, baleta ni a lekaleka ga na imatai ni gauna rau a sota kina. Ia, kena irairai ni a sega ni dina oqo baleta na ivolatukutuku ena 1 Samuela 16:18-23, e vakaraitaka ni a talatala vakatabakidua o Tui Saula vei Tevita, yaco me taleitaki koya sara vakalevu qai lesi koya me daucolata na nona iyaragi. A rairai kilai Tevita vinaka o Saula.
So na vuku ni iVolatabu era dikeva ni a vakuri e muri na 1 Samuela 17:12-31 kei na 17:55–18:5, baleta nira sega ni kune na veitikina oqo ena so tale na ilavelave ni Greek Septuagint, na ivakadewa ni iVolatabu vakaIperiu a vakacavari na kena volai ena ikarua ni senitiuri B.S.K. Ena sega gona ni ka vakayalomatua nodra kaya ni dodonu ga na ivakadewa oya ni Septuagint, me vaka ni kune na veitikinivolatabu oqo ena so tale na ivola ena iVolatabu vakaIperiu.a
Koya gona, nona vakatarogi Apineri taumada, oti qai vakatarogi Tevita, e sega wale ga ni via kila o Saula na yaca i tama i Tevita. Ni raica na vakabauta kei na yaloqaqa e tu vei Tevita ena gauna e se qai vakamatei Koliaci ga kina, e via kila sara ga o Saula se mataqali turaga vakacava e susuga na cauravou oqo. Rairai a vakasamataka o Saula me lewe ni mataivalu na tama i Tevita o Jese, kei na so tale na wekana, de dua eratou doudou qai yaloqaqa tale ga me vakataki Tevita.
Dina ni a lekaleka ga na isaunitaro i Tevita ena 1 Samuela 17:58, “na luvena na nomuni tamata ko Jese, na kai Pecileema,” ia, na veitikina e tarava e dusia ni a sega ni yala ga e kea na nodrau veivosaki. Me baleta na tikina oqo, dikeva na ka e tukuna o C. F. Keil kei F. Delitzsch: “E macala mai na veika e tukuni ena [1 Samuela 18:1], ‘ni sa vosa oti o koya vei Saula,’ ni a sega ni yala ga e kea na nodrau veivosaki me baleta na matavuvale i Tevita, e kena ibalebale ni a balavu na nodrau veivosaki.”
E macala e ke ni taro i Saula ‘A luve i cei o iko na cauravou?’ e vakaibalebaletaka na nona via kila na vanua e susugi kina o Tevita, sega ni nona via kila se o cei o Tevita baleta ni sa kila rawa tu oqori.
[iVakamacala e ra]
a Na kena vakadinadinataki na tikina era bokoci mai na Septuagint, raica na Insight on the Scriptures, Volume 2, tabana e 855, tabaka na iVakadinadina i Jiova.
[iYaloyalo ena tabana e 31]
Na cava e tarogi Tevita kina o Saula se luve i cei o koya?