iBulibuli Totoka​—Basika Vakacalaka?

SA VIA sivi e 150 na yabaki mai na nona vakatura o Charles Darwin ni vereverea kei na duidui ni veika buli e dewa mai na veika sa bula rawa tu. Ia, na nona ile me baleta na bula vakaidewadewa kei na veiveisau ni kena ivakamacala, e vakalewai vei ira era vakabauta ni veivakurabuitaki na kedra ibulibuli na veika bula qai dusia ni vakainaki na nodra buli. Era sega mada ga ni vakabauta e so na daunisaenisi rogo ni bula vakaidewadewa e vu ni kena mai tu e vuravura na veimataqali ka bula.

E so vei ira na daunisaenisi oqo era veiletitaka ni sa ivakaraitaki ga ni veibuli maqosa, qai veisemati vinaka na veibuli kei na biology, veika vakafika, vakakina na vakayagataki ni vakasama. Sa ra saga tale ga me vulici na tikina oqo ena lesoni vakasaenisi e koronivuli. E veiletitaki vakalevu e Mereke na ivakavuvuli ni bula vakaidewadewa, ia sa vakilai tale tiko ga e Igiladi, Necaladi, Pakistan, Serbia kei Taki.

Yali e Dua na Tikina Bibi

Ni dau vakamacalataki na maqosa ni nodra buli na veika, e laurai votu ni sega ni bau cavuti vakadua se o cei e bulia. O vakabauta ni rawa ni tubu vakacalaka ga na veika era tu yavoliti keda, me sega ni dua e bulia? E kaya na ivola na New York Times ni o ira na ilala era tokona na buli vakamaqosa ni veika, “era sega ni vakamacalataka rawa vakamatata o cei se na cava e veibuli.” Kaya na dauvolaivola o Claudia Wallis, o ira oqo era “qarauna me kua ni cavuti na Kalou ena nodra veivosaki.” Ia e kaya na ivola na Newsweek, “ni o ira na vakabauta na veibuli maqosa era sega ni via kaya e dua na ka me baleta na nona bula tiko na dauveibuli.”

E tawayaga na nomu via vakalecalecava na nona kilai na dauveibuli. Me na qai taucoko vakacava na vakamacalataki ni kena buli na lomalagi kei na vuravura se na itekitekivu ni bula, kevaka e sega ni vakatakilai o koya e bulia se vakavuna na bula?

Na veileti me baleta na nona kilai se sega na dauveibuli e vure kina e vica na taro: Ena tarova beka na vakadidike vakasaenisi kei na vuku ni tamata, ke ciqomi ni tiko e dua na dauveibuli cecere? Me qai vakabauti beka ga ni tiko na dauveibuli vuku ke sa sega sara ga ni kune e dua na kena ivakamacala vakasaenisi? Nida dikeva na veika buli era tu yavoliti keda, e donu beka ke tukuni ni dua e buli ira? Na kena isau kei na so tale na taro ena qai veivosakitaki ena ulutaga e tarava.

[iYaloyalo ena tabana e 3]

A vakabauta o Charles Darwin, ni vereverea ni veika bula e dewa mai na veika sa bula rawa tu

[Credit Line]

Darwin: From a photograph by Mrs. J. M. Cameron/U.S. National Archives photo