Rawa Mo Vosota na Veika Tawadodonu!

DUA beka vei keda e sega ni se bau sotava ena nona bula na veika tawadodonu? Dina ni so na ka tawadodonu e raici, se vakasamataki wale tu ga, ia e so tale e yaco dina sara ga.

E vakamosia na yaloda na veika tawadodonu eda dau sotava, qai rawa ni vakaleqa noda veiwekani kei na Kalou. Rairai eda na vinakata me vakadodonutaki sara ga na ituvaki oqori. Cava na vuna? Dua, ni Dauveibuli o Jiova “[e] sega ni ca [“tawadodonu,” NW]” a tugana e lomada meda kila na lewadodonu. (Vakarua 32:4; Vakatekivu 1:​26) Ia, rairai eda sotava e so na ituvaki eda kila ni sega kina na lewadodonu. E kaya e dua na turaga vuku: “Ka’u a qai lesu tale, ka kunea na veivakasaurarataki kece sa caka e ruku ni mata-ni-siga: ka raica, sa vakawai na matadra era sa vakasaurarataki, ka sa sega e vakacegui ira; ia sa tu vei ira na dauveivakasaurarataki na kaukauwa; ia ka sa sega e vakacegui ira.” (Dauvunau 4:1) Rawa vakacava nida vosota na veika tawadodonu?

Cava na Veika Tawadodonu?

Oya na ituvaki se ivalavala e beci kina na ivakatagedegede ni lewadodonu. Na ivakatagedegede cava beka ni lewadodonu e vauci keda na tamata? E macala ni ganiti koya ga na Dauveibuli e dodonu qai sega ni veivukiyaki, me kotora na ivakatagedegede ni ka e dodonu se ka e tawadodonu. Ena nona rai, na muri ni “vunau ni bula” e okati kina na noda “sega ni cakava na ka ca [“tawadodonu,” NW].” (Isikeli 33:15) O koya gona, ni bulia o Jiova na imatai ni tagane, a tugana e lomana na lewaeloma​—oqo e vaka e dua na domo lailai me vukei koya me vakaduiduitaka na ka e dodonu mai na ka e cala. (Roma 2:​14, 15) E vakarautaka tale ga o Jiova ena nona vosa na iVolatabu na itukutuku me baleta na ka e dodonu se ka e tawadodonu.

Vakacava ke da nanuma ni sega ni dodonu na lewa e tau me baleti keda? Ena ka vakayalomatua meda dikeva ke tawadodonu dina na lewa e tau oya. Kena ivakaraitaki na ituvaki a sotava o Jona na parofita Iperiu. A lesi koya o Jiova me tukuna vei ira na kai Ninive na leqa ena vakarau yaco. Taumada a dro o Jona, a sega ni vakayacora nona ilesilesi. Ia, a lesu i Ninive me vakasalataki ira e kea ena veivakarusai sa roro voleka mai. A sega gona ni vakarusa o Jiova na korolevu oya qai vakabulai ira na lewena nira rogoca na ivakasala. E tarai Jona vakacava oqo? “Sa cata vakalevu ko Jona, ka sa cudru sara.” (Jona 4:1) E nanuma ni cala na vakatulewa i Jiova.

Ia, e sega ni cala o Jiova, ni kila na lomada qai “vinakata . . . na ivalavala dodonu kei na lewa dodonu.” (Same 33:5) A dodonu ga me vulica o Jona ni vakatulewa i Jiova e salavata kei na lewadodonu. Kevaka eda nanuma ni tawadodonu na lewa a tau me baleti keda, ena vinaka meda taroga, ‘Ena duidui beka na rai i Jiova?’

Sotavi na Veika Tawadodonu

E tukuni ena iVolatabu e levu na ivakaraitaki ni so era sotava na veika tawadodonu. Levu na ka e rawa nida vulica nida vakasamataka na sala era vosota kina na nodra leqa. Kena ivakaraitaki o Josefa, ena levu ni nodratou vuvu na tuakana, eratou volitaki koya kina me bobula i Ijipita. Ena nona tiko e Ijipita, a saga na wati nona turaga me bacani koya, ia a sega ni vakamalumalumu kina, mani beitaki vakailasu o Josefa ni saga me rau moce vata kei na wati nona turaga. Yaco gona me bala e valeniveivesu. Ia na vakabauta i Josefa e kaukaua cake sara mai na ba kaukamea e viribaiti koya tu. A sega ni laiva na lewa tawadodonu me vakaluluqataka nona bula vakayalo se vakamalumalumutaka nona nuitaki Jiova.​—Vakatekivu 37:​18-​28; 39:​4-​20; Same 105:​17-​19.

O Nepoci e dua tale na turaga a sotava na ka tawadodonu. Oya ena nona veivakamuai cala o Jesepeli na wati Tui Eapi e Isireli. E vinakata na tui na ivotavota ni qele i Nepoci e koto volekata na nona vale vakatui. A sega ni vakadonuya o Nepoci na nona kerekere na tui, baleta ni tabu vua e dua na Isireli me volitaka na nona ivotavota. (Vunau ni Soro 25:23) Oya na vuna e qara kina o wati Eapi, na ivakadinadina lasu me beitaki Nepoci ni vosa vakacacataka na Kalou kei na tui. Mani vakamatei o Nepoci kei ratou na luvena tagane. Vakasamataka mada na veiciciyaki ni vakasama i Nepoci, ni raica na nodratou tomi vatu na duri tu e kea me ratou vakaviriki koya me mate!​—1 Tui 21:​1-​14; 2 Tui 9:​26.

Ia, e lailai wale sara na ka e sotavi oya ni vakatauvatani kei na veika tawadodonu a vakayacori vei Jisu Karisito. Nona totogi me mate, e salavata kei na lasu vaka kina na veilewai e cala vakalawa. Na kovana ni Roma e rogoca nona kisi, a sega ni doudou me tokona na veika e kila ni dodonu. (Joni 18:​38-​40) Io, a cakava o Setani vei Jisu na veika tawadodonu a se sega ni bau caka vua e dua tale!

E dusia beka na ivakaraitaki oya ni vakawaletaka o Jiova na lewa tawadodonu? Sega! Na rai nei Jiova e duidui sara ni vakatauvatani kei keda na tamata. (Aisea 55:​8, 9) Ena nona volitaki o Josefa me bobula, a rawa kina me vakabulai iratou nona vuvale. A lesi me lewa na kakana kece e Ijipita ni bera na dausiga levu a tarai iratou tale ga nona vuvale. Vakasamataka mada kevaka me sega ni vakalaiva o Jiova na veika tawadodonu, kena ibalebale ena sega ni tini e valeniveivesu o Josefa. Na vanua oya a vakamacalataka kina o Josefa na ibalebale ni nodrau tadra e rua na nona itokani kaivesu, dua gona vei rau a tukuna vei Fero na veika me baleti Josefa, qai lesi o Josefa me lewa na kakana kece e Ijipita.​—Vakatekivu 40:1; 41:​9-​14; 45:​4-8.

Vakacava o Nepoci? Tovolea mo raica na ka e yaco me vaka na rai i Jiova. O Jiova e rawa ni vakaturi ira na mate, koya gona ena nona vakasama e vaka ga se bula tiko o Nepoci dina ni sa tu na yagona ena ibulubulu. (1 Tui 21:19; Luke 20:​37, 38) Ena wawa tu o Nepoci me yacova na gauna ena vakaturi koya kina o Jiova, ia na gauna oqori e vaka me lekaleka ga, ni o ira na mate era sa sega ni kila e dua na ka. (Dauvunau 9:5) A sauma tale ga o Jiova na ka a vakayacori vei Nepoci ena nona tauca na nona lewa vei Eapi kei na nona vuvale.​—2 Tui 9:​21, 24, 26, 35, 36; 10:​1-​11; Joni 5:​28, 29.

A mate o Jisu, ia a vakaturi koya na Kalou qai vakatikori koya ena dua na itutu lagilagi, “sa uasivi cake sara vei ira kecega sa liu, kei ira era sa lewa, kei ira sa kaukauwa, kei ira era sa turaga, kei na yaca kecega sa cavuti.” (Efeso 1:​20, 21) Na veika tawadodonu a cakava o Setani vei Jisu Karisito e sega ni tarova nona vakaicovitaki Luvena o Jiova. E kila o Jisu ni rawa sara ga vei Jiova me tarova nona vesu vakatawadodonu, kevaka e nona inaki. Ia, e kila tale ga ni tiko na gauna me vakayacora kina o Jiova na veika e tukuni tu ena iVolatabu kei na nona muduka na veika tawadodonu.

Dina ni vakayacora o Setani kei ira nona italai na veika tawadodonu vei ira na yalododonu, ia ena cakava kina e dua na ka o Jiova se nona vakaotia vakadua. Koya gona, meda waraka ga na Kalou me veisautaka na ituvaki oqori.​—Vakarua 25:16; Roma 12:​17-​19.

Vuna e Vakatara kina O Jiova na Veika Tawadodonu

De dua, e tiko na vuna e sega ni vakadodonutaka kina o Jiova e dua na ituvaki. Ena laiva meda sotava na veika tawadodonu me tiki ni noda vuli na lotu Vakarisito. Ia, na Kalou ‘sa sega ni dau veretaka e dua ina ca.’ (Jemesa 1:​13) Ena rairai laiva me sotavi na ka rarawa qai vukei ira era ciqoma oya me rawa nira vuli kina. “Ni dou sa vakararawataki mada e na gauna eso,” qai vakadeitaka vei keda na iVolatabu, “na Kalou sa dauia na loloma kecega . . . ena qai vakavinakataki kemudou sara, mo dou vakataudeitaki, mo dou vakaukauwataki.”​—1 Pita 5:​10.

O koya gona, ena vakatara tiko o Jiova e dua na ka tawadodonu me rawa ni veivutuni o koya e cala. Ni oti ga e vica na macawa nona vakamatei o Jisu, e so na Jiu e “laucoka na yalodra” nira rogoca na ivakaro i Pita. Era taleitaka na Vosa ni Kalou ra qai papitaiso.​—Cakacaka 2:​36-​42.

Ia, sega ni o ira kece na cakava na veika tawadodonu era na veivutuni. E so era na gu ga mera cakava na veika ca. E kaya na Vosa Vakaibalebale 29:1: “O koya sa dauvunauci ia sa vakadomoqataki koya, ena vakarusai vakasauri, ka sega na ka me bula kina.” Io, ena tu o Jiova me vakarusai ira na tomana tiko ga nodra caka ca.​—Dauvunau 8:​11-​13.

Se mani vakacava na balavu ni gauna ena gadrevi meda vosota tiko kina na veika tawadodonu, eda nuidei ni kila tu o Jiova na sala me vukei keda kina. E vakadeitaka ni na vakaotia na veika tawadodonu cava ga eda sotava ena ituvaki ca ni vuravura ena gauna oqo. E yalataka tale ga vei keda na icovi ni bula tawamudu ena vuravura era na “tiko kina nai valavala dodonu.”​—2 Pita 3:​13.

[iYaloyalo ena tabana e 17]

E vakacava beka na rai i Nepoci ni sotava na veika tawadodonu?