Ka Mo Cakava ena Veika Tawadodonu

1-2. Na cava era cakava e levu nira raica na veika tawadodonu? Cava eda na rairai taroga?

EDA bula tiko ena vuravura e levu kina na veika tawadodonu. E caka vei ira e levu na veika tawadodonu baleta nira dravudravua, vanua era cavutu mai kina, na kedra irairai kei na levu tale. Levu era sotava qori ena vuku ni ka era cakava na daunibisinisi kocokoco se vakailesilesi ni matanitu era dau cakacaka vakailawaki. E vakaleqai keda kece na veika tawadodonu qori kei na so tale.

² E macala ga nira rarawataka e levu na ka tawadodonu era raica tu nikua. Eda via bula ena dua na vuravura meda taqomaki kina, me caka tale ga vei keda na ka dodonu. Eso era via walia na leqa ni vuravura. Era tayabe mera saqata na matanitu kei na kena lawa, se ra digitaka na iliuliu vakapolitiki era yalataka nira na vakaotia na veika tawadodonu. Ia nida lotu vaKarisito, eda vakavulici nida “sega ni vakavuravura,” meda waraka ga na Matanitu ni Kalou me vakaotia na veika tawadodonu kece. (Joni 17:16) Ia eda dau rarawa ni caka na veika tawadodonu vua e dua, eso na gauna eda cudru sara ga. Eda na rairai taroga: ‘Na cava meu cakava? E tiko na ka au rawa ni cakava me baleta na veika tawadodonu ena gauna qo?’ Meda sauma na taro qori, meda dikeva mada na rai nei Jiova kei Jisu me baleta na veika tawadodonu.

RAU CATA O JIOVA KEI JISU NA VEIKA TAWADODONU

3. Na cava eda dau cata kina na veika tawadodonu? (Aisea 5:7)

³ E tukuni ena iVolatabu na vuna eda dau cata kina na veika tawadodonu. E kaya nida buli meda ucui Jiova, ni “taleitaka . . . na ivalavala dodonu kei na lewadodonu.” (Same 33:5; Vkte. 1:26) E sega vakadua ni lewacala, e sega tale ga ni vinakata meda cakava qori! (Vkru. 32:3, 4; Maika 6:8; Saka. 7:9) Kena ivakaraitaki, ena gauna i Aisea, e rogoca o Jiova “na [nodra] tagi ni rarawa” e levu na Isireli era vakalolomataki vei ira na wekadra. (Wilika Aisea 5:7.) Cava e cakava o Jiova? E totogitaki ira na Isireli era beca tiko ga na nona Lawa kei ira na dau cakava na veika tawadodonu.—Aisea 5:5, 13.

4. Na cava na rai i Jisu ni caka vua e dua na tagane na veika tawadodonu? (Raica tale ga na iyaloyalo.)

⁴ E taleitaka o Jisu na ka dodonu, ia e cata na veika tawadodonu me vakataki Jiova. Ni vunau tiko ena dua na gauna, e raica e dua na tagane e mate tu e dua na ligana. E lomani koya o Jisu qai vakabulai koya, ia era sega ni taleitaka qori na iliuliu ni lotu sega ni dauloloma. Era kauaitaka vakasivia na muri ni lawa ni Siga ni Vakacecegu mai na nodra vukea na tagane qori. Na cava na rai i Jisu ena ka era cakava? E ‘rarawataka vakalevu nira sa rui lomaqa.’—Mari. 3:1-6.

5. Na cava meda kua ni cudruvaka tiko ga kina na veika tawadodonu?

⁵ Erau rarawataka o Jiova kei Jisu ni caka vei ira eso tale na veika tawadodonu, kena ibalebale e sega ni cala ke va tale ga qori noda rai. (Efeso 4:26) Ia meda nanuma tiko ke donu mada ga na inaki ni noda cudru, ena sega ga ni walia na veika tawadodonu. Koya gona, ke da cudru tiko ga me dua na gauna balavu, eda na rawa ni tauvimate se lomabibi. (Same 37:1, 8; Jeme. 1:20) Na cava gona meda cakava nida raica na veika tawadodonu? Eda rawa ni vuli ena ivakaraitaki i Jisu.

KA E CAKAVA O JISU ENA VEIKA TAWADODONU

6. Na veika tawadodonu cava e raica o Jisu ni tiko e vuravura? (Raica tale ga na iyaloyalo.)

⁶ Ni bula e vuravura o Jisu, e raica e levu na veika tawadodonu. E raica mada ga nodra vakalolomataki na tauvanua vei ira na iliuliu ni lotu. (Maciu 23:2-4) E kila tale ga nodra voravora na vakailesilesi ni Roma vei ira na lewenivanua. Era vinakata sara ga na Jiu mera kua ni vakarurugi ena veiliutaki vakaRoma. Eso mada ga era lewena eso na ilawalawa mera saqata na matanitu qori. Ia e sega ni via tauyavutaka o Jisu e dua na ilawalawa va qori se tokona. Na gauna e kila kina nira via buli koya me tui, e dro sara.—Joni 6:15.

7-8. Na cava e sega ni saga kina o Jisu me vakaotia na veika tawadodonu e vuravura? (Joni 18:36)

⁷ Ni tiko e vuravura o Jisu, e sega sara ga ni via vakaitavi ena veika vakapolitiki me vakaotia na veika tawadodonu. Na vuna? E kila ni sega ni tu vua na tamata na dodonu se kaukaua me veiliutaki. (Same 146:3; Jere. 10:23) E sega ni rawa tale ga nira vakaotia na ka e vakavuna na veika tawadodonu. E lewa tiko na vuravura o Setani na Tevoro, na kabula vakayalo daulaba e vakayagataka nona lewa me vakavuna na veika tawadodonu. (Joni 8:44; Efeso 2:2) O ira mada ga na tamata vinaka ena vuravura qo, era sega ni rawa ni cakava na ka dodonu ena vuku ni ivalavala ca.—Dauv. 7:20.

⁸ E kila o Jisu ni Matanitu ga ni Kalou ena vakaotia vakadua na vu ni veika tawadodonu. Qori na vuna, e vakayagataka kina nona gauna kei na kaukaua me “vunautaka na itukutuku vinaka ni Matanitu ni Kalou.” (Luke 8:1) E yalataka vei ira “era via kania era via gunuva na ivalavala dodonu,” ni sa vakarau oti na veika ca kei na veika tawadodonu. (Maciu 5:6; Luke 18:7, 8) Ena sega ni cakava rawa qori na matanitu vakatamata, ia na Matanitu ga ni Kalou ni “sega ni vakavuravura.”—Wilika Joni 18:36.

VAKATOTOMURI JISU NI O RAICA NA VEIKA TAWADODONU

9. O vakadeitaka vakacava ni Matanitu ga ni Kalou ena vakaotia na veika tawadodonu kece?

⁹ Nikua, sa sega ni caka rawa na levu ni veika tawadodonu ni vakatauvatani kei na gauna e tiko kina e vuravura o Jisu. Ia ena “iotioti ni veisiga” qo, se vakavuna tiko ga o Setani na veika tawadodonu kei ira na tamata ivalavala ca era muri koya. (2 Tim. 3:1-5, 13; Vkta. 12:12) Me vakataki Jisu, eda kila ni Matanitu ni Kalou duadua ga ena vakaotia na vu ni veika tawadodonu. Nida tokona duadua ga na Matanitu ni Kalou, eda na sega kina ni via tayabe, vakaduiduile, se vakaitavi ena so na sasaga me vakaotia na veika tawadodonu. Dikeva mada nona ivakaraitaki e dua na tacida yalewa o Stacy.a Ni bera ni vulica na iVolatabu, e dau vakaitavi vakalevu ena tayabe. Ia e qai lomatarotarotaka na ka e cakava. E kaya: “Niu dau lai tayabe, au dau taroga ke sa donu tiko na ka au cakava. Ia qo niu sa tokona na Matanitu ni Kalou, au kila ni sa donu na ka au cakava tiko. Au kila ni o Jiova ga ena vakaotia na veika tawadodonu, qori na ka au sega ni cakava rawa.”—Same 72:1, 4.

10. E veicalati vakacava na ka e tukuna o Jisu ena Maciu 5:43-48 kei na ka era cakava na ilawalawa era dau saqata na matanitu? (Raica tale ga na iyaloyalo.)

¹⁰ Levu nikua era lewena na ilawalawa era dau saqata na matanitu, e dau laurai kina na yalo ni nanumi ira ga kei na yaloca, qori e veicalati sara ga kei na ivakaraitaki i Jisu kei na nona ivakavuvuli. (Efeso 4:31) E kaya e dua na tacida o Jeffrey: “Au kila ke mani tekivu vinaka mada ga na tayabe, e rawa ni veisau totolo me voravora se ra butako.” Ia e vakavulici keda o Jisu meda lomani ira na tamata kece ga, ke ra sega mada ga ni duavata kei keda se ra tusaqati keda. (Wilika Maciu 5:43-48.) Nida lotu vaKarisito, eda na saga ena noda vinaka kece meda kua ni cakava e dua na ka e veicalati kei na ivakaraitaki i Jisu.

11. Na cava e dredre kina ena so na gauna meda vakatotomuri Jisu?

¹¹ Eda kila ni Matanitu ni Kalou ena vakaotia vakadua na veika tawadodonu, ia ni caka vei keda, ena dredre ena so na gauna meda vakatotomuri Jisu. Dikeva na ka e yaco vua e dua na yalewa o Janiya, e vakaduiduitaki ena roka ni yagona. E kaya: “Au cudru vakalevu. Au rarawa sara ga, au vinakata mera totogitaki. Au vakasamataka meu tokona e dua na ilawalawa era saqata na veivakaduiduitaki. Au nanuma ni qo e dua na sala vinaka meu vakaraitaka kina noqu cudru.” Ia ni toso na gauna, e qai liaca o Janiya ni dodonu me veisautaka nona rai. E kaya: “Au liaca niu sega ni nuitaki Jiova, au sa nuitaka ga na tamata niu vakabauta na ka era tukuna. Au vakatulewataka meu sa biuta na ilawalawa qori.” Ke donu mada ga na ka eda cudruvaka, meda kua ga ni lai veitovaki ena veika vakapolitiki kei na kena sagai me wali na veika tawadodonu.—Joni 15:19.

12. Na cava meda digia vinaka kina na itukutuku eda wilika, rogoca, se sarava?

¹² Eda na lewa vakacava noda cudru nida raica na veika tawadodonu? Levu era raica ni yaga mera digia vinaka na ka era wilika, rogoca, se sarava. Eso na itukutuku e biu ena sala ni veikilai ena Internet era veivakarerei, era vakaucacataki tale ga kina na veiliutaki. Levu na gauna era na kaburaka ga na daunitukutuku na ka era nanuma, sega ni ka e yaco dina. Ke da rogoca mada ga e dua na itukutuku dina me baleta na veika tawadodonu, vakacava ena yaga ke da vakasamataka tiko ga? Ke da wilika vakalevu na itukutuku va qori, ena rawa nida cudru se yalolailai. (Vkai. 24:10) Koya e ca sara, eda na lai guilecava kina na iwali ni veika tawadodonu, ya na Matanitu ni Kalou.

13. Ena donu vakacava noda rai me baleta na veika tawadodonu nida dau wili iVolatabu e veisiga?

¹³ Eda na vosota na veika tawadodonu nida dau wili iVolatabu e veisiga qai vakasamataka vakatitobu. E rarawataka e dua na tacida yalewa o Alia na nodra vakalolomataki o ira ena nona itikotiko. Kena irairai ni sega ni dua na ka e caka vei ira na dau veivakalolomataki. E kaya: “Au mani taroga, ‘Au vakabauta dina ni na vakaotia o Jiova na leqa kece qo?’ Gauna qori au a wilika tiko na Jope 34:22-29. Au vulica ni sega ni dua na ka e vunitaki ena mata i Jiova. O koya ga e kila na sala mera lewai kina vakadodonu na tamata, ena vakaotia tale ga na leqa kece.” Nida waraka tiko na Matanitu ni Kalou me vakatulewa vakadodonu, e bibi meda vosota na veika tawadodonu ena gauna qo. Eda na cakava vakacava?

KA MEDA CAKAVA ENA VEIKA TAWADODONU

14. Na cava eda rawa ni cakava ena gauna qo? (Kolosa 3:10, 11)

¹⁴ Eda na rairai sega ni lewa rawa na ka tawadodonu era cakava eso tale, ia eda rawa ni lewa na ka eda cakava. Me vaka eda sa vulica mai, eda na vakatotomuri Jisu nida vakaraitaka na loloma. Na loloma qori ena uqeti keda meda dokai ira eso tale, vakabibi o ira na cakava vei keda na ka tawadodonu. (Maciu 7:12; Roma 12:17) Ena marau o Jiova nida caka vinaka vei ira na tamata kece, eda sega tale ga ni veivakaduiduitaki.—Wilika Kolosa 3:10, 11.

15. E yaga vakacava noda wasea na ka dina vakaivolatabu?

¹⁵ Na sala vinaka duadua meda vukei ira kina e levu, ya noda wasea vei ira na ka dina vakaivolatabu. Cava eda kaya kina qori? Baleta “na kilaka me baleti Jiova” ena rawa ni veisautaka e dua e cudrucudru se voravora me dau yalovinaka, dau loloma, e dau veiyaloni tale ga. (Aisea 11:6, 7, 9) Kena ivakaraitaki, ni bera ni vulica na dina e dua na tagane o Jemal, a lewena tu e dua na ilawalawa e saga me veisautaka na veiliutaki ena nona vanua, ni nanuma ni ca nodra veiliutaki. E kaya: “O na sega ni rawa ni vakasaurarataka e dua me veisau. Au a sega ni vakaukauataki meu veisau, ia e veisautaki au na ka dina.” Na ka e vulica o Jemal e veisautaki koya me kua ni dauvakavu ca. Cava eda vulica? Ni veisautaki ira e levu na ka dina vakaivolatabu, era na lewe lailai sara o ira na dauvakavu ca.

16. Na cava o vinakata kina mo tukuna na inuinui ni Matanitu ni Kalou?

¹⁶ Me vakataki Jisu, eda vinakata meda tukuna vei ira e levu ni Matanitu ni Kalou ga ena vakaotia vakadua na veika tawadodonu. Na inuinui qori ena vakayaloqaqataki ira e caka vei ira na veika tawadodonu. (Jere. 29:11) E kaya o Stacy, sa tukuni oti mai: “Noqu vulica na ka dina, au rawa kina ni vosota na veika tawadodonu e caka vei au, au raica tale ga. E veivakacegui o Jiova ni vakayagataka na iVolatabu.” Me rawa nida wasea na itukutuku veivakacegui mai na iVolatabu ena sala me oti kina na veika tawadodonu, e bibi meda vakavakarau vinaka. Ni o kila vinaka na ka dina vakaivolatabu eda veivosakitaka ena ulutaga qo, ena rawarawa nomu veivosakitaka ena veidokai e koronivuli se valenicakacaka.b

17. E vukei keda vakacava o Jiova meda vosota na veika tawadodonu?

¹⁷ Eda kila nida na sotava tiko ga na veika tawadodonu ni o Setani se ‘turaga tiko ga ni vuravura qo.’ Ia eda na sega ni yalolailai se rarawa nida waraka tiko me “biu laivi.” (Joni 12:31) E tukuna vei keda o Jiova ena nona Vosa na vuna e levu kina na veika tawadodonu kei na nona rai me baleta na rarawa. (Same 34:17-19) E vakavulici keda o Jiova ena ivakaraitaki i Luvena ena ka meda cakava ni caka vei keda na veika tawadodonu, kei na sala ena vakaotia kina vakadua nona Matanitu. (2 Pita 3:13) Meda gumatua tiko ga ni vunautaka na itukutuku vinaka ni Matanitu ni Kalou, qai vakanamata tu ena gauna ena roboti vuravura kina na “lewadodonu kei na ivalavala dodonu.”—Aisea 9:7.