Taro na Dauwiliwili

Na cava e vakaibalebaletaka o Jisu ena nona kaya ni “vuku” na nona dauveiqaravi yalodina?

A taroga o Jisu: “O cei mada na dauveiqaravi yalo dina ka vuku, ko koya e na lesia na nona turaga me lewa na nona matavuvale, me solia vei ira na kedra kakana e na kena gauna dodonu?” (Maciu 24:​45, VV) Na “dauveiqaravi” e vakarautaka na “kakana” vakayalo e dusia tiko na ivavakoso ni lotu Vakarisito lumuti. Na cava e vakatokai ira kina o Jisu mera vuku?a

E rawa ni macala vei keda na ka e vakaibalebaletaka o Jisu ena vosa na “vuku” nida dikeva na nona ivakavuvuli. Me kena ivakaraitaki, ni a vosa tiko me baleta “na dauveiqaravi yalodina ka vuku,” a vakayagataka o Jisu na vosa vakatautauvata baleti iratou na goneyalewa lewe tini eratou a yadrava na nona lako mai na tagane vakawati vou. O iratou na goneyalewa savasava oqo, da lai nanumi ira kina na lotu Vakarisito lumuti ni bera na 1914, era a namaka tiko nona tadu mai na tagane vakawati vou e levu cake, o Jisu Karisito. Lima vei ira na le tini na goneyalewa e lailai na waiwai eratou vakarautaka, eratou mani calata na magiti ni vakamau ni yaco mai na tagane vakawati vou. Ia, eratou vuku na vo ni lima na goneyalewa. Eratou vakarautaka vinaka na waiwai me rawa kina ni ratou vakacila rarama tiko ga me yacova nona tadu mai na tagane vou, eratou mani sureti ina kana magiti.​—Maciu 25:​10-​12.

Ni mai veiliutaki o Jisu ena Matanitu ni Kalou ena 1914, era namaka e levu na lotu Vakarisito lumuti mera na tomani koya i lomalagi ena gauna oya. Ia, a se levu na cakacaka e vuravura mera na cakava, qai so e sega tu ni vakavakarau kina. Me vakataki iratou na goneyalewa lialia, era se sega ni kaukaua tu vakayalo, ra sega gona ni vakarautaki ira vinaka mera rarama tiko ga. Ia, e levu ga era valavala vuku, era yalomatua, ra qai vakasamataka na ka ena rawa ni yaco, e vakavuna nodra kaukaua vakayalo. Nira mai kila ni se vo levu tu na cakacaka, era marau sara ni vakayacora. Koya gona, e vakadinadinataki koya ni “dauveiqaravi yalo dina ka vuku.”

Vakasamataka tale ga na nona vakayagataka o Jisu na vosa “vuku” ena Maciu 7:​24. A kaya: “Ko koya yadua sa rogoca na noqu vosa oqo, ka cakava, ka’u na vakatautauvatataka kei na tamata vuku, sa tara na nona vale e na dela ni vatu.” E tara vale ena yavu e dei na tamata vuku, baleta ni vakasamataka tiko ni na rawa ni yaco na cagilaba. Kena veibasai, na tamata lialia e tara nona vale e dela ni nuku qai vakayalia. Koya gona, na tamata vuku e muri Jisu, sa na raica rawa tu na veika ca e vu mai na vuku vakatamata. Nona yalomatua kei na lewa matau, ena uqeti koya me yavutaka na nona vakabauta, ivalavala kei na ivakavuvuli ena veika e vakavulica o Jisu. E vaka kina “na dauveiqaravi yalo dina ka vuku.”

Dikeva tale ga na ivakavakayagataki ni “vuku” ena levu na tikina ena iVolatabu vakaIperiu. Kena ivakaraitaki, a lesi Josefa o Fero me lewa na kakana e Ijipita. Oqo e tiki ni ituvatuva i Jiova me vakarautaka na kakana vei ira na nona tamata. Cava e digitaki kina o Josefa? A kaya vua o Fero: “Sa sega e dua sa yalomatua ka vuku me vakataki iko.” (Vakatekivu 41:​33-​39; 45:5) E kaya tale ga na iVolatabu ni “yalomatua [vuku] o Apikali.” A vakarautaka o koya na kakana me kania na lumuti i Jiova, o Tevita, kei ira na nona tamata. (1 Samuela 25:​3, 11, 18) E rawa nida kaya ni rau vuku o Josefa kei Apikali baleta ni rau vakasamataka rawa tu na ka ena yaco, rau qai vakatulewa vakavuku.

Koya gona, ni tukuna o Jisu ni vuku na dauveiqaravi yalodina, e vakaraitaka ni o ira na matataka na dauveiqaravi oya era yalomatua, ra dau vakasamataka na ka e rawa ni yaco ra qai lewa matau, nira yavutaka nodra vakabauta, ka era cakava kei na nodra ivakavuvuli ena ivakavuvuli dina ni Vosa ni Kalou.

[iVakamacala e ra]