Taro na Dauwiliwili

Nira vakaroti na Jiu mera kua ni kania “e dua na ka sa vakaleveni” ena kanavata ni Lakosivia, na cava ga e vakayagataka kina o Jisu na waini​—na ka e tautauvata vinaka kei na madrai e vakaleveni​—ena nona tauyavutaka na iVakananumi ni nona mate?​—Lako Yani 12:20; Luke 22:​7, 8, 14-​20.

A tauyavutaki na Lakosivia ena 1513 B.S.K., me vakananumi kina nodra biuti Ijipita na Isireli. Me baleta na Lakosivia, a vakarota o Jiova: “Mo dou kakua ni kania e dua na ka sa vakaleveni: dou kania ga na madrai sa sega ni vakaleveni e na nomudou veivale kecega.” (Lako Yani 12:​11, 20) Na ivakaro vakalou oqo e baleta na madrai me na laukana ena Lakosivia. A sega ni cavuti kina na waini.

Na vu ni kena sega ni vakayagataki na leveni, oya nira a vakusakusa na Isireli ena nodra biubiu mai Ijipita. E kaya na Lako Yani 12:34: “Ko ira na tamata era sa kauta na kedra madrai droka ni sa sega ni vakalevenitaki, ia era sa dreketa lako na nodra sedre sa natuki kina na madrai, ka sa oloni e na nodrai sulu.” Nodra sega gona ni vakayagataka na leveni ena nodra solevu ni Lakosivia ena veiyabaki e muri, era nanuma lesu kina na Isireli na veika a yaco oya.

Ni toso na gauna, sa dau vakatakarakarataka na leveni na ivalavala ca se na dukadukali. Me kena ivakaraitaki, a taroga na yapositolo o Paula me baleta e dua a vakayacora na ivalavala tawakilikili ena loma ni ivavakoso: “Dou sa sega beka ni kila sa dauvakalevenitaka nai buli taucoko na leveni lailai?” E kuria: “O koya mo dou qai biuta tani na leveni makawa, mo dou yaco kina mei buli vou, me vaka dou sa sega ni vakalevenitaki. Ni sa vakamatei oti e na vukuda na noda lako-sivia, io na Karisito. O koya me da qai ia na soqoni, me kakua ga e na leveni makawa, se na leveni ni yaloca, kei na ivalavala ca; e na yalosavasava ga kei na yalodina sa sega ni vakaleveni.” (1 Korinica 5:​6-8) Na madrai ga e sega ni vakaleveni, e ganita me vakatakarakarataka na yago uasivi i Jisu.​—Iperiu 7:​26.

E muri, era qai vakayagataka na Jiu na waini ena Lakosivia. Kena irairai, ni a tekivu vakayagataki ena gauna era lesu mai kina vakavesu i Papiloni. E sega ni vakacala na iVolatabu na vakayagataki ni waini, oya na vuna a vakayagataka kina o Jisu ena kanavata ni Lakosivia. Ena gauna makawa, na ka e yaco ena waini e biu dede tu e duidui sara mai na ka e yaco ni vakalevenitaki na madrai. Ni natu na falawa, ena vinakati na isi se na leveni me qai tubu kina. E sega ni gadrevi me vakayagataki na veika oqori ena waini e caka mai na vuanivaini. Na veika oqo sa tu rawa ena vuanivaini. Na wai ni vuanivaini vou e dau tamusuki ena vulaibotabota, ena sega ni rawa ni vakayagataki ena Lakosivia e vakayacori ena vulaitubutubu, baleta ni sa na waini tu kina.

Nona vakayagataka o Jisu na waini me ivakatakarakara ni iVakananumi e sega ni veisaqasaqa kei na ivakaro me baleta na leveni ena Lakosivia. Na waini damudamu e sega ni vakamikamicataki, se wakivata kei na dua tale na alakaolo, se vakaisaluaki, e rawa ni vakayagataki me ivakatakarakara ni nona “dra talei” na Karisito.​—1 Pita 1:​19.