Sega ni Digidigi Donu na iLiuliu Vutuniyau
E DODONU na nona ivalavala na iliuliu gone vutuniyau, e dau muria na lawa, e daulotu tale ga. Ia, a tarogi Jisu: “Vakavuvuli vinaka, a cava na ka vinaka me’u kitaka, me’u rawata kina na bula tawamudu?”
A kaya o Jisu ni bibi vua na gone vutuniyau me muria na ivakaro ni Kalou me rawata kina na bula. Ni vinakata me vakamatailalaitaki na veika e vauci kina, a kaya o Jisu: “Mo kakua ni laba, Mo kakua ni ia na veibutakoci, Mo kakua ni butako, Mo kakua ni veibeitaki vakailasu, Vakarokoroko vei rau na tamamu kei na tinamu: ka, Mo lomana na kai nomu me vaka ko lomani iko.” Oqori era tiki bibi ni Lawa a soli vei Mosese. Sa qai kaya na cauravou oya: “A ka kecega oqori ka’u a vakabauta ga ni ka’u sa gone ka yacova na siga oqo; a cava tale sa vo vei au?”—Maciu 19:16-20.
A “sa lomana” o Jisu, qai kaya: “E dua na ka sa sega vei iko: mo lako, mo volitaka na ka kecega sa tu vei iko, ka solia vei ira sa dravudravua, ko na qai vakaiyau mai lomalagi: ia lako mai, ka muri au.”—Marika 10:17-21.
E dua na vakatulewa bibi e gadrevi me na cakava na iliuliu gone oya. Na cava me na vakatulewataka? Ena digia beka me biuta nona iyau me muri Jisu, se na via taukena tiko ga? Na iyau vakacava ena digitaka, na iyau ni vuravura se vakalomalagi? Ena sega ni rawarawa nona digidigi. E kauaitaka dina na veika vakayalo, ni dau muria na Lawa qai via kila na veika me cakava me vakadonui koya kina na Kalou. Ia na cava e digitaka? A ‘lako ena rarawa, ni sa levu na nona iyau.’—Marika 10:22.
A sega ni digidigi donu na iliuliu gone. Ke a yalodina ni muri Jisu, ke a rawata na ka sara ga a qara voli—na bula tawamudu. Eda sega ni kila na veika e qai yaco vua na cauravou oya. Ia, e kilai ga nira kabai Jerusalemi na mataivalu ni Roma ni oti ga e vasagavulu na yabaki, ra vakarusai kina e levu na Jiu kei na nodra iyau.
Ni vakatauvatani kei na cauravou vutuniyau, eratou a digidigi vakayalomatua na yapositolo o Pita kei na vo ni tisaipeli. A yaga dina na nodratou “biuta na ka kece” me ratou muri Jisu. E kaya o Jisu ni ratou na vakalougatataki vakalevu cake. Io, eratou na rawata na bula tawamudu. Eratou na sega sara ga ni veivutunitaka na nodratou digia me ratou muri Jisu.—Maciu 19:27-29.
O keda kece eda dau vakatulewa ena noda bula—ena veika lalai kei na veika lelevu. Na cava na ivakasala i Jisu me baleta na vakatulewa vaka oqori? O na muria beka na nona ivakasala? Ke vakakina, o na vakalougatataki dina. Meda dikeva mada na sala e rawa nida muri Jisu kina kei na yaga ni nona ivakasala.