Cakava na Loma ni Kalou Nikua

“Sa mate ko koya [Karisito] e na vuku ni tamata kecega, me ra kakua ni bula tiko me yaga vei ira ga.”​—2 KORINICA 5:​15.

1. Tukuna mada na nona vakasavuirogorogo e dua na daukaulotu ena nona ilesilesi.

“NI OTI na veivaluvaluti vakalewenivanua, e imatai ni lori me curuma na koro vakaAferika tu yawa oqo na neitou lori,” a kaya o Aaron e dua na daukaulotu.a “A dredre na sala ni veivosaki kei na ivavakoso lailai mai kea, e bibi kina me kilai na ka era gadreva na mataveitacini. Me ikuri ni kakana, isulu kei na ivola vakaivolatabu, keitou kauta tale ga na vidio Jehovah’s Witnesses​—The Organization Behind the Name.b Era mai sarava e levu na tataleitaki, era tabili ina bure ni sara iyaloyalo ena koro e tiko kina na retioyaloyalo kei na vidio, mani gadrevi me keitou vakaraitaka vakarua. A tauyavutaki e levu sara na vuli iVolatabu ena kena saravi na vidio oya. Sega ni vakabekataki ni a yaga dina na neitou sasaga.”

2. (a) Na cava era vakadeitaka kina na lotu Vakarisito mera vakayagataka nodra bula ena veiqaravi vua na Kalou? (b) Na taro cava eda na dikeva?

² Na cava e bolea kina o Aaron kei ratou na nona itokani na ilakolako dredre oqori? Ena levu ni nodratou vakavinavinakataka na isoro i Jisu Karisito, eratou yalataka kina na nodratou bula vua na Kalou, ratou qai via cakava na lomana. Me vakataki ratou ga, era vakadeitaka kece na lotu Vakarisito yalayala mera “kakua ni bula tiko me yaga vei ira ga,” ia mera cakava na ka kece era rawata “e na vuku ni tukutuku-vinaka.” (2 Korinica 5:​15; 1 Korinica 9:​23) Era kila na lotu Vakarisito, ni gauna e cava kina na ituvaki kei vuravura oqo, ena sega ni yaga na ilavo kei na rogo ena vuravura. O koya gona, era via vakayagataka na nodra bula kei na nodra kaukaua mera cakava na loma ni Kalou. (Dauvunau 12:1) Eda rawa ni cakava vakacava oqo? Eda na vakaukauataki se vakayaloqaqataki vakacava? Cava e so na sala ni veiqaravi e tadola tu vei keda?

Toso Tiko ga Vakayalo

3. Na cava soti e vauci ena kena tekivu vakayacori na loma ni Kalou?

³ E nodra sasaga tudei na lotu Vakarisito mera cakava na loma ni Kalou. Dau tekivu ga ena nodra curu ena Koronivuli ni Vuli Vunau, wilika vakawasoma na iVolatabu, cakacaka vakavunau, ra qai papitaiso sara. Nida toso tiko vakayalo, meda nanuma na vosa ni yapositolo o Paula: “Mo dauvakananuma na veika oqo; mera rawai iko sara; me rairai kina ni ko sa vuku cake mai e na ka kecega.” (1 Timoci 4:​15) Na noda toso vakayalo e sega ni ka meda vakacerecerei kina, ia eda sa vakadeitaka tiko ga na noda soli keda ena vakayacori ni loma ni Kalou. Oqo e vakaraitaka nida nuitaka na Kalou me dusimaki keda ena basoga ni noda bula kece, ni vinaka cake sara nona veidusimaki.​—Same 32:8.

4. Na cava eda rawa ni cakava meda kua ni lomaleqataka na ka e sega soti ni bibi?

⁴ Na noda tu suka se kauaitaki keda vakasivia e rawa ni vakataotaka noda toso ena qaravi Jiova. (Dauvunau 11:4) Koya gona, e dodonu meda valuta na veika eda dau lomaleqataka kevaka eda via marautaka na noda veiqaravi vua na Kalou kei ira e so tale. Kena ivakaraitaki, a vakasamataka o Erik me lai veiqaravi ena dua na ivavakoso e duatani na kena vosa. Ia, a qai leqataka: ‘Era na ciqomi au beka? Au na taleitaki ira beka na mataveitacini? Era na taleitaki au?’ E kaya: “Au qai liaca ni dodonu meu kauaitaki ira vakalevu na taciqu, sega niu kauaitaki au ga. Au mani saga meu kua ni lomaleqataka na veika oqo, ia meu veiqaravi ga ena noqu vinaka taucoko. Au kere veivuke ena masu, au qai saga meu rawata na noqu isausau. Ena gauna oqo, au sa marautaka tiko na noqu veiqaravi ena ivavakoso oya.” (Roma 4:​20) Io, kevaka eda qarava na Kalou ena lomada taucoko da qai tu vakarau meda vukei ira e so tale, eda na marau qai lomavakacegu.

5. Na cava e gadrevi kina meda lalawataka vakavinaka na ka nida cakava na loma ni Kalou? Tukuna e dua na kena ivakaraitaki.

⁵ Kevaka da via cakava vakavinaka na loma ni Kalou, e gadrevi meda lalawataka vakavinaka na ka meda cakava. Eda na sega ni binia tu na dinau me rawa ni vakabobulataki keda ina veika vakavuravura qai vakataotaka na noda qarava na Kalou. E vakasalataki keda na iVolatabu: “O koya sa dau kerekere ena dauveiqaravi vua e soli ka vua.” (Vosa Vakaibalebale 22:​7, NW) Ena donu na noda rai kevaka eda nuitaki Jiova da qai vakaliuca tiko ga na veika vakayalo. Kena ivakaraitaki, eratou vakaitikotiko kei tinadratou ena dua na vanua e saulevu kina na vale, o Guoming kei rau na ganena. E dredre tale ga me kunei e kea na cakacaka vinaka. Ia, ena nodratou vakayagataka vinaka na ilavo kei na nodratou veivuketaka na sausaumi, eratou rawata kina na veika me ratou bula kina, dina ni ratou na sega ni cakacaka kece ena so na gauna. E kaya o Guoming: “So na gauna keitou sega ni veisaumi kece. Ia, keitou se rawa ni cakacaka vakapainia tiko ga, qaravi tale ga o Nau. Keitou vakavinavinakataka ni sega ni vinakata o Nau me keitou biuta na veika vakayalo me keitou qaravi koya kina vakailavo.”​—2 Korinica 12:14; Iperiu 13:5.

6. Na ivakaraitaki cava e dusia ni rawa ni salavata na noda bula kei na loma ni Kalou?

⁶ Kevaka o sa vakaogai iko tiko ena cakacaka saumi​—oya na veika vakailavo se so tale na ka​—ena rairai gadrevi mo veisau me rawa ni o vakaliuca na loma ni Kalou. Ena sega ni yaco na veiveisau oqo ena dua ga na gauna lekaleka. Kevaka eda sikalutu nida se qai tekivu, meda kua ni lai nanuma ni sa guce na noda sasaga. Dikeva mada na ivakaraitaki i Koichi, dau nona malumalumu na vakayagataki vakasivia ni gauna ena ka ni veivakamarautaki. A vulica na iVolatabu ni se itabagone, ia sa vakayabaki na nona bobula tu ina video games. Dua na siga a kaya e lomana: ‘Cava mada o cakava tiko? O sa yabaki 30 vakacaca, ia se sega tu ga ni vakainaki na nomu bula!’ A tomana na nona vuli iVolatabu o Koichi qai ciqoma na nodra veivuke na lewe ni ivavakoso. Dina ni taura toka na gauna me qai veisau, ia a sega ga ni soro. Ena nona masu vagumatua kei na nodra veiuqeti na mataveitacini, e vorata kina na nona malumalumu. (Luke 11:9) Ena gauna oqo sa dauveiqaravi tiko ena ivavakoso o Koichi.

Saga me Veiraurau Nomu Bula

7. Na cava e dodonu kina me veiraurau na noda bula nida cakava tiko na cakacaka ni Kalou?

⁷ E dodonu meda solia na lomada taucoko nida cakava na loma ni Kalou. Meda kua ni tu suka se vucesa. (Iperiu 6:​11, 12) Ia, e sega ni vinakata o Jiova me vakacauoca ena yagoda se na noda vakasama. Noda vakadinata ena yalomalumalumu nida sega ni rawa ni cakava na cakacaka ni Kalou ena noda kaukaua ga, sa da vakalagilagi koya kina, da vakaraitaka tale ga ni veiraurau na noda rai. (1 Pita 4:​11) E yalataka o Jiova ni na vakaukauataki keda meda vakayacora na nona inaki, ia meda kua ga ni vakaocai keda tale ena noda cakava na ka e sega ni namaka vei keda o Jiova. (2 Korinica 4:7) Ena gadrevi meda lewa vinaka na ka eda cakava me kua kina ni vakacauoca na noda qaravi Jiova tiko ga.

8. Na cava a yaco vua e dua na goneyalewa lotu Vakarisito ni a via solia na nona vinaka taucoko me qarava ruarua na vuravura kei Jiova? Na veisau cava a cakava?

⁸ Kena ivakaraitaki o Ji Hye, mai na tokalau kei Esia. E rua na yabaki nona cakacaka tu ena dua na cakacaka e vakaosoosotaki koya sara vakalevu ena gauna a painia voli kina. “Au tovolea meu solia na noqu vinaka taucoko vei Jiova kei na noqu cakacaka,” e kaya, “ia e rauta ga ni lima na aua noqu moce. Toso na gauna sa sega vei au na kaukaua meu qaravi Jiova kina, au sega tale ga ni marautaka na veika vakayalo.” Me rawa ni qaravi Jiova o Ji Hye ena ‘lomana taucoko, yalona taucoko, nona nanuma kece, kei na nona kaukaua kece,’ a vaqara e dua tale na cakacaka saumi e sega ni vakaosoosotaki koya sara vakalevu. (Marika 12:30) “Dina nira vakaukauataki au na lewe ni noqu vuvale meu rawa ilavo, au dei ga ena noqu sasaga meu vakaliuca na loma ni Kalou,” e kaya. “Se veirauti tiko na ilavo au rawata me voli kina na ka ni bula e veisiga, me vaka na isulu rakorako, au qai lomavakacegu niu sa rawa ni moce tale vakavinaka! Au marautaka na cakacaka vakavunau, sa qaqaco tale ga na noqu veiwekani kei Jiova ena gauna oqo. Na vuna niu sa sega ni kauaitaka na veiuqeti kei na veivakamuai ni vuravura.”​—Dauvunau 4:6; Maciu 6:​24, 28-​30.

9. Ena tarai ira vakacava na tamata na noda sasaga ena cakacaka vakavunau?

⁹ Eda sega ni rawa ni veiqaravi kece vakatabakidua vua na Kalou. Kevaka e gadrevi meda vosota e so na ituvaki me vaka nida sa itabaqase, tauvimate kei na so tale na ituvaki e yalani kina na ka eda cakava, meda nanuma tiko ni kila vinaka o Jiova qai marautaka na noda yalodina kei na veiqaravi cava ga eda cakava mai vu ni lomada. (Luke 21:​2, 3) O koya gona, meda kua ni vakawalena na cakayaco ni noda sasaga ena vukudra e so tale, dina ni na lailai na ka eda cakava. Kena ivakaraitaki, kaya mada ke da lai vunau ena vica na vale qai sega ni dua e via vakarorogo. Nida sa biubiu, era na rairai veitalanoataka na itaukeinivale kei ira na sega ni dolava na nodra katuba, na noda dau sikovi ira wasoma, dina nira sega ni vakarorogo! Meda kua ni namaka nira na ciqoma kece na itukutuku vinaka, ia e rawa nira ciqoma e so. (Maciu 13:​19-​23) De ra na qai ciqoma e so tale ni sa veisau na kedra ituvaki se na veika e yaco tiko e vuravura. Se mani cava e yaco, na noda vakaitavi ena cakacaka vakaitalatala ena kena levu eda rawata, eda sa cakava sara tiko ga na cakacaka ni Kalou. Eda okati kina meda “daucakacaka vata kei koya na Kalou.”​—1 Korinica 3:9.

10. Na cava soti eda rawa ni cakava na lewe ni ivavakoso kece?

¹⁰ Kena ikuri, eda na rawa kece ni vukei ira na lewe ni noda vuvale kei ira na tacida vakayalo ena ivavakoso. (Kalatia 6:​10) Ena rawa ni yaga qai tawamudu na noda ivakaraitaki vinaka. (Dauvunau 11:​1, 6) Kevaka era qarava vinaka nodra itavi ena ivavakoso na qase kei na dauveiqaravi, ena bulabula vakayalo qai dei na ivavakoso, tubu tale ga na cakacaka vakarisito. Eda vakadeitaka ni “sega ni ka wale” na noda ‘vakaogai keda ena cakacaka ni Turaga.’​—1 Korinica 15:​58, VV.

Me Nomu iSausau na Vakaliuca na Loma ni Kalou

11. Na cava e so tale na taba ni veiqaravi eda rawa ni cakava me ikuri ni kena eda sa qarava tiko ena ivavakoso eda lewena?

¹¹ Nida lotu Vakarisito, eda marautaka na bula, da qai via vakalagilagia na Kalou ena ka kece eda cakava. (1 Korinica 10:31) Nida yalodina na vunautaka na itukutuku vinaka ni Matanitu ni Kalou, da qai vakavulici ira e so tale mera muria na ka kece e vakarota o Jisu, ena tadola kina vei keda e levu tale na sala ni veiqaravi. (Maciu 24:14; 28:​19, 20) E sega ni yalani na noda veiqaravi ena ivavakoso eda lewena, eda rawa tale ga ni veiqaravi ena vanua e gadrevi kina na veivuke​—ena dua tale na yalava, vosa, se vanuatani. O ira na qase ni ivavakoso kei na dauveiqaravi era se bera ni vakawati, e rawa nira sureti mera lai vuli ena Koronivuli ni Vuli ni Veiqaravi Vakaitalatala kevaka era rawata na kena ivakatagedegede. Oti, mera na lai veiqaravi ena ivavakoso e gadrevi kina na lotu Vakarisito matua, ena nodra dui vanua se i vanuatani. O ira na vakawati era cakacaka vakaitalatala vakatabakidua e rawa nira lai vuli e Kiliati mera daukaulotu ra qai veiqaravi e vanua tani. Gadrevi tale ga e levu na bole cakacaka me qaravi kina na dui itavi e Peceli, na tara kei na maroroi ni vale ni soqoni kei na valenivolavola ni tabana.

12, 13. (a) O na vakatulewataka vakacava na veiqaravi mo sauva? (b) Vakamacalataka se rawa ni yaga vakacava ina so tale na cakacaka na kila e rawati mai na dua na ilesilesi.

¹² Na veiqaravi cava e dodonu mo sauva? Nida sa yalataki keda vei Jiova, eda na rai ga vua kei na nona isoqosoqo me vakasalataki keda qai dusimaki keda. Ena vukei iko na nona “yalo tabu” mo vakatulewa dodonu. (Niemaia 9:​20) Na ka o vulica ena dua na ilesilesi e vakarautaki iko, qai rawa ni yaga ena so tale na ilesilesi.

¹³ Kena ivakaraitaki, rau dau vakaitavi ena tara Kingdom Hall o Dennis kei na watina o Jenny. Ena gauna a ravuta kina na ceva kei Mereke na cagilaba o Katrina, rau bole sara me rau lai veivuke. E kaya o Dennis: “Keirau marau vakalevu ni keirau vakayagataka na kila keirau a vulica mai na tara Kingdom Hall, me keirau vukei ira kina na tacida. E tarai keirau na nodra vakavinavinaka na mataveitacini era a vukei. Levu na isoqosoqo era cakava na cakacaka ni vakacoko e lailai sara na ka era rawata. Era sa tara oti, se vakavinakataka tale ga na iVakadinadina i Jiova e sivia e 5,300 na vale kei na levu na Kingdom Hall. Era raica qo na tamata qai vakavuna mera kauaitaka vakalevu na itukutuku ni Matanitu ni Kalou.”

14. Na cava o rawa ni cakava ke o via cakacaka vakaitalatala vakatabakidua?

¹⁴ Vakacava, e rawa ni o vakaliuca na loma ni Kalou ni o digia me nomu cakacaka tudei na cakacaka vakaitalatala? Ke vaka kina, e sega ni vakabekataki ni o na vakalougatataki sara vakalevu. Ke vakadredretaka nomu vakaliuca na loma ni Kalou na kemu ituvaki, de dua ena rawa ni veisautaki. Mo vakataki Niemaia mada ga ena nona masu ni via vakayacora na ilesilesi bibi: “Kemuni na turaga, . . . mo ni vakayacora mada na ka e cakava na nomuni tamata.” (Niemaia 1:​11) Ena nomu nuitaki koya “sa daurogoca na masu,” me salavata kei na ka o kerea na ka o cakava. (Same 65:2) E gadrevi taumada na sasaga me rawa ni vakalougatataki iko o Jiova ena nomu qaravi koya vakatabakidua. Ni o sa vakatulewataka mo cakacaka vakaitalatala vakatabakidua, kabita dei na nomu vakatulewa oqori. Ni toso tiko na gauna o sa na qaseta nomu veiqaravi, o na marau tale ga kina vakalevu.

Bula e Vakainaki Dina

15. (a) Ena yaga vakacava na noda veitalanoa kei ira sa veiqaravi dede tu vua na Kalou se na noda wilika na kedra italanoa? (b) Tukuna na italanoa ni nona bula e dua e tarai iko sara ga.

¹⁵ Na cava soti o rawa ni namaka ni o vakaliuca na loma ni Kalou? Veitalanoa kei ira na sa qaravi Jiova tu mai vakadede, vakauasivi o ira sa balavu na nodra cakacaka vakaitalatala vakatabakidua. E kalougata qai vakainaki dina na nodra bula! (Vosa Vakaibalebale 10:22) Era na kaya vei iko ni dau vukei ira tu ga o Jiova, ena gauna mada ga era bula donuya kina na ituvaki dredre, mera rawata na ka era gadreva dina tu, kei na levu tale. (Filipai 4:​11-​13) Mai na 1955 ina 1961, a tabaka veitaravi Na Vale ni Vakatawa na italanoa ni nodra bula e so na mataveitacini yalodina ena ulutaga “Cakava na iNaki ni Noqu Bula.” Tekivu mai na gauna oya me yacova mai oqo, sa vica vata tale na drau na italanoa ni bula vaka oya sa tabaki. Era vakaraitaka kece na italanoa oqo na yalo ni gugumatua kei na marau me vaka eda wilika ena ivola ni iVolatabu na Cakacaka. Nida wilika na italanoa vakatubuqoroqoro vaka oya, ena uqeti keda meda kaya, ‘Au via bula sara ga vaka oya!’

16. Na cava ena vakainaki qai marautaki kina na nona bula e dua na lotu Vakarisito?

¹⁶ E nanuma lesu o Aaron, a cavuti ena itekitekivu ni ulutaga oqo: “Au dau sotava e levu na itabagone era veigoleyaki e Aferika nira vakasaqara na inaki ni bula. Levu era sega ni kunea. Ia, keitou cakava tiko na inaki ni Kalou ena neitou vakaliuca na itukutuku vinaka ni nona Matanitu, keitou qai marautaka na bula e vakainaki dina qai ka ni bolebole toka. Keitou vakadinadinataka sara ga ni levu cake na marau ena noda soli ka mai na noda taura na ka.”​—Cakacaka 20:35.

17. Na cava meda vakaliuca kina ena gauna oqo na loma ni Kalou?

¹⁷ Vakacava o iko? Na cava o vakaliuca tiko? Ke sega na ka o lalawataka tu vakayalo, ena rawarawa sara na kena vakaosooso mai e so tale na ka. Na cava mo vakalusia kina na nomu bula ena veika e vakaliuca na vuravura sega ni vakainaki i Setani? Sega ni dede sa na yaco na ‘veivakararawataki levu,’ era na sega ni yaga kina na itutu kei na iyau vakavuravura. Na ka ga e bibi na noda veiwekani kei Jiova. Dua na ka na noda vakavinavinaka nida qarava na Kalou, nida a vukei ira e so tale, kei na noda vakaliuca vakatabakidua na loma ni Kalou!​—Maciu 24:21; Vakatakila 7:​14, 15.

[iVakamacala e ra]

Vakamacalataka Mada

• Na cava na rai i Jiova me baleta na noda veiqaravi vua?

• Ena vukei keda vakacava na noda toso tiko ga vakayalo kei na veiraurau ni noda bula, ena noda qarava na Kalou kei ira na so tale?

• Na cava e so na basoga ni veiqaravi sa tadola tu vei keda?

• E rawa ni vakainaki vakacava na noda bula ena gauna oqo?

[iYaloyalo ena tabana e 23]

E gadrevi me veiraurau noda bula kevaka eda via qaravi Jiova tiko ga ena yaloda taucoko

[iYaloyalo ena tabana e 24]

E levu na tabana eda rawa ni veiqaravi tabu kina