Vakabulai Mai Vua na Daubiri Dai

“Ni na vakabulai iko dina [o Jiova] mai na nona tudai na tamata sa daubiri dai.”​—SAME 91:3.

1. O cei na “daubiri dai,” cava e vakarerevaki kina?

E BULA maliwai ira kece na lotu Vakarisito dina e dua na dau veivakamatei, e vuku sara qai lawaki ca. E vakamacalataki koya na Same 91:3 ni “daubiri dai.” O cei beka na meca oqo? A se tukuni sara tu mai ena ilavelave ni Watchtower, 1 June, 1883, me o Setani na Tevoro. Na nona ilawaki qaseqase me vakamuai ira cala qai coriti ira na tamata i Jiova, e vaka ga na kena tudaitaki e dua na manumanu vuka.

2. Na cava e vakatauvatani kina o Setani ina dua na daubiri dai?

² Era dau toboki na manumanu vuka e liu baleta na rogorogo vinaka ni nodra sere, na duiroka ni vutidra, ra laukana, se cabori me isoro. Ia, era manumanu kidakida totolo, ra qai tobotobo dredre. Era dau saga gona na daubiri dai ena gauna vakaivolatabu, mera kilai ira vinaka na veimataqali manumanu kei na nodra imoimoi, ra qai vakayagataka e so na ilawaki qaseqase mera tudaitaki kina. Ni vakatauvatani Setani gona na iVolatabu me vaka na daubiri dai, sa vakatakila sara tiko ga vei keda na iwalewale e dau vakayagataka me veicoriti kina. E saga na Tevoro me kilai keda yadudua. E wanonova matua na noda ivalavala kei na noda itovo, sa qai biria vaqaseqase na dai me coriti keda bulabula kina. (2 Timoci 2:​26) Ke coriti keda ena nona dai, sa macala tu ga nida na vakaleqai vakayalo, da qai tini vakarusai sara kina. E dodonu gona meda na kila e so na iwalewale e vakayagataka na “daubiri dai” oqo meda taqomaki kina.

3, 4. Na gauna cava e dau vaka kina na laione kei na gata loa na ilawaki i Setani?

³ E vakatauvatana tale ga na daunisame na ilawaki i Setani me vaka na ka e dau cakava na laione se gata loa. (Same 91:13) Me vaka ga e dua na laione, e dau ravuti ira na tamata i Jiova o Setani ena veivakacacani se veilewai. (Same 94:20) Vica sa ra biuti Jiova ena vuku ni veivakacacani kaukaua vaka oya. Levu ga na gauna e sega ni dau yaco na nodra inaki, baleta nira vakaduavatataki tale na tamata ni Kalou ena vuku ni nodra veivakacacani. Ia, vakacava na nona sagai keda lo toka me vaka na gata o Setani?

⁴ E vakayagataka na Tevoro na nona vuku e uasivita na vakasama ni tamata me veivakacalai kina, qai dau gaga nona veisaqati, vaka ga na ikati gaga dauveivakamatei ni gata e vuni lo tu. E vakacalai kina na nodra vakasama e so na tamata ni Kalou mera cakava na lomana, sega ni loma i Jiova, qai dau tini ga ina leqa. Eda kalougata nida sega ni lecava na ilawaki i Setani. (2 Korinica 2:​11) Meda dikeva mada oqo e va na ilawaki dauveivakamatei e vakayagataka na “daubiri dai.”

Rerevaka na Tamata

5. Na cava e cakayaco kina vakalevu na icori ni “rerevaka na tamata”?

⁵ E kila vinaka na “daubiri dai” nira dau vinakata na tamata mera taleitaki se ciqomi. Ra dau kauaitaka na lotu Vakarisito na nodra rai se nanuma na tu wavoliti ira. Nona kila vinaka tu oqori na Tevoro, sa qai cakacaka kina, dau vakavuna gona mera kauai vakalevu na tamata ena ka era nanuma e so tale me baleti ira. Kena ivakaraitaki, nona vakayagataka na icori ni “rerevaka na tamata” me rawai ira kina e so na dauveiqaravi ni Kalou. (Vosa Vakaibalebale 29:25) Kevaka era rerevaka na tamata na dauveiqaravi ni Kalou ra qai cakava kina na ka e cata se ra beca na nona ivakaro ena iVolatabu, sa rawai ira sara tiko ga na “daubiri dai.”​—Isikeli 33:8; Jemesa 4:​17.

6. Na ivakaraitaki cava e vakavotuya nona rawa ni corita e dua na itabagone na “daubiri dai”?

⁶ Kena ivakaraitaki, e rawa nira vakaukauataka e dua na itabagone na nona icaba me vakatavako, qai rawai kina. De a sega ni bau vakasamataka me na vakatavako ni biubiu ena mataka oya me lai vuli. Ia, sega ni dede sa coriti tu ina dua na ka ena leqa kina na yagona, e cata tale ga na Kalou. (2 Korinica 7:1) A bacani mada vakacava? De dua na nona vakailala ca ga, qai lomaleqataka nira na beci koya. Ra itabagone, ni qarauna me kua ni bacani kemuni na “daubiri dai,” mo ni coriti kina! Ke o sega ni vinakata mo rawai, kua ni soro koso ena veivakatovolei lailai mada ga. Muria na ivakaro vakaivolatabu mo kua ni vakailala cala.​—1 Korinica 15:33.

7. E coriti ira vakacava e so na itubutubu o Setani mera vakawalena nodra veika vakayalo?

⁷ Na itubutubu lotu Vakarisito dau kauai, ena vakabibitaka nona itavi e yavutaki ena iVolatabu me vakarautaka na isolisoli vakayago vua nona lewenivuvale. (1 Timoci 5:8) Ia e inaki i Setani me sivia tale nodra vakabibitaka na lotu Vakarisito na itavi oqori. De dua sa lai vakavuna nodra calata wasoma na soqoni nira veiuqeti na boso ni cakacaka me levu na gauna era cakacaka kina. Era na rairai rere na kerea mera vagalalataki mera tiko kei ira na tacidra vakayalo ena porokaramu kece ni soqo ni tikina, mera sokaloutaki Jiova. Ia, kevaka eda “vakararavi vei Jiova” eda na sega ni rawai ena icori oqori. (Vosa Vakaibalebale 3:​5, 6) Ena vakataudeitaki keda tale ga noda kila nida lewe kece ni vuvale i Jiova, qai dau tu vakarau o koya me karoni keda. Kemuni na itubutubu, ni vakabauta beka ni kauaitaki kemuni kei ira na nomuni vuvale o Jiova ena nomuni cakava tiko na lomana? Se na coriti kemuni bulabula beka na Tevoro mo ni cakava na lomana ena nomuni rerevaki ira na tamata? Ni uqeti mo ni dau masulaka na veika oqo.

Na iCori ni Domodomoiyau

8. E vakayagataka vakacava o Setani na icori ni domodomoiyau?

⁸ E dau vakayagataka tale ga o Setani na icori ni domodomoiyau me coriti keda kina. E uqeta na buturara ni bisinisi ena vuravura oqo na vutuniyau totolo, e rawa sara mada ga nira vakacalai kina e so na tamata ni Kalou. Era uqeti e so vaka oqo: “Cakacaka sara vakaukaua. Gauna o sa rawati iko kina, qai vakacegu, mo marautaka na bula. Rawa mada ga ni o painia.” E dau vaka oya na nodra rai e so era dau saga mera rawaka vei ira na tacidra era vakavatu ena ivavakoso vakarisito. Vakasamataka na kena uqeti na bula vaka oya. Sega li ni tautauvata vinaka kei na nona rai na turaga vutuniyau e “lialia” ena ivakatautauvata i Jisu?​—Luke 12:​16-​21.

9. Era na rairai coriti vakacava e so na lotu Vakarisito mera dau gadreva na ka?

⁹ E vakayagataka tale ga o Setani na ituvaki ca nikua me uqeti ira kina na tamata mera dau gadreva na ka. Na gagadre vaka oya e rawa ni vakaleqa nona bula e dua na lotu Vakarisito, me vakaruguta na vosa qai sega ni “vua.” (Marika 4:​19) E uqeti keda na iVolatabu meda lomavakacegu ena kakana kei na isulu sa tu vei keda. (1 Timoci 6:8) Ia, e levu e rawai ira na “daubiri dai” nira sega ni bulataka na ivakasala oya. De tiko beka vei ira na dokadoka, ra nanuma kina ni vinaka vei ira e dua ga na ivakarau ni bula. Vakacava o keda? Eda dau vakaliuca beka na veika eda gadreva, qai ikarua ni ka na sokalou dina? (Akeai 1:​2-8) Ka ni rarawa ni so era sa vakawalena na nodra bula vakayalo ena gauna ni leqa vakailavo mera kua ni biuta na bula sa matau vei ira. Na domodomoiyau sara ga vaka oya e marau kina na “daubiri dai”!

Na iCori ni Veivakamarautaki e Veivakaleqai

10. Na cava mera dikeva yadudua na lotu Vakarisito?

¹⁰ Dua tale na ivadi e vakayagataka na “daubiri dai” oya na nona vakacalai ira na tamata ena nodra sega ni rawa ni vakaduiduitaka na vinaka mai na ca. Sa lewa tu na buturara ni veivakamarautaki na ivakarau ni vakasama a laurai e Sotoma kei Komora. So na gauna e vakaraitaki ena itukutuku e kacivaki ena retioyaloyalo kei na ivola na itovo voravora kei na veivakauqeti ni veiyacovi. Levu na ka e saravi ena buturara ni veivakamarautaki kei na tabana ni vakauitukutuku, e vakabuawataka na kena ‘vakaduiduitaki na vinaka mai na ca.’ (Iperiu 5:​14, VV) Nanuma na ka e tukuna o Jiova vua na parofita o Aisea: “Era na ca ko ira era vakatoka na ca me vinaka, kei na vinaka me ca!” (Aisea 5:​20) Vakacava, sa vesuka tu beka na nomu vakasama na “daubiri dai” ena ka ni veivakamarautaki e veivakaleqai? Bibi kina mo dikevi iko tale mada.​—2 Korinica 13:5.

11. Na cava a veivakasalataki kina na ivola oqo me baleta na porokaramu ena retioyaloyalo na soap opera?

¹¹ Rauta na 25 na yabaki sa oti a vakasalataki ira vakayalololoma na dauveiqaravi ni Kalou Na Vale ni Vakatawa me baleta na porokaramu ena retioyaloyalo.a Oqo na ka e tukuni me baleta na veibacani ni dua na porokaramu e dau saravi vakalevu, na soap opera: “Sa dau iulubale ni ka kece e yaco na veidomoni. Kena ivakaraitaki, e tukuna e dua na goneyalewa e buketeisala: ‘Au domoni Victor. Au sega ni via kila nodra nanuma e so tale. . . . Bibi ga meu vakaluveni vua!’ Na ivakatagi malumu tale ga e salamuria na nona vosa oya sa bau veivesuki dina, dredre meda kaya ni cala na ka e cakava. Vakavuna meda taleitaki Victor, da lomani goneyalewa tale ga. Da rawa sara ga ni vakadonuya na ka rau cakava tiko. ‘Dau kurabuitaki tale na noda via vakaiulubaletaka na ka e yaco,’ e kaya e dua a sarasara tale ga, ia e qai liaci koya. ‘Eda kila vinaka ni cala na itovo vakasisila. . . . Ia, au qai liaca ni sa vesuki sara tiko ga na noqu vakasama meu tokona na nodrau ivalavala.’ ”

12. Na itukutuku dina cava e vakaraitaka ni veiganiti na ivakasala me baleta e so na porokaramu ena retioyaloyalo?

¹² Me tekivu mai na gauna e tabaki kina na ulutaga oya, sa qai levu tiko ga na iwiliwili ni porokaramu veivakacalai nikua. Levu na vanua e saravi kina me 24 na aua ena veisiga. Sa ra vakatawana sara ga ena nodra vakasama kei na lomadra na mataqali veivakamarautaki vaka oya na tagane, yalewa, kei na itabagone. Ia meda kua ni vakaisini keda ena noda dau vakalecalecava. Ena cala ke nanumi ni ca ga na veivakamarautaki vakasisila e yaco dina, mai na kena e saravi wale tu ga. E tiko beka na iulubale vinaka ni dua na lotu Vakarisito ena nona vakatulewa mera vakamarautaki koya na mataqali tamata ena sega ni vakacuruma ina nona vale?

13, 14. Era vakamacalataka vakacava e so na yaga ni ivakasala me baleta na retioyaloyalo?

¹³ Sa yaga vei ira e levu na nodra rogoca na ivakasala ni “dauveiqaravi yalodina ka vuku.” (Maciu 24:​45-​47, VV) So era volavola mai ena gauna era wilika oti kina na ivakasala taudonu e yavutaki vakaivolatabu oya, mera vakamacalataka na kena yaga vei ira.b Kaya e dua: “E 13 na yabaki na noqu bobula tu ina soap opera. Au nanuma niu na dei tiko ga vakayalo ena noqu dau tiko ena soqoni, niu vakaitavi tale ga ena so na cakacaka vakavunau. Ia sa tiko vei au na rai vakavuravura e dau vakaraitaki ena soap opera, oya ni sa iulubale vinaka ni nomu veibutakoci ke sega ni kauaitaki iko se lomani iko o watimu​—baleta ni vakavuna ga o koya. Niu nanuma ni sa iulubale vinaka oya, au veibutakoci kina, au valavala ca gona vei Jiova kei watiqu.” Mani vakasivoi na tacida yalewa oqo. Oti oya sa qai liaci koya, e veivutuni, qai vakasukai mai. Na iulutaga e veivakasalataki me baleta na porokaramu ni soap opera ena retioyaloyalo, e vakaukauataki koya me cata na ka ni veivakamarautaki e cata o Jiova.​—Emosi 5:​14, 15.

¹⁴ E dua tale na dau wiliwili e vakamacalataka vaka oqo na kena yaga vua: “Au tagi niu wiliki ira na ulutaga oqo, au liaca niu a sega ni lomani Jiova dina mai vu ni lomaqu. Au yalataka kina vua niu na sega ni bobula tale ina porokaramu vaka oya.” Ni oti nona vakavinavinakataka na ivola, e vakatusa e dua na yalewa lotu Vakarisito na ka a bobula tu kina: “Au vakasamataka . . . de na vakacaraka noqu veiwekani kei Jiova. Rawa vakacava niu veitokani kei ira, meu qai itokani tale ga i Jiova?” Kevaka sa vakacalai na lomadra na tamata ena 25 na yabaki sa oti ena mataqali porokaramu ena retioyaloyalo vaka oya, vakacava nikua? (2 Timoci 3:​13) Meda qarauna sara na icori ni veivakamarautaki cava ga e vakayagataka o Setani e veivakaleqai​—na soap opera ena retioyaloyalo, qito voravora ena vidio, se na vidio ni ivakatagi vakasisila.

Na iCori ni Duiyaloyalo

15. Era coriti bulabula vakacava e so ena dai ni Tevoro?

¹⁵ E vakayagataka tale ga o Setani na duiyaloyalo me tawasei ira na tamata i Jiova. Rawa sara ga nida vakacalai se mani itavi cava vakarisito eda vakacolati kina. So e coriti ira bulabula o Setani nira vakalaiva na duiyaloyalo me vakacaraka na nodra vakacegu kei na duavata e vakalougatataki ira tiko kina vakayalo o Jiova.​—Same 133:​1-3.

16. E saga tiko vaqaseqase vakacava o Setani me vakacaraka noda duavata?

¹⁶ Ena iMatai ni iValu Levu, a saga o Setani me vakarusa na isoqosoqo i Jiova e vuravura ena nona veitusaqati kaukaua, ia e guce ga. (Vakatakila 11:​7-​13) Me tekivu mai na gauna oya, sa tekivu saga tiko vaqaseqase me vakacaraka noda duavata. Na gauna eda vakatara kina na duiyaloyalo me vakacaraka noda duavata, eda sa soli keda sara tiko ga vakarawarawa vua na “daubiri dai.” Eda sa tarova tiko kina na kena sobuti keda kei na ivavakoso na yalo tabu. Kevaka e yaco oqori, ena marau o Setani baleta ni na tarova na cakacaka ni vunau na nona vakacaraka na vakacegu kei na duavata ni ivavakoso.​—Efeso 4:​27, 30-​32.

17. Kevaka eda duiyaloyalo kei na dua na itokani vakarisito, meda na walia vakacava?

¹⁷ Na cava mo cakava ke drau duiyaloyalo kei na dua na itokani lotu Vakarisito? Ena duidui na ituvaki. Dina ga ni levu na vuna e yaco kina na duiyaloyalo, ia e dodonu me wali. (Maciu 5:​23, 24; 18:​15-​17) E uasivi na ivakasala ena Vosa ni Kalou. Ena sega vakadua ni cala na yavu ni ivakavuvuli ena iVolatabu kevaka eda bulataka. Sega ni vakabekataki ni na yaga dina!

18. Eda na walia vakacava na duiyaloyalo nida vakatotomuri Jiova?

¹⁸ E “tu vakarau ni veivosoti” o Jiova qai dau “veivosoti dina.” (Same 86:​5, NW; 130:​4, NW) Nida vakatotomuri Jiova eda sa vakavotuya tiko nida luve daulomani ni Kalou. (Efeso 5:1) Eda ivalavala ca kece da qai gadreva vakalevu na veivosoti i Jiova. Meda qarauna gona kevaka eda sega ni via vosota e dua. Eda rawa ni vakataki koya na bobula ena ivakatautauvata i Jisu, ni a sega ni vosota e dua tale na bobula a dinautaka vua na ilavo lailai sara. Ni sa lai rogoca na nona turaga, a vakarota me biu e valeniveivesu na bobula sega ni dau veivosoti oya. E tinia o Jisu na ivakatautauvata oya ena nona kaya: “E na cakava tale ga vaka kina vei kemudou ko Tamaqu vakalomalagi, kevaka dou sega ni dau vosoti ira na wekamudou mai na vu ni yalomudou.” (Maciu 18:​21-​35, VV) Nida vakasamataka na ivakatautauvata oya kei na nona dau vosoti keda wale o Jiova, ena veiuqeti dina ena noda saga ni walia na noda duiyaloyalo kei na dua na tacida!​—Same 19:14.

Taqomaki “e na Nona Yasana Vuni ko Koya na Cecere Sara”

19, 20. Meda dau raica vakacava na “yasana vuni” i Jiova kei na nona “yaloyalo” ena gauna rerevaki eda sa bula tiko kina oqo?

¹⁹ Eda sa bula tu oqo ena gauna rerevaki. E rawa sara ga ni vakarusai keda kece o Setani ke sega na veitaqomaki yalololoma i Jiova. Me kua gona ni coriti keda na “daubiri dai” e dodonu meda dei “e na nona yasana vuni ko Koya na Cecere sara”​—na itataqomaki vakaivakatakarakara​—meda “tiko ga e na yaloyalo i Koya sa Kaukauwa.”​—Same 91:1.

²⁰ Me itataqomaki mada ga vei keda na itukutuku kei na ivakasala i Jiova, sega ni ka me yalani kina na noda galala. Eda bula tiko kei na dua na dau veivakamatei e vuku cake sara vei keda. Ke sega na veivuke yalololoma i Jiova ena sega ni dua e drotaka bula na nona dai. (Same 124:​7, 8) Meda masulaka gona me taqomaki keda o Jiova mai vua na “daubiri dai”!​—Maciu 6:​13.

[iVakamacala e ra]

O se Nanuma Tiko?

• Cava e veivakaleqai kina na icori ni “rerevaka na tamata”?

• E vakayagataka vakacava na Tevoro na icori ni domodomoiyau?

• Sa rawai ira vakacava e so o Setani ena icori ni ka ni veivakamarautaki e veivakaleqai?

• Na icori cava e vakayagataka o Setani me vakacaraka na noda duavata?

[iYaloyalo ena tabana e 27]

Era coriti e so nira “rerevaka na tamata”

[iYaloyalo ena tabana e 28]

O dau marautaka beka na ka e cata o Jiova?

[iYaloyalo ena tabana e 29]

Na cava mo cakava ke drau duiyaloyalo kei na dua na nomu itokani lotu Vakarisito?