Dau Yaco Dina na Vosa i Jiova

“Sa sega ni lutu e dua na ka e na ka vinaka kecega sa vosataka e na vukumuni ko Jiova na nomuni Kalou; sa yaco kecega vei kemuni.”​—JOSUA 23:14.

1. O cei o Josua, na cava a cakava ni sa voleka ni mate?

E TURAGANIVALU kaukaua, e yaloqaqa, e tamata vakabauta qai yalodina. A dau muri Mosese qai digitaki koya sara ga o Jiova me liutaka na matanitu o Isireli mai na vanualiwa rerevaki ina vanua e dave kina na wainisucu kei na oni. Ni sa voleka ni cava na nona bula na turaga dokai oqo, o Josua, a tauca e dua na vosa ni tatau veivakauqeti vei ira na qase ni Isireli. Sega ni vakabekataki ni a vaqaqacotaka nodra vakabauta na rogoci koya. Ena vaqaqacotaka tale ga na nomu vakabauta.

2, 3. Ena gauna a vosa kina o Josua vei ira na qase ni Isireli, a vakacava tu na ituvaki kei Isireli, na cava a kaya o Josua?

² Raitayaloyalotaka mada na ituvaki e vakamacalataki ena iVolatabu: “Sa vakacegui ira na Isireli vakadede ko Jiova mai na nodra meca kecega sa vakavolivoliti ira, ka sa qai qase mai ko Josua; ka sa vuqa na nona yabaki: sa qai kacivi ira kecega na Isireli ko Josua, kei ira na nodra qase, kei ira na nodra turaga, kei ira na nodra mataveilewai, kei ira na nodra turaga lalai, a sa kaya vei ira, Au sa qase mai ka sa vuqa na noqu yabaki.”​—Josua 23:​1, 2.

³ Sa voleka ni yabaki 110 o Josua, qai bula ena dua na gauna vakairogorogo ena nodra volaitukutuku makawa na tamata ni Kalou. A raica sara ga na cakacaka lelevu ni Kalou, qai vakadinadinataka na kena vakayacori e levu na vosa ni yalayala i Jiova. O koya gona, ena veika e vakadinadinataka sara ga o koya, a kaya kina ena nuidei: “Dou sa kila e na lomamuni taucoko kei na yalomuni taucoko, ni sa sega ni lutu e dua na ka e na ka vinaka kecega sa vosataka e na vukumuni ko Jiova na nomuni Kalou; sa yaco kecega vei kemuni; sa sega ni lutu e dua na ka oqori.”​—Josua 23:14.

4. Na cava soti a vakadeitaka o Jiova vei ira na Isireli?

⁴ Na vosa cava i Jiova a vakayacori ena gauna i Josua? Eda na dikeva e tolu na veivakadeitaki i Jiova vei ira na Isireli. Kena imatai, ni na sereki ira mai na nodra tu vakabobula. Kena ikarua, ena taqomaki ira. Kena ikatolu, ena karoni ira tiko. E tautauvata tale ga na veivakadeitaki i Jiova vei ira na nona tamata ena gauna oqo, eda sa vakadinadinataka na kena vakayacori, me vakataki Josua ga. Ni bera nida veivosakitaka na ka e cakava o Jiova ena noda gauna, meda dikeva mada na ka a cakava ena gauna i Josua.

Sereki Ira Nona Tamata o Jiova

5, 6. A sereki ira vakacava na Isireli mai Ijipita o Jiova, cava e vakadinadinataki kina?

⁵ Nira tagi vei Jiova na Isireli baleta nira tu vakabobula mai Ijipita, a rogoci ira na Kalou. (Lako Yani 2:​23-​25) A vosa mai na vunikau kama o Jiova vei Mosese: “Ka’u sa lako sobu mai me’u vakabulai ira [na noqu tamata] mai vei ira na kai Ijipita, ka me’u kauti ira cake mai na vanua ko ya ki na vanua vinaka ka levu sara, ki na vanua sa dave kina na wai-ni-sucu kei na oni.” (Lako Yani 3:8) A vakasakiti dina na kena vakadinadinataki nona cakava o Jiova na vosa oqo! Sega ni via sereki ira na Isireli o Fero, qai tukuna vua o Mosese ni na vukica na Kalou na wai ena uciwai na Naile me dra. A yaco dina na vosa i Jiova. A vuki me dra na uciwai na Naile. Era mate na ika qai sega ni gunuvi na kena wai. (Lako Yani 7:​14-​21) Ia, a yalokaukaua ga o Fero, qai vakatauca o Jiova e ciwa tale na kuita, e tukuni ira yadudua ni bera ni vakayacora. (Lako Yani, wase 8-​12) Nira mate na gone ulumatua ni Ijipita ena ikatini ni kuita, sa qai vakaroti ira na Isireli o Fero mera lako​—ra qai biubiu dina na Isireli!​—Lako Yani 12:​29-​32.

⁶ Na veisereki oya a yaco kina o Isireli me nona matanitu digitaki o Jiova, e solia tale ga vei ira na nona Lawa. Vakadinadinataki kina ni o Jiova e dau vakayacora na nona vosa ni yalayala, e dau yaco dina na nona vosa. E vakaraitaka ni kaukaua sara o Jiova vei ira na kalou ni veimatanitu tale e so. E vaqaqacotaki na noda vakabauta nida wilika na veisereki oya. Raitayaloyalotaka mada na nomu raica sara tu ga na veika oya! Vakadinadinataka o Josua ni o Jiova “Sa Cecere sara duaduaga e vuravura taucoko.”​—Same 83:18.

Taqomaki Ira Nona Tamata o Jiova

7. E taqomaki ira vakacava na Isireli o Jiova mai na mataivalu i Fero?

⁷ Vakacava na ikarua ni veivakadeitaki i Jiova, oya me dau taqomaki ira na nona tamata? A kovuti oqo ena vosa ni yalayala i Jiova me sereki ira na Isireli qai kauti ira ina Vanua Yalataki. Vakasamataka mada nona muri ira na Isireli o Fero ena levu ni nona cudru kei na nona mataivalu kaukaua, era vodo yani ena vicanadrau na qiqinivalu. Sa na wacava mada nona nuidei na turaga yaloqaciqacia oya, vakauasivi nira sa rairai tao tu na Isireli ena maliwa ni veiulunivanua kei na wasawasa! Qai taqomaki ira nona tamata na Kalou ena nona biuta e dua na duru o ena kedra maliwa na Isireli kei na Ijipita. A butobuto na nodra yasana na Ijipita; a rarama na nodra yasana na Isireli. Ni se vakaberaberataka tiko na o na nodra toso na Ijipita, a dodoka nona ititoko o Mosese qai wase rua na Wasa Damudamu, era mani dro na Isireli ra qai luvuci na Ijipita ena loma ni wasawasa. A vakarusa kina vakadua o Jiova na mataivalu kaukaua i Fero, qai sega ni vakawabokotaki na nona tamata.​—Lako Yani 14:​19-​28.

8. Na veitaqomaki cava era vakila na Isireli (a) ena vanualiwa kei (b) na nodra curuma yani na Vanua Yalataki?

⁸ Nira sa takosova na Wasa Damudamu, era veilakoyaki voli na Isireli ena vanua e vakatokai me “vanua liwa ka rerevaki ko ya, sa tiko kina na gata vakabukawaqa kei na batibasaga, kei na vanua sa sega kina na wai.” (Vakarua 8:​15) A taqomaki ira tale ga e ke o Jiova. Ia, vakacava na nodra sa curuma yani na Vanua Yalataki? Era veitusaqati na mataivalu kaukaua ni Kenani. E kaya ga o Jiova vei Josua: “Mo cavu tu, mo qalo-kosova na Joritani oqo, ko iko kei ira kecega na tamata oqo, ki na vanua ka’u na solia vei ira, io vei ira na Isireli. Ena sega e dua me vorati iko rawa e na veisiga kecega ko na bula kina: au na tiko vata kei iko, me vaka ka’u a tiko vata kei Mosese: au na sega ni weletaki iko, se biuti iko.” (Josua 1:​2, 5) A yaco dina na vosa oqo. Ena loma ga ni ono na yabaki, a vakadruka e 31 na tui o Josua qai vakamalumalumutaka e levu na iwasewase ni Vanua Yalataki. (Josua 12:​7-​24) A rawata ga oqo o Josua ena veitaqomaki i Jiova.

Karoni Ira Nona Tamata o Jiova

9, 10. E karoni ira vakacava nona tamata o Jiova ena vanualiwa?

⁹ Dikeva mada oqo na ikatolu ni veivakadeitaki i Jiova​—ena karoni ira nona tamata. Ni oti ga nodra sereki mai Ijipita, a yalataka na Kalou vei ira na Isireli: “Raica, ka’u na vakatauca vei kemudou na kakana [“madrai,” NW] mai lomalagi; a ra na curu yani na tamata, ka kumuna vata e na veisiga nai votavota sa rauta na siga yadua.” Me vaka a yalataka, a vakarautaka o Jiova na “madrai mai lomalagi.” “Ni ra sa raica na Isireli, era sa veikayaka vakai ira, A cava oqo? ni ra sa sega ni kila se cava beka.” Oqo na mana, na madrai a yalataka vei ira o Jiova.​—Lako Yani 16:​4, 13-​15.

¹⁰ Ena loma ni 40 na yabaki ena vanualiwa, a karoni ira tiko na Isireli o Jiova ena nona vakarautaka na kedra kakana kei na medra wai. E raica me kua ni madra na nodra isulu, me kua tale ga ni vuvuce na yavadra. (Vakarua 8:​3, 4) E raica kece oqo o Josua. Io, me vaka ga e yalataka o Jiova, e sereki ira nona tamata, e taqomaki ira, qai karoni ira.

Veisereki ena Noda Gauna

11. Na cava a yaco e Brooklyn, Niu Yoka, ena 1914? Na veisau cava sa yaco?

¹¹ Vakacava ena noda gauna? Ena mataka ni Vakaraubuka, 2 Okotova, 1914, a curu yani ina valenikana e Peceli mai Brooklyn, Niu Yoka, o Charles Taze Russell, a liutaka tiko ena gauna oya na nodra cakacaka na Gonevuli ni iVolatabu. “Ni yadra vinaka kece,” e kaya. Ni bera ni dabe, e kaya sara ena marau: “Sa cava na nodra gauna na Veimatanitu Tani; sa oti na gauna ni veiliutaki ni nodra tui.” Sa kena gauna me yavala tale kina o Jiova, na Turaga Cecere ni lomalagi kei vuravura me vakabulai ira nona tamata. A qai vakabulai ira dina!

12. Na veisereki cava a yaco ena 1919, na cava e vakilai kina?

¹² Oti tale e lima na yabaki, a sereki ira nona tamata o Jiova mai vei ‘Papiloni na Ka Levu,’ na lotu lasu kece e vuravura. (Vakatakila 18:2) So ga vei keda na bula donuya na gauna oqori eda a vakadinadinataka na veisereki vakasakiti oya. Ia, eda sa raica tu oqo na ka a yaco ena vuku ni veisereki oqori. A tauyavutaka tale o Jiova na sokalou savasava qai vakaduavatataki ira na sokaloutaki koya. Sa tukuna tu mai vakailiu na tikina oqo o Aisea: “Sa na yaco e na gauna maimuri, ni na vakataudeitaki na ulu-ni-vanua ni vale i Jiova me sivia na veiulu-ni-vanua, ena vakaceceretaki ka me lolovira na veiulu-ni-koro; ka ra na drodro kina na veimatanitu kecega.”​—Aisea 2:2.

13. Na tubu cava o raica vei ira na tamata i Jiova?

¹³ A yaco dina na vosa i Aisea. Ena 1919, era doudou na ivovo ni lumuti mera tekivutaka na cakacaka vakavunau e vuravura raraba e tabea cake na sokaloutaki ni Kalou dina. Matata ena veiyabaki ni 1930 nira sa kumuni tale tiko ga mai e ‘so tani tale na sipi.’ (Joni 10:16) Taumada era gole mai e vica na udolu, oti era yau mai e vica na drau na udolu, nikua era sa tabili mai e vica na milioni mera tokona na sokalou dina! Ena raivotu e raica na yapositolo o Joni, e tukuni nira “dua nai soqosoqo levu sara, e sega e dua na tamata e wilika rawa, mai na veivanua kece, kei na veimataqali, kei na veimatanitu, kei na duivosavosa.” (Vakatakila 7:9) Na cava o sa bau vakadinadinataka? Era le vica na iVakadinadina i Jiova e vuravura ni o se qai vulica na ka dina? Nikua, sa sivia e 6,700,000 na kedra iwiliwili na tamata era qaravi Jiova. Ni sereki ira nona tamata mai vei Papiloni na Ka Levu, e vakarautaka o Jiova na sala me yaco kina na tubu vakasakiti eda vakadinadinataka e veiyasa i vuravura.

14. Na veisereki cava e sa vakarau yaco?

¹⁴ Sa vakarau yavala tale o Jiova me veisereki​—oqo ena kovuti kina na tamata kece e veiyasa i vuravura. Ena vakaraitaka kina o Jiova na vakasakiti ni nona kaukaua ni sa vakarusai ira kece na tusaqati koya tiko, qai vakabulai ira nona tamata mera tawana na vuravura vou ni yalododonu. Ena marautaki dina meda raica ni sa na oti vakadua na ca qai tekivu na gauna vakasakiti duadua ena volaitukutuku ni kawatamata!​—Vakatakila 21:​1-4.

Veitaqomaki i Jiova ena Noda Gauna

15. Na cava e gadrevi kina na veitaqomaki i Jiova ena gauna oqo?

¹⁵ Eda sa raica nira gadreva na veitaqomaki i Jiova na Isireli ena gauna i Josua. Eda gadreva beka na tamata i Jiova ena gauna oqo na nona veitaqomaki? Io, e vaka kina! A vakadreti ira na nona imuri o Jisu: “Dou na qai soli yani me vakararawataki, ka dou na vakamatei; ia dou na cati vei ira na lewe ni veivanua kecega e na vuku ni yacaqu.” (Maciu 24:9) Ena veiyabaki sa sivi, era vosota na iVakadinadina i Jiova ena levu na vanua na veitusaqati kaukaua kei na veivakacacani. Ia, e macala ni a taqomaki ira nona tamata o Jiova. (Roma 8:​31) E vakadeitaka vei keda na nona Vosa ‘ni na sega ni yaco na iyaragi kece ga sa caka me kemu,’​—ena sega ni dua e tarova na kacivaki ni Matanitu ni Kalou kei na veivakavulici.​—Aisea 54:17.

16. O vakadinadinataka vakacava ni dau taqomaki ira nona tamata o Jiova?

¹⁶ Dina ni cati ira na tamata i Jiova o vuravura, ia e tubu tiko ga na kedra iwiliwili. E tubu tiko na kedra iwiliwili na iVakadinadina i Jiova ena 236 na vanua​—ivakadinadina ni taqomaki keda tiko o Jiova vei ira na via vakamatei keda se vagalui keda. O se nanuma tiko na yacadra na daunipolitiki kaukaua se iliuliu ni lotu ena nomu itabagauna era a vakacacani ira vakaca na tamata ni Kalou? Na cava sa yacovi ira? Era tiko e vei ena gauna oqo? Levu era sa mate me vakataki Fero ga ena gauna i Mosese kei Josua. Ia, vakacava o ira na dauqaravi i Jiova ena noda gauna era mate ena yalodina? E nanumi ira vinaka tu o Jiova. E macala gona ni dau veitaqomaki o Jiova, me vaka ga e tukuna.

Karoni Ira Nona Tamata ena Gauna Oqo o Jiova

17. Na cava e kaya o Jiova me baleta na kakana vakayalo eda na tuberi kina meda toro voleka vua?

¹⁷ A karoni ira nona tamata o Jiova ena vanualiwa, qai cakava vaka kina na gauna oqo. E vakani keda vakayalo na “dauveiqaravi yalo dina ka vuku” meda toro voleka kina vua na Kalou. (Maciu 24:​45, VV) Eda kila kina na ka dina vakayalo era vunitaki tu me vica vata na senitiuri. A kaya na agilosi vei Taniela: “Mo maroroya na vosa, ka dregata nai vola, me yaco mada na kenai vakataotioti: era na veiciciyaki na lewe vuqa, ka na vakalevutaki talega na vuku.”​—Taniela 12:4.

18. Na cava e tukuni kina ni sa levu nikua na kilaka dina?

¹⁸ Eda sa bula tu oqo ena gauna ni ivakataotioti, sa vakalevutaki tale ga na vuku se kilaka dina me baleta na Kalou. E vuravura raraba, e uqeti ira na lomana na ka dina na yalo tabu mera rawata na kilaka dodonu me baleta na Kalou dina kei na nona inaki. Sa sinai e vuravura nikua na iVolatabu, vaka kina na ivola e tuberi ira na tamata mera kila na ka dina ena iVolatabu. Me kena ivakaraitaki, dikeva mada na lewenivola ena ivola ni vuli Na Cava Sara Mada e Kaya na iVolatabu? a E so na kena ulutaga: “Na Cava Sara Mada e Kaya na iVolatabu me Baleti Koya na Kalou?,” “Era Tu e Vei na Mate?,” “Na Cava na Matanitu ni Kalou?,” kei “Na Cava e Vakalaiva Kina na Kalou me Yaco Tiko ga na Veika Rarawa?” Sa vica na udolu na yabaki na noda dau vakasamataka tu na tamata na taro oqori. Sa tu rawarawa sara ena gauna oqo na isaunitaro. Dina ni sa oti oqo e vica na senitiuri ni lecaika kei na ivakavuvuli vukitani ni lotu ni Veivanua Vakarisito, e se kaukaua ga na Vosa ni Kalou, e vakayaloqaqataki ira na vinakata mera qaravi Jiova.

19. Na vosa ni yalayala cava o raica ni sa vakavatukanataki, na cava o nanuma kina?

¹⁹ Eda kaya ena vuku ni ka eda sa vakadinadinataka sara ga e matada: “Sa sega ni lutu e dua na ka e na ka vinaka kecega sa vosataka e na vukumuni ko Jiova na nomuni Kalou; sa yaco kecega vei kemuni; sa sega ni lutu e dua na ka oqori.” (Josua 23:14) O Jiova e dau veisereki, veitaqomaki, qai dau karoni ira nona tamata. O bau kila beka e dua nona vosa ni yalayala a sega ni vakayacora ena gauna e lokuca kina? Sega, era sa vakavatukana kece. Eda yalomatua gona ni nuitaka na Vosa ni Kalou.

20. Na cava eda nuitaka kina ni na vinaka na veigauna e se bera mai?

²⁰ Vakacava na veigauna e se bera mai? E tukuna o Jiova ni levu vei keda e rawa ni nuitaka na bula ena vuravura ena veisautaki me parataisi totoka. So e nodra inuinui mera na veiliutaki kei Karisito e lomalagi. Se cava na noda inuinui, e tiko na yavu vinaka meda yalodina tiko ga me vakataki Josua. Ena yaco dina mai na siga ena vakavatukanataki kina na noda inuinui. Eda na qai nanuma na vosa ni yalayala kece i Jiova, eda na qai kaya: “Sa yaco kecega.”

[iVakamacala e ra]

Vakamacalataka Mada

• Na vosa ni yalayala cava i Jiova e raica o Josua ni vakayacori?

• Na vosa ni yalayala cava i Jiova o sa vakadinadinataka ni yaco?

• Cava eda vakadeitaka me baleta na vosa ni Kalou?

[iYaloyalo ena tabana e 23]

A sereki ira nona tamata o Jiova

[iYaloyalo ena tabana e 23]

A taqomaki ira vakacava nona tamata o Jiova ena Wasa Damudamu?

[iYaloyalo ena tabana e 24]

E karoni ira vakacava nona tamata o Jiova ena vanualiwa?

[iYaloyalo ena tabana e 25]

E kauaitaki ira nona tamata ena gauna oqo o Jiova