O Dau Veivakacegui Vei Ira na Tani?
ENA ceva ni veiulunivanua o Lepanoni e koto kina na ulunivanua o Erimoni. E 2,814 na mita na kena cere mai waitui. Dau vakalevu me solegi waicevata na dela i Erimoni ena loma ni yabaki taucoko, oqo e dau vakavuna na kena cevata na kabu e liwa e delana, vakavuna sara na lutu ni tegu. Na tegu e dau mirika na veikau kei na kauvuata era tubu ena baba kei na were ena vanua lolovira. Ena gauna ni draki mamaca e Isireli makawa, na tegu sara ga oqo e dau vakasuasuataka na kau drokadroka.
Ena dua na sere uqeti vakalou, a vakatauvatani na nodra tiko veiyaloni na qaravi Jiova ina “tegu mai Erimoni ka lutu sobu ki na ulu-ni-vanua ko Saioni.” (Same 133:1, 3) Me vaka ga na kena vakabulabulataka na kau drokadroka na tegu mai na ulunivanua o Erimoni, e rawa tale ga nida vakabulabulataki ira eda sotava. Ena sala cava?
iVakaraitaki i Jisu
E dau tarai ira sara ga na tamata na ivakaraitaki i Jisu Karisito, dina ke lekaleka mada ga nodra tiko kei koya. Kena ivakaraitaki, a vola na dauvola Kosipeli o Marika: “A sa keveti ira [ko Jisu], ka tabaki ira e na ligana, ka vosavakalougatataki ira.” (Marika 10:16) Sa na wacava na nodra vakacegui na gone oya!
Ena iotioti ni nona bogi e vuravura, a vuya o Jisu na yavadratou na nona tisaipeli. E rairai tara sara ga na lomadratou na nona yalomalumalumu. A kaya vei iratou o Jisu: “[Au] sa solia e dua nai vakarau vei kemudou, mo dou kitaka me vaka ka’u sa kitaka oti vei kemudou.” (Joni 13:1-17) Io, e dodonu me ratou yalomalumalumu tale ga. A sega ni cudru o Jisu ni ratou sega ni kila ena gauna oya na tisaipeli na ibalebale ni nona vosa, ratou qai veibataka ena bogi oya se o cei e uasivi cake vei ratou. Ia, a vakamacala ga vakamalua vei ratou o Jisu. (Luke 22:24-27) Ena gauna mada ga ‘a vakasewasewani kina, a sega tale ni ia na veivakasewasewani.’ Ena gauna tale ga, ‘a vakararawataki kina, a sega ni vosavakacudrucudru; a laivi koya ga vua sa lewa vakadodonu.’ E bibi meda vakatotomuria na nona dau veivakacegui o Jisu.—1 Pita 2:21, 23.
A kaya o Jisu: “Vakataqara vei kemudou na noqui vua, ka vuli vei au, ni’u sa yalomalua ka yalomalumalumu: dou na kunea kina na vakacegu ni yalomudou.” (Maciu 11:29) Raitayaloyalotaka mada ni vakavulici iko sara ga o Jisu. O ira mada ga na lewe ni nona koro era kurabui nira rogoca na nona veivakavulici ena nodra valenilotu, ra qai kaya: “E rawata maivei ko koya oqo na vuku oqo, kei na cakacaka-mana?” (Maciu 13:54) Nida wilika na italanoa ni bula i Jisu kei na nona cakacaka vakavunau, eda vulica kina na veika meda na cakava meda vakacegui ira kina na tani. Meda dikeva sara mada na ivakaraitaki vakasakiti i Jisu ena nona vosa veiuqeti kei na nona dau tu vakarau me vukei ira na tani.
Me Veivakacegui Tiko ga na Noda Vosa
E rawarawa sara noda basuraka na vale mai na noda tara e dua. Na vakasama oqori e tautauvata sara ga kei na vosa. Nida tamata ivalavala ca, e tiko kece na noda malumalumu. E kaya o Tui Solomoni: “Sa sega na tamata yalododonu e vuravura, sa caka vinaka tiko, ka sega ni caka cala.” (Dauvunau 7:20) E rawarawa sara na noda dusia na nona malumalumu e dua da qai basuraki koya sobu ena vosa mosimosi. (Same 64:2-4) Ena yasana kadua, e gadrevi na sasaga kei na vakasama vakayalomatua me veitaraicake se veivakauqeti kina noda vosa.
E vakayagataka o Jisu na vosa me vakauqeti ira kina na tamata. A vakacegui ira vakayalo ena nona kacivaka na itukutuku ni Matanitu ni Kalou. (Luke 8:1) A vakacegui ira tale ga era mai nona tisaipeli ena nona vakatakilai Tamana vakalomalagi vei ira. (Maciu 11:25-27) Sa rauta mera tabili vei Jisu na tamata!
Kena veibasai, o ira na vunivola kei na Farisi era sega ni dau nanumi ira na tani. E kaya o Jisu: “Era dau vinakata ga na veitikina dokai e na kana magiti, kei na i tikotiko vinaka duadua e na valenilotu.” (Maciu 23:6, VV) Era dau raici ira sobu na tauvanua ra qai kaya: “Era sa rusa na tamata oqo era sa sega ni kila na vunau.” (Joni 7:49) Sega sara ga ni veivakacegui na nodra itovo!
Na noda vosa e vakaraitaka na ivakarau ni lomada kei na noda rai me baleti ira na tani. E kaya o Jisu: “A tamata vinaka sa kauta mai na ka vinaka mai na lololo vinaka ni lomana: kei na tamata ca sa kauta mai na ka ca mai na lololo ca ni lomana: ni sa vosataka na gusuda na ka sa oso vakalevu kina na lomada.” (Luke 6:45) Na cava gona eda rawa ni cakava meda vakadeitaka kina ni veivakacegui na noda vosa?
Dua na ka eda rawa ni cakava, oya meda tauri keda vakamalua da qai vakasama ni bera nida vosa. E kaya na Vosa Vakaibalebale 15:28: “A lomana na yalododonu sa daunanuma na ka me kaya.” E sega ni tukuni me balavu sara na noda vakasamataka na ka meda kaya. Ia, nida vakasama vakailiu, eda rawa ni kila se na ciqomi vakacava na ka eda vakarau tukuna. Rawa nida taroga: ‘E vakaraitaka beka na noqu veinanumi na ka au vakarau kaya? E itukutuku dina se ka e rogoci wale tu ga? E tauci na “vosa ena kena gauna dodonu?” Ena veiuqeti qai veitaraicake vei ira na rogoca?’ (Vosa Vakaibalebale 15:23, NW) Kevaka eda vakila ni cala na noda nanuma se sega ni veiganiti na ituvaki se gauna, de vinaka meda kua ga ni vosa. Ia, e vinaka cake sara meda tukuna na ka e veitaraicake qai dina. Na vosa sabalia e vaka ‘na isua ni seleiwau,’ ia na vosa veiuqeti “sa ia na veivakabulai.”—Vosa Vakaibalebale 12:18.
Ena yaga tale ga ke donu tiko na noda rai me baleti ira eda vakabauta vata, meda raica se cava era talei kina ena mata i Jiova. E kaya o Jisu: “E sega ni lako rawa mai vei au e dua na tamata, kevaka sa sega ni vakayarayarataki koya ko Tamaqu sa talai au mai.” (Joni 6:44) E raica o Jiova na nodra itovo vinaka na nona dauveiqaravi yalodina—o ira mada ga eda nanuma ni mawi tu nodra itovo. Eda na tukuna na veika vinaka baleti ira ke da saga meda raica na nodra itovo vinaka.
Vukei Ira na Tani
E kila vinaka o Jisu na nodra ituvaki na vakararawataki. Koya gona, “ni sa raici ira na lewe vuqa ko koya, sa lomani ira, ni ra sa malumalumu, ka biu wale tu, me vaka na sipi sa sega na nodrai vakatawa.” (Maciu 9:36) Ia, a sega ni raici ira wale tu ga o Jisu, a cakava sara ga kina e dua na ka. Mani sureti ira: “Dou lako mai vei au, koi kemudou vakaaduaga sa oca ka colata nai colacola bibi, ia ka’u na vakacegui kemudou.” A vakadeitaka tale ga: “Sa rawarawa na noqui vua, ka mamada na noqui colacola.”—Maciu 11:28, 30.
Eda sa bula tiko oqo ena “gauna cacamatua, qai lewalewai dredre.” (2 Timoci 3:1, NW) E tarabi tu vei ira e levu na “lomaocaoca e na vuku ni vuravura oqo.” (Maciu 13:22) E so tale e bikai ira tu na rarawa ena vuku ni kedra ituvaki. (1 Cesalonaika 5:14) E rawa vakacava nida vakacegui ira era vakaoqori? Me vakataki Karisito, eda rawa ni vakamamadataka na nodra icolacola.
E so era dau via vakamamadataka na nodra leqa ena nodra veivosaki kei na dua. Ke dua e talaucaka vei keda na nona leqa, eda dau tu vakarau meda vakarogoci koya vinaka? E gadrevi meda vulica na vakarorogo vinaka. E okati kina na nomu rogoca matua na ka e talaucaka tiko e dua, kua ni o lai leqataka sara se o na vukei koya vakacava. Ena vakaraitaka na noda kauai na noda vakarorogo matua, da veirai mata da qai matadredredre ena gauna veiganiti.
Levu na sala e rawa nida vakauqeti ira kina na tacida ena ivavakoso vakarisito. Kena ivakaraitaki, nida tiko ena soqoni ena Kingdom Hall, eda rawa ni qarai ira na tautauvimate. So na gauna, e vakayaloqaqataki ira na vica wale ga na miniti eda vakauqeti ira kina ni bera ni tekivu na soqoni se na gauna sa cava kina. E rawa tale ga nida vakasamataki ira era sa sega ni laurai ena Vulivola ni iVavakoso eda lewena. Eda rawa ni qiriti ira ena talevoni me vakaraitaka nida kauaitaki ira da qai tu vakarau meda vukei ira kevaka ra gadreva.—Filipai 2:4.
Era vakacolati ena levu na itavi na qase ni ivavakoso. Ena rawa nida vukei ira ena noda veitokoni da qai vakayacora ena yalomalumalumu na itavi e lesi vei keda. E uqeti keda na Vosa ni Kalou: “Dou talairawarawa vei ira sa liutaki kemudou, ka mo dou vakamalumalumutaki kemudou: ni ra sa yadrava na yalomudou, me vakataki ira era na tukuni ira kina, me ra kitaka kina e na marau, ka sega e na vutugu: ni sa sega ni yaga vei kemudou me vakaoqori.” (Iperiu 13:17) Nida vakaraitaka na yalorawarawa, ena rawa nida vakacegui ira “era qarava vinaka na nodra cakacaka.”—1 Timoci 5:17, VV.
Veivakacegui Tiko ga ena Vosa kei na Cakacaka Vinaka
Na tegu veivakabulabulataki, e vu mai na udolu vakaudolu na mataniwai lalai era mimiri mai lagi. Me vaka ga na tegu, na noda veivakacegui e sega ni vakilai mai na dua ga na ka vinaka eda cakava, ena laurai ga ena noda bulataka e veigauna na itovo vakarisito.
E vola na yapositolo o Paula: “Dou veilomani sara e na veilomani ni veitacini; dou veiuasiviti e na veivakarokorokotaki.” (Roma 12:10) Meda bulataka na ivakaro i Paula. Me dau veivakacegui mada ga noda vosa kei na noda itovo.
[iYaloyalo ena tabana e 16]
Na tegu mai na Ulunivanua o Erimoni—e dau vakasuasuataka na kau drokadroka
[iYaloyalo ena tabana e 17]
E veivakacegui o koya e dau vakarorogo vinaka