“Dou Lako Mai Vei Au, . . . Ka’u na Vakacegui Kemudou”
Ra Vaka na Matanitegu e Veivakabulabulataki na iTabagone
E SEGA ni vakabekataki ni okati ira tale ga na nona imuri itabagone o Jisu Karisito, ena nona kaya: “Dou lako mai vei au, . . . ka’u na vakacegui kemudou.” (Maciu 11:28) Nira kauti luvedra yani vei Jisu e so na itubutubu, ratou saga na nona tisaipeli me ratou tarovi ira. A qai kaya o Jisu: “Dou laivi ira na gone lalai me ra lako mai vei au, ka mo dou kakua ni tarovi ira.” Ni a ‘keveti ira sara mada ga [o Jisu] qai vosa vakalougatataki ira.’ (Marika 10:14-16) E sega ni vakabekataki nira ka talei vua.
E tukuni ena iVolatabu na ivakaraitaki vinaka ni nodra qaravi Kalou o ira na cauravou kei na goneyalewa yalodina, o ira na itabagone kei ira na gonelalai. E parofisaitaki tale ga ena nona ivola na daunisame ni “na lewe vuqa na nomuni cauravou” nira na veivakabulabulataki me vaka na matanitegu. E tukuni tale ga nira na vakacaucautaka tiko na yaca i Jiova na “cauravou” kei na “goneyalewa.”—Same 110:3; 148:12, 13.
Vanua Mera Bula Kina na iTabagone
E veiganiti mera vakatauvatani vaka oqo na itabagone, ni dau taurivaki na matanitegu me vakaibalebaletaka na sautu kei na kalougata. (Vakatekivu 27:28) E malumu qai veivakacegui na matanitegu. Ni sa tiko tawarairai ena gauna oqo na Karisito, era makutu ra qai yalodina ni soli ira vakayauyau na itabagone lotu Vakarisito. Me vaka ga na veivakabulabulataki ni matanitegu, e vuqa na cauravou kei na goneyalewa era qaravi Jiova ena marau ra qai vukei ira na nodra itokani era vakabauta vata.—Same 71:17.
O ira na itabagone lotu Vakarisito era sega wale ga ni vakabulabulataki ira na tani; e vakabulabulataki ira tale ga na nodra veiqaravi. Sa tu gona na isoqosoqo i Jiova me vanua ni bula vei ira. Na nodra vakabibitaka na cauravou kei na goneyalewa na itovo savasava, era marautaka tiko kina na veiwekani voleka kei na Kalou. (Same 119:9) Ena loma ni ivavakoso, era dau vakaitavi ena cakacaka e veitarai cake, ra kunea tale ga kina na nodra itokani dina—na veika e vakainaki sara kina na nodra bula.
‘E Ka ni Bula kei na Vakacegu’
Era vakila beka na itabagone vakarisito nira bulabula me vaka na “tegu”? Meda rogoci Tania mada, e dua na goneyalewa e dau vakaitavitaki koya ena cakacaka ni ivavakoso, qai marautaka na nona vakayagataka e sivia e 70 na aua ena dua na vula ena cakacaka vakaitalatala. Na cava e vakila? E kaya, “e veivakacegui, e uqeti au tale ga. E ‘ka ni bula kei na vakacegu’ na noqu vakaogai au ena veika me baleti Jiova kei na nona isoqosoqo e vuravura.”—Vosa Vakaibalebale 3:8, NW.
O Ariel, e dua tale ga na itabagone e cakacaka tiko vakaitalatala vakatabakidua, e dau marautaka na kakana vakayalo e vakarautaki mai na ivavakoso. E kaya, “e vakabulabulataki au vakayalo na noqu dau gole ina soqoni vakarisito, soqo ni tikina kei na soqo ni tabacakacaka, na vanua au vakani mai kina vakayalo ena teveli i Jiova. E uqeti au niu kila nira tu ena veiyasa i vuravura o ira era cakava tale tiko ga na cakacaka oqo.” Nona vakamacalataka na ivurevure levu ni veivakacegui, e kaya: “E veivakacegui dina me noda itokani o Jiova, vakabibi na noqu raica qai rogoca na veika e sa vakayacora tiko vua na tamata, na ituvaki ca oqo.”—Jemesa 2:23.
E yabaki 20 o Abishai, e dauvunau vakatabakidua qai dauveiqaravi tale ga vakaitalatala ena ivavakoso. E vakamacalataka na veika e sotava ena vosa oqo: “Au lomavakacegu niu kila tu na iwali ni leqa era sotava tiko na itabagone ena gauna oqo. E vukei au na ka dina mai na iVolatabu me dei tiko ga kina na veika au cakava ena noqu qaravi Jiova mai vu ni lomaqu.”
E dau cudrucudru totolo o Antoine ni se gonetagane lailai. Ena dua na gauna a mokuta e dua nona icaba e koronivuli ena idabedabe, a vakamavoataka tale ga e dua na nona icaba ni tonolaki koya ena penikau. Macala vakasigalevu e ke ni sega ni dau veivakacegui o Antoine! Ia, na ivakavuvuli ena iVolatabu e veisautaka na nona ivakarau. E sa yabaki 19 ena gauna oqo, sa veiqaravi tiko vakaitalatala dauveiqaravi qai dauvunau vakatabakidua ena ivavakoso, a kaya: “Au vakavinavinakataki Jiova ni vukei au meu kilai koya, meu dau vosota, meu veisautaka tale ga na vanua cala au sa mua tiko kina. Ena sala oqo, au levea kina e levu na leqa.”
Era dikeva tale ga e so na veivakacegui ni nodra itovo na itabagone lotu Vakarisito. O Matteo, e dua na itabagone iVakadinadina mai Itali. A vakatura na nona qasenivuli, ke dua e vosa ca ena loma ni kalasi ena kena itotogi me sauma e dua na ilavo lailai. Ena dua na gauna e muri, sa ra qai kerea na gonevuli me sa kau laivi na itotogi oqo, nira kaya “e sa bau dredre dina me kua na vosa ca.” A vakamacalataka o Matteo, “a kaya na qasenivuli ni sega ni vaka kina, qai cavuti au meu ivakaraitaki, niu dua na iVakadinadina i Jiova, qai vakacaucautaki au ena matadra na lewe ni noqu kalasi niu sega ni dau vosa ca.”
Ena dua na kalasi mai Thailand, era levu kina na gone vosalevu. O Racha e yabaki 11, a kacivi koya me tu cake ena mata ni kalasi na nodra qasenivuli qai vakacaucautaka na nona itovo, qai kaya: “Vakacava mo ni muria kece na nona ivakaraitaki? E dau gumatua na vuli qai gone itovo vinaka.” Oti oya sa qai tukuna vei ira na gonevuli: “Ena rawa ga ni vinaka na nomuni itovo, ke oni dua na iVakadinadina i Jiova me vakataki Racha.”
E ka marautaki na noda raici ira na vica vata na udolu na itabagone lotu Vakarisito era kilai Jiova vinaka ra qai cakava na lomana. E laurai vei ira na itabagone ivakaraitaki vinaka oqo, na yalomatua e dau kune ga vei ira na qase. E rawa ni vukei ira na Kalou me vinaka na nodra bula ena gauna oqo, vaka kina na nona dulaka vei ira na bula totoka ena vuravura vou. (1 Timoci 4:8) Ena ituvaki ni vuravura e dravuisiga tu vakayalo oqo, era sinai kina na itabagone era sega ni lomavakacegu ra qai nuiqawaqawa, e veivakabulabulataki gona nida raica na kena veibasai vei ira na itabagone lotu Vakarisito!