Yalololoma ena Vuravura Tawaveinanumi Oqo

E TAUVI malaria e dua na turaga mai Burundi. Gadrevi me kau vakatotolo i valenibula, ia e sega na motoka. Rau vakavodoki koya ena basikeli na nona itokani, ratou qai cabeta na veiulunivanua ena nodrau biliga tiko na basikeli me lima na aua. Rau vakavodoki koya sara ena basi me kauti koya ina valenibula e voleka duadua. Oti e vica na siga sa daumaka tale na nona bula na turaga a tauvi malaria.

Ni oti na vakacaca ni cagilaba o Katrina ena dua na vanua lolovira e Mereke ena Okosita 2005, era donumaka yani e dua na vale e bikai tu ena vunikau e so na tagane era bole cakacaka. O ira oqo era sega ni veikilai kei taukeinivale, ia ena loma ni siga taucoko oya, era varota na kau ra qai kauta laivi na benu. “Au sega ni tukuna rawa na levu ni noqu vakavinavinakataki ira na [tagane] oya,” e kaya o radinivale.

Ra dau vakabibitaka ga na tabana ni vakauitukutuku na kena kaburaki na ivalavala e veivakalolomataki qai voravora. E sega ni dau kaburaki na caka vinaka kei na yalololoma e vakaraitaki e veisiga. Ia, eda se gadreva tiko ga meda lomani, kauaitaki, nanumi, me vakaraitaki tale ga vei keda na yalololoma! E rogoci vakalevu na kena tukuni oqori ena gauna ni Kirisimasi, ni levu era dau kacivaka se lagata kina na sere me baleta na ‘veisaututaki kei na caka vinaka.’​—Luke 2:​14, VV.

Dredre toka me vakaraitaki na yalololoma ena vuravura tawaveinanumi oqo, ni sega kina na veikauaitaki kei na veinanumi. E takalevu tale ga kina na kena nanumi, ni itovo voravora kei na yalo ni dui caka nona erau yavu ni rawaka kei na qaqa. Levu ra muria na ivakavuvuli i Niccolò Machiavelli​—oya ni ka vakavuku na veivakalolomataki mai na yalololoma. Na kocokoco kei na dokadoka e vakaleqa na yalololoma.

Levu ra vakaliuci ira ga veitalia ke ra vakaleqai kina na tani. Era vakaraitaki mera “tagane dina,” o ira na rogo ena buturara ni qito kei na veivakamarautaki qai ra sega ni dau yalololoma. Era vaka tale ga oqori e so na iliuliu vakapolitiki.

E vinaka gona meda taroga: Na cava e bibi kina meda veinanumi? E yaga beka na yalololoma? Eda na vakaraitaka vakacava? Ena veivosakitaki na taro oqori ena ulutaga e tarava.

[Kato ena tabana e 3]

•E ivakaraitaki beka ni dadatuvu na yalololoma?

•Yaga beka na yalololoma?

•Eda na vakaraitaka vakacava na veinanumi?