O sa Tu Vakarau ena Siga i Jiova?
“Sa voleka mai na siga i Jiova na siga ka uasivi, sa voleka mai, io sa kusa sara mai.”—SEFANAIA 1:14.
1-3. (a) Na cava e tukuna na iVolatabu me baleta na siga i Jiova? (b) Na ‘siga cava i Jiova’ sa voleka tiko mai oqo?
NA SIGA i Jiova e sega ni 24 ga na aua na kena dede. Ena taura toka e dua na gauna, ni na lewai ira kina na tamata ca na Kalou. Mera rerevaka o ira na sega ni qaravi Kalou na siga oqo baleta ni butobuto, ena vakilai kina na rarawa, na cudru katakata ni Kalou, kei na ca. (Aisea 13:9; Emosi 5:18-20; Sefanaia 1:15) E kaya na parofisai i Joeli: “Ulei na siga ko ya! ni sa voleka na siga i Jiova, ia ena yaco mai me vaka na veivakarusai maivei Koya sa Kaukauwa.” (Joeli 1:15) Ia, ena vakabulai ira ga na “yalododonu” na Kalou ena siga levu oqori.—Same 7:10.
2 Na malanivosa “siga i Jiova” e dusia na nona vakatauca na Kalou na nona lewa ena duidui gauna. Kena ivakaraitaki, era donuya na lewe i Jerusalemi na “siga i Jiova” ena 607 B.S.K., ni a ravuti ira na mataivalu i Papiloni. (Sefanaia 1:4-7) A tau tale ga na lewa ni Kalou ena 70 S.K., ni vakayagataki Roma me vakarusa na nodra matanitu na Jiu baleta nira a sega ni ciqomi Luvena. (Taniela 9:24-27; Joni 19:15) E tukuna tale tu ga na iVolatabu ni na dua tale na “siga i Jiova,” era na ‘valuti kina na veimatanitu kece.’ (Sakaraia 14:1-3) A uqeti ena yalo tabu na yapositolo o Paula me vakaraitaka ni rau veisemati na siga oya kei na tiko tawarairai i Karisito a tekivu ena 1914 ni a dabe kina vakatui mai lomalagi. (2 Cesalonaika 2:1, 2) Ni sa roro voleka sara mai na siga i Jiova, e veiganiti kina me tikinivolatabu ni yabaki 2007 ni iVakadinadina i Jiova na Sefanaia 1:14 (NW). E tukuni kina: “Sa voleka na siga levu i Jiova.”
3 Oqo sara ga na gauna meda vakarautaki keda kina ni sa voleka tiko mai na siga levu ni Kalou. Eda na vakarautaki keda vakacava? So tale beka na ka e dodonu meda cakava?
Meda Tu Vakarau
4. Na veivakatovolei levu cava a vakarautaki koya kina o Jisu?
4 Ena parofisai i Jisu Karisito me baleta na iotioti ni veisiga ni ituvaki kei vuravura, a kaya kina vei ratou nona tisaipeli: “Mo dou qai vakarau tu.” (Maciu 24:44) Ena gauna a cavuta kina na vosa oqo o Jisu, sa tu vakarau me vosota na veivakatovolei levu—me mate vakaisoro. (Maciu 20:28) Cava eda vulica ena nona vakarautaki koya o Jisu?
5, 6. (a) E vakarautaki keda vakacava ina siga i Jiova na noda lomana na Kalou kei ira na tamata? (b) Na ivakaraitaki cava ni noda lomani ira na tamata e kotora o Jisu?
5 E lomani Jiova dina o Jisu qai mareqeta nona ivakatagedegede dodonu. E kaya na Iperiu 1:9 me baleti Jisu: “Ni kemuni sa vinakata nai valavala dodonu, ka cata nai valavala ca, sa lumuti kemuni kina na Kalou, a nomuni Kalou, e na waiwai ni reki mo ni uasivi cake kina vei ira na nomuni tokani.” A yalodina tiko ga vua na Tamana vakalomalagi baleta ni lomani koya. Ena taqomaki keda tale ga na Kalou nida lomani koya vaka oqori, da qai mareqeta na nona ivakatagedegede. (Same 31:23) Nida cakava oqo, eda sa vakarautaki keda sara tiko ga ina siga i Jiova.
6 Dua na ka e kilai tani kina o Jisu oya nona dau lomani ira na tamata. Io, “sa lomani ira, ni ra sa malumalumu, ka biu wale tu, me vaka na sipi sa sega na nodrai vakatawa.” (Maciu 9:36) A vunautaka gona na itukutuku vinaka o Jisu, me vaka ga ni uqeti keda na loloma meda vunautaka na itukutuku ni Matanitu ni Kalou vei ira eda tiko veitikivi. Na noda lomana na Kalou kei ira na tamata ena uqeti keda meda gugumatua tiko ga ena cakacaka oqori. Eda na vakarautaki keda tale ga ina siga i Jiova.—Maciu 22:37-39.
7. Cava eda marau kina nida waraka tiko na siga i Jiova?
7 Dau marautaka vakalevu o Jisu ni cakava na loma i Jiova. (Same 40:8) Ke tiko vei keda na rai oqori, eda na marautaka tale ga na noda veiqaravi tabu vua na Kalou. Eda na via solika me vakataki Jisu ga, da qai vakila gona na marau dina. (Cakacaka 20:35) Io, ‘sa vu ni noda kaukaua na marautaki Jiova.’ Na marau oqo e vakarautaki keda vinaka ina siga i Jiova.—Niemaia 8:10.
8. Na cava meda toro volekati Jiova kina ena masu?
8 Nona dau masu vagumatua o Jisu vua na Kalou a vakarautaki koya ina ituvaki ena vakatovolei kina na nona vakabauta. A masu tiko ena gauna a papitaisotaki koya kina o Joni. A masu tiko ena bogi taucoko, qai digitaki iratou na nona yapositolo. (Luke 6:12-16) E uqeti keda kece na dau wili iVolatabu na masu i Jisu ena iotioti ni bogi ni nona bula e vuravura. (Marika 14:32-42; Joni 17:1-26) O dau masu wasoma me vakataki Jisu? Mo masu wasoma vei Jiova, me vakaibalebale, kerea na veidusimaki ni yalo tabu qai ciqoma totolo ke sa vakavatukanataki vei iko. E bibi me qaqaco na noda veiwekani kei na Tamada vakalomalagi, vakauasivi ena gauna dredre oqo ni sa roro voleka mai na siga levu ni Kalou. O koya gona, toro voleka tiko ga vei Jiova ena masu.—Jemesa 4:8.
9. Na cava e bibi kina meda dau vakalagilagia na yaca i Jiova?
9 Bibi tale ga vei Jisu me dau vakalagilagia na yaca tabu i Jiova, sega ni vakabekataki ni a vakaukauataki koya me vosota na veivakatovolei. A vakavulica sara ga vei ratou na nona imuri me ratou okata ena nodratou masu na kerekere oqo: “Me vakarokorokotaki na yacamuni.” (Maciu 6:9) Kevaka e lomada dina meda vakalagilagia na yaca i Jiova, eda na sega sara ga ni via vakarogorogocataka na yacana. Noda cakava oqo, eda sa vakarautaki keda vinaka tiko kina ina siga i Jiova.
So Beka na Ka Mo Vakavinakataka?
10. Na cava e bibi kina noda dikevi keda?
10 O na tu vakarau ke yaco nimataka na siga i Jiova? Ena vinaka meda dikevi keda yadudua tale mada, meda vakavinakataka kina e so na noda ivalavala se rai. Ni lekaleka qai veilecayaki tu na bula ni tamata, e bibi gona meda yadrayadravaki tiko vakayalo e veisiga. (Dauvunau 9:11, 12; Jemesa 4:13-15) Meda dikeva mada e so na ka meda vakavinakataka.
11. Na cava na nomu isausau me baleta na wili iVolatabu?
11 Dua na veivakadreti bibi ni “dauveiqaravi yalo dina ka vuku” oya meda wilika e veisiga na iVolatabu. (Maciu 24:45, VV) De dua, me nomu isausau mo wilika tasevu na iVolatabu mai na Vakatekivu ina Vakatakila ena loma ni dua na yabaki, mo vakasamataka tale ga na ka o wilika tiko. Ke o wilika e va na wase e veisiga, o sa na wilika na 1,189 na wase ni iVolatabu ena dua na yabaki. Dodonu mera wilika na Lawa i Jiova na tui kece kei Isireli ‘ena veisiga ni nodra bula.’ Via tautauvata tale ga kei na ka a cakava o Josua. (Vakarua 17:14-20; Josua 1:7, 8) E bibi dina mera wilika na ivakatawa vakayalo na Vosa ni Kalou e veisiga, mera veituberi kina ena “[i]vakavuvuli dina”!—Taito 2:1.
12. Na cava eda uqeti meda cakava ni sa roro tiko mai na siga i Jiova?
12 Na kena roro tiko mai na siga i Jiova e dodonu me uqeti keda meda tiko wasoma ena soqoni vakarisito qai vakaitavi tale ga kina. (Iperiu 10:24, 25) O na vakavinakataka kina nomu dau kacivaka na itukutuku vinaka ni Matanitu ni Kalou, oya mo dau vakasaqarai ira na tu vakarau na vinakata na bula tawamudu, qai vakavulici ira. (Cakacaka 13:48) De dua, mo vakaitavitaki iko ena so tale na sala ena ivavakoso, me vaka nomu kauaitaki ira na itabaqase kei na nomu uqeti ira na itabagone. O na marautaki dina!
Nomu Veiwekani kei Ira Tale e So
13. Taro cava meda dikeva me baleta na noda vakaitovotaka na itovo vou?
13 Ni na sega ni daro na siga i Jiova, ena gadrevi beka mo vakavinakataka nomu “vakaisulu e na tamata vou, o koya sa caka me vaka na Kalou e na yalododonu kei na yalosavasava ni dina”? (Efeso 4:20-24) Ni o vakaitovotaka na itovo vakalou, era na vakadinadinataka e so tale ni o ‘lako voli ena yalo tabu ni Kalou’ qai vuataka na vua ni yalo tabu. (Kalatia 5:16, 22-25) Dou sa cakava tiko beka vakavuvale e so na ka e vakaraitaka ni dou sa vakaitovotaka tiko na itovo vou? (Kolosa 3:9, 10) Kena ivakaraitaki, e laurai beka ena ka o cakava ni o lomani ira na tacimu vakayalo kei ira na sega ni tacimu vakayalo? (Kalatia 6:10) Nomu vulica wasoma na iVolatabu ena uqeti iko mo bulataka na itovo vakalou e bibi ena nomu vakarautaki iko ena siga i Jiova.
14. Na cava meda masuta kina na yalo tabu nida saga tiko meda lewa matau?
14 Vakacava ke o dau cudru totolo, ia o kila ni bibi mo dau lewa matau? Oqo e dua na itovo ena uqeti iko kina na yalo tabu ni Kalou mo vuataka. Masuta gona na yalo tabu, ni salasalavata sara ga kei na vosa i Jisu: “Dou kerekere, ka na soli vei kemudou; dou vakasaqara, ka dou na kunea; dou tukituki, ka na dolavi vei kemudou: . . . kevaka dou kila, koi kemudou sa tamata ca, mo dou solia na ka vinaka vei ira na luvemudou; sa qai dina vakalevu cake, ni na solia na Yalo Tabu ko koya na Tamamudou vakalomalagi vei ira sa kerekere vua.”—Luke 11:9-13.
15. Na cava me caka ke sega ni vinaka tiko nomudrau veiwekani kei na tacimu vakayalo?
15 Kaya mada ke sega soti ni vinaka nomudrau veiwekani kei na dua na tacimu vakayalo. Saga ena nomu vinaka kece mo drau veivakameautaki, me vakilai kina na veiyaloni kei na duavata ena ivavakoso. (Same 133:1-3) Muria na ivakasala i Jisu e volai ena Maciu 5:23, 24 se na Maciu 18:15-17. Ke sa ivakarau ni nomu bula mo se cudru tiko ga ni sa dromu na matanisiga, saga sara vakatotolo mo veivakameautaki. Ena levu na ituvaki, e gadrevi ga meda tu vakarau ni veivosoti. A vola o Paula: “Dou veilomani vakai kemudou, dou lomavinaka [“veinanumi,” VV], dou kakua ni veicudruvi, me vaka sa sega talega ni cudruvi kemudou na Kalou e na vuku i Karisito.”—Efeso 4:25, 26, 32.
16. Cava e bibi kina na veinanumi ena bula vakawati?
16 E bibi ena bula vakawati na veinanumi kei na veivosovosoti. Ke vinakati mo vakavinakataka na tikina oqori se mo kauaitaki watimu vakalevu, saga sara mo cakava oqori ena veidusimaki ni Kalou kei na nona Vosa. Gadrevi beka mo cakacaka ena so na ka e vakaroti ena 1 Korinica 7:1-5, mo kua kina ni lomaocaoca qai yalodina tiko ga ina nomu vakawati? Bibi dina vua na tagane se yalewa vakawati me dau “veinanumi” ena tikina oqo.
17. Na cava me cakava o koya e cala bibi?
17 Vakacava ke o cala bibi? Kena gauna totolo sara mo vakavinakataka na kemu ituvaki. Kua ni tu vakasuka na kerea nodra veidusimaki na qase ni ivavakoso vakarisito. Ena vakaukauataki iko vakayalo nodra masu kei na nodra ivakasala. (Jemesa 5:13-16) Masuti Jiova ena yalo ni veivutuni. Ni o sega ni cakava oqo, ena vakacaraka nomu lewaeloma, o qai dau beitaki iko tiko ga. A vakila oqo o Tevita, ia a marau dina ni vakatusa nona ivalavala ca vei Jiova! Vola o Tevita: “Sa kalougata ko koya sa bokoci na nonai valavala ca, ka sa buluti na nona caka cala. Sa kalougata na tamata sa sega ni wilika vua ko Jiova nai valavala ca; ka sa sega na dauveivakaisini e na yalona.” (Same 32:1-5) E vosoti ira na veivutunitaka dina na nodra ivalavala ca o Jiova.—Same 103:8-14; Vosa Vakaibalebale 28:13.
Tudei Tiko ga ena Nomu Sega ni Vakavuravura
18. Cava me noda rai baleta na vuravura?
18 Sega ni vakabekataki ni o sa vakanamata mo lai bula ina vuravura vou e yalataka tu na Tamada vakalomalagi. O raici ira gona vakacava na kawatamata tawayalododonu era sa yawaka na Kalou? A sega ni rawai Jisu Karisito o Setani “na turaga ni vuravura oqo.” (Joni 12:31; 14:30) Eda sega sara ga ni vinakata me rawai keda na Tevoro kei na nona vuravura, meda muria gona na vosa ni yapositolo o Joni: “Dou kakua ni lomani vuravura, se na veika sa vakavuravura.” E ivakasala veiganiti oqo baleta “ko vuravura sa lako tani yani, kei na kena gagadre talega; ia ko koya sa cakava na ka sa vinakata na Kalou, sa tu dei ga ka sega ni mudu.”—1 Joni 2:15-17.
19. Era uqeti na itabagone lotu Vakarisito mera sauva na isausau cava?
19 Oni sa vakavulici ira tiko na luvemuni me ‘kua ni tauvi ira na duka ni ka vakavuravura’? (Jemesa 1:27) E vinakata o Setani me siwati ira na luvemuni, me vaka nona siwata na ika na dausiwa. Levu na isoqosoqo kei na kalavo e nodra inaki mera dau vakarautaki ira na itabagone ina ivakarau ni bula ena vuravura i Setani. Ia, era sa lewena tu na tamata i Jiova e dua na isoqosoqo ena bulata na ivakarau ca kei vuravura. Mera uqeti gona na itabagone lotu Vakarisito mera ‘vakaogai ira tiko ga e na cakacaka ni Turaga.’ (1 Korinica 15:58) Mera tuberi ira na luvedra na itubutubu qaravi Kalou mera sauva na isausau ena marautaki qai vakainaki kina nodra bula. Ena vakalagilagi kina na Kalou qai vakarautaki ira ina siga i Jiova.
Ni Oti na Siga Levu i Jiova
20. Na cava meda raica dei tiko ga kina na inuinui ni bula tawamudu?
20 Eda na waraka na siga i Jiova ena lomavakacegu kevaka eda raica dei tiko ga na inuinui ni bula tawamudu. (Juta 20, 21) Nida vakanamata tu meda lai bula tawamudu ena Parataisi, eda nuitaka gona meda na kaukaua tale me vaka ga na itabagone. Levu tale ga na gauna meda rawata kina na noda isausau kei na noda vulica e levu na ka me baleti Jiova. Ena tawamudu noda vulica na ka me baleti Jiova nida se kila ga ‘vakatikina na nona ivalavala.’ (Jope 26:14) Oqori e dua dina na bula vakatubuqoroqoro!
21, 22. Na cava eda na veivosakitaka kei ira na vakaturi mai?
21 Era na tukuna o ira na vakaturi ena Parataisi e so na itukutuku eda sega ni kila sara vakavinaka me baleta na veigauna sa oti. Ena vakamacalataka o Inoki nona yaloqaqa me vakasavuya kina na itukutuku i Jiova vei ira na tamata tawavakalou. (Juta 14, 15) Ena talanoataka sara ga o Noa nona tara na waqa. Rau na tukuna o Eparama kei Sera na nodrau nanuma me baleta na nodrau biuta na bula vinaka mai Uri rau qai tiko ena valelaca. Vakasamataka mada ni na talanoataka o Esiteri nona vosa ena vukudra na kai nona, qai vakaseva nona bukiveretaki ira o Emani. (Esiteri 7:1-6) Raitayaloyalotaka na nona talanoataka tiko o Jona na tolu na siga a tiko kina ena kete ni ika levu, se nona vakamacalataka o Joni na Dauveipapitaiso nona papitaisotaki Jisu. (Luke 3:21, 22; 7:28) Sa levu dina na ka vakasakiti meda vulica!
22 Ena duanaudolu na yabaki ni veiliutaki i Karisito, eda na vakavulici ira na vakaturi mera ‘kila na Kalou.’ (Vosa Vakaibalebale 2:1-6) Nikua, eda marau ni levu era vulica na ka me baleta na Kalou o Jiova, ra qai bulataka! Ia vakasamataka mada na levu ni marau o na vakila ni vakalougatataka o Jiova nomu vakavulici ira na tamata era bula ena gauna makawa, oti ra qai bulataka sara!
23. Na cava eda nakita dei meda cakava?
23 E sega ni tukuni rawa na veivakalougatataki eda vakila tu oqo na tamata i Jiova. (Same 40:5) Vakauasivi, noda vakavinavinakataka na isolisoli vakayalo ni Kalou. (Aisea 48:17, 18) Se mani vakacava na keda ituvaki, meda qaravi Kalou mai vu ni lomada nida waraka tiko na siga levu i Jiova.
O na Sauma Vakacava?
• Na cava “na siga i Jiova”?
• O na vakarautaki iko vakacava ina siga i Jiova?
• Ni sa voleka sara oqo na siga levu ni Kalou, na cava meda na vakavinakataka?
• Na cava o na via cakava ni sa oti na siga i Jiova?
[iYaloyalo ena tabana e 12]
A tu vakarau o Jisu me vosota na veivakatovolei
[iYaloyalo ena tabana e 15]
E itavi dokai meda vakavulici ira na vakaturi mai mera kilai Jiova!