O Bau Kila?

Ratou sikovi Jisu ena gauna cava na tamata vuku?

E tukuni ena KosipeIi i Maciu, ni “so na tamata vuku mai na tu i cake” era kau iloloma vei Jisu. (Maciu 2:​1-​12) Sega ni kilai e le vica na tamata vuku se na “dauraikalokalo,” sega ni dua na kena i vakadinadina ni nanumi ni ratou le tolu; sega tale ga ni volai na yacadratou ena iVolatabu.

E vakamacalataka na New International Version Study Bible me baleta na Maciu 2:​11: “Ni vakatauvatani kei ratou na ivakatawanisipi, ratou a sega ni sikovi Jisu ena valenimanumanu na dauraikalokalo ena bogi a sucu kina. Oti toka e vica na vula, ratou sa qai lai raici koya ena nona ‘vale’ ni sa dua toka na ‘gonetagane’ lailai.” E vakadinadinataki oqo ena nona sasaga o Eroti me vakamatei Jisu, a vakarota mera vakamatei na gonetagane kece era yabaki rua lako sobu e Peceliema kei na kena yasayasa kece. A digitaka na yabaki ni bula oya ni veidutaitaka kei na ‘gauna a taroga vei ira na tamata vuku.’​—Maciu 2:​16.

Ke ratou a sikovi Jisu dina na tamata vuku ena bogi a sucu kina, ratou qai kauta yani na koula kei na iloloma talei e so, kena irairai ni na sega ni cabora o Meri e rua ga na ruve ni kauti Jisu ina valenisoro ena 40 na siga e tarava. (Luke 2:​22-​24) Oya na isoro e vakadonui ena Lawa me baleti ira na dravudravua era sega ni rawata na lami. (Vunau ni Soro 12:6-8) Kena irairai ni a qai yaga nodratou iloloma na tamata vuku ena nodratou tiko voli mai Ijipita na vuvale i Jisu.​—Maciu 2:​13-​15.

Cava e va kina na siga me qai yaco ina ibulubulu i Lasarusa o Jisu?

Kena irairai ni nakita o Jisu me vaka oqori. Na vuna? Dikeva na ka e volatukutukutaki ena Joni wase 11.

E vakaitikotiko e Pecani o Lasarusa na itokani i Jisu. Gauna a tauvimate bibi kina, rau vakauitukutuku sara vei Jisu o rau na ganei Lasarusa. (Tikina e 1-3) Mai na vanua e tiko kina o Jisu, ena taura e rua na siga me qai yaco i Pecani. (Joni 10:40) Rairai mate o Lasarusa ena gauna vata ga a vakasavui kina vei Jisu na itukutuku. Cava e cakava? A “tiko tale ko koya e na vanua ko ya ka siga rua,” oti sa qai lako i Pecani. (Tikina e 6, 7, VV) Ni tiko tale me rua na siga qai rua tale na siga nona ilakolako, a yaco ina ibulubulu i Lasarusa ni oti e va na siga nona mate.​—Tikina e 17.

Se qai vakaturi rau oti ga e le rua o Jisu​—e dua ni mate oti ga, kena ikarua a vakaturi ena siga a mate kina, ni oti toka e dua na gauna lekaleka. (Luke 7:​11-​17; 8:​49-​55) Rawa beka ni vakaturi e dua sa va na siga nona mate, sa tekivu vuca tale ga na yagona? (Tikina e 39) E kaya e dua na ivoladusidusi ni iVolatabu nira vakabauta na Jiu “ni dua sa va na siga nona mate sa na sega nona inuinui; sa na vuca na yagona, sa na yali tale ga na yalo e nanumi ni dau vuka volekata toka na yago me tolu na siga.”

Kevaka e dua vei ira na soqo vata toka ena ibulubulu e vakatitiqa, ena vakaraitaka oqo o Jisu ni lewa na mate. E kacivaka yani ina ibulubulu sa tadola tu: “Lasarusa, lako mai. Ia ko koya ka mate sa lako mai.” (Tikina e 43, 44) Io, na veivakaturi e inuinui me baleti ira na mate, sega ni yalo e vakabauti ni bula tiko ni mate e dua.​—Isikeli 18:4; Joni 11:25.