Sikovi Jisu na Dauraikalokalo

Eratou lako mai na Tokalau eso na tagane. Eratou dauraikalokalo​—o ira era vulica na kalokalo kei na vanua era dui tu kina ra qai kaya nira kila rawa mai keri na vuna e yaco kina eso na ka ena bula ni tamata. (Aisea 47:13) Ni ratou se tiko voli mai na nodratou vanua ena Tokalau na tagane qori, eratou raica e dua na “kalokalo” ratou qai muria me vica vata na drau na kilomita i Jerusalemi, sega ni Peceliema.

Ni ratou yaco yani i Jerusalemi na dauraikalokalo, eratou taroga: “I vei o koya e sucu me nodra tui na Jiu? Keitou raica mai na Tokalau na nona kalokalo, keitou mani lako mai me keitou vakarokoroko vua.”​—Maciu 2:1, 2.

Ni rogoca qori o Tui Eroti mai Jerusalemi, e cudru vakalevu. Sa qai soqoni ira na iliuliu ni bete kei na so tale na iliuliu ni lotu vakaJiu ni via kila na vanua ena sucu kina na Karisito. Era yavutaka ena iVolatabu nodra ivakamacala qai kaya: “Mai Peceliema.” (Maciu 2:5; Maika 5:2) E kacivi ratou lo sara na dauraikalokalo o Eroti, e tukuna vei ratou: “Dou lai vaqara vinaka na gone lailai, ni dou kunea, dou qai tukuna mai meu lai cuva tale ga vua.” (Maciu 2:8) Ia e via raica na gone o Eroti me vakamatea!

Ni ratou biubiu na dauraikalokalo, dua na ka veivakurabuitaki e yaco. Sa liu tale vei ratou na “kalokalo” eratou raica mai na Tokalau. E duatani na kalokalo qori ni vakarautaki sara ga me dusimaki ratou. Eratou muria tiko na dauraikalokalo me yacova ni sa lai tu vakadua donuya na delanivale ratou tiko kina o Josefa, Meri kei na nodrau gonetagane lailai.

Ni ratou curu i vale na dauraikalokalo, eratou raici Meri kei Jisu. Eratou cuva sara vua na gone, ratou solia na koula, na drega boivinaka kei na mura me nodratou iloloma vua. E veivakasalataki ena tadra na Kalou me ratou kua ni lesu vei Eroti, ratou mani muria e dua tale na sala ina nodratou vanua.

O cei a vakarautaka na “kalokalo” me dusimaki ratou na dauraikalokalo? Nanuma tiko ni sega ni dusimaki ratou vakadodonu na kalokalo vei Jisu e Peceliema. A liutaki ratou ga vei Tui Eroti e Jerusalemi, a via vakamatei Jisu tiko. A rawa ni yaco dina qori ke sega ni vakasalataki ratou na dauraikalokalo na Kalou me ratou kua ni lai tukuna vei Eroti na vanua e tiko kina o Jisu. Macala ga ni vinakata na meca ni Kalou o Setani me vakamatei o Jisu, qai vakayagataka e dua na kalokalo me vakayacora kina nona inaki.