Vakacegui na Nuiqawaqawa Vakaitabagone

Talanoataka o Eusebio Morcillo

Ena Sepiteba 1993, au sikova e dua na nodra valeniveivesu na kaivesu rerevaki. Kena inaki, nona papitaiso o Mariví na ganequ. Era vakararai ena veidokai e so na kaivesu vaka kina e so na vakailesilesi e kea ena noqu papitaisotaki Mariví. Ni bera niu vakamacalataka se keirau mai tu vakacava e ke, meu talanoataka mada na neitou bula.

AU SUCU e Sipeni ena 5 Me, 1954, au qase duadua vei keitou na le walu na veitacini. E ikatolu o Mariví. A tuberi keitou o Bubu ena ivakavuvuli ni lotu Katolika, ena gauna kece oya au vakasamataka niu voleka sara vua na Kalou. Ia na neitou bula e vale e sega ni vakalou. Dau mokulaki Na kei keitou na gone o Ta. Keitou bula rerere tu ga qai mositi au niu raica nona rarawa o Na.

Au sotava tale ga e koronivuli e so na ituvaki e veivakayalolailaitaki. Dua vei ira na qasenivuli e bete tale ga, e dau vakacumuta e lalaga na ului keimami ke saumi cala na taro. Dua tale na bete e dau vakacacani ira na gonevuli ni raica vata tiko kei ira na nodra lesoni. E vakavu veilecayaki qai veivakarerei tale ga na ivakavuvuli vakatolika me baleti eli, mani seavu kina noqu via qarava na Kalou.

Coriti ena Bula Veilecayaki

Niu sega ni dusimaki ena ivalavala e vakamarautaka na Kalou, levu na gauna au lako i valenidanisi, au veimaliwai kina kei ira e vakasisila qai voravora nodra itovo. Vakalevu e yaco na veivala qai dau vakayagataki na isele, sinucodo, bilo iloilo kei na idabedabe me iyaragi. Dina niu sega ni vakaitavi ena itovo voravora vaka oqo, ia dua na gauna ni yaco na veivala, au a lauvacu qai sega ni vakilai au.

Lakolako au sa sega ni taleitaka na bula voravora vaka oya, au mani vaqara e so na valenidanisi e sega ni dau vakayacori kina na veivala, ia e vakayagataki vakalevu kina na wainimate gaga. Au sega ni marau se lomavakacegu, e kauta ga mai na veilecayaki kei na nuiqawaqawa.

Ena ituvaki oya, au se vakamuai rau ga o José Luis na taciqu gone kei Miguel na noqu itokani voleka ena ivakarau ni bula oqo. Me vakataki ira na vo ni itabagone e Sipeni ena gauna oya, keitou sa coriti tu ena dua na vuravura veilecayaki. Au dau saga e levu na sala meu rawata kina na ilavo me isau ni wainimate gaga. Na ka oqo au beci ga kina.

Vakabulai au o Jiova

Ena loma ni gauna oqori, au dau veitalanoa vakalevu kei ira na noqu itokani me baleta nona bula tiko na Kalou kei na inaki ni noda bula. Au tekivu vakasaqara na Kalou ena noqu qara e dua meu talaucaka vua na lomaqu. Au raica ni o Francisco e dua noqu itokani vakacakacaka e duidui mai vei ira na kena vo. Dau mamarau, daudina, qai yalovinaka, au nanuma kina meu talaucaka vua na lomaqu. E iVakadinadina i Jiova o Francisco, mani solia vei au Na Vale ni Vakatawa e tiko kina na ulutaga me baleta na wainimate gaga.

Niu wilika oti na ulutaga oya, au kerea sara na veivuke ni Kalou ena masu: “Turaga, au kila ni o bula tiko, au via kilai kemuni, meu cakava tale ga na lomamuni. Yalovinaka vukei au!” O Francisco kei na so tale na iVakadinadina era dau vakayagataka na iVolatabu mera vakauqeti au kina, ra solia tale ga vei au na ivola vakaivolatabu meu dau wilika. Au kila ni oya na veivuke au a kerea vua na Kalou. Tekivu tale ga meu tukuna na veika au sa vulica vei ira na noqu itokani vaka kina o José Luis.

Dua na siga, ni oti e dua na soqo ni lagasere, au tawasei au mai vei ira na noqu ilala qai vakasaravi ira toka. E vakavure vakasama vei au na vakasisila ni neimami ivalavala ena vuku ni wainimate gaga. Au mani vakatulewataka sara ga meu biuta na ivakarau ni bula oya, meu sa na iVakadinadina i Jiova.

Au kerea vei Francisco e dua na iVolatabu, mani solia vata mai kei na ivola Na Ka Mo Kila Mo Bula Tawamudu Kina.a Niu wilika na vosa ni yalayala ni Kalou ni na tavoya tani na wainimata kece, ena vakaotia tale ga na mate, au sega ni qai lomalomaruataka niu sa kunea na ka dina ena sereki keda na kawatamata. (Joni 8:​32; Vakatakila 21:4) Oti, au lai tiko sara ena dua na soqoni ni iVakadinadina i Jiova ena Kingdom Hall. E tarai au sara ga na nodra veikauaitaki.

E gu na lomaqu meu tukuna vei ira na tani na veika au sotava ena Kingdom Hall, au mani wasea vei José Luis kei iratou na noqu itokani. Oti e vica na siga, keitou lako ena dua na soqoni. A vakaraici keitou e dua na goneyalewa e dabe toka ena iyatu dabedabe e liu. E kidacalataka beka na keitou irairai ni balavu tu na ulu i keitou, e sega tale ni via rai lesu mai. A rairai kurabui ni keitou lako tale yani ena macawa e tarava, keitou sa vakaisulu vinaka qai vakaneketai.

Sega ni dede, keirau a lako kei Miguel ena dua na soqo ni tabacakacaka ni iVakadinadina i Jiova. Se bera vakadua ni keirau sotava e dua na ituvaki vaka oya​—na veitacini dina, duidui na yabaki ni bula. A vakayacori na soqo ni tabacakacaka ena vanua vata ga keitou a lai sarava kina e dua na soqo ni lagasere. Ia e veiuqeti na soqo ni tabacakacaka kei na ivakatagi e rogoci kina.

Tekivu me keitou vulica kece na iVolatabu. Oti toka e walu na vula, keirau papitaiso kei Miguel ena 26 Julai, 1974. Keirau yabaki 20 ruarua. Vica tale na vula e tarava, ratou papitaiso tale ga e va na neirau itokani. Noqu vulica na iVolatabu e uqeti au meu vukei tinaqu ena cakacaka e vale, meu wasea tale ga vua na veika au sa mai vakabauta, vakavuna me keirau veivolekati sara. Au vakayagataka tale ga e levu na gauna meu vukei ratou kina na taciqu kei na ganequ.

Yaco na gauna me ratou vulica na veika dina ena iVolatabu qai papitaiso o Na, ratou na taciqu kei na ganequ, vaka vo ga e dua. Ena 1977, keirau vakamau kei Soledad, na goneyalewa a kidacala ni raici keitou ena imatai ni gauna ena Kingdom Hall. Oti ga e vica na vula keirau sa painia, era vakatokai kina na iVakadinadina i Jiova era dauvunautaka vakatabakidua na itukutuku vinaka.

Vakabulai na Ganequ

A vaqaseni ni se gonelailai na ganequ o Mariví, e vakaleqa sara ga na ivakarau ni nona bula. E vakasisila nona bula vakaitabagone, okati kina na vakayagataki ni wainimate gaga, butako, kei na nona volitaki koya. A bala e valeniveivesu ni yabaki 23, ia a tomana tiko ga na ivakarau ni bula vakasisila oya.

Gauna oya, au sa veiqaravi tiko kina vakaivakatawa ni tabacakacaka, se ivakatawa dauveilakoyaki ni iVakadinadina i Jiova. Ena 1989, keirau lesi kei Soledad ena vanua a vesu tu kina o Mariví. Era se qai kauta laivi ga na vakailesilesi ni matanitu na luvena tagane, e vakararawataki koya sara vakalevu qai sega ni vinakata me bula. Dua na siga niu sikovi koya, au sureti koya sara me keirau vuli iVolatabu, mani vakadonuya. Oti ga e vula dua nona vuli, sa biuta na vakatavako kei na vakayagataki ni wainimate gaga. Au marau niu raica na kaukaua e solia vua o Jiova me veisautaka nona bula.​—Iperiu 4:​12.

Sega ni dede, sa dau tukuna o Mariví na ka dina mai na iVolatabu vei ira na vo ni kaivesu, wili kina o ira na vakailesilesi e kea. Dina ni a tokitaki mai na dua na valeniveivesu ina dua tale, a tomana tiko ga o Mariví na nona vunau. Ena dua na valeniveivesu, a vunau mai na dua na sela ina dua tale. Tauyavutaka e levu na vuli iVolatabu kei ira na kaivesu ena dui valeniveivesu.

Dua na siga a tukuna vei au o Mariví ni sa via yalataka nona bula vei Jiova me papitaiso. Ia, a sega ni vakatarai me biuta na valeniveivesu, se me dua e papitaisotaki koya e kea. A vosota voli na ituvaki ca ena valeniveivesu me va na yabaki. Cava e vosota rawa kina na ituvaki oya? E dau taleva o Mariví na porokaramu ni soqoni ena nona sela ena gauna vata ga e caka kina na soqoni ena ivavakoso. A dua tale ga na nona porokaramu tudei ni vuli iVolatabu vakataki koya kei na masu.

Dua na gauna a tokitaki o Mariví ina nodra valeniveivesu na kaivesu rerevaki e tiko kina e dua na tobu ni sili. A nanuma ni sa na rawa me papitaiso. A yaco vaka kina ni vakadonui me vakayagataka o Mariví na tobu ni sili, au qai solia na ivunau ni nona papitaiso. Au tiko kei koya ena gauna bibi duadua ena nona bula.

E tauvi AIDS o Mariví ena vuku ni nona ivakarau ni bula makawa, ia ena nona ivalavala vinaka, a sereki totolo kina ena Maji 1994. A lai tiko e vale kei Na qai dau gugumatua ena cakacaka vakaitalatala me yacova nona takali ni oti e rua na yabaki.

Valuta na Yalolailai

Au sotava tale ga na ca ni noqu bula e liu. Na nona dau vakalolomataki au o Ta kei na noqu ivakarau ni bula vakaitabagone e tara sara ga na noqu ivalavala. E dau vakararawataki au noqu nanuma niu tawayaga kei na noqu veivutunitaka na ka au dau cakava e liu. So na gauna au dau yalolailai sara ga. Ia, e veiuqeti na Vosa ni Kalou meu valuta na yalolailai vaka oqo. E vakayaloqaqataki au tale ga na noqu vakasamataka vakatitobu na tikinivolatabu me vaka na Aisea 1:​18 kei na Same 103:​8-​13.

E yaga tale ga na masu ena noqu valuta na vakasama niu tawayaga. Vakalevu me tuturu na wainimataqu niu masu vei Jiova. Ia e vakayaloqaqataki au na 1 Joni 3:​19, 20: “Na ka oqo eda sa kila kina ni da sa dina; eda na vakadinadinataka talega kina na yaloda vua. Ia kevaka sa beitaki keda na yaloda ni da sa ca sa uasivi cake e na yaloda na Kalou, a sa kila na ka kecega.”

Niu masuta na Kalou ena yalo sa ‘ramusu qai bibivoro,’ au kila kina ni sega ni cati au o koya. E vakadeitaka na iVolatabu ni o Jiova e sega ni cati ira na veivutunitaka dina na nodra ivalavala makawa ra qai saumaki mera cakava na lomana.​—Same 51:17.

Gauna ga au vakila kina ni tuburi au na vakatitiqa, au dau tovolea meu vakasamataka na veika vinaka vakayalo me vaka e vakamacalataki ena Filipai 4:8. Gauna e basika mai kina na yalolailai, au dau wiligusutaka na Same 23 kei na iVunau ena Ulunivanua. Dau yaga vakalevu noqu vakasamataka na veika oqo niu sega ni dau moce rawa ena bogi.

Yaga tale ga nona dau vakavinavinakataka na noqu sasaga o watiqu kei ira na taciqu lotu Vakarisito era matua vakayalo. Taumada, e dau dredre meu ciqoma nodra vosa ni veiuqeti, ia ena noqu vulica na iVolatabu au kila ni loloma e “vakabauta na ka kecega.” (1 Korinica 13:7) Au ciqoma ena yalomalumalumu ni vakaiyalayala ga na ka au rawata, e tiko tale ga na noqu malumalumu.

E yaga ena noqu veiqaravi ena tabacakacaka na noqu valuta na yalolailai, niu vulica kina meu dau veinanumi. Sa voleka ni 30 na yabaki na neirau veiqaravi vakatabakidua kei watiqu ena kena vunautaki na itukutuku vinaka. Na marau au vakila ena noqu qaravi ira na tani e yaga sara ena noqu valuta na yalolailai kei na noqu dau vakasamataka na veika au dau cakava e liu.

Niu vakananuma lesu na veivakalougatataki i Jiova, au uqeti sara ga meu cavuta na nona vosa na daunisame: “Vakavinavinaka vei Jiova, . . . o koya sa bokoca na nomui valavala ca kecega, o koya sa vakabulai iko mai na kemu mate kecega; o koya sa vakabulai iko mai na rusa; o koya sa vakaisalataki iko e na ka ni loloma kei nai valavala vakayalololoma sara.”​—Same 103:​1-4.

[iVakamacala e ra]

[Tikina bibi ena tabana e 30]

E dau vakararawataki au noqu nanuma niu tawayaga kei na noqu veivutunitaka na ka au dau cakava e liu. Ia, e veiuqeti na Vosa ni Kalou meu valuta na yalolailai vaka oqo

[iYaloyalo ena tabana e 27]

Taciqu o José Luis kei na noqu itokani o Miguel, rau muria noqu ivakaraitaki vinaka kei na ivakaraitaki ca

[iYaloyalo ena tabana e 28]

Vuvale na Morcillo ena 1973

[iYaloyalo ena tabana e 29]

Ni se vesu tu o Mariví

[iYaloyalo ena tabana e 30]

Kei na watiqu o Soledad