E Veisautaka na Bula na iVolatabu

A RAWA vakacava me marau, me dua tale ga na tama qai tagane vakawati vinaka e dua na turaga e vakaloloma nona isususu? Na cava a uqeta e dua na marama a dau vakayacora tu e liu e levu na itovo ca me veisautaka na nona bula? Wilika mada na ka erau tukuna.

“Au Beci Au.”​—VÍCTOR HUGO HERRERA

SUCU: 1974

VANUA: CHILE

KA E KILAI KINA: BOBULA ENA ALAKAOLO

NOQU BULA E LIU: Au a sucu ena siti o Angol, e dua na vanua totoka ena ceva kei Chile. Au se sega ni bau sotavi tamaqu, a mani susugi au kei taciqu o tinaqu. Niu se qai yabaki tolu keitou toki vakaveitinani ina koroturaga o Santiago. Keitou lai vakaitikotiko ena vanua era dau tara vale kina vakaveitalia o ira na sega na nodra vale. Keitou dau vakayagataka na valelailai e vakarautaki me baleti ira na lewenivanua, keitou dau taki wai tale ga ena paipo lelevu e dau tiko e gaunisala era dau vakayagataka na tabana ni bokobuka.

Ni oti e rauta ni rua na yabaki, sa qai vakarautaka na matanitu e dua na vale e ganiti keitou. Ia ka ni rarawa ni yasayasa keitou tiko kina e vakayagataki vakalevu kina na wainimategaga, alakaolo, levu tale ga na basulawa kei na saqamua.

Ena dua na gauna a sotava o tinaqu e dua na turaga, rau mani vakamau sara. E dau gunu o tamaqu vakacabecabe qai dau mokulaki au kei tinaqu. Ena levu na gauna au dau vunia noqu tagi, au qai diva tu me dua na tamaqu me taqomaki au.

Dina ni dau cakacaka vakaukaua o tinaqu me vakarautaka na veika me keitou bula kina, ia keitou se dravudravua ga. Ena so na gauna keitou dau kania ga na sucu pauta kei na suka ni keitou via kana. Ni keirau dau vinakata vakaveitacini na ka ni veivakamarautaki, keirau dau yaqa lo me keirau lai sara tivi ina vale e tiko tikivi keitou, keirau na sarasara tu ga yani e katubaleka. Ia a toboki keirau ena dua na siga o itaukeinivale, mani oti tale ga kina na neirau dau sara tivi lo!

E vakavudua me qai sega ni dau mateni o tamaqu vakacabecabe, gauna qori e dau volia kina vei keirau vakaveitacini e dua na ka me keirau kania. Ena dua na gauna a volia vei keirau e dua na tivi lailai. Qori e dua vei ira na gauna marautaki vei au.

Au vulica na wilivola niu yabaki 12. Au biu vuli ena yabaki tarava, au sa tekivu cakacaka tale ga kina. Niu dau suka na cakacaka, au na tomani ira na noqu itokani vakacakacaka ena so na pati, keimami daumateni qai vakayagataka na wainimategaga. Toso na gauna au sa lai bobula kina.

Niu yabaki 20 au sotavi Cati, keirau mani vakamau sara. A vinaka na neirau bula vakawati ni se qai tekivu, ia au qai lesuva tale na ivakarau ni noqu bula makawa. Sa qai ca ga vakalevu na noqu itovo. Au qai liaca niu na rawa ni bala i valeniveivesu seu na vakayalia na noqu bula keu muria tiko ga na ivakarau ni bula va qori. Na kena e ca sara niu sa vakalaiva tiko me cakava na luvequ tagane o Victor na veika au dau cakava niu se gone. Au rarawa, au sevaka na ka au cakava, au beci au tale ga.

Ena 2001, a veisiko mai vale e rua na iVakadinadina i Jiova, mani tekivu vulica kina o Cati na iVolatabu. E dau qai talanoataka vei au na veika e sa vulica tiko. Niu via kila na ka e vulica tiko, au tekivu vulica tale ga kina na iVolatabu. Ena 2003, a papitaiso o Cati me dua na iVakadinadina i Jiova.

VEISAUTAKI AU NA IVOLATABU: Au wilika ena dua na siga na Ruci 2:12, e tukuni kina ni o Jiova e dau vakalougatataki ira era cakacakataka nodra vakabauta, ra qai qarai koya me nodra idrodro. Au kila kina keu veisau, au na rawa ni vakamarautaka na Kalou, ena vakalougatataki au tale ga o koya. Au raica ni vakatabuya na mateni na iVolatabu. E uqeti au dina na ka e tukuna na 2 Korinica 7:1. E uqeti keda na tikina qori meda “vakasavasavataki keda mai na dukadukali kece.” Au sa tekivu biuta na noqu itovo makawa. Niu vakayacora qori, au sa qai cudrucudru ga vakalevu, ia e tokoni au tiko ga o Cati.

Au mani biuta na noqu cakacaka baleta ni kaukaua kina na idre ni vakatavako kei na gunu. Dina ni lailai na neitou ilavo niu sa sega ni cakacaka, ia e levu na noqu gauna meu vulica kina na iVolatabu. Gauna qori au sa qai sasagataka meu dua na lotu vaKarisito. E sega vakadua ni kudruvaka o Cati ni lailai na ka au vakarautaka me rawati kina na neitou bula, se me vosataki au me baleta na neitou bula rawarawa. Au vakavinavinakataka dina na nona dau veitokoni vakayalololoma.

Toso na gauna au sa dau veimaliwai kei ira na iVakadinadina. Au sega ni vuli vinaka, ia era vukei au meu kila ni kauaitaka ga o Jiova na noqu gadreva dina meu qaravi koya. E yaga vakalevu ena neitou vuvale na veilomani kei na duavata keitou raica ena ivavakoso vaKarisito. Keitou sega ni kunea na vakacegu va qori ena dua tale na vanua. Au mani papitaiso tale ga ena Tiseba 2004.

KENA YAGA: Au vakadinadinataka na dina ni vosa i Jiova ena Aisea 48:17, e tukuna kina: “Koi au ko Jiova na nomu Kalou, ka’u sa vakavulici iko mo vinaka kina.” E uqeti rau sara ga o tinaqu kei taciqu na veisau au cakava, erau sa vulica tiko ena gauna qo na iVolatabu. Era marautaka mada ga na tiko tikivi keitou ni sa veisau na noqu bula, keitou sa marau tale ga vakavuvale.

E dau lomana na Kalou o watiqu, qai raici au me vaka e dua na nona itokani nuitaki. Dina ga niu sega ni kilai tamaqu, ia e vakavulici au na iVolatabu ena sala meu tuberi ratou kina na tolu na luvequ tagane. Eratou dau dokai au. Ia koya e bibi sara ni ratou vakabauta ni bula dina o Jiova, ratou lomani koya tale ga vakalevu.

E sega ni marautaki na noqu bula niu se gone, ia e vukei au o Jiova meu marautaka tale na noqu bula.

‘Au Daucudrucudru qai Yalokaukaua.’​—NABIHA LAZAROVA

SUCU: 1974

VANUA: BULGARIA

KA E KILAI KINA:DAU VOLITAKI WAINIMATEGAGA

NOQU BULA E LIU: Au sucu e Sofia, Bulgaria, ena dua na vuvale vinaka. A biuti keitou o tamaqu niu se qai yabaki ono. Keitou sega sara ga ni namaka qori, e vakararawataki au sara ga vakalevu. Au vakila niu sega ni kauaitaki qai sega ni lomani. Qori e vakavuna meu dau be kina niu sa qase cake, lai yaco sara meu daucudrucudru qai yalokaukaua.

Au dro mai vale ena imatai ni gauna niu se qai yabaki 14. Au dau butako ilavo mai vei tinaqu kei rau na nona itubutubu. Au dau totogitaki vakalevu e koronivuli baleta niu dau yalokatakata, qori e vakavuna me veisau kina vakalima na noqu koronivuli ena loma ga ni vica na yabaki. Ni vo e tolu na yabaki me vakacavara vinaka kina na noqu vuli, au sa sega ni via vuli. Au sa muria tu e dua na ivakarau ni bula dukadukali. Au sa bobula tu ena tavako kei na mariwana. Au dau gunu, pati vakalevu qai vakaitavi tale ga ena volitaki wainimategaga. Au raica ni sega ni yaga na bula ena vuravura veilecayaki qo, baleta ni yaco tu kina na rarawa kei na mate, qo e vakayalolailaitaki au sara ga. Koya gona, au na sega ni kauaitaka na veisiga nimataka, au sa na marautaka ga na bula ni veisiga yadua.

Ena 1998, au a vesu ena rara ni waqavuka e São Paulo e Brazil niu se qai yabaki 24, baleta niu volitaka tiko na wainimategaga. Au mani totogitaki me va na yabaki e valeniveivesu.

VEISAUTAKI AU NA IVOLATABU: Ena 2000, era tekivu veisiko mai vakadua e veimacawa na iVakadinadina i Jiova ena vanua au vesu tiko kina. Dua vei ira na iVakadinadina e dau kauaitaki au o Marines. E uqeti au meu vulica e levu tale na ka me baleta na iVolatabu. Me vaka niu se bera ni bau kilai ira na iVakadinadina i Jiova, au tarogi ira gona na vo ni kaivesu me baleti ira. Dua na ka na noqu kidacala ni levu vei ira au taroga era tukuna e levu na ka ca me baleti ira. E dua vei ira na kaivesu e tukuna niu rawa ni lewena e dua ga na lotu, ia me kua ga ni iVakadinadina i Jiova. Ia qori e sa qai vakavuna ga meu via kila e levu tale na ka me baleti ira kei na vuna era cati kina vakalevu. Au sa qai mai raica e muri na vuna, oya nira lotu dina. E tukuna tale ga na iVolatabu ni o ira kece era saga mera imuri i Jisu era na vakacacani.​—2 Timoci 3:12.

Ena gauna ya, au a lesi meu cakacaka ena vale ni ivolavola ni valeniveivesu. Ena dua na siga au kunea eso na kateni era tu kina na mekesinia makawa Na Vale ni Vakatawa kei na Yadra! ena dua na rumu era dau maroroi tu kina na iyaya. Au kauta sara na mekesini qori ena rumu au vesu tiko kina, au tekivu vakawilika. Na levu ni ka au kila mai na veika au wilika, e vaka ga na tamata e kunea e dua na toevu ena vanua dravuisiga. Me vaka ni na dede na noqu tiko e valeniveivesu, au vulica kina e veisiga na iVolatabu me vica vata na aua.

E dua na siga au kacivi meu gole ena dua na rumu era tiko kina na vakailesilesi ni valeniveivesu. Au nanuma sara ga niu sa na suka, au mani taura kece na noqu iyaya, vakamoce vei ira na noqu itokani, au cici sara ena ofisi. Ia niu yaco yani, au qai kila ni dua tale na ka au sa beitaki kina, oya niu vunitaka tiko eso na itukutuku. Au mani totogitaki tale me rua na yabaki.

Dua na ka na noqu rarawa ena imatai ni gauna. Ia ni oti e vica na siga, au qai raica ni qo tale ga e vu ni veivakalougatataki vei au. E levu dina na ka au vulica ena iVolatabu, ia au se via muria tiko ga na ivakarau ni noqu bula makawa ena gauna au sa na sere kina. E vinakati e levu na ka meu veisautaka.

Eso na gauna au dau nanuma ni na dredre vua na Kalou me ciqomi au meu dua na nona dauveiqaravi. Ia au dau vakananuma vakatitobu eso na tikinivolatabu me vaka na 1 Korinica 6:9-11. E vakaraitaka na tikinivolatabu qori, ni so na lotu vaKarisito ena imatai ni senitiuri S.K. era a dau butako, dau mateni, eso tale era dau kovea na ka ni bera nira qaravi Jiova. Ia ena veivuke i Jiova era veisau rawa kina. E uqeti au sara ga na nodra ivakaraitaki.

E rawarawa meu biuta eso na noqu malumalumu. Kena ivakaraitaki, e sega ni dredre meu biuta na noqu dau vakayagataka vakasivia na wainimategaga. Ia e dredre meu biuta na noqu dau vakatavako. E sivia e dua na yabaki na noqu sasagataka tiko qori, ia toso na gauna au sa qai valuta rawa. Dua na ka e vukei au meu valuta na vakatavako, oya noqu vulica sara ga na leqa e dau vakavuna na vakatavako. Koya e bibi sara, oya na noqu dau masuti Jiova e vukei au meu muduka kina na ivakarau ni bula qori.

Na levu ga ni noqu toro voleka vei Jiova, e sa tekivu yali tale ga yani vakamalua na noqu dau nanuma niu sega ni kauaitaki. Na ivakarau ni rai qori au se vakila mai na gauna a biuti keitou kina o tamaqu. E tarai au sara ga na ka e tukuni ena Same 27:10, e kaya: “Ni sa laivi au na tamaqu kei na tinaqu, ena qai keveti au cake ko Jiova.” Au sa qai kila niu sa kunea e dua na Tama vinaka duadua—dua ena sega vakadua ni biuti au! Qo sa qai vakainaki na noqu bula. Ena Epereli 2004, ni oti e ono na vula noqu sere mai valeniveivesu, au papitaiso meu dua na iVakadinadina i Jiova.

KENA YAGA: Au sa marautaka na noqu bula. Au sa galala mai na itovo ca, au sa marautaka tale ga na noqu bulabula vakayago qai vinaka na ivakarau ni lomaqu ni vakatauvatani ena gauna au se gone kina. E vakilai tale ga na marau ena noqu bula vakawati au qai veiwekani vakavoleka sara kei na Tamaqu vakalomalagi o Jiova. Niu maliwai ira na nona tamata, au sa kunea kina e levu na tamaqu, tinaqu, ganequ kei ira na taciqu. (Marika 10:29, 30) Au marau nira raica vei au eso na ka au sega tu mada ga ni kila niu rawa ni cakava.

So na gauna au na rarawataka na ka au dau cakava ena gauna sa oti. Ia e vakacegui au na ka e yalataka na Kalou me baleta na vuravura vou, oya nida na ‘sega ni nanuma’ tale na ka ca eda dau vakasamataka tu. (Aisea 65:17) Na veika au sotava e vukei au ena gauna qo meu dau kauaitaki ira era vakila na ituvaki vata ga au sotava. Qori e dua na sala e yaga kina na veika au sotava ena gauna sa oti. Kena ivakaraitaki, niu dau vakaitavi ena cakacaka vakavunau vaKarisito, e rawarawa noqu dau vosa vei ira era bobula tu ena wainimategaga, o ira na dau bobula ena alakaolo, se o ira na dau basulawa​—au sega ni vakaduiduitaki ira. Keu sa rawa ni veisautaka na noqu bula meu vakamarautaki Jiova, au vakadeitaka ni rawa tale ga vua e dua me cakava qori!

[iVakamacala e ra]

[iYaloyalo ena tabana e 26]

[iYaloyalo ena tabana e 27]

[Tikina bibi ena tabana e 27]

“Au sega ni kilai tamaqu, ia e vakavulici au na iVolatabu ena sala meu tuberi ratou kina na tolu na luvequ tagane”

[iYaloyalo ena tabana e 28]

[iYaloyalo ena tabana e 29]

[Tina bibi ena tabana e 29]

“Au sa kunea e dua na Tama vinaka duadua​—dua ena sega vakadua ni biuti au!”