Vakasaqara na Veidusimaki i Jiova ena Nomu Vakatulewa Kece

“Ni sa noda Kalou ka tawa mudu na Kalou oqo: ena tuberi keda ko koya ka yacova na noda mate.”​—SAME 48:14.

1, 2. Na cava meda kua ni vakararavi kina ina noda vuku, ia meda nuitaka ga na veidusimaki i Jiova? Taro cava so e vure kina?

ENA rawarawa sara noda vakaisini keda ena gauna eda vakasamataka tiko kina na veika e tawayaga qai veivakaleqai. (Vkai. 12:11) Kevaka tale ga sa dau lomada tiko ga meda cakava e dua na ka eda kila ni sega ni dodonu me kitaka na lotu Vakarisito, eda na dau qara iulubale meda cakava kina. (Jere. 17:​5, 9) E vuku dina na daunisame ni masuti Jiova: “Mo ni tala mai na nomuni rarama kei na nomuni dina: me rau tuberi au tiko.” (Same 43:3) E sega ni nuitaka na nona vuku vakatamata, ia e vakararavi ga vei Jiova baleta ni ivurevure vinaka duadua ni veidusimaki. Me vakataki koya na daunisame, ena yaga sara vakalevu na noda nuitaka na veidusimaki ni Kalou.

² Na cava meda nuitaka ga kina na veidusimaki i Jiova? Gauna vakacava meda qara kina nona veidusimaki? Na rai cava me tiko vei keda me qai yaga kina na nona veidusimaki? E dusimaki keda tale ga vakacava o Jiova nikua? Ena saumi na taro bibi qori ena ulutaga ni vuli qo.

Cava Meda Nuitaka Kina na Veidusimaki i Jiova?

3-5. Na cava meda nuitaka kina vakatabakidua na veidusimaki i Jiova?

³ E Tamada vakalomalagi o Jiova. (1 Kor. 8:6) E kilai keda vakavinaka, vaka kina na lomada yadudua. (1 Sam. 16:7; Vkai. 21:2) Kaya o Tui Tevita vua na Kalou: “O ni sa kila na noqu tiko sobu kei na noqu tu cake, o ni sa kila na nanuma ni lomaqu ni sa yawa tiko. Ni sa sega e dua na vosa e na gusuqu, sa sega ni kilai deivaki kece sara ga vei kemuni Jiova.” (Same 139:​2, 4) Ni kilai keda vakavinaka o Jiova, sa macala ga ni kila vinaka o koya na veika ena yaga ina noda bula. E vuku tale ga o Jiova. E sega ni dua na ka e vunitaki vua, e kilai keda tu vakavinaka, kila vinaka tale ga na itinitini ni ka e caka. (Aisea 46:​9-​11; Roma 11:33) E ‘Kalou vuku duadua ga.’​—Roma 16:27.

⁴ E lomani keda tale ga o Jiova qai dau vakarautaka na veika me yaga ina noda bula. (Joni 3:​16; 1 Joni 4:8) E dau lomasoli tale ga vei keda. E vola na tisaipeli o Jemesa: “Sa lako maicake nai solisoli vinaka kecega kei nai solisoli kecega e yaga sara, a sa lako sobu mai vua na Tama ni rarama.” (Jeme. 1:​17) E yaga na nona dau lomasoli vei ira na muria na nona veidusimaki.

⁵ Kena ilutua, e kaukaua o Jiova. Tukuna kina na daunisame: “O koya sa tiko e na nona yasana vuni ko Koya na Cecere sara, ena tiko ga e na yaloyalo i Koya sa Kaukauwa. Au na kaya e na vuku i Jiova, O koya ga na noqui drodro kei na noqu bai ni valu: na noqu Kalou; au na vakararavi vua.” (Same 91:​1, 2) Nida muria nona veidusimaki sa vakavotuya tiko ya na noda nuitaki koya ena vuku ni nona dau vakayacora na ka e yalataka. Kevaka mada ga eda tusaqati, ena tokoni keda o Jiova, ena taqomaki keda tale ga. (Same 71:​4, 5; Wilika Vosa Vakaibalebale 3:​19-​26.) E kila vinaka o Jiova na veika ena yaga vei keda, qai via vakacegui keda kina, tu tale ga vua na kaukaua me vakarautaka. Sa bau ka vakalialia dina meda qai vakalecalecava nona veidusimaki! Ia na gauna cava meda na qara kina nona veidusimaki?

Gauna Cava Meda Qara Kina na Nona Veidusimaki?

6, 7. Gauna cava eda na gadreva kina na veidusimaki i Jiova?

⁶ Eda gadreva na veidusimaki ni Kalou ena noda bula taucoko, nida se gone me yacova nida sa itabaqase. Kaya na daunisame: “Ni sa noda Kalou ka tawa mudu na Kalou oqo: ena tuberi keda ko koya ka yacova na noda mate.” (Same 48:14) Me vaka ga na daunisame, era na dau vakasaqara tiko ga na veidusimaki ni Kalou o ira na lotu Vakarisito yalomatua.

⁷ Ia ena so na gauna eda na gadreva sara ga vakalevu na veivakacegui. Me kena ivakaraitaki, ena gauna eda “vakararawataki” kina ena vuku ni veitusaqati, tauvimate bibi, se tawanamaki noda sa sega ni cakacaka saumi. (Same 69:​16, 17) Ena gauna va qori, dau veivakacegui dina nida torovi Jiova ena noda nuidei ni na vakayaloqaqataki keda meda vosota, ena dusimaki keda tale ga meda vakatulewa vinaka. (Wilika Same 102:17.) Ia eda na gadreva tale ga nona veivakacegui ena so tale na ituvaki. Kena ivakaraitaki, nida lai vunautaka na itukutuku ni Matanitu ni Kalou, macala ga nida na gadreva na vedusimaki i Jiova me vuavuaivinaka noda vunau. Ena bibi tale meda muria na veidusimaki i Jiova ke da via vakatulewa vakayalomatua ena veika e vauca na ka ni marau, isulusulu kei na sasauni, ilala, cakacaka, vuli, kei na so tale. Sega ni vakabekataki nida na gadreva tu ga na veidusimaki ena veibasoga ni noda bula.

Veivakaleqai Noda Sega ni Vakasaqara na Veidusimaki ni Kalou

8. Na cava e vakavotui ena nona kania na vuanikau vakatabui o Ivi?

⁸ Meda nanuma tiko ni bibi na yalorawarawa meda muria kina na veidusimaki i Jiova. Ena sega ni vakasaurarataki keda na Kalou meda muria noda idusidusi ke da sega ni vinakata. Na imatai ni tamata a vakatulewataka me kua ni muria na veidusimaki i Jiova o Ivi, kei na ka e sotava kina e vakaraitaka na ca ni nona vakatulewa. Vakasamataka tale ga na ka e vakavotui ena nona vakatulewa va ya o Ivi. A kania na vuanikau vakatabui ni via ‘vaka na Kalou me kila na ka vinaka kei na ka ca.’ (Vkte. 3:5) E suguta kina na itavi ni Kalou, e vakatulewataka ga vakataki koya na veika e vinaka kei na veika e ca, qai sega ni via muria na veidusimaki i Jiova. Mani vakanadakuya kina na veiliutaki cecere i Jiova. E via liutaki koya ga. Oqori tale ga na ka a cakava o Atama, na watina qai talaidredre.​—Roma 5:​12.

9. Na cava e vakavotui ena noda sega ni muria na veidusimaki i Jiova? Cava e ka vakalialia kina qori?

⁹ Kevaka eda sega tale ga ni muria na nona veidusimaki o Jiova nikua, e vakavotuya oya nida sega ni doka nona veiliutaki cecere. Vakasamataka mada e dua e sa dau sarava tiko na iyaloyalo vakasisila. Ke sa dau sosoqoni tiko kei na ivavakoso lotu Vakarisito, ena kila vinaka na idusidusi i Jiova me baleta na ka e cakava tiko ya. Ena kila tale ga ni sega ni dodonu me cavuta na ka vakasisila, se me gaganotaka ni raica tiko. (Efeso 5:3) Ke sega ni muria na idusidusi i Jiova ena veika qo, e sa beca sara tiko ga na nona veiliutaki cecere kei na nona itutu. (1 Kor. 11:3) Sa bau dua dina na ka vakalialia oya, vaka ga e kaya o Jeremaia “sa sega ni vu mai vua na tamata sa lako tu me lewa na nonai lakolako.”​—Jere. 10:23.

10. Na cava meda qarauna kina na noda vakayagataka na noda galala ni vakatulewa?

¹⁰ So era na rairai vakalewa na ka e cavuta o Jeremaia, ra nanuma ni solia tu na Kalou na galala ni vakatulewa, e sega gona ni dodonu me tarogi keda tale ena sala eda vakayagataka kina. Me nanumi tiko ni galala ni vakatulewa e isolisoli i Jiova, ia meda vakayagataka vakavuku. Eda na saumitaro ga vei Jiova ena vuku ni ka eda vakatulewataka meda tukuna se cakava. (Roma 14:10) E kaya o Jisu: “Sa vosataka na gusuda na ka sa oso vakalevu kina na lomada.” E kaya tale ga: “Sa curu yani mai na yalo na nanuma ca, na daulaba, na dauyalewa, na daudara, na daubutako, na veibeitaki vakailasu, na vosa vakacaca.” (Maciu 12:34; 15:19) Na ka gona eda tukuna se cakava e vakavotuya na ka e tu e lomada. Ena vakaraitaka sara ga se da tamata vakacava. Oya na vuna ena vakasaqara kina na lotu Vakarisito yalomatua na veidusimaki i Jiova ena nona vakatulewa kece. Ni cakava qori ena raica o Jiova ni ‘dodonu tiko na lomana,’ ena qai “caka vinaka” vua.​—Same 125:4.

11. Na cava eda vulica ena nodra ivolatukutuku na Isireli?

¹¹ Vakasamataka tale mada na ivolatukutuku kei Isireli. Nira vakatulewa vinaka ena nodra muria nona veidusimaki o Jiova, e taqomaki ira o koya. (Josua 24:​15, 21, 31) Ia levu na gauna era sega ni vakayagataka vinaka na nodra galala ni vakatulewa. Tukuna baleti ira o Jiova ena gauna i Jeremaia: “Ka ra sa sega ni vakarorogo, se vakatu daligadra, era sa muria ga na nodra lewa kei na nodra yalokaukauwa, era sa suka kimuri, ka sega ni lako kiliu.” (Jere. 7:​24-​26) Sa ra bau vakaloloma dina! Meda kua mada ga ni domoqa se muri lomada ga meda beca kina na veidusimaki i Jiova, da lewa tu ga noda ilakolako, qai vakavuna sara meda “suka kimuri, ka sega ni lako kiliu”!

Na Cava ena Gadrevi Meda Muria Kina na iVakasala ni Kalou?

12, 13. (a) Na cava ena uqeti keda meda muria na veidusimaki i Jiova? (b) Na cava e bibi kina na vakabauta?

¹² Ena uqeti keda na noda lomani Jiova meda muria nona veidusimaki. (1 Joni 5:3) Ia e dusia o Paula na ka e gadrevi tale ga: “Keitou sa lako voli e na vakabauta, ka sega ga e na raica.” (2 Kor. 5:​6, 7) Na cava e bibi kina na vakabauta? E tuberi keda o Jiova ina “sala dodonu,” ia na sala qori e sega ni dusimaki keda meda vutuniyau se vakaitutu ena vuravura qo. (Same 23:3) Oya na vuna me dei tiko ga kina na noda vakabauta ni na sobuti keda na veivakalougatataki vakayalo nida qaravi Jiova tiko. (Wilika 2 Korinica 4:​17, 18.) Na vakabauta tale ga ena uqeti keda meda lomavakacegu ena veika sa tu rawa meda bula kina.​—1 Tim. 6:8.

¹³ E vakaraitaka o Jisu ni okati ena sokalou dina na noda vakuai keda, ia ena gadrevi tale ga kina na vakabauta. (Luke 9:​23, 24) E so na dausokalou yalodina era vakuai ira ena levu na ka nira vosota na bula dravudravua, veivakaduiduitaki, kei na veitusaqati kaukaua mada ga. (2 Kor. 11:​23-​27; Vkta. 3:​8-​10) Era marau ni vosota na veituvaki qori ena kaukaua ni nodra vakabauta. (Jeme. 1:​2, 3) Ke kaukaua tale ga na noda vakabauta eda na nuidei ni vinaka duadua ga na muri ni veidusimaki i Jiova. Sega ni vakabekataki ni na yaga tiko ga vei keda. Eda na vakila tale ga na veivakalougatataki ke da vosota tiko ga ena yalodina, ni na uasivita sara na veika rarawa e yacovi keda tiko ena gauna qo ni na lekaleka wale ga.​—Iper. 11:6.

14. Na cava e gadrevi kina me yalomalumalumu o Eka?

¹⁴ E gadrevi tale ga meda dau yalomalumalumu meda muria kina na veidusimaki i Jiova. E vakavotui vinaka qori ena ivakaraitaki i Eka, na vada i Sera. Gauna e kila kina o Sera ni sega ni rawa ni vakaluveni, sa qai soli Eka vei Eparama me vakaluveni vua. E dokadokai koya kina o Eka vei Sera, na nona marama. Sa qai “vakararawataki” Eka o Sera, e vakavuna me dro. E qai tukuna vei Eka e dua na agilosi i Jiova: “Mo lesu tale mada vua na nomu marama, ka vakamalumalumutaki iko vua.” (Vkte. 16:​2, 6, 8, 9) De dua a sega ni vinakata o Eka na veidusimaki ya. Ena gadrevi vua me yalomalumalumu me muria kina na veidusimaki ni agilosi. A cakava dina qori qai muria na vosa ni agilosi, vakasucuma gona na luvenatagane o Isimeli ena keba ga i Eparama, na tama ni gone ya.

15. Vakamacalataka e so na ituvaki ena gadrevi kina meda yalomalumalumu ni muria na veidusimaki i Jiova nikua.

¹⁵ Kena rairai ni gadrevi tale ga na yalomalumalumu meda muria kina na veidusimaki i Jiova. De dua ena gadrevi vei ira e so mera ciqoma na rai i Jiova ni ca e so na ka ni veivakamarautaki era dau galeleta tu. De dua ena gadrevi me kere veivosoti e dua na lotu Vakarisito baleta ni a veivakacudrui. Se a cakava e dua na cala qai vinakati me vakatusa. Vakacava ke ivalavala ca bibi sara? Ena gadrevi me vakamalumalumu me vakatusa na nona ivalavala ca vei ira na qase. So era na rawa sara ga ni vakasivoi mai na ivavakoso vakarisito. Era na qai vakadonui mera lewe tale ni ivavakoso ke ra yalomalumalumu mera veivutuni, ra qai veisautaka nodra itovo. Ena ituvaki va qo kei na so e via tautauvata, e veivakacegui kina na Vosa Vakaibalebale 29:23: “A nona viavialevu na tamata ena vakasivoi kina: ia ko koya sa yalomalumalumu ena dokai tiko.”

Nona Veidusimaki o Jiova

16, 17. Na cava meda cakava me noda idusidusi nuitaki duadua na iVolatabu?

¹⁶ Na ivurevure vinaka duadua ni veidusimaki vakalou na iVolatabu, ni uqeta sara ga na Kalou na kena volai. (Wilika 2 Timoci 3:​16, 17.) Me yaga vei keda na Vosa ni Kalou, ena ka vakayalomatua meda kua ni waraka sara me yaco e dua na ituvaki meda qai qara na idusidusi vakaivolatabu. Ia me noda ivakarau tudei mada ga ni bula na wili iVolatabu e veisiga. (Same 1:​1-3) Eda na kila vinaka kina na Vosa ni Kalou. Ena tiko vei keda na ivakarau ni nona vakasama da qai vakarau tu ena leqa tawanamaki e yaco.

¹⁷ Meda vakasamataka tale ga vakabibi na tikinivolatabu eda wilika, me qai salavata na noda dau masu. Nida vakasamataka tiko vakabibi na tikinivolatabu eda wilika, eda na vakasamataka tale ga na ituvaki ena yaga kina. (1 Tim. 4:​15) Ia, ke mani yaco na leqa levu sara eda na kerea na veidusimaki i Jiova. Ena dusimaki keda nona yalo tabu meda nanuma e so na ivakavuvuli yavutaki vakaivolatabu eda sa wilika oti ena iVolatabu se na ivola vakaivolatabu.​—Wilika Same 25:​4, 5.

18. Vakayagataki ira vakacava na mataveitacini lotu Vakarisito o Jiova mera dusimaki keda?

¹⁸ Dua tale na ivurevure ni veidusimaki yaga i Jiova o ira na mataveitacini lotu Vakarisito. Tiki bibi ni mataveitacini qo na “dauveiqaravi yalo dina ka vuku” e matataka tiko na iLawalawa Dauvakatulewa. E sega ni cegu na vakarautaka tiko mai na kakana vakayalo ena kena tabaki na ivola kei na parokaramu ni soqoni kei na soqo ni tabacakacaka. (Maciu. 24:​45-​47, VV; vakatauvatana Cakacaka 15:​6, 22-​31.) Era tu tale ga na tacida era sa matua sara, vakauasivi o ira na qase ni ivavakoso, e veiganiti mera dau veidusimaki ra veivakasalataki tale ga vakaivolatabu. (Aisea 32:1) E tiko tale ga na ivukevuke yaga era vakalougatataki tu kina na itabagone era lewe ni vuvale lotu Vakarisito. Oya o ira na itubutubu lesi vakalou, e veiganiti mera dau kerea na gone na nodra veidusimaki.​—Efeso 6:​1-3.

19. Na veivakalougatataki cava eda na vakila ena noda vakasaqara tiko ga na veidusimaki i Jiova?

¹⁹ E levu dina na sala e veidusimaki kina o Jiova, ena yaga sara vakalevu ke da dau vakayagataka. Dua na gauna ni a yalodina tu o Isireli, a kaya o Tui Tevita: “Sa vakararavi vei kemuni ko ira na tama i keimami. Era a vakararavi vei kemuni, ia ko ni a vakabulai ira. Era a tagi vei kemuni, a ra sa vakabulai: era a vakararavi vei kemuni, a ra sa sega ni vakamaduataki.” (Same 22:​3-5) Ke da nuitaka na veidusimaki i Jiova da qai muria eda na “sega ni vakamaduataki.” Eda na sega ni vakanuinuikara. Ke da ‘laiva na noda sala vei Jiova’ meda kua ni nuitaka ga na noda vuku, eda na vakalougatataki kina vakalevu ena gauna mada ga qo. (Same 37:5) Ke da yalodina tiko ga ena noda muria na veidusimaki i Jiova, ena tawamudu na veivakalougatataki qori. Vola o Tui Tevita: “Ni sa vinakata na ka dodonu ko Jiova, ka sa sega ni biuti ira na nona tamata era yalosavasava; era sa maroroi ka sega ni mudu . . . Era na taukena na vanua ko ira na yalododonu, Ka tiko kina ka sega ni mudu.”​—Same 37:​28, 29.

Vakamacalataka Mada

• Na cava eda nuitaka kina na veidusimaki i Jiova?

• Na cava e vakavotui ena noda sega ni muria na veidusimaki i Jiova?

• iTuvaki cava so ena gadrevi kina vua na lotu Vakarisito na yalomalumalumu?

• E dusimaki keda vakacava o Jiova nikua?

[iYaloyalo ena tabana e 8]

O dau qara beka na veidusimaki i Jiova ena nomu vakatulewa kece?

[iYaloyalo ena tabana e 9]

E vakanadakuya o Ivi na veiliutaki cecere i Jiova

[iYaloyalo ena tabana e 10]

Na itovo cava e gadrevi me vakaraitaka o Eka me muria kina na veidusimaki ni agilosi?