Na Rai ni iVolatabu

Na Cava Meda Laiva Kina na iVolatabu me Dusimaki Keda?

“Sai koya na Kalou sa vakavuna nai Vola Tabu kecega, a sa yaga oqo mei vakavuvuli, me vunauca na ca, me ia kina na vakadodonutaki.”—2 Timoci 3:16.

O DAU qara e vei na veidusimaki ena nomu bula? Nikua, e binikasauru na ivakasala era tu me baleta na veiulutaga cava ga eda vakasamataka rawa. E levu era se rai ga ina iVolatabu me dusimaki ira, dina ni se volai makawa sara.

Ia e dua na iwase levu ni tamata era nanuma ni sa sega ni yaga na iVolatabu, vakauasivi ena levu ni misini vovou kei na sala ni vakauitukutuku era sa tu ena gauna oqo. E so mada ga na dauniveivakavulici kei na saenitisi rogo, era tokona na vakasama ni iVolatabu sa sega ni ganiti keda. E donu beka na nodra nanuma? Nida vakasamataka na levu ni ivurevure ni veidusimaki era sa tu nikua, me icavai meda rai kina ena iVolatabu me dusimaki keda?

E Lewena na Ka Dina

Dua na gauna a vakacegu toka o Jisu ena yasa ni dua na ikeliwai qai veivosaki tiko kei na dua na yalewa ni Samaria. E kaya: “A Yalo na Kalou: ia ko ira sa lotu vua, e dodonu me ra lotu vakayalo ka vakaidina.” (Joni 4:24) Na veivosa oqori e dusia ni tiko na ivakarau ni sokalou e vakadonuya na Kalou. Me vakaidina na noda sokalou, e dodonu me salavata kei na veika e vakatakila tu na Kalou me baleti koya ena iVolatabu. Na Vosa ni Kalou e lewena na ka dina.​—Joni 17:17.

Ia, e levu na matalotu era kaya nira vakabauta na iVolatabu, qai duidui na ka era vakavuvulitaka. Vakavuna gona na veilecayaki se cava sara mada e kaya na iVolatabu. E Kalou beka o Jisu, se Luve ni Kalou? Sa itinitini beka ga ni bula na mate? E vanua dina beka o eli, mera na lai vakararawataki kina na tamata nira sa mate? E bula dina o Setani? Na cava soti e vauci ena bula ni dua na lotu Vakarisito? E kauaitaka beka na Kalou na noda itovo kei na veika e tu e lomada? Ke rau sa veivinakati e dua na tagane kei na dua na yalewa, e sa na tara beka me rau veiyacovi ni se bera na vakamau? E cala beka na gunuvi ni yaqona ni valagi se na yaqona ni viti?a Ra kaya na veimatalotu yadua ni dina na ka era vakavuvulitaka me baleta na veitaro oqori. Ia, e vuqa na gauna ena veicoqacoqa na veivakavuvuli ni lotu. E matata ni sega ni rawa nira dina kece.​—Maciu 7:21-23.

Ena rawa vakacava mo kila na ka dina me baleta na Kalou kei na mataqali sokalou e vakamarautaki koya? Kaya mada ke o tauvimate, qai tukuni vei iko ni kena iwali ga mo na sele. Cava o na cakava? E macala ni o na qara na dauveisele vinaka duadua e rawa ni cakava na mataqali veisele vaka oya. O na via vakadeitaka ni vakamatanivola kina, se vakacava na ivakatagedegede ni nona kila, o na qai saga sara mo drau veivosaki. Ni oti oya, o sa na vakadeitaka mai na ivakadinadina e tu ni o koya e dauveisele vinaka duadua, sa rawa ni o nuidei me na selevi iko. Rairai e so ena duidui na nodra nanuma. Ia e sa yavutaki vinaka na nomu nuitaki koya na dauveisele oya.

Ena vaka tale ga oqori ke o dikeva vakavinaka na ivakadinadina matata sa tu, ni na rawa ni yavutaki kina nomu vakabauta na Kalou kei na iVolatabu. (Vosa Vakaibalebale 2:1-4) E tu vei iko na digidigi mo qara na isaunitaro me baleta na ivakarau ni sokalou e vakadonuya na Kalou. Rawa mo qara oqori ena nodra dui ivakavuvuli kei na nanuma ga vakatamata, se rawa mo dikeva na rai ni iVolatabu.

E Dodonu Qai Yaga

Nomu dikeva vakavinaka na iVolatabu o na raica kina e levu sara na ivakadinadina ni “Kalou sa vakavuna nai Vola Tabu kecega, a sa yaga”b sara vei keda kece. (2 Timoci 3:16, 17) Kena ivakaraitaki, e robota na iVolatabu na itukutuku matailalai ni parofisai, qai vakadeitaka na itukutuku ni veigauna na kedra vakayacori na veiparofisai oqori. (Aisea 13:19, 20; Taniela 8:3-8, 20-22; Maika 5:2) Dina ni sega ni ivola vakasaenisi na iVolatabu, ia e donu vinaka na veika vakasaenisi e tukuna. A se volai tu mai ena vica vata na udolu na yabaki sa oti na ka dina me baleta na veika bula kei na tiko savasava, qai muri sara na nodra tokona na vakasama oqori na saenitisi.​—Vunau ni Soro 11:27, 28, 32, 33; Aisea 40:22, NW.

O koya gona, na iVolatabu e vukei keda meda vakatulewa vakavuku. E tu tale ga kina e levu na ivakasala yaga me baleta na bula vakavuvale, bula vakayago, veika e rawa ni vakavinakataka na lomada, na veika vakabisinisi, kei na veika tale e so e vauca na bula ni veisiga. Na Vosa Vakaibalebale 2:6, 7, e kaya: “Sa solia na vuku ko Jiova; sa lako mai na gusuna na kila ka kei na yalomatua: sa binia na vuku dina me nodra na yalododonu.” Ena nomu rai ena iVolatabu me dusimaki iko, ena rawa kina mo vakavulica na lomamu ‘me vakaduiduitaka na vinaka mai na ca.’—Iperiu 5:14, VV.

Na Vosa ni Kalou e vukei keda tale ga meda kila na inaki ni bula. (Joni 17:3; Cakacaka 17:26, 27) E vakamacalataka na vuna e sa rui ca kina na ituvaki e vuravura. (Maciu 24:3, 7, 8, 14; 2 Timoci 3:1-5) E vakaraitaka na Kalou vei keda ena iVolatabu nona na vakaotia na ca kece e vuravura me rawa nida na marautaka na bula e uasivi qai tawamudu.​—Aisea 33:24; Taniela 2:44; Vakatakila 21:3, 4.

Lewe vica na milioni era vakadinadinataka ena nodra bula ni rawa nira nuitaka na iVolatabu me ivurevure yaga ni veidusimaki. Era sureti kemuni o ira na tabaka na Yadra! mo ni dikeva mada na iulutaga “Na Rai ni iVolatabu,” e dautabaki ena ilavelave kece ni ivoladraudrau oqo. Ke o cakava oqori, o rawa ni na kunea kina e so tale na ivakadinadina e vakadeitaka ni iVolatabu e ivurevure vinaka duadua ni veidusimaki ena nomu bula.

[iVakamacala e ra]

O BAU VAQAQA BEKA?

◼ Na mataqali sokalou cava e vakadonuya na Kalou?​—Joni 4:24.

◼ Na cava mo cakava me rawa ni yaga kina vei iko na vuku vakalou?​—Vosa Vakaibalebale 2:1-4.

◼ E yaga vakacava na iVolatabu me ivurevure ni veidusimaki?​—Iperiu 5:14, VV.