O se Nanuma Tiko?

O taleitaka na ka o wilika ena itabataba ni Vale ni Vakatawa era se qai tabaki oti ga? Raica mada ke o rawa ni sauma e vica na taro qo:

• Ratou sikovi Jisu ena gauna cava na tamata vuku?

E tukuni ena dua na ivakamacala ena dua na iVolatabu: “Ni vakatauvatani kei ratou na ivakatawanisipi, ratou a sega ni sikovi Jisu ena valenimanumanu na dauraikalokalo ena bogi a sucu kina. Oti toka e vica na vula, ratou sa qai lai raici koya.” Ena gauna ya sa tiko ena nona vale o Jisu ni sa dua toka na ‘gonetagane’ lailai. (Maciu 2:​7-​11) Ke ratou a kauta dina yani vei Jisu na koula kei na iloloma talei e so ena bogi sara ga a sucu kina, ena cabora beka ga o Meri e rua na ruve ena valenisoro ni oti e 40 na siga?​—1/1, tabana e 31.

• Na veisau cava era cakava e levu me vakainaki kina nodra bula?

Ena taroga beka e dua, ‘Rawa beka meu cakava e so na veisau, meu qai saga meu bula rawarawa ga?’ Qori sara ga na ka a cakava o Amy. A vutuniyau o koya, ia a sega ga ni marau. A qai liaca ni sa voleka sara me vakacala nona vakabauta na cakacaka a qara tiko ena vuravura qo. A dikeva ni dodonu me vakaliuca ga na cakacaka e vauca na Matanitu ni Kalou, mani painia sara. Kaya o Amy, “Au sa qai marautaka tu qo na lomavakacegu au sega ni bau vakila” ni vakatauvatani kei na gauna a cakacaka saumi kina.​—1/15, tabana e 19.

• “Nai tabatamata” cava a dusia tiko o Jisu ena gauna a cavuta kina na vosa qori ena Maciu 24:34?

Levu na gauna ni dau cavuta o Jisu na vosa “[i]tabatamata” qai tauca vata kei na vosa ni veivakalewai, e tukuni ira tiko na tamata ca se vosa sara tiko ga vei ira. Ia a sega ni tauca na vosa ni veivakalewai ena gauna a vosa tiko kina qo vei ratou na nona tisaipeli ratou vakarau lumuti ena yalo tabu. O iratou ga qori ratou na raica qai kila se vulica na ibalebale ni ivakatakilakila e cavuti ena Maciu 24:​32, 33. O koya gona, a dusi ira tiko ga na nona muri lumuti o Jisu. Sega wale ga ni okati e ke o ira na nona imuri lumuti ena imatai ni senitiuri, ia era wili tale ga kina o ira na bula donuya na ivakataotioti ni veika vakavuravura.​—2/15, tabana e 23-4.

• Me vaka e volai ena Jemesa 3:​17, na itovo cava meda guta meda bulataka?

Ke da savasava, e dodonu meda cata totolo na ka ca. (Vkte. 39:​7-9) Meda dau veiyaloni tale ga, oya meda kua ni yalokaukaua, veileti se cakava e so na ivalavala ena vakacaraka noda veiyaloni. Bibi gona meda dui tarogi keda: ‘Eda kilai beka nida dau saga na veiyaloni, se da dau cakava na kena veibasai? Da dau veileqaleqati beka se veiba kei ira tale e so? Vakacava, eda dau cudru totolo beka, se da dau veivakacudrui? Eda dau vakaliuliu meda veiyaloni tiko ga kei ira tale e so, da qai tu vakarau na veivosoti? Eda dau usuraka beka mera ciqoma ga na tacida na noda ivakarau ni bula?’​—3/15, tabana e 24-5.