Vakasaqara “Na Ka Savasava e na Rere Vua na Kalou”

E VAKARAITAKA na iVolatabu ni taucoko nona savasava na Kalou o Jiova ni kaya: “E savasava, e savasava, e savasava o Jiova.” (Aisea 6:​3, NW; Vkta. 4:​8, VV) Na vosa vaKirisi kei na vosa vakaIperiu e vakadewataki me “savasava” e tiko kina na vakasama ni sekavula, se tawacala. E vakaibalebaletaka tale ga na ka e vakatabui, e wasei tani me kua ni tauvi duka. Na savasava gona ni Kalou e dusia ni taucoko qai vinaka vakaoti nona savasava.

E vinakata tale ga na Kalou savasava o Jiova mera savasava vakayalo, vakayago tale ga na qaravi koya. E vinakata tale ga mera itovo savasava. E sega ni qai wereubiubi ena tikina qo na iVolatabu, ni vinakata o Jiova mera savasava na dau sokaloutaki koya. E kaya na 1 Pita 1:​16: ‘Dou savasava niu sa savasava.’ E rawa beka nida vakatotomuria na savasava i Jiova na tamata ivalavala ca? Io, ia ena sega ga ni taucoko sara. Eda na qai savasava ga vei Jiova ke savasava noda veiqaravi vakayalo, da qai veivolekati kei koya.

Na cava gona meda cakava meda savasava tiko ga kina ena vuravura e lomoci tu ena itovo tawasavasava? iValavala cava so meda cata? Na veisau cava ena rairai gadrevi meda cakava me baleta na ivakarau ni noda vosa kei noda itovo? Meda vuli mai na ka a vinakata o Jiova mera cakava na Jiu nira sa biubiu mai Papiloni mera lesu ina nodra vanua ena 537 B.S.K.

‘Ena Dua na Sala Savasava’

A yalataka o Jiova nira na lesu tale ina nodra vanua na Isireli era vesu tu e Papiloni. E okati ena parofisai qori na veivakadeitaki qo: “Ena dua kina na sala cecere, kei na salatu: ka sa na vakatokai Na sala tabu [“savasava,” NW].” (Aisea 35:8a) E vakaraitaka qo ni sega wale ga ni vakarautaka o Jiova na sala mera lesu kina na Jiu ina nodra vanua, ia e vakadeitaka tale ga ni na taqomaki ira.

Ena gauna qo e vakarautaka tale ga o Jiova vei ira na nona tamata ‘na Sala Savasava’ mera muria nira biuti Papiloni na Ka Levu, na isoqosoqo ni lotu lasu kece i vuravura. Ena 1919 a sereki ira na lotu vaKarisito lumuti o Jiova mai na nodra bobula tu vakayalo ina lotu lasu. Sa ra qai vakasavasavataka tiko vakamalua nodra sokalou nira biuta tani na ivakavuvuli ni lotu lasu. Eda marau na dausokalou vei Jiova nikua nida qaravi koya tiko ena ituvaki vakayalo e savasava, e vakilai kina na vakacegu dina. Eda marau tale ga nida rawa ni veiwekani voleka kei koya, da qai veiyaloni kei ira e so tale.

Era digia mera cakava na ka savasava o ira na lotu vaKarisito lumuti era lewe ni “qele-ni-sipi lailai,” kei “nai soqosoqo levu sara” ni ‘so tani tale na sipi,’ ra qai sureta tiko e so tale. (Luke 12:32; Vkta. 7:9; Joni 10:16) Era sureti kece tu o ira na vinakata mera ‘solia na yagodra mei madrali bula, me savasava, me vinaka vua na Kalou’ mera lakova kina ‘na Sala Savasava.’​—Roma 12:​1.

“Ena Sega ni Lakova e Dua sa Sega ni Savasava”

Ena 537 B.S.K., a gadrevi mera cakava e dua na ka bibi na Jiu era lesu tiko ina nodra vanua. E volai ena Aisea 35:8b me baleti ira na vakadonui mera muria ‘na Sala Savasava’: “Ena sega ni lakova e dua sa sega ni savasava; ena lako vata ko Koya kei ira era sa muria na sala, ia ko ira na tamata sesewa era na sega ni lako sese kina.” Na inaki ni nodra lesu tale na Jiu i Jerusalemi mera lai tauyavutaka tale na sokalou savasava. Era na sega gona ni vakadonui o ira na beca na veika tabu, era cakava tiko na ka tawasavasava, ra qai nanumi ira ga. A bibi vei ira na Jiu era lesu tiko ya mera muria na ivakatagedegede cecere i Jiova, oya me savasava nodra itovo. Bibi tale ga meda cakava qori ke da vinakata me vakadonui keda o Jiova ena gauna qo. Meda vakasaqara na “ka savasava ena rere vua na Kalou.” (2 Kor. 7:1) O koya gona, na ivalavala tawasavasava cava e dodonu meda cata?

A vola na yapositolo o Paula: “E kune votu na vua ni itovo vakayago, oya na veidauci, ivalavala dukadukali, kei na ivalavala vakasisila.” (Kala. 5:​19, NW) E okati ena veidauci na vakayagataki vakatawadodonu ni gacagaca ni vakatubukawa ena taudaku ni vakawati. Na ivalavala vakasisila e tukuni ira tiko na sega ni dau maduataka na ka ra cakava, e dina nira sokonu na tani ena torosobu ni nona ivalavala. E laurai ena ka era cakava na “garosa; dukaveluvelu; kei na sega ni madua.” Na veidauci kei na ivalavala vakasisila erau sega sara ga ni salavata kei na savasava i Jiova. O koya gona, era na sega sara ga ni vakatarai mera lewena na ivavakoso vaKarisito o ira kece na cakava tiko na veika tawasavasava qo, se ra vakasivoi mai na ivavakoso. Qori tale ga na ka ena yaco vei ira na cakava tiko na ivalavala dukadukali, oya na “ka kecega sa tawa-savasava [“dukadukali,” NW] ni ra sa daugarova.”​—Efeso 4:​19.

Na “ivalavala dukadukali” e okati kina e levu sara na ivalavala ca bibi. Na vosa vaKirisi e vakadewataki mai kina e vakaibalebaletaka na ka dukadukali kece ga me baleta na ivakarau ni vosa, itovo, kei na sokalou lasu. E wili tale ga me “ivalavala dukadukali” e so tale na ka, ia e sega sara ni gadrevi me dua na kena komiti ni veilewai.a Era sa vakasaqara tiko na ka savasava o ira na vakayacora na veika dukadukali qori?

Kaya mada ke sa tekivu sarava lo tiko e dua na lotu vaKarisito na iyaloyalo ca se na iyaloyalo vakasisila. Sa na tekivu garova vakamalua na veika vakasisila. Toso na gauna sa na sega ni dei ena nona inakinaki me savasava tiko ga ena rai nei Jiova. De dua, na ka e cakava e sega ni yacova na ivakatagedegede me okati kina me ivalavala dukadukali sara, ia sa sega ni qai vakasamataka tale tiko ‘na veika e dodonu, savasava, totoka, qai dau dokai.’ (Fpai. 4:8) E tawasavasava na ka vakasisila, se mani iyaloyalo, itaba, ivola, vosa, sere, kei na so tale​—e dau vakaleqa na nona veiwekani kei Jiova e dua. Me kua sara ga ni cavuti ena keda maliwa na ka kece ga sa dukadukali.​—Efeso 5:3.

Vakasamataka mada e dua tale na kena ivakaraitaki. Kaya mada ke sa dau vakatavevele tiko e dua na lotu vaKarisito, oya na yamoci ni yago tabu me garovi kina na veiyacovi. De dua e sarava sara tiko ga na iyaloyalo vakasisila ni veiyacovi ena gauna e vakatavevele tiko kina. Dina ni sega ni volai sara ga ena iVolatabu na vosa na “vakatavevele,” e kena ibalebale beka qo ni na sega ni vakadukadukalitaka noda vakasama kei na lomada? Ena sega li ni vakaleqai na noda veiwekani kei Jiova ke da dau cakava na ivalavala torosobu qo, da qai tawasavasava kina vua? Meda kauaitaka nona ivakasala na yapositolo o Paula meda “vakasavasavataki keda mai na dukadukali kecega ni yago kei na yalo.” E kuria: “Dou qai vakamatea na veitikimudou vakavuravura, a dauyalewa, nai valavala tawa-savasava, na garogaro ca, na dodomo ca, kei na kocokoco.”​—2 Kor. 7:1; Kolo. 3:5.

Ena vuravura e lewa tu o Setani, e vakadonui qai uqeti sara ga na vakayacori ni ivakarau dukadukali. De dua, ena dredre noda vorata na veitemaki meda cakava na ivakarau va qori. Ia e bibi vei keda na lotu vaKarisito dina meda kua ni “bula tale tiko me vakataki ira na tawa lotu e na nodra vakanananu tawa yaga.” (Efeso 4:​17, VV) Ena qai vakadonui keda ga o Jiova meda muria tiko ga ‘na Sala Savasava’ ke da sega ni cakava lo tiko na ivakarau dukadukali, se caka tu e matanalevu.

“Ena Sega Kina e Dua na Laioni”

De dua, ena gadrevi meda veisautaka sara ga noda itovo kei na ivakarau ni noda vosa me qai vakadonui keda kina na Kalou savasava o Jiova. Kaya na Aisea 35:9: “Ena sega kina e dua na laioni, se dua na manumanu daukata me cabeta,” na ‘Sala Savasava.’ Era dau vakatauvatani e so ina manumanu kila baleta ni voravora qai kaukaua dina nodra ivalavala kei na nodra ivakarau ni vosa. Ena sega sara ga nodra tikina ena vuravura vou ni yalododonu e sa yalataka tu na Kalou. (Aisea 11:6; 65:25) Ke da vinakata gona me vakadonui keda na Kalou, e bibi meda biuta na itovo vakamanumanu, da qai vakasaqara ga na ka savasava.

E vakasalataki keda na iVolatabu: ‘Mo ni biuta tani kece na yaloca, na cudrucudru, na daunene, na veiba, na vosa ca, kei na ka ca kece ga.’ (Efeso 4:​31) E kaya na Kolosa 3:8: “Mo dou luvata na ka kecega oqo, a daucudru, na daulesa, na lomaca, na vosa ca, na vosa dukadukali mai na gusumudou.” Na “vosa ca” e cavuti ena rua na tikinivolatabu qo, e vakaibalebaletaki ina vosa mosimosi, torosobu, qai veivakacacani.

E sa takalevu tu nikua na vosa mosimosi qai vakasisila. Sa cavuti sara tiko ga e vale. Rau dau tauca na veiwatini na vosa mosimosi, tawaveinanumi, se rau veivakalewai ni rau veivosaki tiko, rau tauca tale ga na mataqali vosa va qori vei ira na luvedrau. Sega ni dodonu me rogoci ena vuvale lotu vaKarisito na mataqali veivosaki kaukaua va qo.​—1 Kor. 5:​11.

Ena Yaga na Vakasaqarai ni “Ka Savasava e na Rere Vua na Kalou”

Na noda qarava na Kalou savasava o Jiova e ka dokai dina! (Josua 24:19) E ka vakamareqeti dina na parataisi vakayalo eda sa mai lewena tu qo. Sega ni vakabekataki ni ivakatagedegede ni bula vinaka duadua na noda saga me savasava tiko ga noda ivakarau ena rai nei Jiova.

Sa na vakarau parataisi na vuravura qo, me vaka e yalataka na Kalou. (Aisea 35:​1, 2, 5-7) Era na vakaivotavota kina o ira ga era vinakata dina, ra qai cakava na ivalavala vakalou. (Aisea 65:​17, 21) O koya gona, meda saga ena noda igu taucoko meda sokaloutaki Jiova ena ituvaki vakayalo e savasava, da qai veivolekati tiko ga kei koya.

[iVakamacala e ra]

[iYaloyalo ena tabana e 26]

Na cava a gadrevi vei ira na Jiu me rawa nira muria tiko ga kina ‘na Sala Savasava’?

[iYaloyalo ena tabana e 27]

Na ka vakasisila ena vakaleqa sara ga noda veiwekani kei Jiova

[iYaloyalo ena tabana e 28]

‘Mo ni biuta tani kece na veiba kei na vosa ca’