Na Veiqaravi ni iLawalawa Dauvakatulewa

NA ILAWALAWA Dauvakatulewa ni iVakadinadina i Jiova e lewena o ira na tacida tagane era yalataka nodra bula mera dauveiqaravi lumuti ni Kalou. Era matataki koya tiko na dauveiqaravi yalodina ka vuku, e nona itavi me vakarautaka na kakana vakayalo qai veidusimaki ena kena vakaliuci na vunautaki ni Matanitu ni Kalou e vuravura.​—Maciu 24:​14, 45, VV, 46-​47.

E dau bose na iLawalawa Dauvakatulewa ena veimacawa ni siga Vukelulu kece. Na bose qo ena yaga ina nodra cakacaka vata. (Same 133:1) O ira na lewe ni iLawalawa Dauvakatulewa qo era veiqaravi tale ga ena so tale na komiti. Na komiti yadua e tiko na dui tabana era qarava me baleta na cakacaka e vauca na Matanitu ni Kalou.

◼ KOMITI NI KODINEITA (COORDINATOR): Era lewe ni komiti qo na kodineita mai na komiti yadua, dua ga na kena vunivola, eratou lewe kece ni iLawalawa Dauvakatulewa. Ratou na raica me cicivaki vinaka na komiti kece me kua ni dua na leqa. Na dau tu vakarau tale ga me ratou veidusimaki ena leqa tubukoso, veivakacacani, kei na so tale na ka e vinakati vakatotolo e tarai ira na iVakadinadina i Jiova e vuravura raraba.

◼ KOMITI NI LEWE I PECELI: Na komiti qo e tuvanaka qai vakarautaka na nodra qaravi vakayago, vakayalo tale ga na vuvale i Peceli e vuravura raraba, me rawa ni qaqaco tiko ga kina nodra veiwekani kei Jiova. E vakaitavi tale ga ena nodra digitaki kei na nodra sureti na lewenivuvale vou e Peceli, qai tu vakarau me sauma na taro me baleta nodra veiqaravi.

◼ KOMITI NI TABAIVOLA: Qo na komiti e dau qarava na tabaki ni ivola, kena vakarautaki, kei na kena vakau e veiyasa i vuravura. E raica tale ga na kena qaravi na valenitabaivola kei na iyaya tale e so e nona na isoqosoqo ni iVakadinadina i Jiova kei na kena era vakayagataki ena dui tabana. E tuvanaka tale ga na kena vakayagataki vakavinaka na cau me baleta na cakacaka ni Matanitu ni Kalou e vuravura raraba.

◼ KOMITI NI CAKACAKA: Na komiti qo e qarava na cakacaka vakavunau kei na veika e okati ena ivavakoso, ira na painia, qase ni ivavakoso kei ira na ivakatawa dauveilakoyaki. E vakarautaka tale ga na Noda Cakacaka Vakaitalatala kei na nodra sureti na gonevuli mera lai vuli i Kiliati kei na Koronivuli ni Vuli Veiqaravi Vakaitalatala vaka kina na vanua era dui lesi kina.

◼ KOMITI NI VEIVAKAVULICI: Na komiti qo e veidusimaki ena soqo ni tabacakacaka, soqo ni tikina kei na soqoni vakaivavakoso. E vakarautaka na kakana vakayalo vei ira na vuvale i Peceli kei na vuli e so me vaka na kena e vakayacori mai Kiliati kei na vuli ni Painia, vaka kina na kena vakarautaki na porokaramu ni katokatoni kei na caka iyaloyalo.

◼ KOMITI NI VOLAVOLA: Nona itavi na komiti qo me raica na lavetaki ni kakana vakayalo e vakarautaki mai, kena tabaki qai vakau vei ira na mataveitacini kei ira na lewenivanua. E dau sauma tale ga na taro vakaivolatabu qai vakadonuya na drama kei na suinivunau e vakarautaki. E qarava tale ga na cakacaka ni vakadewa e vuravura raraba.

E vakatauvatana na yapositolo o Paula na ivavakoso lotu vaKarisito lumuti ina yago ni tamata, qai vakabibitaka na nodra dui itavi dokai na lewe ni ivavakoso vaka kina nodra veinuitaki, veilomani, kei na nodra cakacaka vata ena vakayacori ni ilesilesi ni Kalou. (Roma 12:​4, 5; 1 Kor. 12:​12-​31) E vakarautaka na Ulu ni iVavakoso, o Jisu Karisito na ka era gadreva na lewe ni ivavakoso mera duavata kina ena cakacaka kei na veivakavulici ena iVolatabu. (Efeso 4:​15, 16; Kolo. 2:​19) Ena sala qori, e veiqaravi tiko gona na iLawalawa Dauvakatulewa ena kena liutaki na cakacaka i Jiova, qai veidusimaki kina nona yalo tabu.