Duavata ena Loloma​—Macala ni Bose Vakayabaki

A VAKILAI na marau ena Assembly Hall ni iVakadinadina i Jiova mai Jersey City, New Jersey, Merika. Ena mataka ni ika3 ni Okotova, 2009, e sivia e 5,000 era tiko ena ika125 ni bose vakayabaki ni Watch Tower Bible and Tract Society of Pennsylvania. E vica tale na udolu era rogoca se ra sarava na porokaramu ni vakayagataki na vidio e sema e Patterson, Brooklyn kei Wallkill e Merika kei na Peceli e Kenada. Era le 13,235 era tiko ena soqo qo era duavata ena nodra lomani Jiova, era marautaka na soqo qo e tolu na aua na kena dede.

Na jeameni ni soqo o Geoffrey Jackson, e dua na lewe ni iLawalawa Dauvakatulewa. A tekivuna na porokaramu ena nona tukuna nira na lagata na sere ena ivolanisere vou na matasere era lewena na vuvale e Peceli. Dua tale ga e lewe ni iLawalawa Dauvakatulewa o David Splane, a liutaka na matasere qo qai vakamacalataka vakalekaleka na bibi ni ivakatagi ena sokalou savasava. Era a sureti na tiko ena soqo qo mera lagata e tolu na sere vou, era lagata eliu na matasere oti sa ra qai laga vata kece. Na nodra lagasere na matasere e baleta ga na soqo bibi qo, me kua ni nanumi ni sa na kena ivakarau ya ena soqoni vakaivavakoso, na soqo ni tabacakacaka se na soqo ni tikina.

Ripote ni Cakacaka ni Valenivolavola ni Tabana Eso

Era vakaraitaka eso na itukutuku mai na lima na valenivolavola ni tabana na lewe ni Komiti ni Valenivolavola ni Tabana era a veisiko yani. E tukuna o Kenneth Little mai Kenada nira sa vakarau tekivu tabaivola vei ira e Merika kei Kenada, qo ena vakatinitaka na levu ni ivola e taba ena nodratou valenivolavola ni tabana. Me rawati qo, ena vakayagataki e dua na misini ni tabaivola vou me rua na iwasewase ni tabaivola merau ya 8 na aua, kena levu kece e 16 na aua ena dua na siga.

O Reiner Thompson e vakaraitaka na ripote ni cakacaka ni Matanitu ni Kalou mai na Dominican Republic. O Albert Olih a vakamacalataka noda cakacaka mai Nigeria. E vakamacalataka o Emile Kritzinger mai Mozambique ni oti e vica vata na yabaki ni veivakacacani era sotava, era sa qai kilai vakalawa na iVakadinadina i Jiova ena 1992. E tubu vakalevu na kedra iwiliwili na dautukutuku ena tolu na vanua qo. O Viv Mouritz mai na valenivolavola ni tabana e Ositerelia a tukuna na tubu e East Timor, e qarava tiko qori na valenivolavola ni tabana o Ositerelia.

Komiti ni iLawalawa Dauvakatulewa

Ena 1976, na cakacaka kece ni iVakadinadina i Jiova era dusimaki ena ono na komiti ni iLawalawa Dauvakatulewa. Era qai digitaki emuri na so tale na sipi mera dau veivuke. Ena gauna qo era le 23 na dauveivukei tiko ena cakacaka qo. Eratou vakatarogi e le ono, e 341 na yabaki eratou veiqaravi vakatabakidua kina​—qo e rauta niratou ya 57 na yabaki ni veiqaravi.

O Don Adams a tekivu veiqaravi e Peceli ena 1943, e vakamacalataka ni Komiti ni Kodineita eratou lewena na kodineita ni lima tale na komiti, e vakadeitaka me cicivaki vinaka na lima na komiti. Na komiti qo e qarava na leqa tubukoso, na veivakacacani, na kisi ni veilewai, kei so tale na ka e vinakati vakatotolo e tarai ira na iVakadinadina i Jiova e vuravura raraba.

O Dan Molchan e vakamacalataka na itavi ni Komiti ni Lewe i Peceli, e qarava nodra veika vakayalo kei na veika vakayago na le 19,851 na lewe i Peceli e vuravura raraba. A vosa o David Sinclair ena ituvatuva ni Komiti ni Tabaivola, na kena voli na iyaya kei na veika era gadreva na valenivolavola ni tabana. A vakamacalataka tarava o Robert Wallen, e dua a veiqaravi tu e Peceli me 60 na yabaki na itavi ni Komiti ni Cakacaka, e tuvanaka na nodra cakacaka na tamata i Jiova ena yalava kei na ivavakoso. E vakamacalataka vakalekaleka o William Malenfant na cakacaka levu ni Komiti ni Veivakavulici me baleta na kena dau vakarautaki na porokaramu ni soqo ni tikina. Oti sa qai vakamacala o John Wischuk ena itavi ni Komiti ni Volavola ena kena vakarautaki vinaka kei na tabaki ni ivola.a

Na Tikinivolatabu ni Yabaki 2010 e Vakabibitaki Kina na Loloma

Eratou vosa ena tolu na ivunau tarava na lewe ni iLawalawa Dauvakatulewa. A tekivuna o Gerrit Lösch ena dua na taro, “O vinakata mera dau lomani iko tale na so?” E vakamacalataka ni loloma e ka eda gadreva qai yaga vei keda kece. Eda bula tu nikua ena loloma i Jiova ni a buli keda baleta ni lomani keda. Na inaki bibi duadua ni noda vunau kei na veivakavulici noda lomani Jiova.

Na loloma e yavutaki ena ivakavuvuli dodonu e sega ni yalani wale ga vei ira na kainoda, vei ira tale ga noda meca. (Maciu 5:​43-45) Era vakauqeti na vakarorogo mera vakasamataka na ka a sotava o Jisu ena vukuda, oya ni a mokulaki, vakalialiai, kasiviti, qai vakoti. Ni vakayacori mada ga qo vua, a masulaki ira ga na sotia era vakoti koya. E sega ni uqeti keda qo meda lomani koya vakalevu? A mani tukuna sara o Brother Lösch na tikinivolatabu ni yabaki 2010: 1 Korinica 13:​7, 8, ‘Na loloma e vosota na ka kece. E sega vakadua ni seavu.’ E sega nida nuitaka wale ga na bula tawamudu, ia meda veilomani da qai lomani tale ga me tawamudu.

O Walokai Vakayalo?

A tekivuna o Samuel Herd nona ivunau ena dua na vosa vakatautauvata. Kaya mada a vakavodoki iko e dua nomu itokani mo drau gole me 50 na kilomita. Ni drau sa vodo tiko, o raica sara na ivakatakilakila ni waiwai ni sa lailai. O tukuna sara vua nomu itokani ni sa voleka ni maca na waiwai ni lori. E tukuna o koya mo kua ni lomaleqa ni vo tiko e rauta e va na lita na waiwai ena taqe. Ia vakalailai ga sa maca na waiwai. E ka vakayalomatua mo drau toso tiko ga qai lai tao tu ena dua na tolonisala? E vinaka cake me sinai tu ga na taqe! E tautauvata tale ga qo kei keda, me sinai tiko ga noda taqe ni waiwai, ya na noda kilaka me baleti Jiova.

Ena vinakati nikua meda vakatawa waiwai tiko ga da qai cakava wasoma. E va na sala me vakayacori kina qo. Kena imatai, na vuli vakataki keda, meda kila vinaka na iVolatabu ena noda wilika e veisiga. Me kua nida wilika wale ga, meda kila tale ga na ibalebale ni ka eda wilika. Kena ikarua, meda vakayagataka vinaka na yakavi ni noda Sokalou Vakavuvale. Eda dau vakatawa waiwai e veimacawa se so ga na gauna? Kena ikatolu, na noda tiko ena soqoni kece. Kena ikava, meda dau vakananuma vakatitobu na veika me baleti Jiova ena dua na vanua vakanomodi. E tukuna na Same 143:5: “Au sa nanuma na gauna makawa; au sa vakanananu ki na nomuni cakacaka kecega.”

“Era na Ramase na iValavala Dodonu”

E ikatolu qai iotioti me vunau o John Barr, e vakamacalataka na vosa vakatautauvata i Jisu me baleta na witi kei na co ca. (Maciu 13:​24-30, 38, 43) Na vosa vakatautauvata qo e dusia tiko na “tatamusuki,” nodra kumuni na “luve ni matanitu” ra qai tawasei tani na co ca mera vakamai.

E vakamatatataka o Brother Barr ni kumukumuni qo ena sega ni tawamudu. E vakaraitaka sara o koya na Maciu 24:​34, e tukuni kina: “Ena sega ni takali na itabatamata qo ena yaco mada e liu na ka kece qo.” E wilika vakarua na ivakamacala: “E vakaibalebaletaka o Jisu na nodra bulavata ena dua na itabagauna na lumuti era a raica na gauna a tekivu kina na ivakatakilakila ena 1914, kei ira na so tale na lumuti era na qai raica na itekitekivu ni veivakararawataki levu.” Eda sega ni kila na dede ni nodra bula na “itabatamata qo,” ia e wili tiko eke e rua na ilawalawa era na bulavata ena dua na gauna. E duidui na nodra yabaki, ia o ira era wili tiko ena rua na ilawalawa qo era na lai bulavata ena iotioti ni veisiga. E veivakacegui nida kila ni so vei ira na lumuti gone, era a bulavata mai kei ira na lumuti qase era a raica na ivakatakilakila ni se qai laurai ena itekitekivu ni 1914, era na bula tiko ni sa tekivu na veivakararawataki levu!

“O ira na luve ni matanitu” era sa waraka tu ga qo nodra icovi e lomalagi, ia ena vinakati vei keda kece meda yalodina tiko ga, da serau tiko ga me yacova sara na iotioti. E ka dokai dina meda raica na kumuni ni “witi” ena noda gauna.

Ni laga na iotioti ni sere, sa qai tinia na porokaramu ena masu o Theodore Jaracz mai na iLawalawa Dauvakatulewa. E dua dina na porokaramu veiuqeti na bose vakayabaki qo!

[iVakamacala e ra]

[Kato ena tabana 5]

VULI NI QASE

A kacivaka o Anthony Morris, dua na lewe ni iLawalawa Dauvakatulewa ni na caka tiko ga na nodra vuli na qase ni ivavakoso. Era tekivu vakavulici na qase ni ivavakoso e Merika ena itekitekivu ni yabaki 2008, ena vanua e dau caka kina na vuli e Patterson, Niu Yoka. E se qai oti ga qo na ika72 ni kalasi, era le 6,720 na qase ni ivavakoso era sa vuli oti. E se levu tale na ka me caka. E Merika mada ga, e sivia na 86,000 na qase ni ivavakoso. Koya gona e vakadonuya na iLawalawa Dauvakatulewa me dua tale na vuli me vakayacori e Brooklyn, Niu Yoka, me tekivu ena 7 Tiseba, 2009.

E va na ivakatawa dauveilakoyaki era na vakavulici e Patterson me rua na vula, mera dauniveivakavulici. O ratou na le va qo eratou na lai veivakavulici e Brooklyn, oti eratou na vakavulici tale e va na ka vou. O ratou na le va qo eratou na qai lai veivakavulici e Brooklyn, ia o ratou na le va eratou vakavulici taumada eratou na lai veivakavulici ena Assembly Hall kei na Kingdom Hall. Ena caka tiko qo me yacova ni sa 12 na dauniveivakavulici era caka vuli vakaono e veimacawa e Merika ena vosa vakavalagi. Eratou sa na qai vakavulici e va na dauniveivakavulici meratou caka vuli ena vosa vakaSipeni. Na koronivuli qo ena sega ni sosomitaka na Koronivuli ni Cakacaka Vakaitalatala, ia e kena inaki ga mera vukei na qase ni ivavakoso mera toso tiko ga vakayalo. Era na tuvanaka tale ga na valenivolavola ni tabana e veiyasai vuravura me caka na vuli ena Assembly Hall kei na Kingdom Hall ena yabaki vakacakacaka ni 2011.

[iYaloyalo ena tabana e 4]

A dola na bose vakayabaki ena sere mai na noda ivolanisere vou, “Sere Vei Jiova”