O Noa kei na Waluvu e Yaco Dina, Sega ni iTukuni Wale Ga

O DIVA mo bula ena dua na vuravura vinaka​—na vanua e kune kina na bula veiyaloni? Na vuravura e sega kina na ivalu, basulawa, se veivakalolomataki? Ke vaka kina, ena vakacegui iko e dua na itukutuku makawa o sega ni vulagi kina. Qo na italanoa me baleti Noa, na turaga vinaka a taya e dua na waqa meratou bula kina vakavuvale ena waluvu e roboti vuravura, era vakarusai kina na tamata ca.

E vica wale ga na italanoa era kilai levu me vaka na waluvu. Na veika a yaco vei Noa e volai ena Vakatekivu wase 6 ina 9, e volai tale ga ena Koran, qai talanoataki e veiyasa i vuravura. A yaco dina na waluvu se italanoa wale ga meda uqeti kina meda cakava na ka dodonu? Era dau veiletitaka na taro qo na daunicioloji kei na daunisaenisi. Ia e sega ni vakatitiqataki na dina ni Vosa ni Kalou​—a yaco dina na italanoa qo. Qo e so na vuna eda vakadeitaka kina ni a yaco dina na waluvu:

E vakamacalataka na Vakatekivu na yabaki, vula, kei na siga sara ga a yaco kina na waluvu, na gauna kei na vanua cava a lai kasa kina na waqa, kei na gauna tale ga a mamaca kina na vuravura. E donu vinaka tale ga na veika me baleta na ta ni waqa​—na kena tuvani, na vakarautaki ni kena balavu kei na kena raba, kei na iyaya a vakayagataki ena kena tara. Ia na itukuni e dau buawa na kena ivakamacala.

E rua na ivakamacala ena iVolatabu e volai kina na iyatukawa e vakadinadinataka ni a bula dina o Noa. (1 Veigauna 1:4; Luke 3:​36) O rau na vola na iyatukawa e rua qo, o Esera kei Luke, rau dauvakadidike vinaka. O Luke a vakamuria na iyatukawa i Jisu Karisito me lesu tale vei Noa.

Ratou a volatukutukutaka tale ga na parofita o Aisea kei Isikeli kei rau na yapositolo o Paula kei Pita na veika me baleti Noa se na waluvu.​—Aisea 54:9; Isikeli 14:​14, 20; Iperiu 11:7; 1 Pita 3:​19, 20; 2 Pita 2:5.

A cavuta tale ga o Jisu Karisito na waluvu ena nona kaya: “Me vaka sa yaco e na gauna i Noa, ena vaka talega kina e na gauna ni Luve ni tamata. Era kana tiko, era gunu, era vakawati, era veimusumusukitaki me ra vakawati, ka yacova na siga ka vodoka kina na waqa ko Noa, ka qai lako mai na waluvu, ka vakamatei ira kecega.” (Luke 17:​26, 27) Ke a sega ni yaco dina na waluvu, ena sega ni vakaibalebale na vosa i Jisu me baleta na “gauna ni Luve ni tamata.”

Sa tukuna makawa tu mai na yapositolo o Pita nira na tiko e so na “dauveivakasewasewani” era na vosabeca na veika e kaya na iVolatabu. A vola o Pita, “Na ka oqo era sa vinakata me ra lecava, ni . . . sa vakarusai kina na vuravura sa tu e na gauna [i Noa], e na waluvu.” Dodonu beka meda lecava na “ka oqo?” Sega! Tomana o Pita: “Na lomalagi kei na vuravura sa tu edaidai, sa maroroi ga e na vosa talega ko ya, sa maroroi ki na bukawaqa me yaco mada na siga ni lewa kei na veivakarusai ni tamata tawalotu.”​—2 Pita 3:​3-7.

Na Kalou ena vakarusai ira vakadua na ca. Ke da vakamuria na ivakaraitaki i Noa, eda na rawa ni dua vei ira na yalododonu era na bula ena vuravura vinaka cake.