Taro na Dauwiliwili
Cava Era Sega ni Vakaitavi Kina ena iValu na iVakadinadina i Jiova?
Ena vanua cava era vakaitikotiko kina na iVakadinadina i Jiova, sa kilai voli mai ena dua na gauna balavu nira sega ni dau tauri iyaragi se vakaitavi ena ivalu. E tukuni ena ivola na Australian Encyclopædia rauta na 50 na yabaki sa oti nodra “tawaveitovaki ena ivalu na iVakadinadina i Jiova.”
Era sega ni vakaitavi ena ivalu ni vakaleqa nodra lewaeloma. E vakavulici nodra lewaeloma ena ivakaro kei na ivakaraitaki i Jisu Karisito. Dua vei ira nona ivakaro mera dauloloma na nona imuri. A vakarota tale ga: “Lomani ira na nomudou meca, caka vinaka vei ira sa cati kemudou.” (Luke 6:27; Maciu 22:39) A tukuna o Jisu ni via taqomaki koya ena iseleiwau e dua na nona imuri: “Daramaka tale na nomui seleiwau ki na kena taga: ni ra na mate e nai seleiwau ko ira kece era taura nai seleiwau.” (Maciu 26:52) E vakamatatataka tale ga ena ka e tukuna kei na ka e cakava mera kua ni lave iyaragi na nona imuri.
Era sega tale ga ni vakaitavi ena ivalu na iVakadinadina i Jiova nira tu e veiyasai vuravura na nodra itokani vakabauta. Nira vaka ga na veitacini, na ivalu ena uqeti ira mera veicati qai beci kina na ivakaro i Jisu mera “veilomani.”—Joni 13:35.
Era sega ni veivosakitaka wale ga na iVakadinadina i Jiova na ivakavuvuli e vauca na loloma, ia era bulataka sara ga. Na kena ivakadinadina e raici donuya na iKarua ni iValu Levu ena 1939-1945. E Mereke, sivia na 4,300 na iVakadinadina i Jiova era bala i valeniveivesu nira sega ni via vakaitavi ena ivalu. Sivia na le 1,500 mai Peritania oka kina e le 300 na yalewa era bala e valeniveivesu nira tawaveitovaki ena ivalu. Ena gauna ni veiliutaki nei Itala e Jamani, a vakarota na matanitu nodra vakamatei e sivia na le 270 na iVakadinadina i Jiova nira sega ni via tauri iyaragi. Era bala e valeniveivesu se keba ni veivakararawataki e 10,000 vakacaca. E vakaloloma tale ga na ka a caka vei ira na iVakadinadina i Jiova mai Japani. Vei kemuni era mate na wekamuni lomani ena bucanivalu donuya na iKarua ni iValu Levu—se dua tale na ivalu a yaco—era sega ni vakavuna na iVakadinadina Jiova na nodra mate na wekamuni.
E vakamatatataki nodra rai na iVakadinadina i Jiova me baleta na ivalu ena iotioti ni vosa a cavuta o Wolfgang Kusserow. Ni sega ni via vakaitavi ena ivalu, e tamusuki kina ena 1942 na uluna na cauravou yabaki 20 qo mai Jamani. (Aisea 2:4) A kaya ena veivaqaqai vakamataivalu a caka me baleti koya: “Au susugi ena vuvale iVakadinadina i Jiova, qai yavutaki na veisusu qori ena Vosa ni Kalou. Qo na lawa bibi qai uasivi duadua e vola na Kalou me baleti keda: ‘Me liu duadua noda lomana na Kalou, tarava noda lomani ira na wekada me vaka ga noda lomani keda.’ Eda vakaroti tale ga: ‘Meda kua ni veivakamatei.’ A uqeta beka na Kalou me volai na ivakaro qori vei ira na vunikau?”—Marika 12:29-31; Lako Yani 20:13.
Era vakabauta na iVakadinadina i Jiova ni veisaututaki tawamudu e vuravura e rawata duadua ga na Kalou Kaukaua o Jiova. Era nuitaki koya me vakayacora nona yalayala me “vakaotia nai valu mai nai yalayala kei vuravura.”—Same 46:9.