E Bula na Vosa i Jiova
Veitikina Bibi ena iVola Vei Ira e Korinica
A KAUAITAKA sara vakalevu na yapositolo o Paula na bula vakayalo ni ivavakoso e Korinica. E rogoca nira sa sega ni dau veirogorogoci se duavata. Era vakayacora tiko ga na ivalavala vakasisila. A volavola tale ga na ivavakoso vei Paula mera taroga kina e so na ka. Koya gona, ni tiko mai Efeso volekata na 55 S.K., ena ikatolu ni nona ilakolako vakaulotu, a vola kina o Paula na imatai ni rua nona ivola vei ira e Korinica.
A qai volai na ikarua ni ivola ni oti ga e vica na vula na kena volai na imatai, e ikuri ga ni imatai ni nona ivola. Na ituvaki ni bula kei na ivavakoso ena gauna ya e tautauvata sara ga kei na ituvaki eda sotava tiko ena gauna qo, qai yaga dina vei keda na itukutuku ena ivola i Paula vei ira e Korinica.—Iper. 4:12.
‘YADRA TIKO, TUDEI QAI QAQA’
A vakarota o Paula ‘mera duavata ga ena ka era tukuna.’ (1 Kor. 1:10) E ‘sega ni dua tale na yavu’ e yavu dei ni itovo vaKarisito, ‘o Jisu Karisito ga.’(1 Kor. 3:11-13) Ke dua e veidauci ena ivavakoso, e kaya vei ira o Paula: “Biuta tani mai na kemuni maliwa na tamata i tovo ca.” (1 Kor. 5:13, VV) “Na yago sa sega ni ka me caka kina na veibutakoci [se “veidauci,” NW],” e kaya, ‘Ia me nona ga na Turaga.’—1 Kor. 6:13, VV.
E sauma o Paula ‘ena vuku ni veika era a vola,’ na ivakasala yaga qai vinaka me baleti ira na vakawati kei ira na sega ni vakawati. (1 Kor. 7:1, VV) Ni vakamacalataka oti na ituvatuva ni veiliutaki vaKarisito, na kena tuvanaki vakamatau na soqoni vaKarisito, kei na kena yaco dina na veivakaturi, a qai uqeti ira o Paula: “Ni yadra tiko, ni tudei e na vakabauta, ni kaukauwa ka qaqa.”—1 Kor. 16:13,VV.
Saumi na Taro Vakaivolatabu:
1:21—E dau vakayagataka beka o Jiova na ka “vakalialia” me vakabulai ira kina na vakabauta? E sega. Ia me vaka ni ra “sa sega ni kila na Kalou na kai vuravura e na nodra vuku,” e ka vakalialia vei ira na ka e vakayagataka o Jiova me veivakabulai kina.—Joni 17:25.
5:5—Na cava na ibalebale ni nona “soli . . . vei Setani” o “koya [na tamata ca]” me “vakarusai kina na yagona, me vakabulai na yalona”? Ni dua e sega ni veivutunitaka nona valavala ca bibi qai vakasivoi ena ivavakoso, e sa lai lewe tale ni vuravura i Setani. (1 Joni 5:19) Koya gona, e sa soli sara tiko ga vei Setani. Na nona vakasivoi e dua ena vakarusa se kauta laivi na ka e dau veivakaleqai vakayalo ena ivavakoso, me rawa ni taqomaki tiko ga na kena itovo.—2 Tim. 4:22.
7:33, 34—Na cava na ibalebale ni “veika ni vuravura” e dau lomaocaocataka na tagane se yalewa vakawati? A vakaibalebaletaka tiko o Paula na veika e vauca na noda bula ni veisiga, na ka era kauaitaka tu vakalevu na lotu vaKarisito vakawati. Okati kina na kakana, isulu kei na vale, ia sega ni okati e ke na veika ca ni vuravura qo, ni dodonu mera vakanadakuya qori na lotu vaKarisito.—1 Joni 2:15-17.
11:26—Me vakacava na levu ni “gauna” me vakananumi kina na mate i Jisu, me “yacova” sara na gauna cava? A sega ni tukuna tiko o Paula me vakananumi ena veigauna na mate i Jisu. Na vosa vaKirisi e vakadewataki me “e na gauna kecega” e kena ibalebale “na gauna” se “na gauna kece.” Koya gona, a kaya o Paula ni gauna kece era vakayagataka kina na lotu vaKarisito lumuti na madrai kei na waini—e dau vakayacori vakadua e veiyabaki ena ika14 ni Naisani —era sa “vakatakila kina na nona mate na Turaga.” Era cakava tiko qori me “yacova na nona lako mai,” se na gauna era na vakaturi kina i lomalagi.—1 Ces. 4:14-17.
13:13—Ena sala cava e uasivi kina na loloma mai na vakabauta kei na inuinui? Ena sega ni tawamudu e so na basoga ni vakabauta kei na inuinui baleta ni na tini vakayacori “na veika sa vakanuinuitaki,” qai laurai tale ga “na veika sa tawa kune.” (Iper. 11:1) Ia na loloma e uasivia sara na vakabauta kei na inuinui baleta ni tawamudu.
15:29—Na cava na ibalebale ni nona “papitaisotaki” e dua “e na vukudra na mate”? A sega ni vakaibalebaletaka o Paula mera papitaiso na bula ena vukudra na mate era a sega tu ni papitaiso. E tukuna tiko ga o koya na nodra papitaiso, se tabadromuci na lotu vaKarisito lumuti ina dua na ivakarau ni bula era na lai tini mate kina ena yalodina. Oti, era na qai vakaturi ina bula vakayalo.
Na Ka Eda Vulica:
1:26-31; 3:3-9; 4:7. Ena duavata na ivavakoso nida sakitaki Jiova ena yalomalumalumu, ia meda kua ga ni sakitaki keda.
2:3-5. Ni vunau tiko e Korinica, na vanua ra vuli kina na vuku ni Kirisi, a leqataka o Paula se na uqeti ira vakacava na vakarorogo. Ia, a sega ni vakalaiva nona malumalumu se rere me tarova nona cakacaka lesi vaKalou. Meda kua tale ga ni vakalaiva e so na ituvaki me tarova na noda tukuna yani na tukutuku vinaka ni Matanitu ni Kalou. Koya gona, meda nuitaki Jiova mada ga me vakataki Paula.
2:16. Ke tiko vei keda na “lomai Karisito” eda na kila na ivakarau ni nona vakasama, eda na vakatotomuria na nona rai, da kilai koya vinaka kei na nona itovo, da qai muria na nona ivakaraitaki. (1 Pita 2:21; 4:1) E bibi dina meda vulica vinaka na bula i Jisu kei na nona cakacaka vakaitalatala!
3:10-15; 4:17. Dodonu meda dikevi keda da qai vakavinakataka noda veivakavulici kei na noda tubera e so tale mera tisaipeli. (Maciu 28:19, 20, VV) Ke sega ni vinaka noda veivakavulici, era na rairai tawayalodina na gonevuli ni vakatovolei na nodra vakabauta, da na qai rarawataka na ka mosimosi ya ni na vaka sara ga eda vakabulai “mai na buka waqa.”
6:18. Noda “dro tani mai na daudara [se “veidauci,” NW]” e sega ni baleta ga noda dro tani mai na veika e okati me por·neiʹa, ia e wili tale ga kina na iyaloyalo vakasisila, na vakanananu ca me baleta na veiyacovi, kei na wede—na veika e rawa ni vakavuna na veidauci.—Maciu 5:28; Jeme. 3:17.
7:29. Mera qarauna na veiwatini me kua ni sivia na nodra kauaitaka ga na kedra isa me sa lai ikarua kina ni ka na veika e vauca na Matanitu ni Kalou.
10:8-11. A sega ni taleitaka o Jiova na nodra vosa kudrukudru na Isireli me baleti Mosese kei Eroni. Eda na yalomatua ke da saga meda kua ni dau vosa kudrukudru.
16:2. Ke tuvai vakamatau noda cau vakailavo qai muri vinaka na kena ituvatuva, ena sega ni leqa na noda cau me baleta na vunautaki ni itukutuku vinaka e vuravura raraba
‘VAKAVINAKATAKI TIKO GA’
A tukuna o Paula vei ira e Korinica mera ‘vosota qai vakacegui’ koya na tamata cakacala e veivutunitaka nona ivalavala. Dina ni a vakararawataki ira na imatai ni nona ivola, ia a marau o Paula baleta nira “rarawa ga ki na veivutuni.”—2 Kor. 2:6, 7; 7:8, 9.
Me vaka nira “sa vutuniyau e na ka kece ga,” a uqeti ira e Korinica o Paula mera “lomasoli e na cakacaka.” Ni sauma oti na nodra vosa na dau saqati koya, e qai vakasalataki ira kece: “Mo dou vinaka! Mo dou vinaka taucoko, mo dou vakacegui sara, mo dou lomavata, mo dou veivinakati tiko.”—2 Kor. 8:7, VV; 13:11.
Saumi na Taro Vakaivolatabu:
2:15, 16—E rawa vakacava nida “boivinaka . . . e na mata i [Karisito]”? Ena noda talairawarawa ena ka e tukuna na iVolatabu, kei na noda vunautaka na kena itukutuku. Dina ni ka vakasisila vei ira na tawayalododonu na ka “boivinaka” qo, ia e boivinaka vei Jiova kei ira na yalomalumalumu.
5:16—Rawa vakacava vei ira na lotu vaKarisito lumuti mera “sega tale ni doka [se “kila,” NW] e dua na tamata e na vuku ni ka vakayago”? Era sega ni dau raici ira na tamata ena rai vakayago, oya mera veivakaduiduitaki ena vuku ni yau e taukena e dua, matatamata e lewena, se itovo ni vanua e cavutu mai kina. Na ka e bibi vei ira na nodra veiwekani vakayalo kei ira na nodra itokani ra vakabauta vata.
11:1, 16; 12:11—A sega beka ni yalorawarawa o Paula vei ira e Korinica? Sega. Ia era na rairai nanuma e so ni sa rui tukutukuni koya qai sega ni yalorawarawa, baleta na ka a kaya me vakacala kina na nodra veibeitaki e so me baleta na nona itavi vakayapositolo.
12:1-4—O cei “sa kau cake ki Parataisi”? E sega ni vakamacalataki ena iVolatabu ni dua tale a raica na mataqali raivotu va qo. A vakamacalataki Paula beka ga na tikina qo baleta ni muria ga na nona sauma na veibeitaki a caka me baleta nona itavi vakayapositolo, a rairai tukuna tiko o koya na ka a sotava. Na ka a raivotutaka na yapositolo a rairai dusia na parataisi vakayalo ra marautaka tiko na ivavakoso vaKarisito ena “gauna ni vakataotioti” qo.—Tani. 12:4.
Na Ka Eda Vulica:
3:5. E tukuni ena tikinivolatabu qo ni vakarautaki keda na lotu vaKarisito o Jiova meda rawata na ivakatagedegede ni vunau, ni vakayagataka nona Vosa, nona yalo tabu, kei na nona isoqosoqo e vuravura. (Joni 16:7; 2 Tim. 3:16, 17) Meda gumatua gona na vulica na iVolatabu kei na vola vakaivolatabu, masuta tiko ga na yalo tabu, dau tiko ena soqoni qai dau vakaitavi kina.—Same 1:1-3; Luke 11:10-13; Iper. 10:24, 25.
4:16. Me vaka ni vakavoutaka o Jiova ‘na tamata e loma ena veisiga kece ga,’ meda vakayagataka vinaka mada ga na ivukevuke e vakarautaka, da qai vakananuma e veisiga na veika vakayalo.
4:17, 18. Na noda dau vakasamataka ni ‘na mamada qai sega ni dede noda rarawa’, ena uqeti keda meda yalodina tiko ga vei Jiova ena gauna dredre qo.
5:1-5. E totoka dina nona vakamacalataka o Paula na nodra inuinui ni bula i lomalagi na lotu vaKarisito lumuti!
10:13. Eda dusimaki meda cakacaka ga ena yalava e lesi kina na noda ivavakoso, vakavo ga ke da lesi ena vanua e gadrevi kina vakalevu na veivuke.
13:5. Ke da via kila ‘se da tu ena vakabauta, se segai,’ meda dikeva ke salavata na noda itovo kei na ivakavuvuli ena iVolatabu. ‘Nida vakatovolei keda,’ e dodonu meda dikeva mada na ivakatagedegede ni noda bula vakayalo, okati kina na noda dau “vakaduiduitaka na vinaka mai na ca” kei na noda cakacaka ena vuku ni noda vakabauta. (Iper. 5:14, VV; Jeme. 1:22-25) Ke da muria na ivakasala i Paula, eda na rawa ni lako tiko ga ena sala ni dina.
[iYaloyalo ena tabana e 26]
Na cava na ibalebale ni vosa “e na gauna kecega dou sa kania kina na madrai oqo, ka gunuva na bilo oqo”?—1 Kor. 11:26