Sa Voleka na Vuravura Parataisi!

“Tama i keimami mai lomalagi, me vakarokorokotaki na yacamuni, me yaco mai na nomuni matanitu, me caka na lomamuni e vuravura, me vaka sa caka tiko mai lomalagi.”​—Maciu 6:​9, 10, VV.

NA MASU kilai levu qo e vakatokai me Masu ni Turaga, e solia vei keda na inuinui. Ena sala cava?

Me vaka e tukuni ena Masu ni Turaga, na Matanitu ni Kalou ena vakayacora e vuravura na loma ni Kalou, me vaka ga e vakayacori tiko ena gauna qo mai lomalagi. E inaki ni Kalou me Parataisi na vuravura. (Vakatakila 21:​1-5) Na cava sara mada na Matanitu ni Kalou, ena vakalesuya mai vakacava e vuravura na Parataisi?

Dua Dina na Matanitu

Na Matanitu ni Kalou e dua dina na matanitu. Me cicivaki e dua na matanitu ena gadrevi o ira na veiliutaki, na lawa, kei ira na vakarurugi kina. E rawata beka na ivakatagedegede qori na Matanitu ni Kalou? Dikeva mada na isau vakaivolatabu ni tolu na taro qo:

O cei era na veiliutaki ena Matanitu ni Kalou? (Aisea 33:22) Na Kalou o Jiova e lesi Luvena o Jisu Karisito me liutaka na Matanitu. (Maciu 28:18) Ena veidusimaki i Jiova, sa digitaka o Jisu e vica “maivei ira kecega na veimataqali, kei na duivosavosa, kei na veimatanitu, kei na veivanua” mera veiliutaki kei koya mera ‘tui, ra lewai vuravura tale ga.’​—Vakatakila 5:​9, 10.

Na lawa cava e vakarautaka na Matanitu ni Kalou mera muria na vakarurugi kina? E so na lawa kei na ivunau e gadrevi mera na muria. Tukuna o Jisu ni lawa bibi duadua: “Mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kecega. Ai matai ni vunau oqo, ka levu: a sa tautauvata na kenai karua, Mo lomana na kai nomu me vaka ko lomani iko.”​—Maciu 22:​37-​39.

E so na ka mera kua ni cakava o ira na vakarurugi ena Matanitu ni Kalou. Kena ivakaraitaki, e vakamatatataka na iVolatabu: “Dou kakua ni vakaisini kemudou: o ira na daudara [“veidauci,” NW], kei ira na dausoro ki na matakau, kei ira na dauyalewa, kei ira na viavia vaka na yalewa, kei ira na veimoceri vakatagane, kei ira na daubutako, kei ira na daukocokoco, kei ira na daumateni, kei ira na dauveivakasewasewani, kei ira na daukovekove, era na sega ni rawata na matanitu ni Kalou.”​—1 Korinica 6:​9, 10.

O cei era na vakarurugi ena Matanitu ni Kalou? O Jisu a vakatauvatani ira na vakarurugi ena Matanitu ni Kalou ina sipi. E kaya: “A ra na rogoca na domoqu; ena qai dua bau na qele ni sipi, ka dua bau nai vakatawa.” (Joni 10:16) Me vakarurugi e dua ena Matanitu ni Kalou, me kua ni kaya wale tu ga ni muria tiko na iVakatawa Vinaka o Jisu, ia me cakava sara ga na nona ivakaro. E kaya o Jisu: “Ena sega ni curu ki na matanitu vakalomalagi ko ira kecega sa kaya vei au, Turaga, Turaga; ko koya ga sa cakava na loma i Tamaqu sa tiko mai lomalagi.”​—Maciu 7:​21.

Koya gona, o ira na vakarurugi ena Matanitu ni Kalou, era dau vakayagataka qai doka na yaca ni Kalou, Jiova, me vaka ga a cakava o Jisu. (Joni 17:26) Era talairawarawa ina ivakaro i Jisu mera vakavulici ira tale e so me baleta “nai tukutuku-vinaka oqo kei na matanitu.” (Maciu 24:14; 28:​19, 20, VV) Era veilomani dina.​—Joni 13:35.

“Vakawabokotaki Ira Era sa Vakawabokotaki Vuravura”

Na veika e yaco tu e vuravura nikua e vakaraitaka ni sa na vakarau veisautaka na Matanitu ni Kalou na ituvaki e vuravura. Eda kila vakacava? A vakamacalataka o Jisu ena rua na udolu na yabaki sa oti na ivakatakilakila ni sa “voleka na matanitu ni Kalou.” (Luke 21:31) Me vaka e vakamacalataki ena ulutaga sa oti, na ivakatakilakila e laurai levu e vuravura raraba.

Na cava ena yaco tarava? E sauma o Jisu: “[E]na qai levu sara na rarawa, ka sega ni vakakina eliu mai nai vakatekivu kei vuravura ka yacova na gauna oqo, ka na sega sara talega emuri.” (Maciu 24:21) Ena sega ni vakayacora qo na tamata. Na Kalou sara ga ena “vakawabokotaki ira era sa vakawabokotaki vuravura.” (Vakatakila 11:18) O ira na tamata ca era tawaveinanumi ena nodra vakacacani vuravura, era na “muduki tani.” Ia o ira na yalododonu era qarava vakaidina na Kalou “era na tiko dei kina.”​—Vosa Vakaibalebale 2:​21, 22.

E tiko na vuna vinaka e vakayacora kina na Kalou o Jiova na veika qo. Baleta na cava? Vakasamataka mada na ivakatautauvata qo: Kaya mada ni dua na nomu vale tabavica e redetaki. E so vei ira na saumi rede era ivalavala vinaka, ra veinanumi; ra sauma na rede, ra qai qarava vinaka na vale. Ia e so tale era dauveivala, ra tawaveinanumi; ra bese na sauma na rede, ra vakacacana tale ga na vale. Dina nira sa vakasalataki, era sega ga ni veisau. Na cava o na cakava? Ni o itaukeinivale, sega ni vakabekataki ni o na vakatalai ira qori.

Koya gona, ni bulia na vuravura kei na veika kece e tiko kina na Kalou o Jiova, e tu vua na dodonu me digia se o cei me tawana na vuravura. (Vakatakila 4:​11) A kaya o Jiova ni nona inaki mera muduki laivi e vuravura na tamata ca era sega ni kauaitaka nona inaki, ra qai dau via siova na nodra dodonu e so tale.​—Same 37:​9-11.

Vakalesui Mai na Parataisi

Sa voleka qo me lewa mai na vuravura na Matanitu ni Kalou, e liutaka o Jisu Karisito. Kaya o Jisu ni qo na itekitekivu ni kena “vakavoutaki na ka kece.” (Maciu 19:​28, New International Version) Ena vakacava beka na ituvaki ena gauna ya? Dikeva na yalayala ena iVolatabu:

Same 46:9. “Sa vakaotia nai valu mai nai yalayala kei vuravura.”

Aisea 35:1. “Ena reki e na vuku ni ka oqo na lekutu kei na vanua dravuisiga; ia na vanua liwa lala ena marau, ka se me vaka na rose.”

Aisea 65:21-23. “Era na rekitaka vakadede na cakacaka ni ligadra ko ira na tamata ka’u sa digitaka. Era na sega ni oca walega, se vakasucu gone me ka ni rarawa vei ira.”

Joni 5:​28, 29. “Sa lako mai na gauna era na rogoca kina na domona [Jisu] ko ira kecega e nai bulubulu, a ra na lako maikina.”

Vakatakila 21:4. “Na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu.”

Vuna me Vakabauti Kina

Oni vakabauta na yalayala ena iVolatabu? E parofisaitaka na iVolatabu nira na sega ni vakabauta e levu. E kaya: “[E]ra na lako mai e so na tamata era dau muria na gagadre ca ni yagodra e na gauna e muri. Era na vakalialiai kemuni, ka ra kaya tiko, ‘Sa evei na vosa ni yalayala me baleta na nona lako mai? Me tekivu sara mai na gauna era a bale yani kina na qase era sa yaco tiko ga na veika kece me vaka era a yaco tiko mai na i vakatekivu kei vuravura.’ ” (2 Pita 3:​3, 4, VV) Ia era cala na dauveivakalialiai qo. Dikeva e va na vuna e rawa ni o vakabauta kina na ka e kaya na iVolatabu:

(1) Na Kalou a vakarusai ira na tamata ca ena veigauna sa oti. Me kena ivakaraitaki na waluvu ena siga i Noa.​—2 Pita 3:​5-7.

(2) A parofisaitaki tu ena Vosa ni Kalou na veika e yaco tiko e vuravura ena gauna qo.

(3) Era sega ni “yaco tiko ga na veika kece me vaka era a yaco tiko mai na i vakatekivu kei vuravura.” Sa roboti vuravura tu na itovo vakasisila, na bula vakaloloma, kei na vakacacani ni iyaubula ena kena ivakatagedegede e cake sara.

(4) Sa vunautaki tiko e vuravura taucoko na ‘itukutuku vinaka ni matanitu,’ e vakaraitaka ni sa voleka “nai vakataotioti [icavacava, NW].”​—Maciu 24:14.

Era sureti kemuni na iVakadinadina i Jiova moni vulica na Vosa ni Kalou, moni rawa ni kila e levu tale na ka me baleta na inuinui ni bula tawamudu ena ruku ni veiliutaki ni Matanitu ni Kalou. (Joni 17:3) Io, e waraki keda tu e dua na gauna totoka. Sa voleka sara na gauna totoka qori! O na bula beka kina?

[Tikina bibi ena tabana e 7]

Era vakacalai o ira na kaya ni ituvaki qo ena sega ni veisau me vinaka

[iYaloyalo ena tabana e 8]

O na bula beka ena ituvaki qo?