Na Sala Mo Dua Kina na Tama Vinaka

“Kemuni na tama, ni kua ni dau vakacudrui ira na luvemuni, de ra datuvu kina.”​—Kolosa 3:​21, The Holy Bible​—New International Version.

NA CAVA me cakava na tama me kua kina ni vakacudruya na luvena? Ena yaga me kila na bibi ni nona itavi. “Na itavi vakatama e dredre, ia e vakasakiti ni vakatau kina na ivakarau ni vakasama kei na ivakarau ni yalona na gone,” e kaya e dua na ivola me baleta na vakasama.

Na cava na itavi nei tama? Ena levu na vuvale o tama duadua ga ena vakatauitotogi. Ni be na gone, dau matau me tukuna o tina, ‘Waraki ta me yaco mai!’ Ena vinaka me veiganiti na itotogi, me dei tale ga na lewa e tau mera kua ni veilecayaki kina na gone nira sa uabula. Ia e levu tale na ka e okati mo dua kina na tama vinaka.

E ka ni rarawa ni sega na ivakaraitaki vinaka mera muria e so na tama. E so na tagane a sega na tamadra nira tubu cake mai. Ia na tagane e dau kaukaua nona vakavulici ni se gone, ena rairai vakatale ga qori na ivakarau ni nona vakavulici ira na luvena. Ena rawa vakacava me biuta na ivakarau ya e dua na tama qai saga me dua na itubutubu vinaka?

Me rawa ni dua e tama vinaka, e tiko na ivakasala e yaga, e nuitaki tale ga. Na iVolatabu e lewena na ivakasala vinaka duadua me baleta na bula vakavuvale. E sega ni ka ga e nanumi; e sega tale ga ni vakaleqai keda. Na ivakasala ena iVolatabu e laurai kina na vuku ni Kalou o Jiova, o koya a tauyavutaka na bula vakavuvale. (Efeso 3:​14, 15, VV) Ke o dua na tama, ena vinaka mo vakasamataka na ka e kaya na iVolatabu me baleta na susu gone.a

Ena sega ni kauaitaka ga na tama vinaka na veika vakayago kei na veika era gadreva na gone, ia ena kauaitaka tale ga na nodra veiwekani kei na Kalou. Ni dua na gone e lomani tamana rau qai veivolekati, ena rairai rawarawa vua me bucina me vinaka nona veiwekani kei na Kalou, ena voleka tale ga vua. Ena vakasama vata qori, e kaya na iVolatabu ni o Jiova na Dauveibuli, e Tamada tale ga. (Aisea 64:8) Eda na veivosakitaka e ono na ka e gadreva na gone vei tamana. Ena ituvaki yadua, eda na dikeva se na yaga vakacava na ivakavuvuli vakaivolatabu me vakayacora kina o tama na gagadre qori.

Ra Vinakata na Gone na Loloma Vakatama

E ivakaraitaki uasivi ni Tama o Jiova. E vakamacalataka na iVolatabu na nona rai me baleti Jisu na Luvena ulumatua: “Sa lomana na Luvena ko Tamana.” (Joni 3:​35; Kolosa 1:​15) Ena vica na ituvaki, a vakaraitaka sara ga o Jiova nona lomani Luvena kei na nona vakadonui koya. E kaya o Jiova mai lomalagi ena gauna a papitaiso kina o Jisu: “O iko na noqu Gone ni toko; au sa dauvinakati [“vakadonui,” NW] iko vakalevu.” (Luke 3:​22) A sega ni lomalomaruataka o Jisu ni lomani koya o Tamana. Na cava e rawa ni vulica e dua na tama ena nona ivakaraitaki na Kalou?

Me kua ni tu suka o tama ni tukuna vei ira na luvena ni lomani ira. E kaya o Kelvin, e lima na luvena: “Au dau saga meu kua wale ga ni tukuna vei iratou na luvequ niu lomani iratou, ia au dau vakaraitaka tale ga ena noqu kauaitaki iratou yadudua. Au dau veivuke ena veisautaki ni pikini kei na nodratou vakasilimi.” Era na via kila tale ga na gone na nomu veivakadonui. Me kua ni sivia nomu vakalelewa, se mo veivakadodonutaki tu ga. Ia mo vakacaucautaki ira. O Donizete, e rua na luvena goneyalewa, e kaya, “E dodonu me qara o tama na gauna me vakacaucautaki ira kina na luvena.” Nira kila na gone ni o vakadonui ira, era na vakayaloqaqataki nira kila ni tiko na kedra yaga. Qori tale ga ena uqeti ira mera toro voleka vua na Kalou.

iVakaraitaki Vinaka

E tukuni ena Joni 5:​19 ni cakava o Jisu “na ka ga sa raica ni kitaka ko Tamana.” Vakasamataka ni kaya na tikinivolatabu ya ni o Jisu e raica qai cakava na ka e “kitaka” o Tamana. Era cakava tale ga qori na gone. Kaya mada, ke dua na tama e dau rokovi qai dokai watina, ena rairai tubu cake tale ga na luvena me vakatotomuri tamana ena nona doka qai rokovi ira na yalewa. Na ivakaraitaki nei tama ena sega wale ga ni yaga vei luvena tagane, ia ena yaga tale ga ena rai nei luvena yalewa me baleti ira na tagane.

E dau dredre mera kere veivosoti na luvemu? E bibi tale e ke na ivakaraitaki. Nanuma lesu o Kelvin na nodrau vakacacana e dua na itaba saulevu na luvena tagane. Ena levu ni nona cudru e tukia na dela ni teveli qai kavida rua. A rarawataka o Kelvin na ka e cakava mani kere veivosoti vei iratou na veitinani ni sega ni lewa vinaka na nona cudru. E kila o Kelvin ni nona kere veivosoti e yaga vei ratou na luvena, e rawarawa kina me ratou dau kere veivosoti tale ga.

Vuvale Mamarau

O Jiova na “Kalou mamarau.” (1 Timoci 1:​11, NW) E sega gona ni kurabuitaki ni marautaka na Luvena o Jisu na nona dau tiko kei Tamana. E matata vinaka noda kila na nodrau veiwekani o Jisu kei Tamana ena Vosa Vakaibalebale 8:​30: “Au a qai tiko kaya [Tamana] me matai daucakacaka: . . . Ka’u a marau tiko e matana.” Erau veivolekati dina na veitamani qo!

O ira na luvemu era taleitaka na vuvale mamarau. Ena rawa qori ke o tikica na gauna mo qito kina kei ira. Dou na veivolekati sara kina vakaveiluveni. E duavata ena vakasama ya o Felix, e dua tiko na luvena cauravou, e kaya: “E bibi ena neirau veivolekati vakaveiluveni na gauna e tikici ena ka ni veivakamarautaki. Keirau qito vata, gadivi ira na neirau itokani, gade tale ga ina veivanua e taleitaki. Qo era veivolekati, ra marau kina na lewe ni vuvale.”

Mera Vakavulici ena Veika Vakayalo

A vakavulici Jisu o Tamana. E rawa gona me tukuna o Jisu: “Ka’u sa tukuna vei ira na kai vuravura na veika ka’u a rogoca maivei koya [Tamana].” (Joni 8:26) Ena rai ni Kalou, na nodra vakavulici na gone ena veika vakayalo kei na veika vakayago e itavi sara ga nei tama. Dua vei ira na itavi qori na nomu vakavulici luvemu me tara na lomana na ivakavuvuli dina. Me tekivu qo nira se lalai. (2 Timoci 3:​14, 15) Ni se gone sara na luvei Felix sa dau tekivu wilika vua na italanoa ena iVolatabu. E dau vakayagataka o Felix na italanoa e taleitaki qai rokataki vinaka tu, okati kina na ivola iTalanoa Mai na iVolatabu.b Ni sa qase cake o luvena, e vakayagataka o Felix e dua tale na ivola vakaivolatabu e veiganiti kei na yabaki ni bula nei luvena.

E tukuna o Donizete: “E ka ni sasaga na vuli iVolatabu vakavuvale e taleitaki. E bibi mera vakaraitaka na itubutubu nira taleitaka na veika vakayalo, ke sega ena totolo mera toboka na gone ni itubutubu mada ga e sega ni cakava.” O Carlos e tolu na luvena tagane, e tukuna: “Keitou daubose vakavuvale e veimacawa me veivosakitaki kina na veika e gadrevi ena vuvale. Na lewenivuvale yadua ena vakatura na ka me veivosakitaki.” Ena vanua se cava ga eratou cakava, e dau saga o Kelvin me tukuna vei ratou na luvena na veika me baleta na Kalou. Eda nanuma kina na vosa i Mosese: “Na vosa oqo, ka’u sa vakarota vei kemuni e na siga oqo, me tiko ga e na lomamuni: ia mo ni gumatua ni vakavulica vei ira na luvemuni, ka dauvosataka ni kemuni sa tiko e na nomuni vale, ni kemuni sa lako voli talega e na sala, ka ni kemuni sa koto sobu, ni kemuni sa duri cake talega.”​—Vakarua 6:​6, 7.

Bibi Mera Vakadodonutaki

Ena vinakati mera vakadodonutaki na gone mera yaga ra qai nuitaki ena gauna mai muri. De dua era nanuma e so na itubutubu ni nodra vakadodonutaki na gone e oka kina na itotogi mosimosi, vosa kaukaua ni veivakarerei se na vosa e veibeci. Ia e sega ni tukuna na iVolatabu mera vakadodonutaka na luvedra na itubutubu ena sala kaukaua. Kena veibasai ga mera veivakavulici ena loloma, me vaka ga e cakava o Jiova. (Iperiu 12:​4-​11) E kaya na iVolatabu: “Kemuni na i tubutubu, ni kakua ni dau vakacudrui ira na luvemuni ia mo ni dau vakavulici ira ga e na i vakarau kei na i vakavuvuli ni Turaga [Jiova].”​—Efeso 6:​4, VV.

Ena rairai tu tu yadua me tau na itotogi, ia e dodonu me kila na gone na vuna. Me kua ni nanuma ni cati ena nona vakadodonutaki. Na veikuitataki vakalialia e sega ni tokona na iVolatabu, ni rawa ni mavoa kina na gone. (Vosa Vakaibalebale 16:32) E kaya o Kelvin: “Ni gadrevi meu vakadodonutaki iratou na luvequ me baleta na leqa bibi, au dau saga me matata vei iratou ni vu ni noqu veivakadodonutaki na noqu loloma.”

Mera Taqomaki

Ena vinakati mera taqomaki na gone mai na ilala kei na veivakamuai ca ena vakaleqai ira. Ia ka ni rarawa nira tu na “tamata ca” ena vuravura nikua era dau saga mera vakaleqai ira na gonelalai. (2 Timoci 3:​1-5, 13) Ena rawa vakacava mo taqomaki ira na luvemu? Qo e dua na ivakasala vuku ena iVolatabu: “O koya sa yalomatua sa kunea na ca, ka sa vunitaki koya: ia ko ira sa sega ni vuku era sa lako tu yani, a ra sa kunea na rarawa.” (Vosa Vakaibalebale 22:3) Mo taqomaka na luvemu mai na ca, e dodonu mo yadrava tiko na leqa e basika. Namaka ni na yaco e so na ituvaki ena rawa ni tini ina leqa, saga gona ena nomu vinaka kece mo taqomaki ira na luvemu. Kena ivakaraitaki, rairai o vakatara mera vakayagataka na Internet na luvemu, ia mo vakadeitaka nira kila na kena ivakavakayagataki dodonu. De dua ena vinaka me biu na kompiuta ena vanua laurai levu mo rawa ni raica na kena dau vakayagataki.

Me tu vakarau o tama me vakavulici ira na luvena me baleti ira na dauveivaqaseni. E kila na luvemu na ka me cakava ke dua e vakasagai koya ni o yali tu?c Ena vinaka mera kila na luvemu na ivakavakayagataki dodonu ni yago tabu kei na kena e tawadodonu. E kaya o Kelvin: “Au sega ni vakatautaka na veivakavulici qo vei ira tale e so, vei ira mada ga na nodratou qasenivuli. Au kila ni noqu itavi meu vakavulica vei iratou na luvequ na veika me baleta na veiyacovi kei ira na dauveivaqaseni.” Niratou tubucake tiko eratou sega ni vakaleqai ena veika oya, ia ena gauna qo ratou sa marautaka tiko nodratou bula vakawati.

Qara na Veivuke ni Kalou

Na isolisoli vinaka e rawa ni solia e dua na tama, na nona vukei luvena me qaqaco nona veiwekani kei na Kalou. E bibi duadua na ivakaraitaki nei tama. E kaya o Donizete: “Mera vakaraitaka sara ga na tama nira mareqeta nodra veiwekani kei na Kalou. E dodonu me vakavotui qo ni yaco na leqa se so na ituvaki dredre. Ena ituvaki va qori me vakaraitaka o tama ni nuitaki Jiova dina. Ni dau vakavinavinakataki na nona yalovinaka na Kalou ena masu vakavuvale, era na kila kina na gone ni bibi mera itokani ni Kalou.”

Ena rawa vakacava vua e dua me tama vinaka? Me qara na nona ivakasala e kila vinaka na nodra susugi na gone, na Kalou o Jiova. Ke o vakavulica na luvemu ena veidusimaki ni Vosa ni Kalou, o na vakadinata na kena yaga me vaka e vakamacalataki ena Vosa Vakaibalebale 22:6: “Ni sa qase mai, ena sega ni lako tani maikina.”

[iVakamacala e ra]

[iYaloyalo ena tabana e 27]

Na tama me ivakaraitaki vinaka vei ira na luvena

[iYaloyalo ena tabana e 28]

Me vakavulici gone o tama ena veika vakayalo

[iYaloyalo ena tabana e 29]

Mera vakadodonutaki na gone ena loloma