O na Vosota Vakacava ena Cakacaka Vakaitalatala?

O DAU vakila beka ena so gauna na yalolailai kei na oca mo sega kina ni lai cakacaka vakavunau? Ena rawa ni vakavuna me dredre na noda vosota na veitusaqati kaukaua, nuiqawaqawa, tautauvimate, idre ni veimurimuri, se nodra sega ni kauai na tamata ena cakacaka vakavunau. Ia, vakasamataka mada na ivakaraitaki i Jisu. A vosota na veivakatovolei dredre duadua “e na vuku ni marau sa viritu e matana.” (Iper. 12:2) E kila vinaka o koya, ni nona vakadinadinataka ni cala nona beitaki na Kalou, e sa vakamarautaka tiko na loma i Jiova.​—Vkai. 27:11.

Eda na vakamarautaki Jiova tale ga nida vosota tiko ena cakacaka vakaitalatala. Ia, vakacava ke o yalolailai vakayalo ena vuku ni so na ituvaki mo sega kina ni via vunau? E kaya o Krystyna, e dau tautauvimate ena nona bula vaqase: “E sega ni ka vou na noqu dau vakila na oca kei na yalolailai. Dau rawa ni vakayalolailaitaki au ena so na gauna na noqu sa qase, au qai vakila na leqa me vaka na tautauvimate kei na nuiqawaqawa ni bula e veisiga.” O na rawa vakacava ni vosota ena cakacaka vakaitalatala ke o sotava e so na ituvaki dredre?

Vakatotomuri Ira na Parofita

Me vosota ena cakacaka vakavunau e dua na dautukutuku ni Matanitu ni Kalou, e dodonu me tiko vua na nodra itovo ni rai e so na parofita ena gauna makawa. Kena ivakaraitaki o Jeremaia. A tu vakasuka ena imatai ni gauna a lesi kina me veiqaravi vakaparofita. Ia, a vosota rawa na nona itavi dredre me sivia na 40 na yabaki baleta ni vulica me nuitaka na Kalou.​—Jere. 1:6; 20:7-11.

A vakayaloqaqataki Henryk na ivakaraitaki i Jeremaia. E kaya: “Sa sivia qo na 70 na yabaki noqu cakacaka vakaitalatala tiko, so na gauna e dau vakayalolailaitaki au na ka era cakava na tamata, se na nodra sega ni kauai. Ena gauna va qori au dau vakananuma na ivakaraitaki i Jeremaia. Na nona lomani Jiova kei na qaqaco ni nona vakabauta e vakayaloqaqataki koya me parofisai tiko ga.” (Jere. 1:17) A uqeti Rafał tale ga na ivakaraitaki i Jeremaia. E kaya: “A nuitaka na Kalou o Jeremaia, qai sega ni nanumi koya ga kei na lomana. E tomana tiko ga nona cakacaka ena yaloqaqa, dina ni a cati kina vakalevu. Au saga meu daunanuma tiko ga qori.”

E dua tale na parofita o Aisea, nona ivakaraitaki e uqeta e levu mera vosota ena cakacaka vakaitalatala. A kaya vua na Kalou nira na sega ni rogoci koya na kainona. “Mo vakabibitaka na yalodra na tamata oqo, ka vakadidivarataka na daligadra,” e kaya o Jiova. Ena sega beka ni yaga nona vunau o Aisea? E sega ni vaka kina mai na rai i Jiova! Na gauna a lesi kina me parofita, e kaya: “Koi au oqo; mo ni talai au.” (Aisea 6:8-10) A dei toka ga o Aisea ena nona ilesilesi. E va beka qori nomu rai me baleta na ivakaro meda cakacaka vakavunau?

Meda kua ni kauai vakalevu ena nodra sega ni via vakarorogo na tamata ena noda cakacaka vakaitalatala, ni na vakayaloqaqataki keda qori meda vosota tiko ga me vaka ga a cakava o Aisea. A walia rawa o Rafał na yalolailai ena sala qo: “Au sega ni dau kauaitaka nodra veivakalialiai e so, baleta niu sega ni lewa na ka ra tukuna ena yalava ena vuku ni tukutuku vinaka.” E kuria o Anna: “Au saga meu kua ni dau nanuma tiko na ka e veivakayalolailaitaki se sega ni vinaka. Au cakava rawa qo niu masu kei na noqu wilika na tikinivolatabu e veisiga ni bera niu lai cakacaka vakavunau. E dau yali totolo ga na rai cala.”

A veiqaravi na parofita o Isikeli vei ira na Jiu yalokaukaua ra tu vakavesu i Papiloni. (Isik. 2:6) Ke a sega ni wasea na parofita qo na vosa ni Kalou, qai mate kina e dua na tamata ca ni a sega ni rogoca na ivakasala, ena beitaki vua na nona mate. A kaya o Jiova vei Isikeli: “Na nona mate ka’u na taroga vei iko.”​—Isik. 3:17, 18.

A saga o Henryk me tiko vua na rai vata ga a tiko vei Isikeli: “Au sega ni vinakata me beitaki vei au na nodra dra na tamata kece. E leqataki na nodra bula.” (Caka. 20:26, 27) E va tale ga qori na rai i Zbigniew: “A tomana nona cakacaka o Isikeli qai sega ni kauai ena nodra nanuma na tamata. E yaga qo vei au me dau tiko vei au na nona rai na Dauveibuli me baleta na cakacaka vakavunau.”

O Sega ni Cakacaka Duadua

O sega ni cakacaka duadua tiko ni o cakacaka vakavunau. Me vakataka ga na yapositolo o Paula, eda rawa ni kaya: “Ni da sa daucakacaka vata kei koya na Kalou.” (1 Kor. 3:9) E kaya o Krystyna e dau yalolailai ena so na gauna: “Ya na vuna au dau kerea tiko ga kina na nona veivakayaloqaqataki o Jiova. E dau vakayaloqaqataki au tu ga.” Io, eda gadreva dina na yalo tabu ni Kalou me tokoni keda ena cakacaka vakaitalatala!​—Saka. 4:6.

Nida cakacaka vakavunau, e dusimaki keda na yalo tabu meda vakaraitaka na itovo era tiki ni “vua ni Yalo Tabu.” (Kala. 5:22, 23) Ena uqeti keda qori meda vosota kina na cakacaka vakavunau ena ituvaki kece eda donuya. E kaya o Henryk: “E yaga vei au na cakacaka vakavunau niu vakavinakataka kina na noqu itovo. Au vulica kina na vosovoso kei na veikauaitaki, meu kua tale ga ni datuvu.” Noda vosota ena cakacaka vakavunau, dina nida na sotava kina na veika dredre ena uqeti keda meda vakaitovotaka vakalevu na itovo era tiki ni vua ni yalo tabu.

E vakayagataka o Jiova nona agilosi me veidusimaki ena cakacaka talei qo. (Vkta. 14:6) E vakaraitaka na iVolatabu nira tu e “oba vakatini na udolu, ka vuqa tale na udolu” na agilosi va qo. (Vkta. 5:11) Ena veidusimaki i Jisu, era tokoni ira na dauveiqaravi ni Kalou e vuravura na agilosi. O dau vakasamataka beka qori ena gauna o cakacaka vakavunau tiko kina?

“E vakayaloqaqataki au noqu dau vakasamataka nira tokoni keda tiko na agilosi ena noda cakacaka vakaitalatala,” e kaya o Anna. “Au marautaka dina nodra dauveivuke ni dusimaki ira tiko o Jiova kei Jisu.” E dua dina na ka dokai na noda cakacaka vata kei ira na agilosi yalodina!

Eda na vosota vakacava nida cakacaka vata kei na so tale na dautukutuku? Eda vakalougatataki nida kilai ira na ilawalawa levu era iVakadinadina yalodina. Sega ni vakabekataki ni o vakadinata na ka e tukuna na Vosa Vakaibalebale: “Sa vagatai na kaukamea e na kaukamea: ia na tamata, sa vagata vakakina na mata ni wekana.”​—Vkai. 27:17.

Na noda cakacaka vata kei na so tale ena cakacaka vakavunau, e dua na gauna vinaka meda dikeva kina na iwalewale laulau ena rairai vou vei keda. E kaya o Elżbieta, “Niu cakacaka kei na levu na dautukutuku au rawa kina ni vakaraitaka noqu lomani ira eda vakabauta vata kei ira eda sota kaya.” Tovolea me veiveisau na dautukutuku drau cakacaka vata. O na taleitaka kina nomu cakacaka vakaitalatala.

Qarauna Vinaka Nomu Bula

Me rawa nida gumatua tiko ga ena cakacaka vakaitalatala, meda dau lalawataka vinaka na ka, me dua noda ituvatuva ni vuli vakataki keda, da qai vakacegu vinaka. Kena ibalebale ga ya meda qarauna vinaka noda bula vakayalo kei na noda bula vakayago.

E kaya na iVolatabu: “A nanuma ni lomana na dautara ka sa vakauta ga ki na sautu.” (Vkai. 21:5) E kaya o Zygmunt, sa yabaki 88 ena gauna qo: “E vuavuaivinaka na noqu veiqaravi niu muria tiko e dua na ituvatuva vinaka. Au dau tuva vinaka noqu gauna me levu kina noqu gauna ni vunau.”

Ena vakarautaki keda qai uqeti keda na titobu ni noda kila na iVolatabu, da qai qarava vinaka kina noda cakacaka vakaitalatala. Me vaka ga noda kania na kakana me rawa nida bula tiko kina, dodonu meda kania tale ga na kakana vakayalo meda rawa ni vakaitavi tiko ga kina ena cakacaka vakavunau. Nida wilika na Vosa ni Kalou e veisiga da qai kania na “kakana e na kena gauna dodonu” ena vakaukauataki keda ena cakacaka vakaitalatala.​—Maciu 24:45-47, VV.

A cakava na veisau levu o Elżbieta ena nona bula me vakavinakataka kina nona cakacaka vakaitalatala. E kaya: “Au vakalailaitaka na gauna ni noqu sara retioyaloyalo me levu kina na gauna ni noqu vakavakarau ina cakacaka vakaitalatala. Niu wili iVolatabu ena veibogi, au dau vakasamataki ira au sota kaya ena yalava. Au dau qara na tikinivolatabu kei na ulutaga ena ganiti ira.”

Nida vakacegu vinaka eda na kaukaua tiko ga kina da qai rawa ni vakaitavi vakalevu ena cakacaka vakavunau. Ia ena yasana adua, ke sivia tale na ka ni veivakamarautaki eda cakava ena rawa ni vakaleqa noda ivakarau ni cakacaka. E kaya e dua na dautukutuku gugumatua o Andrzej: “Eda na oca ke lailai na gauna ni vakacegu, qai rawa ni tini sara ena yalolailai. Au dau saga me kua ni yaco qori.”​—Dauv. 4:6.

E sega ni levu era taleitaka na itukutuku vinaka, dina nida dau gumatua na vunau. Ia o Jiova ena sega ni guilecava na noda cakacaka. (Iper. 6:10) Ke levu mada ga era sega ni via vosa vei keda, era na rairai veitalanoataka na noda veisiko yani ena gauna eda sa biubiu mai kina. Na yaga ni veika e caka ena vaka toka na veika eda wilika me baleti Isikeli: Nira “na kila ga ni sa dua na parofita ka tiko e na kedra maliwa.” (Isik. 2:5) E dina ni sega ni rawarawa na noda cakacaka vakaitalatala, ia e yaga vei keda vaka kina o ira na rogoca.

“E uqeti keda na cakacaka vakaitalatala meda vakaitovotaka na itovo vou, meda qai vakaraitaka kina noda lomana na Kalou kei ira tale e so,” e kaya o Zygmunt. “E dua dina na ka dokai na vakaitavi ena cakacaka ni veivakabulai qo. Ena sega ni vakaruataki ena kena ivakatagedegede eda cakava tiko qo se me na tautauvata kei na ituvaki qo,” e tomana o Andrzej. O na rawa tale ga ni vakalougatataki vakalevu ke o vosota tiko ena cakacaka vakaitalatala ena gauna qo.​—2 Kor. 4:1, 2.

[iYaloyalo ena tabana e 31]

Nida qarauna vinaka noda bula vakayalo kei na noda bula vakayago ena vakayaloqaqataki keda meda vosota ena cakacaka vakaitalatala