Taro na Dauwiliwili

E tukuni ena iVolatabu “nai vola i Jeseri” kei “nai vola ni valu i Jiova.” (Josua 10:13; Tiko 21:14) Na rua na ivola qo erau sega ni lewe ni iVolatabu. Ia erau a uqeti beka vakalou qai yali?

E sega na vuna vinaka meda tukuna kina ni uqeti vakalou na rua na ivola qo, oti qai yali. O ira era uqeti mera vola na iVolatabu era vakekeli ena so tale na ivola. So na ivola qori era rairai tiki ni iVolatabu qai vakayagataki kina na vosa e sega ni kilai levu vei ira na dauwiliwili ena gauna qo. Kena ivakaraitaki, na 1 Veigauna 29:29 e tukuna “nai vola i Samuela na rairai, kei nai vola i Necani na parofita, kei nai vola i Kata na rairai.” Na tolu na ivola qori e rawa ni vakaibalebaletaki tiko ina ivola eda sa kila tu nikua me 1 kei na 2 ni Samuela, se na ivola na Dauveilewai.

Ena yasana adua, a rairai vakayagataki e so na ivola e tautauvata na yacadra kei na ivola ena iVolatabu, ia era sega ni lewe ni iVolatabu. Meda vakatauvatana mada ina va na ivola ni gauna makawa: “na ivola ni veika sa caka e na nodra gauna na tui Juta,” “kedrai vola na tui Juta kei Isireli,” “kedrai vola na tui Isireli,” kei na “kedrai vola na tui Isireli kei Juta.” Dina ni na rairai tautauvata na yacadra kei na yaca ra volai koto ena iVolatabu me vaka na 1 Tui kei na 2 Tui, na va na ivola qori e sega ni uqeti vakalou, era sega tale ga ni tiki ni iVolatabu. (1 Tui 14:29; 2 Vei. 16:11; 20:34; 27:7) Era rairai ivola ni volaitukutuku makawa era sa tu ena gauna a volavola tiko kina na parofita o Jeremaia kei Esera ena iVolatabu.

Io, e so na dauvolaivolatabu era dau cavuta e so na ivola se vakekeli ena so tale na ivolatukutuku makawa se ivakamacala e sega ni uqeti vakalou. E tukuni ena Esiteri 10:2 “nai vola ni veika sa caka e na nodra gauna na tui Mitia kei Perisia.” Koya gona, a vakarautaka o Luke na nona itukutuku ena Kosipeli ena nona “vakatarotaroga matua sara na ka kecega mai nai vakatekivu.” A rairai vakaibalebaletaka na nona vakekeli ena ivakamacala volai a soli vua, ena gauna a vakarautaka tiko kina na iyatukawa i Jisu eda wilika ena nona Kosipeli. (Luke 1:3; 3:23-38) Dina ni a sega ni uqeti vakalou na ivola e vakekeli kina o Luke, ia na Kosipeli a vola o koya e uqeti vakalou. E se yaga tiko ga vei keda na Kosipeli qori.

Na rua na ivola e tarogi toka qo—“nai vola i Jeseri” kei “nai vola ni valu i Jiova”—e rairai tiko dina ia erau sega ga ni uqeti vakalou. Qori gona na vuna a sega ni taqomaka kina o Jiova. Na kena cavuti na rua na ivola qori era nanuma kina na vuku ni iVolatabu ni rau ivola ni serekali se sere ni nodra veileqaleqati na Isireli kei na kedra meca. (2 Sam. 1:17-27) E vakamacalataka e dua na encyclopedia ni iVolatabu ni lewe ni vola qori e rairai “serekali se sere era maroroya tu na daulagasere e Isireli makawa.” E so mada ga na tagane a vakayagataka na Kalou mera parofita se raivotu era volaitukutukutaka e so na ka, ia e sega ni digia se vakatara o Jiova me lewe ni iVolatabu. Na veika e lewe ni iVolatabu e ‘yaga me ivakavuvuli, me veivunauci, me veivakadodonutaki’ ena gauna qo.​—2 Tim. 3:16; 2 Vei. 9:29; 12:15; 13:22.

Na kena cavuti e so na ivola ena iVolatabu kei na yaga ni kedra itukutuku, e sega ni dodonu meda lai tinia kina nira uqeti vakalou. Ia, e maroroya na Kalou o Jiova na ivola kece e tiko kina na “vosa ni noda Kalou,” era na “tu dei ka tawa mudu.” (Aisea 40:8) Io, na veika e digia o Jiova me lewe ni 66 na ivola ena iVolatabu e ganiti keda sara ga meda ‘cakava na veicakacaka vinaka kece nida sa vakarautaki oti kina.’​—2 Tim. 3:16, 17, VV.