Sucu Vou—E Vakatau Vei Keda Yadua?
O CEI e vakavuna na sucu vou? Nira veiuqeti eso na iliuliu ni lotu mera sucu tale na lotu vaKarisito, era cavuqaqataka na vosa i Jisu: “E dodonu mo ni sucu tale.” (Joni 3:7, VV) Era veisautaka na vosa qori me ivakaro, era tukuna “Ni sucu tale!” Era vakavuvulitaka ni tamata yadua e vakabauta, e dodonu me lewa me talairawarawa vei Jisu, me sucu vou tale ga. Ena vakasama qori, e nanumi kina ni sucu vou e vakatau sara ga vei keda yadua. Ia e salavata beka qori kei na ka e tukuna o Jisu vei Nikotimo?
Ni wiliki vinaka na ka e tukuna o Jisu, e sega ni vakavuvulitaka ni vakatau ina tamata yadua me sucu vou se sega. Na cava na vuna? Na vosa vaKirisi e vakadewataki me “sucu tale” e rawa ni kena ibalebale tale ga “dodonu me sucu mai cake.”a Me salavata kei na ikarua ni kena ibalebale, na sucu vou e vu “mai cake”—“mai lomalagi” se ‘mai vua na Tamada.’ (Joni 19:11; Jemesa 1:17) Io, na Kalou e vakavuna na sucu vou.—1 Joni 3:9.
Ke dei tiko ena noda vakasama na vosa “mai cake,” eda na vakadeitaka ni sega ni rawa vua e dua me lewa nona sucu vou. Vakasamataka mada na nona sucu e dua na gone. E vakavuna ga vakataki koya? Sega! E vakavuna o tamana. Na sucu vou e va tale ga qori, e vakavuna ga na Tamada vakalomalagi. (Joni 1:13) E donu kina na ka e tukuna na yapositolo o Pita: “Me da ia na vakavinavinaka vua na Kalou na Tama ni noda Turaga ko Jisu Karisito! Sa vakasucumi keda vou ko koya e na vuku ni nona loloma levu.”—1 Pita 1:3, VV.
E Dua Beka na iVakaro?
Eso era na rairai taroga, ‘Ke sega dina ni rawa vua e dua me lewa ga nona sucu tale, na cava ga e vakarota kina o Jisu: “E dodonu mo ni sucu tale”?’ E taro vinaka qori. Ke ivakaro dina, sa vakaukauataki keda tiko o Jisu meda cakava e dua na ka eda sega ni lewa. Qori e sega ni vakasama vakayalomatua. Na cava ga na ibalebale ni kena tukuni e dodonu moni “sucu tale”?
E sega ni ivakaro na malanivosa ya ke laurai vinaka na vosa taumada e volai kina, e dua ga na itukutuku. Ni tukuna gona o Jisu e dodonu moni “sucu tale,” e tukuna tiko ga e dua na itukutuku, e sega ni ivakaro. E kaya: “E bibi moni sucu mai cake.”—Joni 3:7, Modern Young’s Literal Translation.
Vakasamataka mada na ivakatautauvata qo ni kedrau duidui na itukutuku kei na ivakaro. Raitayaloyalotaka e dua na siti e vica vata na kena koronivuli. E dua vei ira qori e nodra koronivuli na gone itaukei era tiko vakayawa mai na siti. Dua na siga e lako yani e dua na gonetagane e sega ni gone itaukei, e tukuna vei qasenivuli liu, “Au via vuli ena koronivuli qo.” E tukuna sara na qasenivuli liu, “E dodonu mo itaukei.” E sega ni vakarota tiko e keri o qasenivuli liu, “Mo dua na itaukei!” Ia e tukuna tiko ga na ka e vinakati vei ira na via vuli ena koronivuli ya. Ena nona tukuna tale ga o Jisu: “E dodonu mo ni sucu tale,” e vakaraitaka tiko ga na ka e vinakati vua e dua me ‘curu ina Matanitu ni Kalou.’
Ena vakasama qori, e vure cake mai kina e dua tale na taro me baleta na sucu vou. Na cava na kena inaki? Na isau ni taro qo e bibi ena kena kilai na ka dina me baleta na sucu tale.
[iVakamacala e ra]
a E vica vata na vakadewa ni iVolatabu era vakadewataka va qo na Joni 3:3. Kena ivakaraitaki, e kaya na Literal Translation of the Bible: “Ke sega ni sucu mai cake e dua, ena sega ni rawa ni raica na matanitu ni Kalou.”
[iYaloyalo ena tabana e 6]
Erau tautauvata vakacava na sucu vou kei na nona sucu e dua na gone?