Na Cava na iBalebale ni Sucu Tale?

Kena isau vakaivolatabu

Na matavosa “sucu tale” e dusia e dua na veiwekani vou ena kedrau maliwa na Kalou kei koya e sucu tale. (Joni 3:3, 7) Na Kalou e vakatokai ira na sucu tale mera luvena. (Roma 8:15, 16; Kalatia 4:5; 1 Joni 3:1) E tautauvata vinaka qori kei ira na gonesusu e vakalawataki nodra volai ena dua na vuvale. Nira sa lewenivuvale ni Kalou o ira na sucu tale, ena veisau tale ga na kedra ivolatukutuku.—2 Korinica 6:18.

Vuna e sucu tale kina e dua

E kaya o Jisu: “Ke dua e sega ni sucu tale, ena sega ni raica na Matanitu ni Kalou.” (Joni 3:3) Ni dua gona e sucu tale, e sa vakarautaki koya tiko me lai veiliutaki kei Karisito ena Matanitu ni Kalou. E veiliutaki mai lomalagi na Matanitu qo, e vakamacalataka na iVolatabu na ‘sucu vou’ me vakarautaka e dua na ivotavota e “maroroi tu mai lomalagi.” (1 Pita 1:3, 4) O ira na sucu tale era vakabauta nira na ‘veiliutaki vata vakatui’ kei Karisito.—2 Timoci 2:12; 2 Korinica 1:21, 22.

Ena sucu tale vakacava e dua?

Ni vakamacalataka tiko na tikina qo o Jisu, e kaya ni o ira na sucu tale era na “sucu ena wai kei na yalo tabu.” (Joni 3:5) E kena ibalebale nira na papitaiso ena wai, ra papitaiso tale ga ena yalo tabu.—Cakacaka 1:5; 2:1-4.

E imatai duadua ni tamata me sucu tale o Jisu. A papitaiso ena Uciwai na Joritani qai lumuti se papitaisotaki koya na Kalou ena yalo tabu. E sucu tale o Jisu ena yalo tabu me luvena vakayalo na Kalou, qai nuitaka na bula i lomalagi. (Marika 1:9-11) A vakayacora qori na Kalou ena nona vakaturi Jisu me dua na kabula vakayalo.—Cakacaka 13:33.

Era papitaiso tale ga ena wai eso era sucu tale ni bera nira papitaiso ena yalo tabu.a (Cakacaka 2:38, 41) Era nuitaka na bula i lomalagi, ena vakayacora qori na Kalou nira sa vakaturi.—1 Korinica 15:42-49.

Rai cala me baleta na sucu tale

Rai cala: E vakatau vei keda meda sucu tale se sega.

Kena dina: E vinakata na Kalou meda veiwekani voleka kei koya, meda vakabulai tale ga. (1 Timoci 2:3, 4; Jemesa 4:8) Ia ena digitaka ga o koya o ira mera sucu tale se lumuti ena yalo tabu. E tukuna na iVolatabu, ni nona sucu tale e dua e “sega ni vakatau vei koya e diva se nona sasaga, e vakatau ga vua na Kalou.” (Roma 9:16) Na matavosa “sucu tale” e rawa tale ga ni tukuni me sucu mai cake, qori e vakadeitaka ni nodra digitaki na sucu tale e “lako mai cake,” se veidigitaki na Kalou.—Joni 3:3.