Eso Ra Veiliutaki, Yaga Vei Ira e Levu

ME TEKIVU mai na nodratou gauna na yapositolo, ra sa digitaki tiko mai vuravura e dua na ilawalawa lotu vaKarisito yalodina e yalani na kedra iwiliwili, e vakadonui ira na Kalou mera luvena. Ni taucoko na veisau era vakila, e tukuna kina na Vosa ni Kalou nira sucu vou. Na sucu vou e vakarautaki ira na sucu tale ena nodra veiliutaki mai lomalagi. (2 Timoci 2:12) Nira mate, era vakaturi ina bula vakalomalagi mera veiliutaki. (Roma 6:3-5) Era na ‘liutaki vuravura’ mai lomalagi vata kei Karisito.​—Vakatakila 5:10, VV; 11:15.

Ia e tukuna na iVolatabu nira na bula tawamudu na nodra itokani. E tukuna tale ga na (iVolatabu vakaIperiu kei na iVolatabu vaKirisi vaKarisito), ni loma ni Kalou me vakabulai e rua na ilawalawa tamata. E dua ga na ilawalawa lailai era na veiliutaki mai lomalagi, na ilawalawa levu era bula e vuravura era na vakarurugi ena nodra veiliutaki. Vakasamataka na ka e vola na yapositolo o Joni vei ira na nona itokani era sucu vou. E kaya me baleti Jisu: “Sai bulubulu ni nodai valavala ca ko koya; a sa sega e na vuku ni noda walega [na ilawalawa lailai], e na vuku talega ni nodra na kai vuravura kecega [na ilawalawa levu].”​—1 Joni 2:2.

E vola tale ga na yapositolo o Paula: “Ni ra sa wawa tu ka nanamaki tiko na veika kece e bulia na Kalou [ilawalawa levu] me vakaraitaki ira mai na luvena [ilawalawa lailai] ko koya.” (Roma 8:19-21, VV) Na cava na ibalebale ni ka e rau tukuna o Joni kei Paula? O ira na sucu tale era na veiliutaki mai lomalagi. Na cava e kena inaki? Mera vakalougatataki tawamudu kina na milioni vakacaca era na bula e vuravura ena veiliutaki ni Matanitu ni Kalou. E vakavulici ira gona na nona tisaipeli o Jisu mera masuta: “Me yaco mai na nomuni matanitu, me caka na lomamuni e vuravura, me vaka sa caka tiko mai lomalagi.”​—Maciu 6:10, VV.

E tukuni tale ga ena iVolatabu vakaIperiu ni na vakabulai e rua na ilawalawa. Kena ivakaraitaki, e tukuna o Jiova vei Eparama na tukai Jisu: “Ena kalougata talega na veimatanitu kecega e vuravura [na ilawalawa levu] e na nomu kawa [na ilawalawa lailai].” (Vakatekivu 22:18) Io, era na vakalougatataki na veimatanitu kece ena vuku ni “kawa” i Eparama.

O cei na “kawa” ya? O Jisu Karisito kei ira na sucu vou, era luvena vakacabecabe na Kalou. E tukuna na yapositolo o Paula: “Kevaka dou sa nei Karisito, dou sa qai kawa i Eparaama.” (Kalatia 3:16, 29) Na veivakalougatataki cava era na marautaka na veimatanitu ena vuku ni “kawa”? Ena vakadonui ira na Kalou, ra qai bula tawamudu ena parataisi e vuravura. Na daunisame o Tevita e parofisaitaka: “Era na taukena na vanua ko ira na yalododonu, ka tiko kina ka sega ni mudu.”​—Same 37:29; Aisea 45:18; Vakatakila 21:1-5.

Na veiliutaki e lomalagi e baleti ira ga eso, ia na yaga ni nodra veiliutaki​—na bula tawamudu e vuravura kei na vuqa tale na veivakalougatataki era na marautaka e levu. Meda saga mada ga vakavuvale meda maliwai ira na vakalougatataki tawamudu ena ruku ni veiliutaki ni Matanitu ni Kalou.

[iYaloyalo ena tabana e 12]

E milioni vakacaca era na vakalougatataki mera bula tawamudu e vuravura. O na dua vei ira?