Watchtower LAIBRI ENA INTERNET
Watchtower
LAIBRI ENA INTERNET
vakaViti
  • IVOLATABU
  • IVOLA
  • SOQONI
  • w09 4/15 t. 7-11
  • Ena Vakamarautaki Jiova Nomu Yalodina

Sega na kena vidio.

Vosota, sega ni laurai rawa na vidio.

  • Ena Vakamarautaki Jiova Nomu Yalodina
  • Na Vale ni Vakatawa Kacivaka na Matanitu i Jiova—2009
  • Ulutaga Lailai
  • iKuri ni Ulutaga
  • Kilai Koya Tiko na Meca Dina
  • Saga Mo Veivolekati kei Jiova
  • Dau Tokoni Ira Nona Tamata Yalodina o Jiova
  • E Vakavinavinakataka o Jope na Yaca i Jiova
    Na Vale ni Vakatawa Kacivaka na Matanitu i Jiova—2009
  • Mo “Nuitaki Jiova”
    Na Vale ni Vakatawa Kacivaka na Matanitu i Jiova (Vulici)—2022
  • “Au na Sega ni Soro ena Noqu Yalodina!”
    Vakatotomuria Nodra Vakabauta
  • Mo Yalodina Tiko Ga!
    Na Vale ni Vakatawa Kacivaka na Matanitu i Jiova (Vulici)—2019
Raica Tale Eso
Na Vale ni Vakatawa Kacivaka na Matanitu i Jiova—2009
w09 4/15 t. 7-11

Ena Vakamarautaki Jiova Nomu Yalodina

“Mo vuku, na luvequ, ka vakamarautaka na lomaqu, me dua na vosa me’u tauca vua sa beitaki au.”​—VKAI. 27:11.

1, 2. (a) Na veivakalewai cava i Setani e volai ena ivola na Jope? (b) Na ivakadinadina cava e dusia ni vakalewai Jiova tiko ga o Setani ni oti na mate i Jope?

A VAKATARAI Setani o Jiova me vakatovolea na yalodina ni nona dauveiqaravi, o Jope. A mani mate kina nona manumanu kei ira na luvena, a yaviti koya tale ga e dua na mate mosimosi. Ia, a sega ni vakalewa ga na yalodina i Jope o Setani, e tukuna eso tale na ka. E kaya o Setani: “Nai sau ni kulina na kulina, ia na nona ka kecega ena solia na tamata me bula kina.” Na veivakalewai qo e sega ni yalani ga vei Jope, e vauci ira tale ga na bula tiko ni mate oti o koya.​—Jope 2:4.

2 Ni oti e rauta ni 600 na yabaki nona vakatovolei o Jope, a uqeti vakalou o Solomoni me vola: “Mo vuku, na luvequ, ka vakamarautaka na lomaqu, me dua na vosa me’u tauca vua sa beitaki au.” (Vkai. 27:11) E macala eke ni se vakalewai Jiova tiko ga o Setani ena gauna oya. Kena ikuri, e raivotutaka o Joni nona beitaki ira tiko na dauveiqaravi ni Kalou o Setani ni oti nona kolotaki mai lomalagi, qo ni oti toka ga na kena tekivu veiliutaki na Matanitu ni Kalou ena 1914. Ena iotioti ni veisiga ni ituvaki eda bula tu kina qo, e se vakalewa tiko ga o Setani na noda yalodina vua na Kalou.​—Vkta. 12:10.

3. Na veika bibi cava eda rawa ni vulica ena ivola i Jope?

3 Dikeva mada e tolu na tikina bibi eda rawa ni vulica ena ivola i Jope. Kena imatai, na ka a sotava o Jope e vakatakilai kina na meca dina ni kawatamata, e dau vakavuna tale ga nodra tusaqati na tamata ni Kalou. Na meca qori o Setani na Tevoro. Kena ikarua, eda na rawa ni yalodina tiko ga ena veivakatovolei kece ke da veiwekani voleka kei na Kalou. Kena ikatolu, nida vakatovolei ena so na ka, ena tokoni keda na Kalou me vaka ga nona tokoni Jope. Nikua, e cakava qori o Jiova ena nona vakayagataka nona Vosa, nona isoqosoqo, kei na yalona tabu.

Kilai Koya Tiko na Meca Dina

4. O cei me beitaki ni vakavuna na leqa ni kawatamata nikua?

4 E levu era sega ni vakabauta ni bula tiko o Setani. Koya gona, dina nira na rairai leqataka na veika e yaco tu e vuravura, ia era sega ni kila ni vakavuna sara tiko ga o Setani na Tevoro. E dina nida vakavuna ga na kawatamata e levu na leqa sa tarai keda tu qo. Rau a vinakata ga na vuda o Atama kei Ivi, me rau lewai rau ga. Me tekivu mai na gauna ya, e dua na iwase levu ni itabatamata era sega ni dau cakacaka vakayalomatua. Ia, na Tevoro ga a vakacalai Ivi me talaidredre vua na Kalou. O koya sara ga e lewa tu na ivakarau ni bula ni kawatamata ivalavala ca era sa takali tiko yani ena vuravura qo. Ni “kalou ni vuravura oqo” o Setani, e laurai gona ena ivakarau ni tamata na itovo e tiko vua: dokadoka, veiba, vuvu, kocokoco, lawaki, kei na talaidredre. (2 Kor. 4:4;1 Tim. 2:​14; 3:6; wilika Jemesa 3:​14, 15.) Na itovo qo e vakavuna kina na veileqaleqataki vakapolitiki, vakalotu, na veicati, cakacaka butobuto, kei na veilecayaki​—e vakavuna tiko e levu na leqa ni kawatamata.

5. Na cava eda uqeti meda cakava ena ka totoka eda sa kila tu?

5 Eda vakalougatataki na dauveiqaravi i Jiova nida kila na veika qo! Io, eda kilai koya e vakavuna na kena torosobu tiko ga na ituvaki kei vuravura. Sega li ni uqeti keda qo meda vakamacalataka ena noda cakacaka vakaitalatala o koya e vakavuna dina tiko na leqa? Sega li nida marau na tokona na Kalou dina o Jiova, da qai vakamacalataka vei ira tale eso na sala ena vakarusai Setani kina kei na nona vakaotia na leqa ni kawatamata?

6, 7. (a) O cei e vakavuna nodra tusaqati na dausokalou dina? (b) Eda na vakatotomuri Ilaiu vakacava?

6 E sega wale ga ni vakavuna o Setani e levu na veika rarawa e vuravura, e liutaka sara ga na nodra tusaqati na tamata ni Kalou. E nakita dei me vakatovolei keda vakalevu. A tukuna o Jisu Karisito vua na yapositolo o Pita: “I Saimoni, I Saimoni, raica, sa kerei kemudou ko Setani, me tauvuloni kemudou me vaka na witi.” (Luke 22:31) O koya gona, eda na vakatovolei kece baleta nida muria tiko na we ni yava i Jisu. E vakatauvatana o Pita na Tevoro ni vaka na “laioni sa tagi, a sa vakasaqara eso me tiloma.” E tukuna o Paula: “Ko ira kecega era na via lotu dina vei Karisito Jisu, era na vakacacataki.”​—1 Pita 5:8; 2 Tim. 3:12.

7 Ni sotava e dua na tacida na ituvaki dredre, meda kua ni nanuma ni vakavuna o Jiova. Me vaka eda sa veivosakitaka mai, o Setani ga na meca dina. Eda na sega ni yawaka na tacida qori, me vakataki ratou na itokani lasulasu i Jope, ia eda na vakataki Ilaiu ga, ni a vosa vei Jope me vaka e dua na itokani dina. Eda na tokoni koya na tacida meda vorata na meca o Setani. (Vkai. 3:27; 1 Ces. 5:25) Na noda isausau oya meda tokona na tacida me yalodina tiko ga ena veivakatovolei kece, me marau kina o Jiova.

8. Na cava a sega ni tarovi Jope rawa kina o Setani ena nona vakalagilagi Jiova?

8 Na imatai ni ka a cakava o Setani, oya me vakarusa na nona manumanu o Jope. Era yaga vakalevu nona manumanu qori, kena irairai ni nona ivurevure ni ilavo. E vakayagataka tale ga ena sokalou. Ni oti nona vakasavasavataki ratou na luvena o Jope, a “sou e na mataka, ka vakacabora nai soro kama me vaka na kedratoui wiliwili kecega: ni sa kaya ko Jope, De sa cala ko iratou na luvequ, ka vosavakacacataka lo na Kalou e lomadratou. Ia sa daukitaka vakaoqo ko Jope.” (Jope 1:4, 5) O koya gona, e cabora vakawasoma na isoro manumanu o Jope vei Jiova. Ni tekivu nona vakatovolei, a sega ni cakava rawa qori. A sega vei Jope na “[i]yau” me vakalagilagi Jiova kina. (Vkai. 3:9) Ia, a vakalagilagi Jiova ga ena ka e tukuna!

Saga Mo Veivolekati kei Jiova

9. Na cava meda dau vakabibitaka ena noda bula?

9 Se da vutuniyau se dravudravua, bulabula vinaka se tautauvimate, e rawa nida veivolekati kei Jiova. Ena veivakatovolei kece eda sotava, nida volekata na Kalou ena vakaukauataki keda meda yalodina tiko ga, da qai vakamarautaki koya. Eso mada ga a lailai na ka era kila me baleta na dina, ia era a sega ni soro koso ra qai yalodina tiko ga.

10, 11. (a) Na cava a cakava e dua na tacida yalewa ni vakatovolei nona yalodina? (b) A sauma vakacava na tacida yalewa qo na veibeitaki i Setani?

10 Vakasamataka mada na ivakaraitaki i Valentina Garnovskaya, e dua na iVakadinadina e Rusia, e vakataki Jope ni yalodina tiko ga ena gauna e vakatovolei kina vakaukaua. Ena 1945 ni voleka ni yabaki 20, a vunau vua e dua na tacida tagane. A talevi koya vakarua na tacida ya me veivosakitaka na iVolatabu, ia a sega tale ni raici koya o Valentina ni oti ya. A tekivu vunau ga o Valentina vei ira na tiko tikivi koya. Mani vesu kina qai totogitaki me walu na yabaki ena dua na keba. A sereki ena 1953, mani tomana tale kina nona cakacaka vakavunau. A vesu tale qai totogi me tini na yabaki e valeniveivesu. Ni oti e vica vata na yabaki ena dua na keba, a vakau ina dua tale na keba. Ena keba qori, era a tiko kina eso na mataveitacini yalewa era maroroya tu e dua na iVolatabu. Dua na siga a vakaraitaka vei Valentina e dua na tacida yalewa na iVolatabu. Dua na ka nona marau! Vakasamataka mada, na iotioti ni iVolatabu a raica o Valentina oya na nona na tacida tagane a vunau vua ena 1945!

11 Ena 1967, a sereki o Valentina qai yalataki koya vei Jiova ena nona papitaiso. A vakayagataka na nona galala me gumatua kina ena cakacaka vakaitalatala me yacova na 1969. Ena yabaki qori, a vesu tale kina qai totogi yabaki tolu e valeniveivesu. Ia, a vunau tiko ga. Ni bera nona mate ena 2001, sa vakavulica oti e 44 na tamata mera kila na ka dina. E 21 na yabaki nona a tiko e valeniveivesu kei na vica na keba. A tu vakarau me vakuai koya ena levu na ka, oka kina nona galala, me rawa ni yalodina tiko ga kina. Ni sa voleka ni mai cava na nona bula, a kaya o Valentina: “A sega ni dua na vanua meu tiko dei kina. Na ka kece au taukena e tawani tu ga ena dua na kato ni sulu, ia au marau, au lomavakacegu tale ga na qaravi Jiova.” A sauma vinaka o Valentina na veibeitaki i Setani, ena nona tukuna nida na sega ni yalodina vua na Kalou nida vakatovolei! (Jope 1:9-11) E sega ni vakabekataki ni a vakamarautaki Jiova o Valentina, sa vakanamata tale tu ga o Jiova ena gauna me vakaturi koya kina, kei ira kece na mate era yalodina tiko ga nira a vakatovolei.—Jope 14:15.

12. Na cava e bibi kina na loloma ena noda veiwekani kei Jiova?

12 Na noda veiwekani kei Jiova e yavutaki ena noda lomani koya. Eda qoroya nona itovo na Kalou, da qai saga ena noda vinaka kece me salavata na noda bula kei na nona inaki. Eda vakalasuya na Tevoro nida vinakata meda lomani Jiova, qai vu dina mai lomada, eda sega ni vakasaurarataki kina. Na loloma va qo e vakaukauataki keda meda yalodina ena gauna eda vakatovolei kina. Ena marau kina o Jiova me “maroroya na nodra sala na yalosavasava.”​—Vkai. 2:8; Same 97:10.

13. E raica vakacava o Jiova na ka eda cakava ena vukuna?

13 Ena uqeti keda na loloma meda doka na yaca i Jiova, ke da mani nanuma ni vakaiyalayala ga na ka eda rawa ni cakava. E raica na yasana vinaka o Jiova, qai sega ni veivakalewai ke da sega ni cakava kece na ka eda via cakava. Sega wale ga ni bibi na ka eda cakava, e bibi tale ga na inaki eda cakava kina. Dina ni rarawa vakalevu o Jope qai vosota na veivakatovolei, a tukuna vei ratou na nona itokani lasulasu ni lomana na sala i Jiova. (Wilika Jope 10:12; 28:28.) Ena iotioti ni wase ni ivola i Jope, e volai kina nona cudruvi ratou o Elifasi, Pilitati, kei Sofa o Jiova baleta ni ratou a sega ni tukuna na ka dina. Ia, a vakaraitaka o Jiova nona vakadonui Jope ena nona tukuna vakava “na noqu tamata” kei na nona dusimaki Jope me kere veivosoti ena vukudratou na cala. (Jope 42:7-9) Meda cakava tale ga qori me rawa ni vakadonui keda tiko ga kina o Jiova.

Dau Tokoni Ira Nona Tamata Yalodina o Jiova

14. A vunauci Jope vakacava na Kalou me vakadodonutaka na nona rai?

14 A yalodina tiko ga o Jope, dina ni a sucu ivalavala ca. So na gauna ni a vakatovolei sara vakaukaua, a tuburi koya na rai cala. Me kena ivakaraitaki, a kaya vei Jiova: “Au sa tagi vei kemuni, ia ko ni sa sega ni rogoci au. . . . Kemuni sa vuki me yalovakatani vei au: ko ni sa vorati au e na ligamuni kaukauwa.” Kena ikuri, a vakabibitaka o Jope nona vakadonui koya ga ena nona kaya: “Ni’u sa sega ni tamata ca,” e kaya tale ga “sa sega ni tu e ligaqu nai valavala sa sega ni dodonu: a noqu masumasu talega sa savasava.” (Jope 10:7; 16:17; 30:20, 21) Ia, a vunauci koya vakayalololoma o Jiova ena nona tarogi Jope ena vica vata na taro me uqeti Jope me kua ni nanumi koya ga. A rawa kina ni raica na kaukaua levu ni Kalou kei na somidi ni tamata. A yalomalumalumu ena veidusimaki qori o Jope qai vakadodonutaki koya.​—Wilika Jope 40:8; 42:2, 6.

15, 16. E dusimaki ira vakacava nona dauveiqaravi nikua o Jiova?

15 E dusimaki ira tale ga vakayalololoma qai vakadodonutaki ira nona dauveiqaravi ena gauna qo o Jiova. Kena ikuri, e yaga dina vei keda. Me kena ivakaraitaki, a vakarautaka o Jisu Karisito na isoro ni veivoli, me yavu ni kena vosoti na ivalavala ca. Ena vuku ni isoro qori, e rawa kina nida veiwekani voleka kei na Kalou dina nida tamata ivalavala ca. (Jeme. 4:8; 1 Joni 2:1) Nida vakatovolei, eda rawa ni kerea tale ga na veidusimaki kei na veivakaukauataki ni yalo tabu ni Kalou. Kuria qori, sa tiko na iVolatabu, ke da wilika qai vakasamataka vakatitobu na veika e volai tu kina, eda sa vakarautaki keda tiko ena gauna ena vakatovolei kina noda vakabauta. E bibi na noda dau vuli vakataki keda, nida na kila kina na kena vakalewai na noda yalodina kei na dodonu ni nona veiliutaki cecere na Kalou e lomalagi vaka kina e vuravura.

16 Kena ikuri, eda kalougata nida lewena e dua na mataveitacini era tiko e veiyasa i vuravura, e vakani keda tiko o Jiova ena kakana vakayalo ena nona vakayagataka na “dauveiqaravi yalo dina ka vuku.” (Maciu 24:45-47, VV) Ena rauta na 100,000 na ivavakoso kece ni iVakadinadina i Jiova, e vakarautaki kina na soqoni me tuberi keda qai vakaukauataki keda meda vosota na vakatovolei ni noda vakabauta. E dina qo ena ivakaraitaki ni dua na itabagone iVakadinadina e tiko mai Jamani, o Sheila.

17. Tukuna e dua na ivakaraitaki e dusia ni ka vakayalomatua na noda muria voleka na idusidusi ni isoqosoqo i Jiova ena gauna qo.

17 Ena dua na siga ni tiko mai koronivuli o Sheila, a sega ni tiko e dua na qasenivuli ena nona kalasi. Era nanuma na nona icaba mera vakatovolea na Ouija board, e dua na papa ni vakatevoro e vakayagataki me kilai kina na veika e se bera ni yaco. A gole totolo sara i tuba o Sheila, qai marau sara ga ni cakava qori ena vuku ni ka a yaco. A rogoca o koya ni so na gonevuli era vakila nodra tiko na timoni ena gauna ra vakayagataka kina na papa, ra qai dui dro. Ia, na cava e vakatulewataka kina o Sheila me gole totolo i tuba? “Ni bera toka ga na leqa qo, a veivosakitaki ena soqoni ena Kingdom Hall na rerevaki ni kena vakayagataki na Ouija board. Au kila gona na ka meu cakava,” e kaya o Sheila. “Au vinakata meu vakamarautaki Jiova, me vaka e kaya na iVolatabu ena Vosa Vakaibalebale 27:11.” A vinaka gona nona a tiko ena soqoni qai vakarorogo matua tiko o Sheila!

18. Na cava o nakita dei mo cakava?

18 Meda nakita dei mada ga meda muria voleka na idusidusi mai na isoqosoqo ni Kalou. Eda na dusimaki qai vakaukauataki nida tiko wasoma ena soqoni, wili iVolatabu, vulica na ivola vakaivolatabu, masu, vaka kina noda veimaliwai kei ira na lotu vaKarisito matua. E vinakata o Jiova meda qaqa, qai nuidei nida rawa ni yalodina tiko ga. E ka dokai dina meda vakavinavinakataka na yaca i Jiova, meda yalodina tiko ga, da qai vakamarautaki Jiova!

O se Nanuma Tiko?

• Na ituvaki kei na veivakatovolei cava e vakavuna o Setani?

• Na cava na ka talei duadua e tiko vei keda?

• Na cava na yavu ni noda veiwekani kei Jiova?

• E tokoni keda tiko vakacava nikua o Jiova?

[iYaloyalo ena tabana e 8]

Sega li ni o vinakata mo wasea na kilaka talei sa tiko vei iko?

[iYaloyalo ena tabana e 9]

Eda rawa ni dusimaki ira na tacida vakayalo mera yalodina tiko ga

[iYaloyalo ena tabana e 10]

A tu vakarau o Valentina me vakuai koya ena ka kece ga e tu vua, me rawa ni yalodina tiko ga kina

    iVola vakaViti (1982-2026)
    Sogota
    Dolava
    • vakaViti
    • Vakauta
    • Digia
    • Copyright © 2025 Watch Tower Bible and Tract Society of Pennsylvania
    • iVakavakayagataki
    • Kemu iTukutuku
    • Privacy Settings
    • JW.ORG
    • Dolava
    Vakauta