Mo Yalodina Tiko Ga!

1. Eratou yalodina tiko ga vakacava na tolu na iVakadinadina i Jiova ena ivakaraitaki qo?

RAITAYALOYALOTAKA mada e tolu na ituvaki eda rawa ni sotava na iVakadinadina i Jiova. (1) E vuli tiko e dua na goneyalewa qai kerei ira na lewenikalasi o qasenivuli mera vakaitavi ena soqo ni olodei. E kila o goneyalewa ni cata o Jiova na soqo qori, mani tukuna ena veidokai ni na sega ni vakaitavi. (2) E vunau tiko e veivale e dua na cauravou mamadua. E kila ni tiko ena vale tarava e dua rau vuli vata, a vakalialiai keda na iVakadinadina i Jiova ena dua na gauna. Ia e lako na cauravou qo lai tukituki sara ena vale qori. (3) E cakacaka vakaukaua e dua na tama me qarava nona vuvale. Dua na siga e kerea nona boso me cakacaka vakailawaki se me cakava e dua na ka e tabu vakalawa. E kila ni rawa ni sake ke sega ni muria qori. Ia e vakamacalataka ni bibi vua na ka e vinakata na Kalou, oya me daudina, me talairawarawa tale ga ina lawa.—Roma 13:1-4; Iper. 13:18.

2. Na taro cava eda na veivosakitaka, na vuna?

² Na itovo cava o raica vei ratou na tacida qori? De dua o raica e vica me vaka na yaloqaqa kei na daudina. Ia e vakasakiti sara na nodratou yalodina. Eratou yalodina kece vei Jiova. Eratou sega ni via beca na ivakatagedegede ni Kalou. Eratou cakava na ka e dodonu ni ratou yalodina. Sa na marautaka mada ga o Jiova na nodratou yalodina. Eda via vakamarautaka tale ga na Tamada vakalomalagi. Meda veivosakitaka mada na taro qo: Na cava na yalodina? Cava me bibi kina vei keda noda yalodina? Sala cava eda na vakayaloqaqataki tale ga kina meda yalodina tiko ga ni dredre na ituvaki?

NA CAVA NA YALODINA?

3. (a) Eda vakaraitaka vakacava nida yalodina? (b) Na ivakaraitaki cava ena uqeti keda meda yalodina?

³ Eda vakaraitaka vakacava na tamata ni Kalou nida yalodina? Oya ni taucoko qai dei noda lomani Jiova, eda na cakava ga na ka ena vakamarautaki koya. Dikeva mada eso na kena ivakamacala. Na vosa vakaIperiu ni “yalodina” ena iVolatabu e dusia ni taucoko, e vinaka, e sega ni vakatikina. Kena ivakaraitaki, era dau cabora na Isireli na isoro manumanu vei Jiova. E tukuni ena Lawa ni dodonu me vinakab na manumanu qori. (Vunau 22:21, 22) E tabu nira cabora na tamata ni Kalou na manumanu lokiloki, oya ni mudu tu e dua na yavana, yali e dua na daligana, e boko e dua na matana, se tauvimate tu. E bibi sara ga vei Jiova me taucoko na manumanu qori, me vinaka, me kua ni yali e dua na tikina. (Mala. 1:6-9) E dodonu ga me va qori na rai nei Jiova. Nida volia e dua na ivola, iyaya ni cakacaka se vuata, eda sega ni vinakata me qaraqara tu se yali eso na tikina. Eda vinakata me taucoko, vinaka, me kua ni yali e dua na tikina. E va sara ga qori na rai nei Jiova me baleta noda lomani koya kei na noda yalodina. E dodonu me taucoko, me vinaka, me kua ni vakatikina.

4. (a) E rawa nida yalodina nida sega ni uasivi? Vakamacalataka. (b) Me vaka e tukuni ena Same 103:12-14, na cava na rai i Jiova me baleti keda?

⁴ Vakacava eda na yalodina ga ke da uasivi? Ni levu na noda malumalumu kei na noda cala, ena rawa ni va qori na noda rai. Meda dikeva mada e rua na vuna me kua kina ni va qori na noda rai. Kena imatai, o Jiova e sega ni raica noda malumalumu. E tukuni ena nona Vosa: “Ke oni dau raica ga na cala, i Ja, o cei gona Jiova ena duri rawa?” (Same 130:3) E kila nida tamata ivalavala ca, eda dau cala, ia e tu vakarau me veivosoti. (Same 86:5) Kena ikarua, o Jiova e kila na ka eda dui rawata, e sega gona ni namaka vakasivia vei keda na ka. (Wilika Same 103:12-14.) Ena sala cava e raica kina o Jiova ni taucoko noda yalodina, e vinaka qai sega ni vakatikina?

5. Meda yalodina vei Jiova, na cava e bibi kina meda lomani koya?

⁵ Na noda yalodina na tamata i Jiova e vakatau tiko ena noda lomani koya. E dodonu me taucoko, me vinaka, me kua tale ga ni vakatikina na noda lomana na Kalou kei na noda via vakaliuca na Tamada vakalomalagi. Ni dei tu ga noda lomani koya nida vakatovolei, e dusia nida yalodina. (1 Vei. 28:9; Maciu 22:37) Vakasamataki ratou tale na tacida ena imatai ni parakaravu. Na cava ratou cakava kina na ka dodonu? Vakacava e cata na goneyalewa ya me marau e koronivuli, se vinakata na cauravou ya me vakamaduataki e katuba, se na tama ya me sake ena nona cakacaka? Sega. Eratou kila na ivakatagedegede dodonu i Jiova, qai dei tu ga nodratou vakasama me ratou vakamarautaka na Tamadratou vakalomalagi. Ni ratou lomani koya, eratou nanumi koya kina ni bera ni ratou vakatulewa. Ratou mani vakaraitaka nodratou yalodina ena ka eratou cakava.

BIBI MEDA YALODINA

6. (a) Na cava me bibi kina vei keda noda yalodina? (b) Sala cava rau tawayalodina kina o Atama kei Ivi?

⁶ Na cava me bibi kina vei keda noda yalodina? Na vuna oya ni o Setani e vakalewai Jiova tiko, e vakalewai iko tale ga. Na agilosi talaidredre qo a vakavuna ga nona vakatokai me o Setani, se “Dauveivorati” ena were o Iteni. E vakarogorogocataka na yaca i Jiova ni tukuna ni Kalou ca, e nanumi koya ga, e iLiuliu lasulasu. Ka ni rarawa ni rau to vei Setani o Atama kei Ivi, rau talaidredre vei Jiova. (Vkte. 3:1-6) A rawa sara ga ni rau lomani Jiova vakalevu ena levu ni ka e vakarautaka vei rau ena were o Iteni. Ia na gauna e vakalelewa kina o Setani, a sega ni taucoko tu se vinaka na nodrau lomani Jiova, e vakatikina. E basika kina na taro qo: E rawa ni dua e yalodina tiko ga vei Jiova ni lomani koya? Se rawa nida kaya, e rawa nida yalodina? A tarogi na taro qori me baleti Jope.

7. Me vaka e tukuni ena Jope 1:8-11, na cava na rai i Jiova kei Setani me baleta na yalodina i Jope?

⁷ E bula o Jope ena gauna era tiko kina na Isireli e Ijipita. E vakasakiti na nona yalodina. E sega ni uasivi, e dau cala tale ga me vakataki keda. Ia o Jiova e lomani Jope ni turaga yalodina. Kena irairai ni sa vakalewai Jiova oti o Setani ena vuku ni noda yalodina na tamata. E mani cavuti Jope o Jiova. Na nona ivakarau ni bula e vakalasui Setani sara ga! E tukuna o Setani me vakatovolei mada na yalodina i Jope. O Jiova e nuitaki Jope na nona itokani, mani vakadonuya me vakatovolei koya o Setani.—Wilika Jope 1:8-11.

8. Na cava e cakava vei Jope o Setani?

⁸ E voravora o Setani qai daulaba. E vakarusa na ka kece e taukena o Jope, vakavuna me butakoci nona iyau, vakamatei nona dauveiqaravi, e vakarogorogocataka tale ga na yacana. E vakavuna me ratou mate kece na tini na luvena e dau lomana. Oti sa qai vakavuna me tauvimate o Jope, oya me tauvi bo na yagona taucoko. E rarawa vakalevu o watina ni mositi koya na ka e yaco, mani uqeti Jope me soro, me vosavakacacataka ga na Kalou qai mate. A vinakata mada ga o Jope me mate ia e yalodina tiko ga. E mani tovolea tale o Setani e dua na iwalewale ni vakayagataki ratou na tolu na itokani i Jope. Ratou lako vua me vica vata na siga, ia ratou sega ni bau veivakacegui. Ratou vakalewai koya ga, ratou cudruvi koya. Ratou kaya ni vakavuna na Kalou na leqa kece e sotava, ni sega tale ga ni kauaitaka nona yalodina. Ratou kaya mada ga ni daucaka ca o Jope qai ganiti koya vinaka me vakalolomataki va qori!—Jope 1:13-22; 2:7-11; 15:4, 5; 22:3-6; 25:4-6.

9. Ni sotava na ituvaki dredre o Jope, na cava e sega ni via cakava?

⁹ Na cava e cakava o Jope ena ituvaki dredre qori? Ni sega ni uasivi, e cudruvi ratou kina na nona itokani dauveivakacegui lasulasu, sa rauta me kaya ni a vosa tale ga vakalialia. E kauaitaka ga ni donu tiko, e sega ni kauaitaka na yalododonu ni Kalou. (Jope 6:3; 13:4, 5; 32:2; 34:5) Na gauna mada ga e ca sara kina na kena ituvaki, e sega ga ni via talaidredre vei Jiova. E sega ni via vakabauta na nodratou itukutuku na itokani lasu. E kaya: “Au na sega ni kaya ni dou yalododonu! Me yacova niu mate, au na sega ni soro ena noqu yalodina!” (Jope 27:5) E bibi dina na ka e tukuna qori. E dei tu ga na lomana me yalodina qai sega ni soro. Eda rawa tale ga ni cakava qori.

10. O okati vakacava ena vakalelewa i Setani?

¹⁰ O okati vakacava ena vakalelewa i Setani? E kaya ni o sega ni lomani Jiova dina, o na tinia nomu qaravi koya mo taqomaki iko kina, o na sega tale ga ni yalodina tiko ga! (Jope 2:4, 5; Vkta. 12:10) Na cava nomu rai me baleta na vakalelewa qori? E mosimosi dina. Ia qo na ka mo vakasamataka: E nuitaki iko o Jiova ni kila ni qo e dua na gauna vinaka mo vakamarautaki koya kina. E vakalaivi Setani gona me vakatovolea nomu yalodina. E nuidei o Jiova ni o na yalodina qai tokoni koya mo vakalasui Setani. E yalataka ni na vukei iko. (Iper. 13:6) Sa dua dina na ka dokai me nuitaki keda na Turaga Cecere ni lomalagi kei na vuravura! O sa qai kila na vuna e bibi kina mo yalodina? O rawa sara ga ni vakalasui Setani mo tutaka na yaca rogo vinaka i Tamada qai tokona na nona veiliutaki. Na cava meda cakava meda yalodina tiko ga?

EDA RAWA NI YALODINA TIKO GA

11. Na cava eda vulica vei Jope?

¹¹ Sa qai kaukaua sara na veivakacacani i Setani ena “iotioti ni veisiga” qo. (2 Tim. 3:1) Ena gauna rarawataki qori, eda na vakayaloqaqataki vakacava meda yalodina tiko ga? Levu na ka eda vulica vei Jope. Ni se bera sara ni vakatovolei, sa dau yalodina voli mai. Meda dikeva mada e tolu na ka eda vulica vua ena vakaukauataki keda meda yalodina tiko ga.

12. (a) Me vaka e tukuni ena Jope 26:7, 8, 14, e rawa vakacava ni qoroi Jiova o Jope qai dokai koya? b) Eda na qoroi Jiova tale ga vakacava?

¹² E lomani Jiova vakalevu o Jope ni vakasamataka na vakatubuqoroqoro ni ka e bulia. E tiko na gauna e dau vakasamataka kina vakatitobu o Jope na vakatubuqoroqoro ni veika e bulia o Jiova. (Wilika Jope 26:7, 8, 14.) E qoroqoro ni vakasamataka na vuravura, na lomalagi, na o, kei na kurukuru, e liaca kina ni se lailai sara na ka e kila me baleta na ibulibuli i Jiova. E qoroya tale ga na vosa i Jiova, e kaya kina ni “mareqeta nona vosa.” (Jope 23:12) E qoroi Jiova vakalevu o Jope qai dokai koya. E uqeti koya me lomani Tamana, e via vakamarautaki koya tale ga. Qori e vakayaloqaqataki koya me yalodina tiko ga. Meda cakava tale ga qori. Sa levu sara na ka eda kila ena gauna qo me baleta na ibulibuli i Jiova ni vakatauvatani kei na gauna i Jope. Sa tu tale ga na iVolatabu taucoko meda vulica vinaka kina na veika me baleti Jiova. Eda na qoroya na veika kece eda vulica. Na noda qoroi Jiova kei na noda dokai koya, ena uqeti keda meda lomani koya, talairawarawa vua, ena vakayaloqaqataki keda tale ga meda yalodina tiko ga.—Jope 28:28.

13-14. Me vaka e tukuni ena Jope 31:1, e vakaraitaka vakacava o Jope ni talairawarawa? (b) Eda na vakatotomuri koya vakacava?

¹³ Nona talairawarawa ena ka kece o Jope e vakayaloqaqataki koya me yalodina tiko ga. E kila o Jope ni bibi na talairawarawa me rawa ni yalodina. Na gauna kece eda talairawarawa kina, eda vakayaloqaqataki meda yalodina tiko ga. E saga o Jope me talairawarawa vei Jiova e veisiga. Kena ivakaraitaki, e dau qarauna nona itovo vei ira na yalewa. (Wilika Jope 31:1.) Ni tagane vakawati, e kila ni cala me domona e dua tale na yalewa e sega ni watina. Sa levu tu nikua na veitemaki ni veiyacovi. Me vakataki Jope, vakacava eda cata meda domona e dua tale e sega ni watida? Eda na cata na iyaloyalo se itaba vakasisila se veivagarogaroi? (Maciu 5:28) Nida saga vagumatua meda lewai keda vinaka e veisiga, ena vakayaloqaqataki keda meda yalodina tiko ga.

¹⁴ O Jope e talairawarawa tale ga vei Jiova ena ka me baleta na iyau. E kila ke nuitaka na nona iyau, ena vakayacora kina na cala bibi e ganita me totogitaki. (Jope 31:24, 25, 28) Na vuravura nikua e uqeta na domodomoiyau. Nida muria na ivakavuvuli vakaivolatabu me donu noda rai me baleta na ilavo kei na iyau, ena uqeti keda meda yalodina tiko ga.—Vkai. 30:8, 9; Maciu 6:19-21.

15. (a) Na cava e uqeti Jope me yalodina tiko ga? (b) Ena yaga vakacava nida vakasamataka na veivakalougatataki e vakarautaka o Jiova?

¹⁵ E yalodina tiko ga o Jope ni vakasamataka na veika ena vakalougatataki koya kina na Kalou. E vakabauta ni kauaitaka na Kalou na nona yalodina. (Jope 31:6) E vakatovolei o Jope, ia e nuidei tu ni na vakalougatataki koya o Jiova. Qori e uqeti koya me yalodina tiko ga. Na levu ni nona marautaka o Jiova na yalodina i Jope, e vakalougatataki koya kina vakalevu ni se bera mada ga ni uasivi! (Jope 42:12-17; Jeme. 5:11) Ena vakalougatataki sara vakalevu o Jope ena gauna se bera mai. Vakacava o nuidei ni na vakalougatataka o Jiova na nomu yalodina? E sega ni veisau na noda Kalou. (Mala. 3:6) Ke da nanuma tiko ni kauaitaka o Jiova noda yalodina, ena dei tu ga na lomada nida na marautaka na veika totoka ena gauna se bera mai.—1 Ces. 5:8, 9.

16. Na cava meda vakadeitaka?

¹⁶ Mo vakadeitaka gona mo yalodina tiko ga! O na rairai nanuma ena so na gauna ni o iko ga o yalodina tiko, ia me kua ni va qori nomu rai. O dua tale ga vei ira na le vica vata na milioni era yalodina tiko ga e veiyasa i vuravura. O na duavata kei ira na tagane kei na yalewa vakabauta era yalodina tiko ga ena veigauna sa oti nira vakamatei mada ga. (Iper. 11:36-38; 12:1) Meda yalodina mada ga me vakataki Jope, ni kaya: “Au na sega ni soro ena noqu yalodina!” Meda lagiti Jiova tiko ga me tawamudu nida yalodina!